Profesi Osea i ed nou mars avek Bondye

“Zot pou mars deryer Zeova.”—OSEA 11:10.

1. Ki zistwar senbolik ki annan dan liv Osea?

ESKI ou kontan bann zistwar avek bann akter enteresan ek bann konplo eksitan ladan? Dan sa liv Labib ki apel Osea i annan en zistwar senbolik. * I baze lo lavi fanmiy profet Osea, e i relye avek sa maryaz senbolik ki Zeova ti fer avek ansyen Izrael par mwayen lalyans Lalwa Moiz.

2. Ki nou konnen lo Osea?

² Osea sapit 1 i konmans donn lenformasyon lo sa zistwar. I paret ki Osea ti reste kekpar dan sa rwayonm dis tribi Izrael, (osi apele par son tribi pli renonmen, Efraim). I ti profetize pandan renny sa set dernyen lerwa Izrael e dan letan Ouziya, Yotam, Aaz ek Izkiya, ki ti bann lerwa Zida. (Osea 1:1) Alors, Osea ti profetiz pour omwen 59 lannen. Menm si sa liv Osea ti konplete en pe letan apre 745 A.N.L., i aplikab ozordi, kot plizyer milyon dimoun pe viv zot lavi parey ti ganny predir: “Zot pou mars deryer Zeova.”—Osea 11:10.

Ki en Rezimen sa Zistwar i revele

3, 4. An bref eksplike ki i annan dan Osea sapit 1 ziska 5.

³ En pti apersi lo Osea sapit 1 ziska 5 pou fortifye nou determinasyon pour mars avek Bondye par montre lafwa e viv an armoni avek son lavolonte. Menm si bann zabitan rwayonm Izrael ti koupab pour adilter spirityel, Bondye ti pou montre son mizerikord si zot ti repantir. Sa ti evidan par fason ki Osea ti azir avek son madanm, Gomer. Apre ki i ti’n fer en zanfan avek Osea, i paret ki Gomer ti ganny de zanfan ilezitim. Kantmenm sa, Osea ti aksepte Gomer ankor, zis parey Zeova ti pare pour montre mizerikord anver bann Izraelit ki ti repantir.—Osea 1:1–3:5.

⁴ Zeova ti annan en zafer legal pour regle avek Izrael akoz ti napa laverite, labonte leker, oubyen konnesans Bondye dan sa pei. I ti pou fer Izrael ek Zida rann kont akoz Izrael ti’n anfonse dan idolatri e rwayonm Zida ti dezobeisan. Me ler pep Bondye ti dan en “sitiasyon kritik,” zot ti pou rod Zeova.—Osea 4:1–5:15.

Sa Zistwar i kontinyen

5, 6. (a) Ki degre fornikasyon ti’n arive dan sa dis tribi rwayonm Izrael? (b) Akoz sa lavertisman ki Zeova ti donn ansyen Izrael i annan lenportans pour nou?

⁵ Bondye ti donn lord Osea: “Ale, pran en madanm fornikasyon pour ou ek bann zanfan fornikasyon, parski akoz fornikasyon, sa pei pe aret swiv Zeova.” (Osea 1:2) Ziska ki degre fornikasyon ti pe ganny pratike Izrael? Sa profesi i dir nou: “Sa latitid fornikasyon in  fer zot [dimoun dan sa dis tribi] egare, e fornikasyon i fer zot kit zot Bondye. . . . Zot bann fiy in fer fornikasyon e zot bann bel-fiy in fer adilter. . . . Bann zonm zot zot al avek bann prostitye e zot sakrifye avek bann prostitye dan tanp.”—Osea 4:12-14.

⁶ Fornikasyon dan en sans spirityel e osi fizik, ti partou kote Izrael. Alors Zeova ti pou fer bann Izraelit “rann kont.” (Osea 1:4; 4:9) Sa lavertisman i annan lenportans pour nou akoz Zeova pou fer tou sa bann ki pe pratik limoralite e pe fer fo ladorasyon ozordi rann kont. Me bann ki pe mars avek Bondye i swiv standar Zeova konsernan en ladorasyon ki prop e zot konnen ki “personn ki pe anmenn en lavi [fornikasyon], . . . pa pou ganny en plas dan sa Rwayonm Kris ek Bondye.”—Efezyen 5:5; Zak 1:27.

7. Ki maryaz Osea avek Gomer ti reprezante?

⁷ Letan Osea ti marye avek Gomer i paret ki i ti en vyerz, e i ti en madanm fidel letan i ti donn “nesans en garson pour Osea.” (Osea 1:3) Parey dan sa zistwar senbolik, en pti pe letan apre ki Zeova ti liber bann Izraelit Lezip an 1513 A.N.L., Bondye ti fer en lalyans avek zot, ki ti parey en maryaz legal. Izrael ti montre ki zot dakor avek sa lalyans par promet pour reste fidel avek zot “propriyeter” Zeova. (Izai 54:5) Alors, maryaz Gomer ek Osea ti pe reprezant sa maryaz senbolik ant nasyon Izrael ek Bondye. Me sitiasyon ti sanze apre!

8. Ki mannyer sa dis tribi rwayonm Izrael ti vin an egzistans, e ki ou kapab dir lo zot ladorasyon?

⁸ Madanm Osea “ti tonm ansent ankor enn fwa e donn nesans en pti fiy.” Gomer ti ganny sa fiy e plitar en lot zanfan probableman an deor son maryaz. (Osea 1:6, 8) Vi ki Gomer ti reprezant Izrael, petet ou pe demande, ‘Ki mannyer nasyon Izrael ti fer prostitisyon?’ An 997 A.N.L., dis tribi Izrael ti separe avek tribi Zida ek Benzamen ki ti dan sid. Ladorasyon pti bef ti ganny entrodwir dan sa dis tribi rwayonm nor Izrael pour anpes bann dimoun al Zerizalenm pour ador Zeova dan son tanp. Ladorasyon Baal, ki ti enplik en bann aktivite seksyel san kontrol, ti’n byen etablir Izrael.

9. Parey Osea 1:6 ti predir, ki ti arive avek Izrael?

⁹ Zour nesans petet dezyenm zanfan ilezitim Gomer, Bondye ti dir Osea: “Apel li Lorouama [ki vedir “i pa ti ganny demontre mizerikord”], parski mon pa pou montre mizerikord ankor pour lakaz Izrael, akoz vreman mon pou tir zot la.” (Osea 1:6) Zeova ‘ti tir zot la’ ler bann Asiryen ti anmenn zot an egzil an 740 A.N.L. Me Bondye ti montre mizerikord anver sa de tribi rwayonm Zida e i ti sov Zida. I pa ti sov zot par lark, lepe, lager, seval oubyen zot kavalye. (Osea 1:7) Dan en sel lannwit, an 732 A.N.L., zis en lanz tousel ti touy 185,000 larme Asiryen ki ti pe menas Zerizalenm, lavil kapital Zida.—2 Lerwa 19:35.

Zafer legal Zeova kont Izrael

10. Ki lavi adilter Gomer ti reprezante?

¹⁰ Gomer ti kit Osea e i ti vin “en madanm fornikasyon.” I ti viv en lavi adilter avek en lot zonm. Sa i montre ki mannyer rwayonm Izrael ti fer lalyans politik avek bann nasyon payen e konmans depan lo zot. Olye donn loner Zeova pour zot prosperite, Izrael ti onor bann bondye sa bann nasyon pour sa e  kas son lalyans maryaz avek Bondye par fer fo ladorasyon. I pa sirprenan ki Zeova ti annan en zafer legal kont sa nasyon ki ti’n komet adilter spirityel!—Osea 1:2; 2:2, 12, 13.

11. Ki ti arive avek lalyans Lalwa ler Zeova ti les Izrael ek Zida al an egzil?

¹¹ Ki pinisyon Izrael ti gannyen pour kit son Propriyeter? Bondye ti fer li “al dan dezer” Babilonn, sa nasyon ki ti ranvers Lasiri, kot bann Izraelit ti’n ganny egzile an 740 A.N.L. (Osea 2:14) Ler Zeova ti met en lafen avek sa dis tribi rwayonm Izrael, i pa ti kennsel son lalyans maryaz avek sa douz tribi orizinal nasyon Izrael. Annefe, ler Bondye ti les bann Babilonnyen detrir Zerizalenm an 607 A.N.L. e permet pep Zida al an egzil, i pa ti aboli Lalwa Moiz. Atraver sa Lalwa, sa douz tribi Izrael ti’n vin konman madanm Zeova. Sa relasyon ti fini selman apre ki bann dirizan Zwif ti rezet Zezi Kri e met li amor lannen 33 N.L.—Kolosyen 2:14.

Zeova ti averti Izrael

12, 13. Ki sa pwen pli enportan dan Osea 2:6-8, e ki mannyer sa parol ti aplik pour Izrael?

¹² Bondye ti averti Izrael pour “rezet son fornikasyon,” me Izrael ti anvi al avek son bann lanmoure. (Osea 2:2, 5) Zeova ti dir: “Mon pe bar ou semen avek pikan e mon pou fer monte en miray ros otour li, pour li pa kapab vwar son prop semen. I pou tay deryer son bann lanmoure, me i pa pou zwenn zot; e i pou sirman rod zot, me i pa pou trouv zot. I pou bezwen dir, ‘Mon anvi ale e retourn kot mon msye, sa enn premye, akoz mon ti pli byen sa letan ki la konmela.’ Me i pa ti rekonnet ki se mwan ki ti donn li lagrenn ek diven dou ek delwil, e ki mon ti fer li ganny en kantite larzan ek lor, ki zot ti servi pour Baal [oubyen, ki “zot ti fer en stati Baal avek,” not anba lo paz].”—Osea 2:6-8.

¹³ Menm si Izrael ti esey rod led avek bann nasyon ki ti’n vin son bann “lanmoure,” personn pa ti kapab ed li. Konmsi i ti’n ganny bare partou kote par en brousay ki enposib penetre, ki ti fer zot pa kapab aport li okenn led. Apre en latak par bann Asiryen ki ti dir pour trwa zan, finalman Samari, son lavil kapital, ti tonbe an 740 A.N.L., e sa dis tribi rwayonm Izrael pa ti zanmen ganny reetablir. Zis detrwa endividi parmi sa bann Izraelit egzile ki ti kapab mazin sa bon kondisyon ki ti egziste ler zot zanset ti servi Zeova. Sa pti group zot, zot ti pou rezet ladorasyon Baal e rod en nouvo relasyon avek Zeova.

En lot Leson lo sa Zistwar

14. Akoz Osea ti rekonmans son relasyon maryaz avek Gomer?

¹⁴ Pour nou konpran pli byen sa relasyon ki ti egziste ant lavi maryaz Osea ek relasyon ant Izrael avek Zeova, annou egzamin sa parol: “Zeova ti dir avek mwan: ‘Ale ankor enn fwa. Kontan en fanm ki en lot dimoun in kontan e ki’n komet adilter.’ ” (Osea 3:1) Osea ti obeir sa lenstriksyon e i ti repran Gomer avek sa zonm ki i ti pe viv avek. Apre, Osea ti konsey severman son madanm: “Ou pou reste pour mwan pour bokou zour. Ou pa devret fer fornikasyon, e ou pa devret vin madanm en lot zonm.” (Osea 3:2, 3) Gomer ti aksepte sa disiplin e Osea ti rekonmans son relasyon maryaz avek li. Ki mannyer sa ti aplik avek fason ki Bondye ti azir avek pep Izrael ek Zida?

15, 16. (a) Ki sa nasyon ki Bondye ti’n disiplinen ti devret fer pour ganny son mizerikord? (b) Ki mannyer Osea 2:18 in ganny akonpli?

¹⁵ Kan Izrael ti an egzil e Zida ti Babilonn, Bondye ti servi son bann profet pour ‘koz avek zot leker.’ Pour pep Bondye ganny son mizerikord, zot ti bezwen repantir e retourn avek zot Msye ki zot Propriyeter, zis parey Gomer ti retourn avek son msye. Apre sa, Zeova ti pou tir son nasyon ki i ti’n disiplinen dan “dezer” Babilonn e retourn avek li Zida ek Zerizalenm. (Osea 2:14, 15) Bondye ti akonpli sa promes an 537 A.N.L.

 ¹⁶ Bondye ti osi akonpli sa lot promes: ‘Mon pou fer en lalyans pour zot an rapor avek bann zannimo sovaz dan lakanpanny e avek bann zwazo ek lezot zannimo lo later. Mon pou elimin lark, lepe, ek lager dan pei, e mon pou fer zot repoz an sekirite.’ (Osea 2:18) Sa restan Zwif ki ti retourn dan zot pei natal ti viv an sekirite, zot pa ti bezwen per bann zannimo. Sa profesi ti osi ganny en lakonplisman an 1919 N.L., ler sa restan Izrael spirityel ti ganny libere avek “Gran Babilonn,” ki bann fo larelizyon. Ozordi zot pe viv an sekirite e rezwir lavi dan en paradi spirityel avek zot bann konpanyon, ki annan lespwar pour viv pour touzour lo later. Bann move tre parey zannimo pa egziste parmi bann vre Kretyen.—Revelasyon 14:8; Izai 11:6-9; Galat 6:16.

Pran aker sa bann Leson

17-19. (a) Ki bann kalite Bondye ki nou ganny ankouraze pour imite la? (b) Ki lefe mizerikord ek konpasyon Zeova i devret annan lo nou?

¹⁷ Bondye i demontre mizerikord ek konpasyon, e koumsa ki nou devret ete. Sa i en leson ki nou’n aprann dan bann premye sapit Osea. (Osea 1:6, 7; 2:23) Sa mizerikord ki Bondye ti pare pour montre anver bann Izraelit ki ti repantir i an armoni avek sa proverb enspire: “Sa enn ki pe kasyet son bann lofans pa pou reisi, me sa enn ki pe konfese e pe kit zot pou ganny demontre mizerikord.” (Proverb 28:13) Parol sa psalmis i osi rekonfortan pour bann dimoun ki fer pese me ki repantir: “Bann sakrifis pour Bondye i en lespri fatige; ou pa pou mepriz en leker kase e brize, O Bondye.”—Psonm 51:17.

¹⁸ Profesi Osea i fer byen resorti konpasyon ek mizerikord sa Bondye ki nou adore. Menm si serten i elwannyen avek son semen drwat, zot kapab repantir e sanz zot lavi. Si zot fer sa, Zeova pou aksepte zot avek lebra ouver. Zeova ti demontre mizerikord anver bann dimoun ki ti repantir dan sa nasyon ki i ti’n fer en maryaz senbolik avek. Menm si zot ti dezobei Zeova e ‘fer soufer Sen Izrael, i ti pran pitye e mazinen ki zot ti bann senp imen.’ (Psonm 78:38-41) Sa mizerikord ki Zeova ti demontre i devret pous nou pour kontinyen mars avek nou Bondye, Zeova, ki ranpli avek konpasyon.

¹⁹ Kantmenm, mert, vol, ek adilter ti partou kote Izrael, Zeova ti ‘koz avek leker Izrael.’ (Osea 2:14; 4:2) Kan nou reflesir lo mizerikord ek konpasyon Zeova, sa i devret ankouraz nou e fer nou pli atase avek li. Annou alor demann nou lekor: ‘Ki mannyer mon kapab pli byen imit mizerikord ek konpasyon Zeova dan mon relasyon avek lezot? Si en konpanyon Kretyen ki’n ofans mwan i demann mwan pardon, eski mon ‘pare pour pardonnen?’—Psonm 86:5.

20. Donn en legzanp pour montre ki nou devret annan konfyans dan sa lespwar ki Bondye in donn nou.

²⁰ Bondye i donn vre lespwar. Par egzanp, i ti promet: “Mon pou donn li . . . laplenn Akor konman en larantre pour lespwar.” (Osea 2:15) Ansyen pep Zeova ti annan sa lasirans ki zot ti pou ganny reetablir dan zot pei natal, kot “laplenn Akor” ti sitye. Lakonplisman sa profesi an 537 A.N.L., i donn nou bon rezon pour rezwir dan sa lespwar solid ki Zeova in met devan nou.

21. Ki rol konnesans i zwe an rapor avek mars avek Bondye?

²¹ Pour nou kontinyen mars avek Bondye, nou bezwen kontinyen aprann konn li e aplik sa konnesans dan nou lavi. Dan ansyen Izrael, dimoun ti mank konnesans lo Zeova. (Osea 4:1, 6) Me serten ti apresye en kantite lenstriksyon sorti kot Bondye. Zot ti azir an armoni avek sa lenstriksyon e zot ti ganny beni en kantite. Osea ti enn parmi zot, zis parey sa 7,000 dimoun dan letan Eliya ki pa ti azenou devan Baal. (1 Lerwa 19:18; Romen 11:1-4) Nou prop lapresyasyon pour lenstriksyon sorti kot Bondye pou ed nou  kontinyen mars avek li.—Psonm 119:66; Izai 30:20, 21.

22. Ki mannyer nou devret vwar bann fo lansennyman?

²² Zeova i ekspekte bann zonm ki dirize parmi son pep rezet fo lansennyman. Me Osea 5:1 i dir: “Ekout sa, zot bann pret, e port atansyon, lakaz Izrael, e ou lakaz lerwa, ekoute, akoz zizman i konsern zot; akoz zot in vin en latrap pour Mitspa e konman en lasenn lo Tabor.” Bann fo ansennyan ti konman en latrap ek en lasenn pour bann Izraelit, zot ti motiv bann Izraelit pour ador zidol. Petet montanny Tabor ek en landrwa apele Mitspa ti bann landrwa kot zot ti fer sa kalite fo ladorasyon.

23. Ki mannyer ou’n benefisye atraver en letid lo Osea sapit 1 ziska 5?

²³ Ziska prezan, profesi Osea in montre nou ki Zeova i en Bondye ki kontan pardonnen, ki donn lespwar, ki beni sa bann ki aplik son lenstriksyon e rezet bann fo lansennyman. Parey bann Izraelit dan lepase, annou alor rod Zeova e toultan fer zefor pour fer li plezir. (Osea 5:15) Ler nou fer sa, nou pou rekolte sa ki bon e ganny sa gran lazwa ek lape ki tou sa bann ki mars fidelman avek Bondye i eksperyanse.—Psonm 100:2; Filipyen 4:6, 7.

[Not anba lo paz]

Ki ou pou reponn?

• Ki maryaz Osea avek Gomer ti reprezante?

• Akoz Zeova ti annan en zafer legal pour regle avek Izrael?

• Ki leson dan Osea sapit 1 ziska 5 ki ou’n kontan?

[Kestyon]

[Portre lo paz 9]

Eski ou konnen ki madanm Osea i reprezante?