Bann Pwen enteresan dan Liv Neemya
Parol Zeova i vivan
Bann Pwen enteresan dan Liv Neemya
I TI annan douz an depi ki bann dernyen levennman dan liv Ezra ti’n fini pase. Sa lord pour al “reetablir e rebatir Zerizalenm” ti pros pour ganny donnen. Sa levennman ti pou konmansman sa 70 semenn oubyen 490 lannen ki ti pou dire ziska ki Mesi i aparet. (Danyel 9:24-27) Liv Neemya i rakont listwar pep Bondye kan zot ti rekonstri miray Zerizalenm. Sa liv i kouver en peryod letan enportan ki ti dir pour plis ki 12 zan, depi 456 A.N.L. ziska en pe letan apre 443 A.N.L.
Sa liv in ganny ekrir par Neemya ki ti en Gouverner. I en liv tre enteresan ki montre ki mannyer vre ladorasyon i prospere ler dimoun i azir avek determinasyon ek konfyans dan Zeova. I klerman montre ki mannyer Zeova i aranz keksoz pour akonpli son lavolonte. I osi koz lo en dirizan ki ti for e kouraze. Sa mesaz dan liv Neemya i fourni bann bon leson pour bann vre adorater ozordi, akoz “parol Bondye i vivan e i annan pisans.”—Ebre 4:12.
“FINALMAN MIRAY TI FINI FER”
Neemya ti dan pale Siz, e Lerwa Artakzerses Longmen ti’n swazir li konman enn son serviter akoz i ti annan konfyans dan li. Kan Neemya ti tande ki son pep ti “dan en move sitiasyon e ganny en move repitasyon; miray Zerizalenm ti’n demolir, e son bann baro ti’n brile,” sa ti fatig li en kantite. Avek bokou santiman i ti priy Bondye pour ganny son led. (Neemya 1:3, 4) Avek letan, lerwa ti remarke ki Neemya ti dan sagrinasyon, alors i ti dakor pour les Neemya al Zerizalenm.
Apre ki i ti’n ariv Zerizalenm, Neemya ti egzamin sa miray aswar dan fernwanr. I ti fer bann Zwif konnen ki i ti annan lentansyon rekonstri sa miray. Travay konstriksyon ti demare. Anmenmtan serten dimoun ti konmans opoz sa travay. Me anba direksyon Neemya ki ti annan kouraz, “finalman sa miray ti fini fer.”—Neemya 6:15.
Larepons pour bann Kestyon lo Labib:
1:1; 2:1—Eski sa “ventyenm lannen” ki ganny mansyonnen dan sa de verse ti konmans ganny konte apartir menm lannen? Wi. Sa ti sa ventyenm lannen ki Lerwa Artakzerses ti pe rennyen. Me sa metod ki ganny servi pour konte dan sa de verse i diferan. Dapre listwar, Artakzerses ti mont lo tronn an 475 A.N.L. Ler bann sekreter Babilonnyen ti kont lakantite lannen ki bann lerwa Pers ti rennyen, zot ti abitye konmans konte avek mwan Nizan (Mars/Avril) ziska Nizan lannen swivan. Alors premye lannen ki Artakzerses ti rennyen ti konmans Nizan 474 A.N.L. Alors, sa ventyenm lannen lerwa Artakzerses ki ganny mansyonnen dan Neemya 2:1, ti konmans dan mwan Nizan an 455 A.N.L. Alor mwan Kislev (Novanm/Desanm ki ganny mansyonnen dan Neemya 1:1) ti bezwen sa lannen avan, setadir 456 A.N.L. Dapre Neemya, sa mwan ti osi form parti sa ventyenm lannen lerwa Artakzerses. Petet dan sa ka i ti pe konmans kont bann lannen apartir sa dat ki sa lerwa ti mont lo tronn. I kapab osi ki Neemya ti pe servi sa ki bann Zwif ozordi i apel en lannen sivil pour kont letan. En lannen sivil i konmans dan mwan Tisri (Septanm/Oktob). Antouka, i dan lannen 455 A.N.L. ki lord ti sorti pour rebatir Zerizalenm.
4:17, 18—Ki mannyer bann zonm ti kapab fer travay konstriksyon avek zis en kote lanmen? Sa pa ti en problenm pour bann ki ti sarye materyo. Omoman ki zot ti’n met zot materyo lo zot latet oubyen zepol, zot ti kapab fasilman tenir li avek en kote lanmen, “anmezir ki lot kote ti pe tyonbo zot lans.” Tandis ki bann travayer ki ti bezwen servi tou le de zot lanmen, “sakenn ti annan son lepe dan son leren, pandan ki zot ti pe travay.” Zot ti pare pour lager nenport ler ki zot lennmi i atake.
5:7—Dan ki sans Neemya ti konmans “vwar fot avek bann dimoun enportan ek bann asistan sef”? Sa bann zonm ti pe kas Lalwa Moiz par pret zot bann frer Zwif keksoz avek lentere. (Levitik 25:36; Deterononm 23:19) Deplis sa lentere ki zot ti pe demande ti o. Si zot ti pe demann 1 poursan tou le mwan, sa ti pou ariv 12 poursan pour en lannen. (Neemya 5:11) Sa ti vreman mal pour zot enpoz tousala lo bann dimoun ki ti deza annan en kantite taks pour peye e ki ti napa ase manze. Par servi Lalwa Bondye, Neemya ti kapab vwar fot avek bann risar, alor i ti kapab koriz e reprimann zot e i ti fer zot vwar kote zot ti pe mal fer.
6:5—Vi ki normalman bann let konfidansyel ti ganny mete dan en sak ki’n fermen, akoz Sanbala ti anvoy en let ki pa’n fermen pour Neemya? I kapab ki Sanbala ti anvi fer tou dimoun konn bann fo lakizasyon ki ti’n ganny fer kont Neemya par anvoy sa let dan sa fason. Petet i ti mazinen ki sa ti pou vreman fer Neemya ankoler, ki i ti pou aret travay konstriksyon e vin defann son lekor. Oubyen Sanbala ti mazinen ki sa let ti pou fer bann Zwif per, ki finalman zot ti pou aret zot travay. Neemya pa ti les personn fer li per e i ti kontiny sa travay ki Bondye ti’n donn li.
Leson pour nou:
1:4; 2:4; 4:4, 5. Kan nou bezwen fer fas avek bann sitiasyon difisil oubyen kan nou bezwen pran bann desizyon enportan, nou devret “priye tou letan.” Nou devret osi azir an akor avek bann direksyon ki nou gannyen atraver lorganizasyon Zeova.—Romen 12:12.
1:11–2:8; 4:4, 5, 15, 16; 6:16. Zeova i reponn lapriyer son bann serviter ki priy li avek senserite.—Psonm 86:6, 7.
1:4; 4:19, 20; 6:3, 15. Menm si Neemya ti en dimoun dous, i’n kit en bon legzanp pour nou konman en zonm kouraze ki ti defann sa ki drwat.
1:11–2:3. Son pozisyon enportan konman serviter lerwa pa ti sa keksoz prensipal ki ti fer Neemya zwaye. Me plito pour vwar vre ladorasyon progrese ti sa keksoz prensipal ki ti fer li zwaye. Kwa ki devret vin premye dan nou lavi e ki fer nou zwaye? Eski pa i devret ladorasyon Zeova ek tou keksoz ki promot sa ladorasyon?
2:4-8. Zeova ti fer Artakzerses donn Neemya permisyon pour al rekonstri miray Zerizalenm. Proverb 21:1 i dir ki leker en lerwa i parey larivyer dan lanmen Zeova. I diriz li partou kot i fer li plezir.
3:5, 27. Kontrerman avek bann “dimoun enportan” parmi bann Tekoit, nou pa devret konsider bann travay mannyel an rapor avek vre ladorasyon tro enferyer pour nou. Okontrer nou kapab imit bann senp Tekoit ki ti pare pour ofer zot lekor volonterman.
3:10, 23, 28-30. Menm si serten i kapab al dan bann landrwa kot i bezwen plis proklanmater, en kantite nou i siport vre ladorasyon dan nou teritwar. Nou kapab fer sa par partisip dan konstriksyon Lasal Rwayonm e ede kan i annan bann dezas. Me pres sa bon nouvel Rwayonm i reste nou travay prensipal.
4:14. Kan nou fer fas avek lopozisyon nou osi nou kapab sirmont sa lafreyer si nou toultan mazin sa Enn tou pwisan.
5:14-19. Lefe ki Gouverner Neemya ti abes li, demontre bon zizman e i pa ti egois, i’n kit en tre bon legzanp pour bann sirveyan. Menm si i ti vreman anvi ki sa pep i obeir Lalwa Bondye, i pa ti zanmen fer dominer pour bann rezon egois. Okontrer i ti enterese avek bann ki ti fatige ek bann ki ti pov. Par demontre zenerozite, Neemya in kit en bon legzanp pour tou bann serviter Bondye.
“O MON BONDYE, MAZIN MWAN POUR LEBYEN”
Toudswit apre ki miray Zerizalenm ti fini fer, Neemya ti met bann baro e i ti fer laranzman pour ki sa lavil i reste an sekirite. I ti fer en lalis bann zanset bann fanmiy. Pret Ezra ti lir sa liv Lalwa Moiz e Neemya ek bann Levit ti eksplik sa Lalwa avek bann dimoun ki ti’n zwenn ansanm “lo laplas piblik ki ti devan Baro Delo.” (Neemya 8:1) Kan zot ti aprann konsernan Lafet bann Payot, zot ti tre kontan pour obzerv sa lafet.
Pandan en lot lafet apre, konman en nasyon bann “desandans Izrael” ti konfes zot pese. Bann Levit ti rapel bann Izraelit lafason ki Bondye ti’n azir avek zot e zot ti fer en serman “pour mars dapre Lalwa sa vre Bondye.” (Neemya 9:1, 2; 10:29) Vi ki ti napa ase dimoun ki ti pe viv Zerizalenm, alor zot ti tir osor pour ki enn dan sak dis dimoun ki ti pe viv an deor lavil i vin reste dan sa lavil. Apre, zot ti fer en seremoni pour dedye zot nouvo miray. Zot ti sitan zwaye ki ‘depi byen lwen bann dimoun ti kapab tann zot.’ (Neemya 12:43) Douz an apre ki i ti’n ariv Zerizalenm, Neemya ti kit sa pei pour kontinyen servi Artakzerses. Deswit apre, bann Zwif ti konmans fer sa ki mal. Kan Neemya ti retourn Zerizalenm, avek determinasyon i ti regle sa move sitiasyon. Avek limilite i ti demann Bondye: “O mon Bondye, mazin mwan pour lebyen.”—Neemya 13:31.
Larepons pour bann Kestyon baze lo Labib:
7:6-67—Akoz lakantite dimoun ki Neemya ti anrezistre ki ti retourn Zerizalenm avek Zorobabel i diferan avek lakantite ki Ezra ti anrezistre pour sak fanmiy? (Ezra 2:1-65) Sa diferans i egziste petet akoz Ezra ek Neemya pa ti ganny zot lenformasyon dan menm sours. Par egzanp, petet lakantite dimoun ki ti anrezistre pour retourn Zerizalenm ti kapab diferan avek lakantite ki ti vreman retournen. Sa diferans dan sa de resi i osi kapab egziste akoz okonmansman serten Zwif pa ti konnen dan ki desandans zot sorti, nek plitar ki zot ti kapab konnen. Me tou le de resi i tonm dakor lo en pwen: Lakantite dimoun ki ti retournen okonmansman ti 42,360, apard bann lesklav ek bann santer.
10:34—Akoz sa pep ti ganny demande pour fourni dibwa? I napa okenn lendikasyon dan Lalwa Moiz ki montre ki zot ti bezwen ofer dibwa konman lofrann. Zot ti ganny demande pour fer sa akoz sa sitiasyon ki ti egziste sa letan. Zot ti bezwen en gran kantite dibwa pour bril bann sakrifis lo lotel. I paret ki ti napa ase Netinim, ki pa ti bann Izraelit, pour servi konman bann lesklav kot tanp. Alors, zot ti tir osor pour fer sir ki i ti toultan annan ase dibwa pour servi.
13:6—Pour konbyen letan Neemya pa ti Zerizalenm? Labib i zis dir ki “en pe letan plitar,” Neemya ti demann lerwa permisyon pour retourn Zerizalenm. Alors i enposib pour konnen ki kantite letan i pa ti Zerizalenm. Me kan i ti retourn Zerizalenm, Neemya ti remarke ki laranzman bann pret pa ti pe marse, e ki zot pa ti pe obzerv Saba. En kantite ti’n marye avek bann madanm etranze, e zot zanfan pa ti ni menm koz langaz bann Zwif. Lefe ki kondisyon ti’n sitan degrade koumsa, i bezwen ki Neemya pa ti la pour en bon pe letan.
13:25, 28—Apard ki fer bann Zwif konnen ki zot ti’n retonm dan lemal, ki lezot keksoz Neemya ti fer pour koriz zot? Neemya ti donn zot en malediksyon kan i ti anons sa zizman ki trouve dan Lalwa Bondye kont zot. I ti ‘tap serten’ petet par demann ki lalwa i pran aksyon kont zot. Pour montre son mekontantman, i ti ‘tir en pe seve lo zot latet.’ I ti osi pous pti zanfan Gran Pret Eliasib, ki ti’n marye avek fiy Sanbala, ki ti en Oronit.
Leson pour nou:
8:8. Kan nou servi Parol Bondye, nou anvi ki nou lansennyman i fer sans. Pour arive fer sa, nou bezwen byen pronons bann mo, byen met lanfaz, byen eksplik bann verse Labib e fer kler son laplikasyon.
8:10. Nou ganny ‘sa lazwa ki sorti kot Zeova,’ kan nou konsyan e satisfer nou bezwen spirityel e kan nou swiv direksyon ki sorti kot Li. Pa i tre enportan ki nou etidye Labib seryezman, asiste renyon regilyerman e partisip dan predikasyon e fer disip avek devouman!
11:2. Sa ti kout serten bokou e anmenn serten dezavantaz kan zot ti kit sa ki zot posede deryer e al Zerizalenm. Bann ki ti pare pour fer sa ti demontre en leta lespri sakrifis. Nou osi nou kapab demontre sa menm leta lespri kan nou ganny sa loportinite pour servi lezot kot bann lasanble e dan lezot lokazyon.
12:31, 38, 40-42. Sant bann kantik i en fason ki nou loue Zeova e montre li ki nou apresye tou sa ki i’n fer pour nou. Dan renyon oubyen lasanble nou devret sant bann kantik avek tou nou leker.
13:4-31. Nou bezwen veye ki lanmour pour larzan, koripsyon, apostazi pa ptit-a-pti afekte nou.
13:22. Neemya ti konnen ki i ti pou bezwen rann kont Bondye. Nou osi nou bezwen konsyan ki nou pou bezwen rann kont Zeova en zour.
I enportan pour annan laprouvasyon Zeova!
En psalmis ti sante: “Si Zeova li menm pa konstri sa lakaz, i pour nanryen ki bann travayer in travay dir lo la.” (Psonm 127:1) Pa liv Neemya i klerman montre ki sa parol i vre!
Leson pour nou i kler. Si nou anvi reisi dan nenport ki aktivite nou angaz nou ladan, nou bezwen annan laprouvasyon Zeova. Eski nou kapab ekspekte ki Zeova pou beni nou si nou pa met vre ladorasyon premye dan nou lavi? Alor, parey Neemya, annou les ladorasyon Zeova ek tou keksoz ki promot sa ladorasyon vin premye dan nou lavi.
[Portre lo paz 28]
‘Leker en lerwa i parey larivyer dan lanmen Zeova’
[Portre lo paz 29]
Neemya, en zonm kouraze e dous, i ariv Zerizalenm
[Portre lo paz 30]
Eski ou lansennyman i fer sans?