Lekel ou pou obei​—Bondye oubyen Zonm?

“Nou devre obei Bondye plito ki zonm.”—AKT 5:29.

1. (a) Lo ki verse prensipal sa lartik letid i baze? (b) Akoz bann zapot ti ganny arete?

BANN ziz lakour siprenm Zwif ti’n bezwen vreman ofanse. Bann prizonnyen ti manke. Sa bann prizonnyen ti bann zapot Zezi Kri, en zonm ki lakour siprenm ti’n kondann amor zis detrwa semenn avan. Aprezan, sa lakour ti pare pour tret ka bann disip ki ti pli pros avek Zezi. Me ler bann gard ti al sers zot, zot ti vwar zot kaso vid, menm si laport ti take. En pe letan apre, bann gard ti ganny lenformasyon ki sa bann zapot ti kot tanp Zerizalenm e zot ti pe ansenny dimoun lo Zezi Kri san okenn lafreyer. Ti sa menm aktivite ki ti fer zot ganny arete pli boner! Bann gard ti al direk kot tanp, tyonbo bann zapot ankor e anmenn zot devan lakour.—Akt 5:17-27.

2. Ki en lanz ti demann bann zapot pour fer?

² En lanz ti’n liber sa bann zapot dan prizon. Eski zot ti ganny libere zis pour zot aret ganny persekite? Non. Sa ti ganny fer pour ki bann zabitan Zerizalenm i antann sa bon nouvel lo Zezi Kri. Sa lanz ti donn bann zapot lenstriksyon ki zot kontinyen “anons lepep sa mesaz konsernan sa nouvo Lavi.” (Akt 5:19, 20) Sanmenm rezon ki ler bann gard ti trouv bann zapot, zot ti vwar bann zapot pe obei sa lord.

3, 4. (a) Ler Pyer ek Zan ti ganny demande pour aret prese, ki mannyer zot ti reazir? (b) Ki mannyer lezot zapot ti azir?

 ³ Zapot Pyer ek Zan ti de parmi sa bann predikater determinen e zot ti’n deza pas devan lakour parey sef ziz, Zozef Kaif, ti severman rapel zot. I ti dir: “Pa nou’n defann zot strikteman koz ankor lo sa zonm? La zot in fann zot lansennyman dan Zerizalenm antye.” (Akt 5:28) Kaif pa ti’n devret sirprann pour vwar Pyer ek Zan ankor ankour. Premye fwa ki zot ti ganny demande pour aret prese, sa de zapot ti reponn: ‘Zize zotmenm devan Bondye, si i byen obei zot plito ki obei Bondye? Kant a nou, nou pa kapab aret koz lo keksoz ki nou’n war e tande.’ Parey ansyen profet Zeremi, Pyer ek Zan pa ti kapab refize akonpli zot travay predikasyon.—Akt 4:18-20; Zeremi 20:9.

⁴ Me aprezan, pa zis Pyer ek Zan, me tou zapot, enkli Matyas ki ti’n fek ganny swazir, ti annan sa loportinite pour fer konnen zot pozisyon anver sa ki lakour ti pe demann zot fer. (Akt 1:21-26) Ler lord ti sorti pour zot aret prese, zot osi zot ti reponn avek lardyes: ‘Nou devre obei Bondye plito ki zonm.’—Akt 5:29.

Obei Bondye oubyen Zonm?

5, 6. Akoz bann zapot pa ti obei lord lakour?

⁵ Bann zapot ti bann zonm ki ti obei lalwa e normalman zot pa ti pou dezobei en lord lakour. Me napa en dimoun, menm si i annan en kantite pouvwar, ki annan lotorite pour donn lord son prosen pour dezobei en komannman Bondye. Zeova i “Tre O lo later antye.” (Psonm 83:18) I pa zis “Ziz lo later antye” me i osi sa enn ki annan drwa pour fer lalwa, e i osi Lerwa leternite. Devan Bondye napa okenn lord lakour pour kennsel enn son bann komannman ki akseptab.—Zenez 18:25; Izai 33:22.

⁶ Serten pli bon eksper dan bann zafer legal in rekonnet sa fe. Par egzanp, William Blackstone ti ekrir ki okenn lalwa zonm pa devret kontredir “lalwa revele,” setadir sa ki trouve dan Labib. Alor, lakour Zwif ti pe desot son vre lotorite ler i ti donn lord bann zapot pour aret prese. Bann zapot pa ti kapab obei sa lord.

7. Akoz sa travay predikasyon ti fer bann sef pret ankoler?

⁷ Determinasyon bann zapot pour kontinyen prese ti fer bann sef pret ankoler. Serten zot, enkli Kaif li menm, ti bann Sadiseen, ki pa ti krwar dan rezireksyon. (Akt 4:1, 2; 5:17) Me bann zapot ti kontinyen ensiste ki Zezi ti’n resisite. Deplis, serten sef pret ti’n fer bokou pour ganny faver bann lotorite Romen. Ler Pilat ti ofer zot sa loportinite pour aksepte Zezi konman zot lerwa, zour i ti pe ganny zize, bann sef pret ti menm al ziska pour dir: “Nou napa okenn lot lerwa ki Sezar.” (Zan 19:15) * Bann zapot pa ti pe zis konfirmen ki Zezi in ganny resisite me zot ti pe osi ansennyen ki apard non Zezi, “napa okenn lot non dan lemonn ki Bondye in donnen par lekel nou kapab ganny sove.” (Akt 2:36; 4:12) Si dimoun ti konmans get Zezi ki’n resisite konman zot lider, bann pret ti per pangar bann Romen i vini e bann dirizan Zwif ti kapab perdi ‘zot plas e zot nasyon.’—Zan 11:48.

8. Ki bon konsey Gamalyel ti donn bann ziz Sannedren?

⁸ Lavenir ti paret sonm pour bann zapot Zezi Kri. Bann ziz lakour Sannedren ti determinen pour met zot amor. (Akt 5:33) Me sitiasyon ti sanze san ekspekte. Gamalyel, en eksper dan Lalwa, ti leve e averti son bann kanmarad pour pa azir tro vit. I ti  fer sa bon obzervasyon: “Si se zonm ki deryer sa travay ki zot pe fer, i pou disparet limenm. Me si sa i travay Bondye, zot pa pou kapab detri li.” Apre sa, Gamalyel ti dir en keksoz tre enportan: “Fer atansyon ki zot pa pe lit kont Bondye.”—Akt 5:34, 38, 39.

9. Kwa ki montre ki travay bann zapot ti travay Bondye?

⁹ San ekspekte, sa lakour ti aksepte konsey Gamalyel. Lakour ti “apel bann zapot, fer bat zot, e donn zot lord pour pa koz ankor lo Zezi. Apre sa zot ti les zot ale.” Me sa pa ti fer bann zapot per ditou. Okontrer zot ti determinen pour obei lord sa lanz pour prese. Alor, apre ki zot ti ganny large, “toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:40, 42) Zeova ti beni zot zefor. Ziska ki degre? “Parol Bondye ti kontinyen fannen; lakantite bann ki ti krwar dan Zezi ti ogmant bokou dan Zerizalenm.” Annefe, “en gran kantite pret ti aksepte lafwa.” (Akt 6:7) Sa ti’n bezwen vin konman en gro defet pour bann sef pret! Levidans ti pe akimile: Travay bann zapot ti vreman travay Bondye!

Bann ki lit kont Bondye pa pou reisi

10. Akoz Kaif ti’n kapab santi li an sekirite dan son pozisyon, me akoz son konfyans ti mal plase?

¹⁰ Dan premye syek, bann gran pret ti ganny apwente par lotorite Romen. Zozef Kaif ki ti en zonm ris ti ganny mete dan sa pozisyon par Valerius Gratus, e i ti reste dan sa pozisyon pli lontan ki bokou gran pret avan li. I probab ki Kaif ti mazinen ki son skil konman en diplomat ek son lanmitye avek Pilat ki ti fer li ganny sa plas olye ki lentervansyon Bondye. Antouleka, son konfyans dan zonm ti mal plase. Zis trwa zan apre ki bann zapot ti pas devan Sannedren, Kaif ti perdi faver lotorite Romen e i ti ganny retire gran pret.

11. Ki ti arive finalman avek Pons Pilat ek sa sistenm Zwif, e ki konklizyon ou tire atraver sa?

 ¹¹ Sa lord pour tir Kaif dan son pozisyon ti sorti kot Lucius Vitellius, gouverner Siri e i ti parlao Pilat. Pilat, bon zanmi Kaif pa ti kapab fer nanryen pour anpes sa arive. Annefe, zis enn an apre Kaif ti tonbe, Pilat li menm ti ganny retire o pouvwar e i ti ganny apele Ronm pour reponn serten lakizasyon serye kont li. Tandis ki pour bann dirizan Zwif ki ti met zot konfyans dan Sezar, bann Romen ti vreman pran ‘zot plas e zot nasyon.’ Sa ti arive dan lannen 70 N.L., ler larme Romen ti konpletman detri lavil Zerizalenm, enkli tanp ek sa lasal Sannedren. Dan zot ka, parol sa psalmis ti vreman vin en realite: “Pa met zot konfyans dan bann dimoun enportan, ni dan senp zonm lo later, ki pa kapab sov nou”!—Zan 11:48; Psonm 146:3.

12. Ki mannyer ka Zezi i montre ki obei Bondye i en keksoz saz pour fer?

¹² Lo lot kote, apre son rezireksyon Bondye ti apwent Zezi Kri konman Gran Pret dan en gran tanp spirityel. Napa personn ki kapab kennsel sa lapwentman. Vreman, Zezi “i gard son pretriz pour touzour.” (Ebre 2:9; 7:17, 24; 9:11) Bondye ti osi apwent Zezi konman Ziz bann vivan ek bann mor. (1 Pyer 4:5) Dan sa pozisyon, Zezi pou determinen si Zozef Kaif ek Pons Pilat i annan okenn posibilite pour viv ankor.—Matye 23:33; Akt 24:15.

Proklanmater Rwayonm ki pa per dan nou Letan

13. Dan nou letan, lekel ki ti travay zonm, e lekel ki ti travay Bondye? Ki mannyer nou konn sa?

¹³ Dan nou letan, parey dan premye syek, i’n annan bokou ki’n “lit kont Bondye.” (Akt 5:39) Par egzanp ler bann Temwen Zeova Lalmanny ti refize rekonnet Adolf Hitler konman zot Führer oubyen Lider, Hitler ti atoupri oule ekstermin zot. (Matye 23:10) Lorganizasyon mertriye Hilter ti paret annan sa kapasite pour fer sa. Bann Nazi ti reisi aret plizyer milye Temwen e anvoy zot dan bann kan konsantrasyon. Zot ti menm arive touy serten Temwen. Me bann Nazi pa ti reisi kas determinasyon bann Temwen pour ador selman Bondye, e zot pa ti arive elimin serviter Bondye konman en group. Travay sa bann Kretyen ti travay Bondye, pa travay zonm, e personn pa kapab met en fren avek travay Bondye. Swasant an plitar, bann sirvivan fidel kan konsantrasyon Hilter i ankor pe servi Zeova ‘avek tou zot leker, avek tou zot lam, e avek tou zot lespri.’ Tandis ki Hilter ek son parti Nazi i listwar.—Matye 22:37.

14. (a) Ki zefor bann ki opoze in fer pour sali repitasyon bann serviter Bondye, e avek ki rezilta? (b) Eski zot zefor pou fer okenn move lefe dirab lo pep Bondye? (Ebre 13:5, 6)

¹⁴ Dan bann lannen ki’n pase depi zefor bann Nazi, i’n annan lezot ki’n zwenn sa lager perdan kont Zeova ek son pep. Dan detrwa pei Lerop, serten group relizye e politik malen in esey klasifye Temwen Zeova konman ‘en sekt danzere.’ Sa i menm lakizasyon ki zot ti fer kont bann Kretyen dan premye syek. (Akt 28:22) Me larealite i ki Lakour Drwa Imen Eropeen in rekonnet  Temwen Zeova konman en larelizyon, pa en sekt. Bann ki opoz nou i konn sa tre byen. Kantmenm sa, zot persiste pour sali repitasyon bann Temwen. Akoz sa bann fo rapor lo nou, serten Kretyen in ganny pouse dan zot travay. Zot in fatig e fer problenm avek bann zanfan Temwen dan lekol. Bann propriyeter ki per i nepli lwe bann batiman ki bann Temwen in servi pour bokou lannen konman landrwa rasanbleman. Dan detrwa ka, bann lazans gouvernman in menm refize donn sitwayennte serten dimoun zis akoz zot Temwen Zeova! Kantmenm sa, bann Temwen pa bes lebra.

15, 16. Ki mannyer bann Temwen Zeova Lafrans in reazir anver lopozisyon lo zot travay Kretyen, e akoz zot kontinyen prese?

¹⁵ Par egzanp Lafrans, an zeneral dimoun i rezonnab e ouver. Me detrwa dimoun ki opoz nou in promot bann lalwa avek bi pour afekte travay Rwayonm. Ki bann Temwen Zeova dan sa pei in fer? Zot in entansifye zot aktivite predikasyon plis ki zanmen avan e zot in ganny bann tre bon rezilta. (Zak 4:7) Ou kapab krwar ki zis dan en lespas sis mwan, lakantite letid Labib in ogmant par 33 poursan dan sa pei! Sa i bezwen ofans Dyab en kantite ki bann dimoun senser Lafrans pe aksepte sa bon nouvel. (Revelasyon 12:17) Nou bann frer ek ser Kretyen Lafrans i annan konfyans ki parol profet Izai pou vin vre dan zot ka: “Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen.”—Izai 54:17.

¹⁶ Temwen Zeova pa pran plezir pour ganny persekite. Me akoz lobeisans anver lord Bondye pour tou Kretyen, zot pa kapab e zot pa pou aret koz lo bann keksoz ki zot in tande. Zot fer zefor pour vin bann bon sitwayen. Me ler i annan en konfli ant lalwa Bondye ek lalwa zonm, zot obei Bondye konman dirizan.

Pa per zot

17. (a) Akoz nou pa devret per nou lennmi? (b) Ki latitid nou devret annan anver bann ki persekit nou?

¹⁷ Nou bann lennmi i dan en sitiasyon tre danzere. Zot pe lit kont Bondye. Alor, an armoni avek parol Zezi, dan plas ki nou per zot, nou priy pour sa bann ki pe persekit nou. (Matye 5:44) Nou priye ki si i annan ki pe opoz Bondye akoz linyorans, parey dan ka Sol, Zeova pou zantiman fer zot vwar laverite. (2 Korentyen 4:4) Sol ti vin zapot Pol e i ti soufer en kantite avek lotorite ki ti egziste dan son letan. Kantmenm sa, i ti kontinyen rapel son bann konpanyon Kretyen pour ‘soumet zot avek bann dirizan ek lotorite e obei zot, e ki zot devre touzour pare pour fer tou sa ki byen. Ki fodre pa ki zot malparl personn, [menm zot bann pli gran persekiter] me ki zot evit tou kerel e montre zot zanmi e poli avek tou dimoun.’ (Tit 3:1, 2) Bann Temwen Zeova Lafrans e partou i fer zefor pour aplik sa konsey.

18. (a) Dan ki fason Zeova i kapab delivre son pep? (b) Ki pou rezilta final?

¹⁸ Bondye ti dir profet Zeremi: “Mon  avek ou pour delivre ou.” (Zeremi 1:8) Ki mannyer Zeova i kapab delivre nou avek persekisyon ozordi? I kapab lev en ziz ki zis e rezonnab parey Gamalyel. Oubyen i kapab fer sir ki en zofisye koronpi oubyen ki opoz nou i ganny ranplase san ekspekte par enn ki pli rezonnab. Me parler, Zeova i kapab les sa persekisyon lo son pep kontinyen. (2 Timote 3:12) Si Bondye i les nou ganny persekite, i pou toultan donn nou sa lafors pour andir persekisyon. (1 Korentyen 10:13) Okenn keksoz ki Bondye i les arive, nou asire ki pou arive alafen: Sa bann ki lit kont pep Bondye pe lit kont Bondye li menm, e bann ki lager kont Bondye pa pou sorti venker.

19. Ki teks pour lannen 2006, e akoz i apropriye?

¹⁹ Zezi ti dir son disip ekspekte ki zot pou soufer. (Zan 16:33) Akoz sa, zanmen avan sa parol dan Akt 5:29 in vin sitan aler: ‘Nou devre obei Bondye plito ki zonm.’ Pour sa rezon ki sa parol enteresan in ganny swazir konman teks pour lannen 2006 pour bann Temwen Zeova. Fotespere ki i vin nou determinasyon pandan sa lannen ki pe vini e toudilon leternite pour obei Bondye konman dirizan nenport kwa ki arive!

[Not anba lo paz]

Eski ou kapab reponn?

• Ki legzanp ankourazan bann zapot in kite pour nou par lafason zot ti fer fas avek lopozisyon?

• Akoz nou devret toultan obei Bondye konman dirizan olye zonm?

• Sa bann ki opoz nou pe lager kont lekel an realite?

• Ki rezilta final nou ekspekte pour sa bann ki andir persekisyon?

[Kestyon]

[Ekstre lo paz 7]

Teks pour lannen 2006 i: “Nou devre obei Bondye plito ki zonm.” —Akt 5:29

[Portre lo paz 3]

‘Nou devre obei Bondye plito ki zonm’

[Portre lo paz 5]

Kaif ti met son konfyans dan zonm olye dan Bondye