“Semen Zeova i drwat”
“Semen Zeova i drwat”
“Semen Zeova i drwat e bann dimoun drwat ki pou mars lo la.”—OSEA 14:9.
1, 2. Ki kalite konmansman Zeova ti donn bann Izraelit, me ki ti arive avek zot?
ZEOVA ti donn bann Izraelit en bon konmansman dan letan profet Moiz. Me boner dan wityenm syek A.N.L., zot sitiasyon ti’n vin sitan move ki Bondye ti konsider zot koupab pour tou sa bann pese grav ki zot ti pe fer. Sa i evidan dan Osea sapit 10 ziska 14.
2 Leker zabitan Izrael ti’n vin ipokrit. Olye senm lagrenn ladrwatir, bann dimoun dan sa dis tribi rwayonm Izrael ti “plant mesanste” e zot ti pe rekolte sa ki move. (Osea 10:1, 13) Zeova ti dir: “Kan Izrael ti ankor en pti garson, mon ti kontan li, e mon ti kriy mon garson pour fer li sorti Lezip.” (Osea 11:1) Kantmenm Bondye ti’n delivre bann Izraelit dan lesklavaz Lezip, zot ti rekonpans li par koz manti e esey anbet li. (Osea 11:12) Alors, Zeova ti donn zot sa konsey: “Ou devret retourn kot ou Bondye, gard labonte leker ek lazistis.”—Osea 12:6.
3. Ki ti pou arive avek Samari rebel, me ki bann Izraelit ti bezwen fer pour ganny mizerikord Zeova?
3 Samari rebel ek son lerwa ti pou mal fini. (Osea 13:11, 16) Me dernyen sapit profesi Osea i konmans avek sa siplikasyon: “O Izrael, retourn kot Zeova ou Bondye.” Si bann Izraelit ti vreman rod pardon Zeova, i ti pou montre son mizerikord anver zot. Byensir, zot ti pou bezwen rekonnet ki “semen Zeova i drwat,” e mars lo la.—Osea 14:1-6, 9.
4. Ki prensip nou pou egzaminen dan profesi Osea?
4 Dan sa seksyon profesi Osea i annan bokou prensip ki kapab ed nou mars avek Bondye. Nou pou egzamin sa bann: (1) Zeova i ekspekte nou rann li en servis sakre ki san lipokrizi, (2) Bondye i montre son pep lanmour fidel, (3) nou bezwen toultan met nou lespwar dan Zeova, (4) semen Zeova i toultan drwat, e (5) bann ki fer pese i kapab retourn kot Zeova.
Zeova i ekspekte en Ladorasyon ki san Lipokrizi
5. Ki kalite servis Bondye i ekspekte avek nou?
5 Zeova i ekspekte nou rann li en servis sakre ki prop e san lipokrizi. Me Izrael ti’n vin en “pye rezen ki pe dezenere” ki nepli raport fri. Sa nasyon ti’n fer en kantite ‘lotel’ pour servi dan fo ladorasyon. Zot ti’n menm met debout bann pilye, petet bann ki ti’n fer ekspreseman pour servi dan bann fo ladorasyon. Zeova ti pe al kas sa bann lotel e detri sa bann pilye.—Osea 10:1, 2.
6. Pour mars avek Bondye, ki kalite nou bezwen debaras nou avek?
6 Napa plas pour lipokrizi parmi bann serviter Bondye. Me ki ti’n arive avek bann Izraelit? ‘Zot leker ti’n vin ipokrit’! Kantmenm zot ti en nasyon ki ti dedye avek Zeova e zot ti’n fer en lalyans avek li, Zeova ti dir ki zot ipokrit. Ki nou kapab aprann atraver sa? Si nou’n dedye nou lavi avek Bondye, nou pa devret vin ipokrit! Proverb 3:32 i averti: “Zeova i deteste en dimoun rize, me I pros avek bann ki drwat.” Pour nou mars avek Bondye, nou bezwen demontre lanmour “ki sorti dan en leker pir, en bonn konsyans ek en lafwa senser.”—1 Timote 1:5.
Bondye i montre son Pep Lanmour fidel
7, 8. (a) Anba ki sirkonstans nou kapab rezwir lanmour fidel Bondye? (b) Ki nou devret fer si nou’n fer en pese grav?
7 Si nou ador Zeova san lipokrizi e dan en fason drwat, nou pou ganny son labonte leker, oubyen lanmour fidel. Zeova ti dir bann Izraelit dezobeisan: “Senm pour ou menm dan ladrwatir e rekolte an akor avek labonte leker. Prepar en bon later pour ou menm, kan i ankor annan letan pour rod Zeova ziska ki i vin ansenny zot ladrwatir.”—Osea 10:12.
8 Si selman bann Izraelit ti repantir e rod Zeova! I ti pou’n “ansenny zot ladrwatir” avek gran ker. Si nou’n fer en pese grav, annou rod Zeova, priye pour ganny son pardon e rod led spirityel avek bann ansyen dan kongregasyon. (Zak 5:13-16) Nou devret osi rod gidans lespri sen Bondye, parski zapot Pol ti ekrir: “Si i senm sa ki fer plezir son natir imen, i pou rekolte dapre son natir imen, lanmor. Me si i senm sa ki fer plezir Lespri, i pou rekolte sorti kot Lespri, lavi eternel.” (Galat 6:8) Si nou senm “sa ki fer plezir Lespri,” nou pou kontinyen ganny lanmour fidel Bondye.
9, 10. Ki mannyer Osea 11:1-4 i aplik pour Izrael?
9 Nou kapab annan konfyans ki Zeova i touzour montre lanmour dan son fason azir avek son pep. Nou vwar laprev sa dan Osea 11:1-4, kot nou lir: “Kan Izrael ti ankor en pti garson, mon ti kontan li, e mon ti kriy mon garson pour fer li sorti Lezip. . . . Zot ti konmans sakrifye avek bann Baal e konmans fer lafimen sakrifisyel monte pour bann stati. Me mwan, mon ti fer Efraim [bann Izraelit] aprann marse, pran zot dan mon lebra. Me zot pa ti rekonnet ki mon ti’n geri zot. Mon ti kontinyen anmenn zot avek lakord, avek lakord lanmour. Alor, mon ti vin pour zot parey sa bann ki pe tir en zoug lo zot lanmaswar, e avek douser mon ti anmenn manze pour sakenn.”
10 La Zeova pe konpar Izrael avek en pti zanfan. Avek lanmour Zeova ti fer bann Izraelit aprann marse, i ti pran zot dan son lebra. I ti kontinyen anmenn zot avek “lakord lanmour.” Pa sa i en portre tousan! Mazin ou konman en paran pe ed ou zanfan aprann marse. Ou lebra i gran ouver. Petet ou menm kapab servi en lakord pour ou zanfan tyonbo an ka i pe al tonbe. Be Zeova i kontan ou koumsa. I kontan pour diriz ou avek “lakord lanmour.”
11. Dan ki fason Bondye ti ‘vin parey en dimoun ki pe tir en zoug’?
11 Par son fason azir avek bann Izraelit, Zeova “ti vin pour zot parey sa bann ki pe tir en zoug lo zot lanmaswar, e avek douser [i] ti anmenn manze pour sakenn.” Bondye ti azir parey en dimoun ki retir oubyen rekil en zoug pour permet en zannimo manz dan en fason konfortab. Zis ler zot ti aret soumet avek Bondye ki bann Izraelit ti vin anba zoug zot lennmi, ki ti lour pour anmennen. (Deterononm 28:45, 48; Zeremi 28:14) Fotespere nou pa zanmen tonm dan lanmen nou gran lennmi, Satan, e soufer anba son zoug ki dir. Plito, annou kontinyen mars fidelman avek nou Bondye ki kontan nou.
Toultan met Lespwar dan Zeova
12. Dapre Osea 12:6, ki nou bezwen fer pour nou kontinyen mars avek Bondye?
12 Pour kontinyen mars avek Bondye, nou bezwen toultan met lespwar dan li. Zeova ti dir bann Izraelit: “Me ou, ou devret retourn kot ou Bondye, gard labonte leker ek lazistis, e kontinyen annan lespwar dan ou Bondye.” (Osea 12:6) Bann Izraelit ti kapab retourn kot Zeova e montre ki zot repantir par demontre labonte leker, lazistis, e par ‘kontinyen met zot lespwar dan Bondye.’ Menm si ziska prezan nou ankor pe mars fidelman avek Bondye, nou bezwen kontinyen demontre labonte leker, lazistis, e toultan met nou lespwar dan li.—Psonm 27:14.
13, 14. Ki mannyer Pol ti aplik Osea 13:14, e ki rezon sa i donn nou pour met nou lespwar dan Zeova?
13 Profesi Osea ki enplik bann Izraelit i donn nou en rezon spesyal pour met nou lespwar dan Bondye. Zeova ti dir: “Mon pou liber zot dan lanmen Seol, mon pou repran zot dan lanmor. Lanmor, oli ou bann dart? Seol, oli ou pouvwar pour detrir?” (Osea 13:14) Bondye pa ti pe al liber bann Izraelit dan lanmor a sa moman. Me finalman Zeova pou anval lanmor pour touzour e met en lafen avek son laviktwar.
14 Kan Pol ti pe ekrir son bann konpanyon Kretyen swazir, i ti sit profesi Osea e i ti ekrir: ‘Kan sa ki mortel i a’n vin imortel, e kan sa ki devre pouri, i a’n vin en natir ki enposib pouri, alor sa ki Lekritir in dir pou akonpli: “Lanmor i ganny detri par laviktwar konplet. Lanmor, oli ou laviktwar? Lanmor, oli ou pouvwar blese?” Pouvwar blese lanmor, se pese i ganny son pouvwar avek lalwa. Me annou rann glwar Bondye ki donn nou laviktwar atraver nou Senyer Zezi-Kri.’ (1 Korentyen 15:54-57) Zeova ti lev Zezi dan lanmor. Sa i en garanti rekonfortan ki bann dimoun dan memwar Bondye pou resisite. (Zan 5:28, 29) Sa i en rezon merveye pour met lespwar dan Zeova! Toudmenm, i annan en lot keksoz apard sa lespwar rezireksyon, ki donn nou en bon rezon pour mars avek Bondye.
Semen Zeova i toultan drwat
15, 16. Ki ti ganny predir konsernan Samari, e ki mannyer sa profesi ti akonpli?
15 Nou konviksyon ki “semen Zeova i drwat” i ed nou kontinyen mars avek li. Bann zabitan Samari pa ti mars dan semen drwat Bondye. Alors zot ti pou peye pour sa bann move keksoz ki zot ti pe fer e akoz zot ti mank lafwa dan Zeova. I ti ganny predir: “Samari pou ganny trouve koupab, parski vreman i rebel kont son Bondye. Par lepe, zot pou tonbe. Zot prop zanfan pou ganny kraze an morso, e zot madanm ansent, zot zot vant pou ganny fann.” (Osea 13:16) Listwar i montre ki vreman bann Asiryen ti fer sa bann kriyote.
16 Samari ti lavil kapital sa dis tribi rwayonm Izrael. Me la sa non Samari ti kapab pe refer avek sa rwayonm antye. (1 Lerwa 21:1) Lerwa Asiryen, Salmanasar 5 ti antour lavil Samari an 742 A.N.L. Kan Samari ti finalman tonbe an 740 A.N.L., bokou son bann dimoun enportan ti ganny egzile Mezopotami ek Medi. I pa kler lekel ki ti vreman kaptir Samari ant Salmanazar 5 ek son sikseser Sargon 2. (2 Lerwa 17:1-6, 22, 23; 18:9-12) Toudmenm, dapre rikord Sargon, 27,290 Izraelit ti ganny deporte dan diferan landrwa dan rezyon nor Efrat ek Medi.
17. Olye mank respe pour standar Bondye, ki nou devret fer?
17 Bann zabitan Samari ti pey ser akoz zot pa ti obeir Zeova e mars dan son semen drwat. Konman bann Kretyen ki’n dedye avek Zeova, nou osi nou pou sibir bann move konsekans si nou kontinyen fer pese e pa montre okenn respe pour son bann standar drwat. Fotespere nou pa zanmen pran sa move semen! Okontrer, annou aplik konsey zapot Pyer: “Ki personn parmi zot pa soufer konman en kriminel, ou en voler, ou en bandi, ou bann ki mel dan zafer lezot. Me si en dimoun i soufer konman en kretyen, i pa devre onte, me plito rann glwar Bondye, akoz i port sa non.”—1 Pyer 4:15, 16.
18. Ki mannyer nou kapab kontinyen “rann glwar Bondye”?
18 Nou kontinyen “rann glwar Bondye” par mars dan son semen drwat olye fer keksoz dan nou prop fason. Kaen ti komet mert akoz i ti fer sa ki fer li plezir e i pa ti ekoute kan Zeova ti averti li ki pese ti pe al poz lanmen lo li. (Zenez 4:1-8) Balaam ti aksepte larzan avek lerwa Moab pour modi Izrael, me son zefor ti anven. (Nonm 24:10) Bondye ti met Kora ek lezot amor akoz zot ti rebel kont lotorite Moiz ek Aaron. (Nonm 16:1-3, 31-33) Definitivman, nou pa anvi ‘swiv menm semen ki Kaen, fer menm fot ki Balaam voras, oubyen ganny detrir akoz nou revolte parey Kora!’ (Zid 11) Toudmenm, si i annan parmi nou ki fer en fot grav, profesi Osea i donn nou en lasirans rekonfortan.
Bann ki fer Pese i kapab retourn kot Zeova
19, 20. Ki kalite sakrifis ki bann Izraelit ki ti repantir ti kapab ofer?
19 Menm bann ki’n tonbe ler zot fer pese grav i kapab retourn kot Zeova. Dan Osea 14:1, 2, nou trouv sa siplikasyon: “O Izrael, retourn kot Zeova ou Bondye, parski ou’n tonbe akoz ou fot. Pran avek zot bann parol e retourn kot Zeova. Dir avek li, zot tou, ‘Eski ou kapab pardonn fot; e aksepte sa ki bon, e an retour nou pou ofer bann zenn toro nou labous.’ ”
20 Bann Izraelit ki ti repantir, ti kapab ofer Bondye ‘bann zenn toro zot labous.’ Zot ti kapab fer sa par loue Bondye senserman avek zot labous. Pol ti refer avek sa profesi kan i ti sipliy bann Kretyen Ebre pour “rann glwar Bondye, setadir, annou toultan loue son non [oubyen ofer bann sakrifis] par nou labous.” (Ebre 13:15) Nou vreman privilezye pour mars avek Bondye e ofer sa bann sakrifis ozordi!
21, 22. Ki sanzman bann Izraelit ki ti repantir ti eksperyanse?
21 Bann Izraelit ki ti aret zot move lavi e retourn kot Bondye ti ofer li ‘bann zenn toro zot labous.’ An rezilta, zot ti reganny sa bon kondisyon spirityel, parey Zeova ti’n promet. Osea 14:4-7 i dir: “Mon [Zeova] pou geri zot enfidelite. Mon pou kontan zot akoz mon anvi, akoz mon nepli ankoler avek li. Mon pou vin parey laroze pour Izrael. I pou fleri parey lis, e son rasin pou anfonse parey Liban. Son bann bourzon pou sorti, son dinite pou vin parey pour pye zoliv, e son parfen pou vin parey pour Liban. Zot pou reste ankor dan son lonbraz. Zot pou ganny lagrenn e bourzonnen parey pye rezen. Son souvenir pou parey diven Liban.”
22 Bann Izraelit ki repantir ti pou ganny geri spirityelman e santi ankor lanmour Bondye. Zeova ti pou vin parey laroze ki rafresi zot dan le sans ki i ti pou beni zot en kantite. Son pep ki pou’n ganny reetablir, pou annan en ‘dinite parey pour pye zoliv,’ e zot pou mars dan semen Bondye. Vi ki nou determinen pour mars avek Zeova, ki nou bezwen fer?
Kontinyen mars dan Semen drwat Zeova
23, 24. Ki sa profesi ankourazan ki konklir liv Osea, e ki lefe i fer lo nou?
23 Si nou oule kontinyen mars avek Bondye, nou bezwen demontre sa “lasazes ki sorti dan lesyel” e toultan azir an armoni avek son semen drwat. (Zak 3:17, 18) Dernyen verse profesi Osea i lir koumsa: “Lekel ki saz, ki kapab konpran sa bann keksoz? Lekel ki pridan, ki kapab konn zot? Parski semen Zeova i drwat e bann dimoun drwat ki pou mars lo la. Me bann ki fer lofans zot, zot pou tonbe lo la.”—Osea 14:9.
24 Olye swiv lasazes ek standar sa lemonn, annou determinen pour mars dan semen drwat Bondye. (Deterononm 32:4) Osea ti mars dan semen drwat Bondye pour 59 lannen oubyen menm plis. I ti delivre bann mesaz Bondye fidelman, e i ti konnen ki bann ki saz e pridan ti pou konpran sa bann parol. Be nou ozordi? Osi lontan ki Zeova i permet nou donn en temwannyaz, nou pou kontinyen rod bann ki aksepte labonte divin avek lasazes. Nou kontan fer sa par donn tou nou korperasyon ‘lesklav fidel e pridan’ dan sa travay.—Matye 24:45-47.
25. Apre ki nou’n egzamin profesi Osea, ki i devret ed nou pour fer?
25 Nou egzaminasyon lo profesi Osea i devret ed nou pour kontinyen mars avek Bondye, avek lespwar pour viv pour touzour dan son nouvo lemonn. (2 Pyer 3:13; Zid 20, 21) Pa en lespwar merveye ki nou’n ganny ofer! Sa lespwar pou vin en realite pour nou personnelman si nou prouve par nou parol ek nou aksyon ki nou vreman serye kan nou dir: “Semen Zeova i drwat.”
Ki ou pou reponn?
• Si nou ladorasyon i prop devan Bondye, ki i pou fer pour nou?
• Akoz nou devret toultan met lespwar dan Zeova?
• Akoz ou konvenki ki semen Zeova i drwat?
• Ki mannyer nou kapab kontinyen mars dan semen drwat Zeova?
[Kestyon]
[Portre lo paz 18]
Aksepte led spirityel sorti kot bann ansyen
[Portre lo paz 21]
Kontinyen mars avek Bondye avek lespwar lavi eternel devan nou