En Lemonn enzis

ESKI ou dakor ki nou pe viv dan en lemonn enzis? San okenn dout ou dakor. Apre tou, nenport talan nou annan, oubyen menm si nou byen plàn nou lavi, nou pa asire si nou pou ganny larises, si nou pou trouv sikse ouswa si nou pou menm ganny en bouse manze. Souvannfwa, tou i fini parey sa ki Lerwa Salomon ti dir: “Dipen pa pour bann ki saz, ni larises pour bann ki entelizan, ni sikse pour bann ki annan abilite.” Akoz? Salomon i kontinyen, “akoz i tou depan lo letan ek sirkonstans.”—Eklezyast 9:11, Louis Segond.

“Kan en Maler i ariv en sel kou”

Wi, souvannfwa “letan ek sirkonstans” i kas nou bann plan ki nou’n byen fer ek nou lespwar ki nou byen kontan. Souvan sa i arive akoz par kwensidans nou dan en move landrwa kot en maler i arive. Dapre Salomon, “kan en maler i ariv en sel kou,” nou “parey pwason ki’n ganny tyonbo dan lasenn, parey en zwazo ki’n tonm dan latrap.” (Eklezyast 9:12, SG) Par egzanp, plizyer milyon dimoun pe trimouse pour kiltiv later pour kapab nouri zot fanmiy. Me en sel kou en “maler” i arive kot lapli pa tonbe e lasesres i detri zot plantasyon.

Lezot i esey ede, me souvannfwa menm sa led ki bann ki’n pas atraver “maler” i gannyen avek larestan kominote, i paret enzis. Par egzanp diran enn bann lannen ki’n pase, pandan sa lalit pour diminyen lafamin, dapre en lorganizasyon ki aport led, “kontinan [Lafrik] antye ti ganny zis 20 poursan lakantite larzan ki ti ganny donnen pour lager golf.” Eski i zis ki bann pei ris ti depans senk fwa plis larzan pour fer lager dan en pei ki pour ed en kontinan? Eski i zis ki serten pa mank nanryen, kan 25 poursan popilasyon lemonn i ankor pe viv dan lanmizer nwanr, oubyen kan plizyer milyon zanfan pe mor tou le  zan avek bann maladi ki ti’n kapab ganny anpese? Byensir i pa zis!

Sirman, pa zis “letan ek sirkonstans” ki enplike dan bann ‘maler ki ariv en sel kou.’ Sa kantite vyolans ki nou pa kapab kontrole i osi domin nou lavi e determinen ki pou arive avek nou. Sa ti leka dan en sitiasyon ki ti arive Belsan, Alania. Ti lotonm 2004 kan plizyer santenn dimoun, parmi plizyer zanfan ki ti pe al lekol pour premye fwa, ti ganny touye dan en konfli ant bann teroris ek lafors sekirite. I vre ki sa ki ti mor oubyen viv ti depan lo sirkonstans ki zot ti ladan, me sa “maler” ti rezilta konfli antre imen.

Eski i pou toultan koumsa?

Kan nou koz lo lenzistis, bokou i kapab dir: “Ki ou a fer lavi ki koumsa. I’n toultan koumsa, e i pou toultan reste koumsa.” Dapre zot, bann ki for pou toultan abiz bann ki feb, bann ki ris pou toultan eksplwat bann ki pov. Zot dir ki tousala ansanm avek “letan ek sirkonstans,” pou afekte nou toultan ki imen i ankor egziste.

Eski i vreman bezwen koumsa? Eski i posib pour bann ki byen servi zot abilite dan en fason saz, ganny rekonpanse pour zot travay dir? Eski i annan en dimoun ki kapab sanz sa lemonn enzis pour touzour? Egzaminen ki sa lot lartik i annan pour dir lo sa size.

 [Portre lo paz 2]

KOUVERTIR: En zonm avek en zanfan: UN PHOTO 148426/McCurry/Stockbower

[Portre lo paz 3]

MAXIM MARMUR/AFP/Getty Images