Vin bann Minis Kretyen ki pare pour kontinyen adapte
Vin bann Minis Kretyen ki pare pour kontinyen adapte
“Mon fer mwan vin tou avek tou dimoun pour mwan sov de-trwa parmi zot par tou mannyer posib.”—1 KORENTYEN 9:22.
1, 2. (a) Dan ki fason zapot Pol ti en minis efikas? (b) Ki Pol ti dir lo son latas?
I TI alez kan i ti koz avek bann dimoun entelizan ek bann dimoun ordiner ki ti fer latant. I ti konvenk bann dirizan Romen ek bann dimoun san gran ledikasyon dan lavil Frizi. Sa ki i ti ekrir ti motiv bann Grek ki ti pare pour ekout en lot pwennvi ek bann Zwif ki pa ti oule sanz zot pwennvi. Sa ki i ti dir ti fer sans anmenmtan ki i ti koz avek bokou santiman. Kan i ti koz avek lezot, i ti esey koz lo en keksoz ki zot tou pou dakor lo la, avek bi pour fer serten krwar dan Kris.—Akt 20:21.
2 Sa dimoun ki nou pe koz lo la i zapot Pol, ki san okenn dout ti en minis efikas e ki ti pare pour adapte. (1 Timote 1:12) Zezi ti’n donn li sa misyon pour “fer tou bann nasyon ek bann lerwa ek pep Izrael konn [Kris].” (Akt 9:15) Ki mannyer i ti vwar sa latas? I ti dir: “Mon fer mwan vin tou avek tou dimoun pour mwan sov de-trwa parmi zot par tou mannyer posib. Mon fer tousala pour Levanzil, pour mwan ganny en par dan son bann benediksyon.” (1 Korentyen 9:19-23) Ki nou kapab aprann avek legzanp Pol ki pou kapab ed nou vin pli efikas dan nou predikasyon ek lansennyman?
En Zonm ki’n sanze i reisi son Latas
3. Ki ti reaksyon Pol anver bann Kretyen avan ki i ti konverti?
3 Eski Pol ti toultan en dimoun ki ti annan pasyans, konsiderasyon, toultan pare pour akonpli latas ki i ti gannyen? Pa ditou! Lefe ki Sol (son non avan i ti vin Kretyen) ti en dimoun relizye ki ti fanatik, sa ti fer li persekit bann disip Kris dan en fason kriyel. Kan i ti ankor en zennonm i ti dakor pour les Etyenn ganny touye. Apre, Pol ti kontinyen swiv bann Kretyen pour persekit zot. (Akt 7:58; 8:1, 3; 1 Timote 1:13) I ti kontinyen “ranpli avek bann menas lanmor kont bann disip Senyer.” I pa ti zis kontant li pour persekit bann Kretyen Zerizalenm, me son laenn kont bann Kretyen ti pous li pour persekit zot ziska dan nor, menm ziska Damas.—Akt 9:1, 2.
4. Ki azisteman Pol ti bezwen fer pour li kapab akonpli son misyon?
4 Rezon akoz ki Pol ti sitan ay bann Kretyen i akoz petet i ti konvenki ki sa nouvo larelizyon ti pou sali larelizyon Zwif par melanz li avek krwayans bann dimoun ki pa ti Zwif. Apre tou, Pol ti en “Farizyen,” ki vedir “separe.” (Akt 23:6) Zis esey mazinen ki mannyer Pol ti’n bezwen soke kan Bondye ti swazir li pour al pres avek bann dimoun ki pa ti Zwif, en keksoz ki i pa ti’n zanmen mazinen! (Akt 22:14, 15; 26:16-18) Bann Farizyen pa ti zanmen oule manz avek sa bann ki dapre zot ti bann move dimoun! (Lik 7:36-39) San dout Pol ti bezwen fer gro zefor pour aziste son pwennvi an akor avek lavolonte Bondye, ki oule ki tou sort dimoun i ganny sove.—Galat 1:13-17.
5. Konman nou kapab imit Pol dan nou predikasyon?
5 Petet nou bezwen fer menm parey Pol anmezir ki nou zwenn plis dimoun ki koz en lot langaz dan nou teritwar. Ler nou zwenn sa bann dimoun nou bezwen fer zefor pour egzamin nou latitid anver zot e retir okenn move pwennvi ek lapliferans ki nou kapab demontre. (Efezyen 4:22-24) Ki swa nou konsyan oubyen non, nou tou nou’n ganny enfliyanse avek sa lanvironnman ki nou’n grandi ladan oubyen avek ledikasyon ki nou’n gannyen. Alors, sa i kapab fer nou vin en dimoun ki fer lapliferans oubyen ki pa kapab adapte avek bann nouvo sirkonstans. Si nou anvi reisi kan nou pe rod e ed sa bann ki parey mouton, nou bezwen rezet sa bann move santiman. (Romen 15:7) Sanmenm sa ki Pol ti fer. I ti dakor pour agrandir son minister menm si sa ti en defi. Vi ki i ti ganny motive par lanmour pour lezot, i ti devlop bann fason ansennyen ki vo lapenn imite. Anfet si nou etidye lafason ki sa “zapot pour bann pep non-Zwif” ti prese, nou pou vwar ki i ti pran an konsiderasyon krwayans lezot, i ti pare pour adapte e rod bann nouvo lapros pour prese e ansennyen. *—Romen 11:13.
En Minis ki pare pour adapte an Aksyon
6. Ki mannyer Pol ti pran an konsiderasyon lanvironnman kot son lodyans ti’n grandi e ki rezilta i ti gannyen?
6 Pol ti pran an konsiderasyon krwayans ek lanvironnman ki son lodyans ti’n grandi ladan. Kan i ti pe koz avek Lerwa Agripa 2, i ti rekonnet ki sa lerwa ti “konn tre byen tou bann koutim Zwif ek zot bann size diskisyon.” Apre Pol ti byen servi sa konnesans ki i ti annan lo krwayans Agripa e diskit bann keksoz ki sa lerwa ti konpran tre byen. Lefe ki Pol ti pe rezonn avek li dan en fason kler e avek konviksyon, Agripa ti dir: ‘Dan en pti moman ou pou fer mwan vin Kretyen.’—Akt 26:2, 3, 27, 28.
7. Ki mannyer Pol ti montre ki i ti en dimoun ki ti pare pour adapte ler i ti pe pres avek en lafoul dan lavil Lis?
7 Pol ti osi pare pour adapte. Remarke ki mannyer son lapros ti diferan kan i ti pe esey dekouraz en lafoul dan lavil Lis ki ti oule ador li ek Barnabas konman bondye. Sa bann dimoun ki ti koz Likaonyen ti ganny konsidere konman bann dernyen dimoun e ki pli krwar dan siperstisyon. Dapre Akt 14:14-18, Pol ti koz lo kreasyon ek bann keksoz natirel pour montre ki sa vre Bondye i pli siperyer ki tou. Sa diskisyon ti fasil pour konpran, e i paret ki sa ti “anpes lafoul ofer zot en sakrifis.”
8. Dan ki fason Pol ti montre ki i ti en dimoun ki adapte menm si parfwa i ti mekontan?
8 Byensir, Pol pa ti parfe, e parfwa i ti mekontan. Par egzanp en zour kan i ti ganny imilye dan en fason enzis, i ti mal koz avek en Zwif ki ti apel Ananyas. Me kan Pol ti konnen ki sa dimoun ki i ti’n mal koz avek ti en gran pret, deswit i ti demann lekskiz. (Akt 23:1-5) Kan i ti Atenn, premye kou i ti mekontan “pour vwar ziska ki pwen sa lavil ti ranpli avek zidol.” Parkont dan son diskour ki i ti fer lo montanny Mars, Pol ti napa okenn lakoler. Okontrer, i ti koz avek zot lo bann keksoz ki zot ti dakor avek lo zot laplas piblik, par refer avek zot lotel ki ti’n ganny fer pour “en bondye enkoni” e i ti sit enn zot poenm.—Akt 17:16-28.
9. Ki mannyer Pol ti kapab rod bann nouvo lapros pour koz avek diferan kalite dimoun?
9 Finalman, Pol ti kapab rod bann nouvo lapros pour ansenny diferan kalite dimoun. I ti pran an konsiderasyon kiltir ek lanvironnman ki sa bann dimoun ti’n grandi ladan. Kan i ti ekrir bann Kretyen Ronm i ti konn tre byen ki zot ti pe viv dan lavil kapital sa pli gran pouvwar mondyal sa letan. En pwen kle ki Pol ti fer resorti dan son let pour bann Kretyen Ronm, i pouvwar sakrifis Zezi, pour ranport laviktwar lo pouvwar pese Adan ki anmenn koripsyon. Pol ti koz avek bann Kretyen dan rezyon Ronm dan langaz ki ti pou tous zot leker.—Romen 1:4; 5:14, 15.
10, 11. Ki mannyer Pol ti adapte son legzanp avek bann ki ti ekout li? (Vwar not anba lo paz.)
10 Ki Pol ti fer ler i ti anvi eksplik laverite dan Labib ki profon avek bann dimoun? Zapot Pol ti annan sa abilite pour servi bann keksoz dan lavi toulezour ek legzanp ki fasil konpran, pour eklersi bann keksoz konplike dan Labib. Par egzanp, i ti konnen ki bann dimoun Ronm ti konn sa sistenm lesklavaz ki ti egziste dan Lanpir Romen. Anfet, i probab ki bokou dimoun ki Pol ti adres sa let avek ti bann lesklav. Alors, Pol ti servi sa sistenm lesklavaz konman en baz pour apiy son largiman konsernan swa ki en dimoun i fer. Savedir si i oule pese oubyen ladrwatir vin son met.—Romen 6:16-20.
11 Dapre en travay referans, “dan sistenm Romen en met ti kapab liber son lesklav san okenn kondisyon, oubyen si sa lesklav ti anvi lib i ti kapab pey son met. En lesklav ti osi kapab ganny libere si i ti dakor pour soumet avek en bondye.” En lesklav lib ti kapab deside kontinyen servi son met pour li ganny en lapey. I probab ki Pol ti pe mazin sa sistenm lesklavaz kan i ti pe ekrir konsernan lekel met ki en dimoun i deside pour obeir, ki swa pese ouswa ladrwatir. Bann Kretyen Ronm ti’n ganny libere avek pese e aprezan Bondye ki ti zot met. Zot ti lib pour servi Bondye. Me kantmenm sa, zot ti kapab deside pour servi pese, ki ti zot met avan, si zot ti anvi. Sa legzanp ki senp, me ki zot ti familye avek ti pou pous bann Kretyen Ronm pour demann zot lekor, ‘Lekel mon met?’ *
Aprann avek Legzanp Pol
12, 13. (a) Ki zefor nou bezwen fer ozordi pour kapab tous leker diferan kalite dimoun dan nou teritwar? (b) Ki keksoz ou’n vwar efikas ler ou’n pres avek dimoun ki sorti dan en lot pei?
12 Parey Pol nou bezwen pran an konsiderasyon krwayans lezot, pare pour adapte e rod bann diferan lapros pour kapab tous leker diferan kalite dimoun. Pour kapab fer sa bann dimoun ki nou koz avek byen konpran sa bon nouvel, nou bezwen fer plis ki zis en senp vizit koumsa menm, oubyen partaz en mesaz ki nou’n prepare e zis kit en piblikasyon baze lo Labib. Nou devret rekonnet zot bezwen, kwa ki trakas zot, kwa ki zot kontan e pa kontan, ki zot lenkyetid ek fo konsep. Menm si i demann en kantite refleksyon ek zefor, bann proklanmater dan lemonn antye pe fer sa avek devouman. Par egzanp, biro brans Temwen Zeova Laongri ti dir: “Bann frer ek ser i respekte koutim ek fason viv bann dimoun etranze e zot pa ekspekte sa bann dimoun pour adapte avek zot koutim lokal.” Bann Temwen dan lezot landrwa i esey fer menm parey.
13 Dan en pei Lazi, laplipar dimoun i konsernen avek lasante, lafason pour elve zanfan ek ledikasyon. Alors, bann proklanmater dan sa pei i esey met lanfaz lo sa bann size olye koz lo problenm parey move kondisyon sa lemonn oubyen bann gro problenm sosyal. Pareyman, bann proklanmater dan en lavil Letazini ti remarke ki dan en rezyon dan zot teritwar, dimoun i trakase avek bann problenm parey koripsyon, problenm trafik ek krim. Bann Temwen laba i servi sa bann size pour konmans konversasyon lo Labib. Bann bon ansennyan Labib i toultan fer sir ki nenport ki topik zot swazir, zot reste pozitif e ankourazan, zot toultan fer resorti byenfe ki nou gannyen konmela menm ler nou aplik bann prensip Labib. Zot osi fer resorti sa zoli lespwar ki Bondye i ofer pour lavenir.—Izai 48:17, 18; 52:7.
14. Eksplike ki mannyer nou kapab adapte avek bezwen ek sirkonstans bann dimoun ki nou zwenn dan predikasyon?
14 I osi itil pour servi diferan lapros dan nou predikasyon, akoz nou zwenn dimoun avek diferan kiltir, ledikasyon ek larelizyon. Nou lapros pou diferan ler nou zwenn en dimoun ki krwar dan en Kreater me ki pa krwar dan Labib, avek enn ki pa krwar Bondye i egziste. Nou pa pou fer menm prezantasyon avek en dimoun ki krwar ki tou piblikasyon relizye i zis en mwayen pour fann propagann, avek en dimoun ki aksepte sa ki Labib i dir. Nou bezwen adapte ler nou pe koz avek dimoun ki annan diferan nivo ledikasyon. Bann bon ansennyan pou servi bann rezonnman ek legzanp apropriye avek sak dimoun ki zot zwenn.—1 Zan 5:20.
Led pour bann nouvo Proklanmater
15, 16. Akoz i annan bezwen pour form bann nouvo proklanmater?
15 Pol pa ti zis pe mazinen ki mannyer i pou amelyor son fason ansennyen. I ti vwar li neseser pour form e prepar sa zenn zenerasyon apre li, parey Timote ek Tit pour ki zot vin bann bon proklanmater. (2 Timote 2:2; 3:10, 14; Tit 1:4) Pareyman ozordi, i annan gran bezwen pour donn e ganny formasyon.
16 An 1914 ti annan apepre 5,000 proklanmater dan lemonn antye; e ozordi sak semenn apepre 5,000 dimoun pe batize! (Izai 54:2, 3; Akt 11:21) Kan bann nouvo i konmans asosye avek kongregasyon e zot anvi konmans prese, zot bezwen ganny formasyon ek lenstriksyon. (Galat 6:6) I tre enportan ki nou servi metod nou Met, Zezi, kan nou pe ansenny e form bann nouvo disip. *
17, 18. Ki mannyer nou kapab ed bann nouvo ganny konfyans dan zot lekor pour anons sa mesaz Rwayonm?
17 Zezi pa ti zis rod en lafoul dimoun epi dir son bann zapot konmans koze. Premyerman, i ti met lanfaz lo nesesite pour pres sa mesaz Rwayonm e i ti ankouraz zot pour persiste dan lapriyer. Apre i ti donn zot trwa keksoz debaz: en partner, en teritwar ek en mesaz. (Matye 9:35-38; 10:5-7; Mark 6:7; Lik 9:2, 6) Nou osi nou kapab fer parey. Ki swa nou pe ed nou prop zanfan, en nouvo etidyan oubyen en dimoun ki pa’n prese pour en pe letan, i pou byen si nou fer zefor pour form zot dan sa fason.
18 Pour bann nouvo annan konfyans dan zot menm ki zot kapab prezant sa mesaz Rwayonm, zot pou bezwen ganny ede en kantite. Eski ou kapab ed bann nouvo pour prepar e egzers en prezantasyon ki senp e enteresan? Kan ou dan predikasyon, les zot aprann avek ou anmezir ki ou konmans fer detrwa lakaz premye. Ou kapab swiv legzanp Gideonn ki ti dir avek son bann kanmarad gerye: “Zot devret get mwan pour zot aprann, e zot devret fer parey.” (Ziz 7:17) Apre donn sa nouvo proklanmater sans pour li partisipe. Senserman felisit sa bann nouvo pour zot zefor, e kan i apropriye donn zot bann pti sizesyon pour zot amelyore.
19. Ki ou determinen pour fer anmezir ki ou ‘byen akonpli’ ou minister?
19 Pour kapab ‘byen akonpli nou devwar’ dan predikasyon, nou determinen pour vin bann dimoun ki pare pour adapte nou lapros e nou anvi form bann nouvo proklanmater pour fer parey nou. Ler nou mazinen ki nou lobzektif i tre enportan, savedir pour fer dimoun ganny sa konnesans lo Bondye ki anmenn ver lavi eternel, nou konvenki ki i vo lapenn fer zefor pour “vin tou avek tou dimoun pour [nou] sov de-trwa parmi zot par tou mannyer posib.”—2 Timote 4:5; 1 Korentyen 9:22.
[Not anba lo paz]
^ par. 5 Egzamin sa bann teks swivan pour vwar sa bann kalite ki Pol ti demontre dan son predikasyon. Akt 13:9, 16-42; 17:2-4; 18:1-4; 19:11-20; 20:34; Romen 10:11-15; 2 Korentyen 6:11-13.
^ par. 11 Pareyman kan i ti pe eksplike ki relasyon i annan ant Bondye ek son bann “garson” ki i’n swazir, Pol ti servi en keksoz dan domenn legal ki bann dimoun dan Lanpir Romen ti familye avek. (Romen 8:14-17) Liv St. Paul at Rome, i dir ki “ladopsyon ti en koutim an Ronm, e i ti en koutim ki ti relye pros avek sa nide ki bann Romen ti annan lo en fanmiy.”
^ par. 16 Sa laranzman Pionye ed lezot i an mars dan tou bann kongregasyon Temwen Zeova atraver lemonn. Sa i en laranzman kot bann serviter aplentan ki eksperyanse e ki’n ganny formasyon i ed bann proklanmater ki annan mwens leksperyans.
Eski ou rapel?
• Konman nou kapab imit Pol dan nou predikasyon?
• Ki sanzman petet nou bezwen fer dan nou fason panse?
• Ki mannyer nou kapab gard nou mesaz pozitif?
• Ki bann nouvo proklanmater i bezwen gannyen pour zot kapab annan konfyans dan zot lekor?
[Kestyon]
[Esktre lo paz 29]
Zapot Pol ti pran an konsiderasyon krwayans lezot, ti pare pour adapte e rod nouvo bann lapros pour prese
[Esktre lo paz 31]
Zezi ti donn son bann disip trwa keksoz debaz: en partner, en teritwar ek en mesaz
[Portre lo paz 28]
Pol ti kapab koz avek plizyer kalite dimoun akoz i ti adapte son lapros
[Portre lo paz 30]
Bann bon ansennyan i pran an konsiderasyon landrwa kot bann dimoun i sorti
[Portre lo paz 31]
Bann proklanmater ki pare pour adapte i ed bann nouvo prepare avan al dan predikasyon