Parol Zeova i vivan

Bann Pwen enteresan dan Liv Dezyenm Kronik

LIV Labib Dezyenm Kronik i konmans avek ler Salomon ti pe dirize konman lerwa lo Izrael. Sa liv i fini avek sa parol ki Lerwa Siris sorti Pers ti dir bann Zwif an egzil Babilonn: ‘[Zeova] li menm in donn mwan lord pour konstri en lakaz pour li Zerizalenm, ki an Zida. Nenport parmi zot son pep, ki Zeova son Bondye i avek li. Alor les li mont [Zerizalenm].’ (2 Kronik 36:23) Pret Ezra ti fini ekrir sa liv an 460 A.N.L., e i kouver en peryod letan 500 zan. Sa ti konmans depi 1037 A.N.L. ziska 537 A.N.L.

Lord ki Siris ti fer sorti ti fer li posib pour bann Zwif retourn Zerizalenm e reetablir ladorasyon Zeova dan sa pei. Me sa kantite letan ki zot ti’n pase an egzil Babilonn ti’n fer en move lefe lo zot. Bann Zwif ki ti retourn dan zot pei pa ti konn byen listwar zot nasyon. Dezyenm Kronik ti donn zot sa loportinite pour zot kapab lir en rezimen tre enteresan lo bann levennman ki ti arive pandan letan bann lerwa sorti dan laliny desandans David. Sa resi i osi enteres nou akoz i fer nou vwar benediksyon ki nou gannyen ler nou obeir sa vre Bondye, ek konsekans dezobeisans.

EN LERWA I FER EN LAKAZ POUR ZEOVA

(2 Kronik 1:1–9:31)

Zeova ti donn Salomon lasazes ek konnesans, keksoz ki Salomon ti vreman anvi. Me Zeova ti osi donn li larises ek loner. Sa lerwa ti konstri en tre zoli lakaz pour Zeova Zerizalenm, e dimoun ti ‘zwaye e kontan.’ (2 Kronik 7:10) Salomon ti “annan plis larises ek lasazes ki tou lezot lerwa lo later.”—2 Kronik 9:22.

Apre ki i ti’n diriz Izrael pour 40 an, Salomon ti ‘dormi dan lanmor avek son bann zanset, e Reabam, son garson ti konmans dirize dan son plas.’ (2 Kronik 9:31) Ezra pa ti rakonte ki Salomon ti elwannyen avek vre ladorasyon. Sel defo ki Ezra i mansyonnen lo sa lerwa i  son move desizyon pour pran bokou seval sorti Lezip ek son maryaz avek fiy Faraon. Alor Ezra ti prezant sa resi dapre en pwennvi pozitif.

Larepons pour bann Kestyon lo Labib:

2:14—Akoz laliny desandans sa artizan dekrir dan sa verse i diferan avek sa enn dan 1 Lerwa 7:14? Premye Lerwa i refer avek manman sa artizan konman “en vev sorti dan tribi Naftali.” Sa i akoz i ti’n marye avek en zonm sorti dan sa tribi. Me sa madanm li menm ti sorti dan tribi Dann. Apre lanmor son mari, sa madanm ti marye avek en zonm sorti Tir, e sa artizan ti ne dan sa maryaz.

2:18; 8:10—Sa de verse i dir ki ti annan 3,600 azout 250 depite ki ti travay konman sirveyan ek formenn dan sa group travayer, tandis ki 1 Lerwa 5:16; 9:23, i mansyonn 3,300 azout 550 depite. Akoz i annan en diferans dan sa de sif? I paret ki sa diferans i egziste akoz lafason ki bann depite in ganny klasifye. Petet Dezyenm Kronik i klasifye li koumsa: 3,600 depite ki pa Izraelit ek 250 ki Izraelit. Tandis ki Premye Lerwa i disteng 3,300 formenn avek 550 sef formenn. Antouka, an tou ti annan 3,850 depite.

4:2-4—Akoz zot ti servi bann toro konman en reprezantasyon pour siport sa gran basen? Dan Labib, toro i en senbol lafors. (Ezekyel 1:10; Revelasyon 4:6, 7) Sa swa pour servi reprezantasyon en toro ti apropriye akoz sa 12 toro kwiv ti siport sa gro basen ki ti pez apepre 30 tonn. Fer bann toro pour servi dan sa fason pa ti kas dezyenm komannman, ki ti anpes fer bann lobze pour adore.—Egzod 20:4, 5.

4:5—Ki kantite delo an tou sa basen ti kapab pran? Si zot ti ranpli li plen, i ti pou pran apepre 66,000 lit. Me son nivo normal ti kekfwa apepre de tyer son kapasite. Premye Lerwa 7:26 i dir ki ti annan 44,000 lit delo dan sa basen.

5:4, 5, 10—Lekel sa meb sorti dan tabernak ki ti ganny servi dan tanp Salomon? Sel keksoz dan sa tabernak ki ti ganny garde dan tanp Salomon ti sa Lars. Apre konstriksyon tanp, i paret ki sa tabernak ti ganny anmase Zerizalenm sorti Gibeonn.—2 Kronik 1:3, 4.

Leson pour nou:

1:11, 12. Sa ki Salomon ti demann Zeova i montre ki sa lerwa ti vreman anvi ganny lasazes ek konnesans. Nou lapriyer ki nou fer avek Bondye i vreman montre sa ki nou leker i anvi. I bon ki nou egzamin konteni nou lapriyer.

6:4. En lapresyasyon senser pour labonte leker Zeova i devret pous nou pour beni Zeova, savedir loue li avek lafeksyon ek rekonesans.

6:18-21. Menm si Bondye pa kapab reste dan okenn batiman, tanp ti ganny servi konman sant ladorasyon Zeova. Ozordi, bann Lasal Rwayonm Temwen Zeova i bann sant vre ladorasyon dan kominote.

6:19, 22, 32. Zeova ti pou ekout lapriyer tou dimoun depi lerwa ziska sa dernyen dimoun dan sa nasyon, menm en etranze ki ti apros li avek senserite. *—Psonm 65:2.

DIFERAN LERWA KI SORTI DAN LALINY DESANDANS DAVID

(2 Kronik 10:1–36:23)

Sa Rwayonm ini Izrael ti diviz an de: dis tribi Rwayonm nor ek sa de tribi Rwayonm sid, Zida ek Benzamen. Bann pret ek Levit partou dan Izrael ti met lwayote anver lalyans Rwayonm avan lwayote anver zot  nasyon e zot ti donn Reabam, garson Salomon zot sipor. Enn pti pe plis ki 30 an apre ki tanp ti konplete, tou son bann trezor ti ganny vole.

Parmi sa 19 lerwa ki ti vin apre Reabam, 5 ti fidel, 3 ti konmans byen me apre vin enfidel, e enn ti sanze e aret fer sa ki mal. Larestan ti fer sa ki mal dan lizye Zeova. * Lanfaz ti ganny mete lo aktivite sa senk lerwa ki ti met zot konfyans dan Zeova. Sa resi konsernan Izkiya ki ti reentrodwir bann servis tanp e Yosiya ki ti fer laranzman pour selebre en gran Lapak, ti’n bezwen vin en gran lankourazman pour bann Zwif ki ti enterese pour reetablir ladorasyon Zeova Zerizalenm.

Larepons pour bann Kestyon lo Labib:

13:5—Ki sa lekspresyon “en lalyans disel” i vedir? Vi ki disel i kapab prezerv keksoz, i ti ganny servi pour reprezant en keksoz ki pa sanze e ki stab. Alor, “en lalyans disel,” i donn sa lide en lagreman serye.

14:2-5; 15:17—Eski Lerwa Aza ti retir tou bann “oter”? I paret ki i pa ti fer sa. Petet Aza ti retir selman bann oter ki ti asosye avek ladorasyon bann fo bondye me pa sa bann kot dimoun ti ador Zeova. I kapab osi ki bann oter ti reganny konstri dan bann dernyen moman renny Aza. Son garson Yeosafat ti retir sa bann oter. An realite, bann oter pa ti disparet konpletman, menm pandan renny Yeosafat.—2 Kronik 17:5, 6; 20:31-33.

15:9; 34:6—Ki ti pozisyon tribi Simeon an rapor avek divizyon rwayonm Izrael? Lefe ki Simeon ti ganny konman en leritaz plizyer landrwa dan teritwar Zida, alor lo laspe zeografik, tribi Simeon ti dan rwayonm Zida ek Benzamen. (Zozye 19:1) Me lo laspe larelizyon ek politik, sa tribi ti pran kote avek rwayonm nor. (1 Kronik 11:30-33; 12:20-24) Alor, Simeon ti ganny konte parmi sa dis tribi.

16:13, 14—Eski zot ti bril lekor Aza? Non, sa brile ki zot ti fer zour lanterman i refer avek bril zepis me pa avek lekor Aza.—Not anba lo paz.

35:3—Kote Yosiya ti pran sa Lars sen pour remet dan tanp? Labib pa dir si sa Lars ti ganny retire pli boner par en move lerwa oubyen si Yosiya ti deplas li pour protez li pandan travay reparasyon lo tanp. Sel referans istorik an rapor avek Lars apre letan Salomon i ler Yosiya ti remet li dan tanp.

Leson pour nou:

13:13-18; 14:11, 12; 32:9-23. Pa sa i en bon leson lo lenportans pour apiy lo Zeova!

16:1-5, 7; 18:1-3, 28-32; 21:4-6; 22:10-12; 28:16-22. Fer lalyans avek bann etranze oubyen avek dimoun ki pa Temwen i anmenn move konsekans. Nou saz si nou evit okenn lasosyasyon ki pa neseser avek lemonn.—Zan 17:14, 16; Zak 4:4.

16:7-12; 26:16-21; 32:25, 26. Lorgey ti fer Lerwa Aza azir dan en move fason pandan bann dernyen lannen son lavi. En leta lespri orgeye ti anmenn maler pour Ouziya. Izkiya ti azir dan en fason bet e petet i ti fer vantar ler i ti montre bann reprezantan Babilonn son trezor. (Izai 39:1-7) Labib i averti: “Avan maler i annan lorgey, e avan fo pa en lespri arogan.”—Proverb 16:18.

16:9. Zeova i ed sa bann ki zot leker i tou pour li e i anvi servi son pouvwar dan zot lentere.

18:12, 13, 23, 24, 27. Parey Mikaya, nou devret kouraze e ardyese ler nou pe koz lo Zeova e lo son plan.

 19:1-3. Zeova i rod sa ki bon dan nou menm ler nou depler li.

20:1-28. Nou kapab annan konfyans ki Zeova pou les nou trouv li ler avek limilite nou tourn ver li pour gidans.—Proverb 15:29.

20:17. Pour “vwar delivrans Zeova,” nou bezwen “pran nou pozisyon” e siport dan en fason aktif Rwayonm Bondye. Olye azir dan nou prop fason, nou bezwen “debout trankil,” e met tou nou konfyans dan Zeova.

24:17-19; 25:14. Ladorasyon zidol ti vin en pyez pour Yeoas ek son garson Amatsya. Ozordi lezot kalite idolatri parey groker oubyen patriyotism i kapab vin en pyez atiran.—Kolosyen 3:5; Revelasyon 13:4.

32:6, 7. Nou osi nou bezwen kouraze e for anmezir nou “met lo nou tou bann lekipman batay ki Bondye i donnen” e kontiny sa lager spirityel.—Efezyen 6:11-18.

33:2-9, 12, 13, 15, 16. En dimoun i montre vre repantans par aret fer sa ki mal e determinen pour fer sa ki byen. Si en dimoun i senserman repantir apre ki i’n fer vreman sa ki mal, parey Lerwa Manase, Zeova i kapab montre li son mizerikord.

34:1-3. Nenport sitiasyon difisil ki nou’n eksperyanse pandan nou lanfans i pa neseserman anpes nou arive konn Bondye e servi li. Apre ki Manase, granpapa Yosiya ti’n repantir, petet i ti vin en bon lenfliyans lo Yosiya. Nenport bon lenfliyans ki Yosiya ti’n kapab gannyen ti finalman prodwir bann bon rezilta. I kapab ariv menm keksoz avek nou.

36:15-17. Zeova i annan konpasyon e i pasyan. Me son konpasyon ek pasyans i annan limit. Dimoun i bezwen byen reazir anver predikasyon Rwayonm pour zot sirviv ler Zeova i met en lafen avek sa move sistenm.

36:17, 22, 23. Sa ki Zeova i dir i toultan vin vre.—1 Lerwa 9:7, 8; Zeremi 25:9-11.

En Liv ti motiv li pour azir

Dan 2 Kronik 34:33 i dir: “Yosiya ti retir tou keksoz degoutan dan tou landrwa ki ti pour bann garson Izrael, e i ti fer tou dimoun Izrael servi Zeova zot Bondye.” Kwa ki ti pous Yosiya pour fer sa? Ler Safann ki ti en sekreter ti anmenn liv Lalwa Zeova ki ti’n fek ganny trouve kot Lerwa Yosiya, sa lerwa ti fer lir li aotvwa. Sa ki Yosiya ti tande ti sitan tous li ki avek devouman i ti promouvwar vre ladorasyon toudilon son lavi.

Lir Parol Bondye e reflesir lo sa ki nou lir i kapab fer en lefe profon lo nou. Pa refleksyon lo resi sa bann lerwa i ankouraz nou pour imit legzanp sa bann ki ti met konfyans dan Zeova e evit konportman sa bann ki pa ti fer sa? Dezyenm Kronik i ankouraz nou pour donn sa vre Bondye en devosyon pour li tousel e reste fidel avek li. Son mesaz i sirman vivan e pwisan.—Ebre 4:12.

[Not anba lo paz]

[Portre lo paz 14]

Ou konnen akoz zot ti servi toro konman en reprezantasyon pour siport sa gran basen?

[Portre lo paz 17]

Menm si i pa ti ganny bokou led ler i ti en zanfan, Yosiya ti grandi pour vin en serviter fidel Zeova