Pran en Dezisyon e azir konmela menm
Pran en Dezisyon e azir konmela menm
“Ziska kan zot pou bwate lo de diferan lopinyon?”—1 LERWA 18:21.
1. Kwa ki fer nou letan sitan diferan avek lepase?
ESKI ou krwar ki Zeova i sa sel vre Bondye? Eski ou krwar osi ki bann profesi Labib i montre ki nou pe viv dan “bann dernyen zour” sa lemonn mesan? (2 Timote 3:1) Si i leka, ou pou sirman dakor ki ozordi, plis ki zanmen avan, i neseser pran en desizyon e azir. Zanmen dan listwar imen in annan sitan en kantite lavi an danze koumsa.
2. Ki ti arive dan sa Rwayonm dis tribi Izrael pandan renny Lerwa Aab?
2 Dan bann lannen 900 avan nou lepok, nasyon Izrael ti bezwen pran en desizyon tre serye. Lekel ki zot pou servi? Anba lenfliyans son madanm payen, Zezabel, Lerwa Aab ti ankouraz ladorasyon Baal dan sa Rwayonm dis tribi Izrael. Baal ti en bondye fertilite ki ti sipoze donn lapli ek bon rekolt. Bokou adorater Baal ti’n kapab anvoy en beko avek en stati zot bondye oubyen azenou devan li. Pour fer Baal beni zot plantasyon ek zot troupo, son bann adorater ti partisip dan bann vis seksyel avek bann prostitye tanp. Zot ti osi annan sa labitid pour koup zot lekor pour fer disan koule.—1 Lerwa 18:28.
3. Ki lefe ladorasyon Baal ti fer lo pep Bondye?
3 En group Izraelit apepre 7,000 zot, ti refize partisip dan sa kalite form ladorasyon ki ti ranpli avek idolatri, imoralite ek vyolans. (1 Lerwa 19:18) Zot ti reste fidel avek Zeova ek son lalyans, e pour sa zot ti ganny persekite. Par egzanp, Larenn Zezabel ti touy bokou profet Zeova. (1 Lerwa 18:4, 13) Akoz sa bann kondisyon difisil, laplipar Izraelit ti pratik de kalite larelizyon. Zot ti pe esey fer plezir Zeova e anmenmtan fer plezir Baal. Me pour en Izraelit ador en fo bondye, i ti konmsi i’n rezet net Zeova. Zeova ti promet pour beni bann Izraelit si zot ti kontan li e obeir son bann komannman. Me i ti averti zot ki si zot pa donn li en ‘devosyon pour li tousel,’ zot pou nepli egziste konman en nasyon.—Deterononm 5:6-10; 28:15, 63.
4. Ki Zezi ek son bann zapot ti predir pou arive parmi bann Kretyen, e ki mannyer sa ti akonpli?
4 Ozordi sa menm kondisyon i egziste dan Kretyente. Bann dimoun ki al legliz zot dir zot Kretyen, me zot lafet, konportman ek krwayans pa mars ansanm avek lansennyman Labib. Parey Zezabel, bann pret Kretyente i responsab pour persekit bann Temwen Zeova. Bann pret i osi annan en gran repitasyon pour siport bann lager e alor zot responsab pour lanmor plizyer milyon manm legliz. Labib i apel sa kalite sipor ki larelizyon i donn bann gouvernman lemonn konman fornikasyon spirityel. (Revelasyon 18:2, 3) Deplis, pli ale Kretyente pe toler aktivite seksyel imoral, menm parmi son bann pret. Zezi Kri ek son bann zapot ti predir sa gran apostazi. (Matye 13:36-43; Akt 20:29, 30; 2 Pyer 2:1, 2) Ki pou arive finalman avek sa plis ki en bilyon dimoun ki dan Kretyente? Ki responsabilite bann vre adorater Zeova i annan anver zot ek tou lezot dimoun ki’n ganny anbete par fo larelizyon? Nou ganny en larepons kler pour sa bann kestyon par egzamin bann levennman enteresan ki ti anmenn ‘destriksyon Baal Izrael.’—2 Lerwa 10:28.
Lanmour Bondye pour son Pep rebel
5. Ki mannyer Zeova ti montre lanmour pour son pep rebel?
5 Zeova pa pran plezir pour pini bann ki pa reste fidel avek li. Konman en bon Papa, i oule ki bann move dimoun i repantir e retourn kot li. (Ezekyel 18:32; 2 Pyer 3:9) Zeova ti montre i sa kalite Bondye ler i ti servi bokou profet dan letan Aab ek Zezabel pour averti Son pep konsekans ador Baal. Eliya ti enn parmi sa bann profet. Apre en lasesres sever, ki ti ganny anonse davans, Eliya ti dir Lerwa Aab rasanble bann Izraelit ek bann profet Baal ansanm lo montanny Karmel.—1 Lerwa 18:1, 19.
6, 7. (a) Ki mannyer Eliya ti revel lakoz apostazi Izrael? (b) Ki bann profet Baal ti fer? (c) Ki Eliya ti fer?
6 Petet avek lentansyon pour fer plezir Zezabel, sa renyon ti ganny fer dan en landrwa kot en lotel Zeova ti’n “demolir.” (1 Lerwa 18:30) Malerezman, bann Izraelit prezan sa zour pa ti asire lekel, si Zeova oubyen Baal, ki ti vreman kapab fer sa lapli ki zot ti sitan bezwen tonbe. I ti annan 450 profet ki ti reprezant Baal, tandis ki Eliya ti sel profet ki ti reprezant Zeova. Eliya ti adres rasin zot problenm par demann sa pep: “Ziska kan zot pou bwate lo de diferan lopinyon?” Apre dan en fason pli kler i ti met devan zot sa sitiasyon: “Si Zeova i sa vre Bondye, swiv li; me si i Baal, ale swiv li.” Pour fer sa bann Izraelit ki pa ti konnen ki desizyon pour fer donn Zeova en devosyon pour li tousel, Eliya ti sizer en tes ki ti pou montre lekel sa vre Bondye. Zot ti pou touy de toro pour fer en sakrifis, enn pour Zeova e lot pour Baal. Sa vre Bondye ti pou bril son sakrifis avek dife. Bann profet Baal ti prepar zot sakrifis, e apre pour plizyer er-d-tan zot ti kriye: “O Baal, reponn nou!” Ler Eliya ti konmans sikann zot, zot ti koup zot ziska ki disan ti koule, e zot ti kriy avek tou zot lafors. Me ti napa larepons.—1 Lerwa 18:21, 26-29.
7 Aprezan ti tour Eliya. Premyerman, i ti repar lotel Zeova e met bann morso sa zenn toro lo la. Apre i ti demande ki kat gran resipyan delo i ganny vide lo sa sakrifis. Sa ti ganny fer trwa fwa ziska sa rigol otour sa lotel ti plen avek delo. Apre Eliya ti priye: “O Zeova, Bondye Abraam, Izaak ek Izrael, fer zot konnen ozordi ki ou Bondye dan Izrael e mwan ou serviter e ki se par ou parol ki mon’n fer tou sa bann keksoz. Reponn mwan, O Zeova, reponn mwan, pour ki sa pep i kapab konnen ki ou, Zeova, ou sa vre Bondye e ou menm ou’n fer zot leker retourn [anver ou].”—1 Lerwa 18:30-37.
8. Ki mannyer Bondye ti reponn lapriyer Eliya, e ki sa profet ti fer?
8 Vre Bondye ti reazir par bril sa sakrifis enkli sa lotel avek dife sorti dan lesyel. Sa dife ti menm fer sek sa delo dan rigol otour sa lotel! Zis esey mazin lefe ki sa ti fer lo bann Izraelit. “Deswit zot ti tonm ater e zot ti dir: ‘Zeova i sa vre Bondye! Zeova i sa vre Bondye!’” Aprezan ti’n ariv ler pour Eliya pran en lot aksyon serye, e i ti dir bann Izraelit: “Tyonbo bann profet Baal! Pa les ni enn sape!” Apre sa, tou sa 450 profet Baal ti ganny touye devan montanny Karmel.—1 Lerwa 18:38-40.
9. Ki mannyer bann vre adorater ti ganny teste ankor?
9 Sa menm zour inoubliyab, Zeova ti fer lapli tonbe dan sa pei pour premye fwa apre trwa zan edmi! (Zak 5:17, 18) Ou kapab mazin konversasyon ki bann Izraelit ti fer antre zot ler zot ti pe retourn kot zot; Zeova ti’n prouve ki se li vre Bondye. Me bann adorater Baal pa ti oule les tonbe. Zezabel ti kontinyen son kanpanny pour persekit bann serviter Zeova. (1 Lerwa 19:1, 2; 21:11-16) Alor fidelite pep Bondye ti ganny teste ankor enn fwa. Eski zot ti pou donn zot devosyon zis pour Zeova ler son zour zizman kont bann adorater Baal ti pou arive?
Fer ou Desizyon e azir konmela menm
10. (a) Ki bann Kretyen swazir in fer dan nou letan? (b) Ki en dimoun i bezwen fer pour obeir sa lord dan Revelasyon 18:4?
10 Dan nou letan, bann Kretyen swazir in fer en travay parey avek Eliya. Par zot parol e osi par servi bann piblikasyon, zot in averti dimoun dan tou pei ki swa zot dan Kretyente oubyen non konsernan danze fo larelizyon. Sa in fer plizyer milyon fer en desizyon e azir par kas zot lasosyasyon avek fo larelizyon. Zot in dedye zot lavi avek Zeova e zot in vin bann disip batize Zezi Kri. Wi, zot in obeir lapel irzan Bondye konsernan fo larelizyon: “Sorti dan sa lavil, mon pep, pour ou pa partisip dan son bann pese e ki ou pa resevwar en par son bann fleo.”—Revelasyon 18:4.
11. Kwa ki neseser pour ganny laprouvasyon Zeova?
11 I annan plizyer lezot milyon dimoun ki atire par sa mesaz dan Labib ki bann Temwen Zeova pe partaze. Me kantmenm sa, zot pa ankor asire ki zot pou fer. Serten parmi zot i asiste renyon tanzantan, petet Memoryal oubyen serten sesyon en lasanble distrik. Nou ankouraz tou sa bann dimoun pour reflesir byen lo parol Eliya: “Ziska kan zot pou ezite pran en kote?” (1 Lerwa 18:21, Bible de Darby) Olye anvoy pour plitar, zot bezwen fer en desizyon e azir konmela menm e avek devouman travay pour dedye zot lavi e batize pour vin bann adorater Zeova. Zot lespwar pour lavi eternel i an danze!—2 Tesalonisyen 1:6-9.
12. Dan ki sitiasyon danzere serten Kretyen in tonm ladan, e ki zot devret fer?
12 Malerezman, serten Kretyen batize in vin iregilye oubyen inaktif dan zot ladorasyon. (Ebre 10:23-25; 13:15, 16) Serten in perdi zot devouman akoz zot per persekisyon, akoz traka lavi, oubyen akoz dezir pour vin ris oubyen tay deryer plezir egois. Zezi ti averti ki sa bann keksoz ti pou fer tonbe, etouf, e vin en pyez pour serten son bann disip. (Matye 10:28-33; 13:20-22; Lik 12:22-31; 21:34-36) Olye ‘bwate lo de lopinyon,’ sa bann dimoun i devret annan ‘lantouzyasm e sanz zot konportman’ par pran en desizyon serye e azir pour akonpli zot dedikasyon avek Bondye.—Revelasyon 3:15-19.
Fo Larelizyon i trouv son Lafen en sel Kou
13. Dekrir sitiasyon Izrael ler Yeou ti ganny apwente lerwa.
13 Rezon akoz i irzan pour dimoun fer en desizyon e azir konmela menm i evidan atraver sa ki ti arive apepre 18 an apre sa ki ti arive lo montanny Karmel konsernan lekel ki vre Bondye. Zour zizman Zeova ti ariv kont ladorasyon Baal en sel kou e san ekspekte pandan minister Elisa, sikseser Eliya. Pandan sa letan, Yeoram, garson Lerwa Aab ti pe diriz Izrael e son manman Zezabel ti ankor pe azir konman larenn. San fer tapaz, Elisa ti anvoy son serviter pour apwent Yeou, konman nouvo lerwa, ki sa letan ti sef larme Izrael. Sa letan, Yeou ti lo kote les Zourden kot Ramot-Gilead e i ti pe diriz en lager kont lennmi Izrael. Lerwa Yeoram ti Yizreel dan vale obor Megido e i ti pe rekipere avek en blesir ki i ti gannyen dan en lager.—2 Lerwa 8:29–9:4.
14, 15. Ki travay Yeou ti gannyen pour fer e ki mannyer i ti reazir?
14 Lala sa ki Zeova ti demann Yeou pour fer: “Fodre ou elimin lakaz Aab ou senyer, e mon bezwen revanz disan mon bann serviter bann profet ek disan tou serviter Zeova dan lanmen Zezabel. Tou dimoun dan lakaz Aab i bezwen ganny detri; . . . Lisyen pou manz Zezabel lo sa bout later Yizreel, e pou napa personn ki pou anter li.”—2 Lerwa 9:7-10.
15 Yeou ti en zonm ki pa ti tarde pour deside ki pou fer. San esper plis ki sa, i ti mont dan son saret e al vit ver Yizreel. En dimoun ki ti pe veye Yizreel ti remark fason kondwir Yeou e i ti al dir sa Lerwa Yeoram. Ler Yeoram ti tann sa, i ti mont dan son saret e al zwenn son sef larme. Ler zot ti rankontre kanmarad, Yeoram ti demande: “Eski i annan lape, Yeou?” Yeou ti reponn: “Ki lape i kapab annan osi lontan ki i annan fornikasyon Zezabel ou manman ek son kantite grigri?” Apre, avan ki Lerwa Yeoram ti kapab sove, Yeou ti tir son lark e viz en dart dan leker Yeoram ki ti mor.—2 Lerwa 9:20-24.
16. (a) Ki sitiasyon bann zofisye lakour Zezabel ti fer fas avek en sel kou? (b) Ki mannyer parol Zeova lo Zezabel ti akonpli?
16 San tarde, Yeou ti al vit ver lavil dan son saret. Zezabel ki ti’n met son ta makiyaz ti debout anler devan en lafnet e menas Yeou par son parol. Yeou pa ti antren li e i ti lans en lapel pour sipor: “Lekel ki avek mwan? Lekel?” Bann serviter Zezabel ti bezwen aprezan fer en desizyon e azir. De oubyen trwa zofisye ti tir latet deor par lafnet. Deswit zot lwayote ti ganny teste. Yeou ti donn lord, “Les li tonbe!” Sa bann zofisye ti les Zezabel tonbe lo semen anba, kot bann seval ek saret Yeou ti pil pil lo li. Alor sa enn ki ti ankouraz ladorasyon Baal Izrael ti trouv son lafen ki i ti merite. Avan ki zot ti ganny letan pour anter Zezabel, bann lisyen ti manz son laser, zis parey ti’n predir.—2 Lerwa 9:30-37.
17. Zizman Bondye lo Zezabel i devret ranforsi nou lafwa dan ki levennman alavenir?
17 En lafen sokan e parey pou ariv lo sa prostitye senbolik ki annan sa non “Gran Babilonn.” Sa prostitye i reprezant bann fo larelizyon dan sa lemonn Satan, ki zot lorizin i sorti dan ansyen lavil Babilonn. Apre lafen fo larelizyon, Zeova pou tourn son latansyon lo tou larestan dimoun ki form parti sa lemonn Satan. Zot osi zot pou ganny detri, pour prepar semen pour en nouvo lemonn drwat.—Revelasyon 17:3-6; 19:19-21; 21:1-4.
18. Apre lanmor Zezabel, ki ti arive avek bann adorater Baal Izrael?
18 Apre lanmor Zezabel, Lerwa Yeou pa ti tarde pour egzekit tou desandans Aab ek son bann gran siporter. (2 Lerwa 10:11) Me bokou Izraelit ki ti ador Baal ti ankor dan sa pei. Konsernan zot, Yeou ti pran aksyon serye pour montre ki i “pa toler okenn rivalite kont Zeova.” (2 Lerwa 10:16) Yeou ti fer krwar i en adorater Baal, e i ti organiz en gran lafet kot tanp Baal ki Aab ti’n konstri Samari. Tou adorater Baal Izrael ti vin sa lafet. Lefe ki zot ti’n pri dan tanp, bann zonm Yeou ti kapab met zot tou amor. Sa resi Labib i fini avek sa parol: “Alor Yeou ti retir Baal dan Izrael.”—2 Lerwa 10:18-28.
19. Ki sa lespwar merveye ki pe esper sa “gran lafoul” adorater fidel Zeova?
19 Ladorasyon Baal ti ganny eliminen Izrael. Sirman dan menm fason, en sel kou bann fo larelizyon sa lemonn pou trouv zot lafen san ekspekte. Lo ki kote ou pou ete ler sa gran zour zizman i arive? Pran en desizyon e azir konmela menm, e ou kapab privilezye pour parmi sa “gran lafoul” ki pou sirviv sa ‘gran ladetres.’ En zour ou pou kapab get lepase avek lazwa e ou pou loue Bondye pour ziz severman sa “gran prostitye ki’n ranpli later avek koripsyon ek son bann laksyon imoral.” Ansanm avek lezot vre adorater, ou pou dakor avek parol dan sa sanson ki sorti dan lesyel: ‘Loue Ya! Akoz Zeova nou Bondye Toupisan i Lerwa.’—Revelasyon 7:9, 10, 14; 19:1, 2, 6.
Kestyon pour Refleksyon
• Ki mannyer ansyen Izrael ti arive koupab devan Zeova pour ador Baal?
• Ki sa gran apostazi ki Labib ti predir, e ki mannyer sa profesi in akonpli?
• Ki mannyer Yeou ti elimin ladorasyon Baal?
• Ki nou bezwen fer pour sirviv zour zizman Bondye?
[Kestyon]
[Map lo paz 9]
(Vwar prezantasyon dan piblikasyon)
Soko
Afek
Elkat
Yokneam
Megido
Taanak
Dotann
SAMARI
Enn-Dor
Sounenm
Ofra
Yizreel
Yibleanm (Gat-Rimonn)
Tirtsa
Bet-Semes
Bet-Seann (Bet-Sann)
Yabes-Gilead?
Abel-Meola
Lakaz Arbel
Ramot-Gilead
Montanny
Montanny Karmel
Montanny Tabor
More
Montanny Gilboa
[Delo]
Lanmer Lamediterane
Lanmer Galile
[Larivyer]
Larivyer Zourden
[Pi]
Pi Arod
[Portre]
Baze lo map prodwir par Pictorial Archive (Near Eastern History) Est. and Survey of Israel
[Portre lo paz 10]
Partisip regilyerman dan predikasyon e asiste renyon i laspe enportan vre ladorasyon
[Portre lo paz 12]
Parey Yeou, tou dimoun ki anvi sirviv zour Zeova i bezwen fer en desizyon e azir