En Temwannyaz pour tou Nasyon
En Temwannyaz pour tou Nasyon
“Zot a vin mon bann temwen . . . ziska tou bann landrwa pli elwannyen lo later.”—AKT 1:8.
1. Kan e kote bann disip ti tann pour premye fwa sa profesi ki dan Matye 24:14?
NOU sitan familye avek parol Zezi dan Matye 24:14 ki bokou nou nou konn li parker. Sa i vreman en profesi remarkab! Esey mazin sa ki ti’n pas dan lespri sa bann disip ler zot ti tann sa parol pour premye fwa. I ti lannen 33 nou lepok. I ti’n pas apepre trwa zan depi ki bann disip ti avek Zezi e la aprezan zot ti avek li Zerizalenm. Zot ti’n vwar son bann mirak e zot ti’n ekout son lansennyman. Menm si zot ti kontan sa bann laverite presye ki Zezi ti’n ansenny zot, zot ti konn tre byen ki bokou dimoun pa ti kontan. Zezi ti annan bann gran lennmi ki ti annan bokou lenfliyans.
2. Ki danze ek defi bann disip ti pou rankontre?
2 Zezi ti pe asize lo montanny Zolivye avek kat disip ki ti pe byen ekout li anmezir ki i ti koz lo danze ek defi ki zot ti pou rankontre. Pli boner, Zezi ti’n dir zot ki i pou ganny touye. (Matye 16:21) Aprezan i ti fer li kler ki zot osi zot ti pou eksperyans gro lopozisyon. I ti dir: “Zot pou ganny persekite e met a-mor. Tou dimoun pou ay zot akoz mwan.” Pa fini la. Bann fo profet ti pou anbet bokou dimoun. Serten dimoun ti pou abandonn zot lafwa, trai e ay kanmarad. I ti pou annan menm serten, annefe “en gran kantite” dimoun ki ti pou les zot lanmour pour Bondye e pour son Parol diminyen.—Matye 24:9-12.
3. Akoz parol Zezi dan Matye 24:14 i vreman enpresyonan?
3 I ti apre ki Zezi ti’n mansyonn sa bann sitiasyon dekourazan ki i ti dir en parol ki ti’n bezwen sirprann son bann disip. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Wi, Zezi ti konmans “servi [konman] temwen pour laverite,” Izrael, e sa temwannyaz ti pou kontinyen e tous lemonn antye. (Zan 18:37) Sa i en profesi enpresyonan! Akoz i ti pou en defi zis pour sa temwannyaz ariv “partou dan lemonn.” Aprezan ler ou mazinen ki ‘tou dimoun ti pou ay zot,’ pour zot akonpli sa travay, sa ti pou bezwen en mirak. Lakonplisman sa gro latas ti pou glorifye souvrennte ek pouvwar Zeova. I ti pou osi montre dimoun ki lanmour Zeova i gran, e ki i osi pran pitye e annan pasyans. Deplis, sa travay ti pou donn son bann serviter en loportinite pour montre zot lafwa ek devosyon.
4. Lekel ki ti ganny demande pour rann temwannyaz, e ki parol rekonfortan Zezi ti donnen?
4 Zezi ti fer byen kler avek son bann disip ki zot ti annan en travay tre enportan pour akonpli. Avan ki i ti mont dan lesyel, Zezi ti aparet avek zot e i ti dir: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Byensir, i pa ti pou pran bokou letan pour lezot dimoun asosye avek bann disip. Kantmenm sa, ti napa bokou disip. Zot ti’n bezwen soulaze ler zot ti konnen ki lespri sen pwisan Bondye ti pou donn zot lafors pour akonpli son travay!
5. Ki bann disip pa ti konnen konsernan sa travay predikasyon?
5 Bann disip ti konnen ki zot ti bezwen pres sa bon nouvel e fer dimoun dan ‘tou pep vin bann disip [Zezi].’ (Matye 28:19, 20) Me zot pa ti konnen ziska ki degre sa travay ti pou ale, e parey nou zot pa ti konnen kan lafen ti pou arive. Sa i bann keksoz ki zis Zeova i deside. (Matye 24:36) Ler Zeova i satisfe avek nivo ki sa travay in ganny fer, i pou met en lafen avek sa lemonn mesan. Se selman sa letan ki bann Kretyen pou konpran ki sa travay predikasyon in ganny akonpli lo sa nivo ki Zeova ti oule. Sa bann premye disip pa ti kapab mazin ditou ziska ki degre sa temwannyaz ti pou ganny donnen dan sa letan lafen.
Sa Temwannyaz dan premye Syek
6. Ki ti arive zour Lapannkot lannen 33 N.L., e en pe letan apre?
6 Dan premye syek, sa travay predikasyon e fer disip ti anmenn bann rezilta remarkab. Zour Lapannkot lannen 33 N.L., i ti annan apepre 120 disip dan en lasanm anler Zerizalenm. Lespri sen Bondye ti desann lo zot e zapot Pyer ti donn en diskour ankourazan. I ti eksplik sinifikasyon sa mirak e apepre 3,000 dimoun ti vin krwayan e ti batize. Sa ti zis konmansman. Menm si bann sef relizye ti determinen dan zot zefor pour aret predikasyon sa bon nouvel, ‘toulezour Zeova ti azout avek zot group tou bann ki ti pe ganny sove.’ Pa bokou letan apre, “lakantite krwayan ti ariv anviron 5000 zonm.” Apre sa, “en pli gran kantite dimoun, zonm ek fanm ti krwar e aksepte Senyer.”—Akt 2:1-4, 8, 14, 41, 47; 4:4; 5:14.
7. Akoz ler Korney ti konverti sa ti en devlopman enportan?
7 Dan lannen 36 N.L. en lot devlopman enportan ti arive ler Korney ki pa ti en Zwif ti konverti e batize. Ler Zeova ti diriz zapot Pyer ver sa zonm ki ti annan respe pour Bondye, Zeova ti pe montre ki lord Zezi pour fer dimoun dan ‘tou pep vin bann disip’ pa ti aplik zis avek bann Zwif ki ti pe viv dan diferan pei. (Akt 10:44, 45) Ki mannyer bann zonm responsab dan kongregasyon sa letan ti reazir anver sa devlopman? Ler bann zapot ek ansyen ti konpran ki bann dimoun ki pa ti Zwif osi i bezwen antann sa bon nouvel, zot ti glorifye Bondye. (Akt 11:1, 18) Antretan, sa travay predikasyon ti pe kontinyen anmenn rezilta parmi bann Zwif. Detrwa lannen plitar, posibleman anviron lannen 58 N.L., apard ki bann krwayan ki pa Zwif ti annan ‘plizyer milye Zwif ki ti’n adopte lafwa.’—Akt 21:20.
8. Ki lefe sa bon nouvel i fer lo bann dimoun?
8 Menm si bann rapor lo lakantite dimoun ki ti aksepte lansennyman bann premye Kretyen i enpresyonan, nou pa devret zanmen oubliy sa bann dimoun ki sa bann sif i reprezante. Sa mesaz sorti dan Labib ki zot ti tande ti pwisan. (Ebre 4:12) I ti sanz en kantite lavi sa bann dimoun ki ti aksepte li. Zot ti met zot lavi annord, devlop sa nouvo personnalite, e zot ti rekonsilye avek Bondye. (Efezyen 4:22, 23) Ozordi osi i menm zafer. Deplis, sa bann ki pe aksepte sa bon nouvel zot tou zot annan sa lesperans merveye pour viv pour touzour.—Zan 3:16.
Travay ansanm avek Bondye
9. Ki privilez ek responsabilite bann premye Kretyen ti rekonnet zot annan?
9 Bann premye Kretyen ti rekonnet ki zot pa ti pe akonpli tousala par zot prop lafors. Okontrer zot ti rekonnet ki “pisans Sent-Espri” ti pe siport zot dan zot travay. (Romen 15:13, 19) Se gras a Zeova ki bann premye Kretyen ti pe progrese. Anmenmtan, sa bann Kretyen ti konnen ki zot annan sa privilez ek responsabilite pour “travay ansanm [avek] Bondye.” (1 Korentyen 3:6-9) Alor, an armoni avek konsey Zezi, zot ti donn tou sa ki zot annan dan sa travay ki zot ti’n ganny demande pour fer.—Lik 13:24.
10. Ki zefor serten premye Kretyen ti fer pour donn en temwannyaz avek tou dimoun?
10 Pol ki ti en “zapot pour bann pep non-Zwif” ti vwayaz plizyer milye kilomet apye e lo bato. I ti etablir bokou kongregasyon dan bann provens Romen dan Lazi ek Lagres. (Romen 11:13) I ti osi al Ronm e petet menm Lespanny. Antretan, zapot Pyer, ki li ti annan responsabilite pour anons “levanzil avek bann sirkonsi” ti vwayaz dan lot direksyon pour al Babilonn, kot bokou Zwif ti reste sa letan. (Galat 2:7-9; 1 Pyer 5:13) Parmi sa kantite lezot ki ti travay dir dan travay Senyer ti annan bann madanm parey Trifenn ek Trifoz. En lot madanm apele Persid, ti osi fer bokou dan “travay pour Senyer.”—Romen 16:12.
11. Ki mannyer Zeova ti beni zefor bann disip?
11 Zeova ti beni en kantite zefor sa bann dimoun ek lezot travayer devoue. Dan mwens ki 30 tan apre ki Zezi ti predir ki sa bon nouvel pou ganny anonse partou dan lemonn, Pol ti ekrir ki “sa Levanzil” in ganny anonse “dan lemonn antye.” (Kolosyen 1:23) Eski lafen ti arive apre sa? Dan en sans, wi. I ti ariv lo sa sistenm Zwif dan lannen 70 N.L., ler larme Romen ti detrir Zerizalenm avek son tanp. Me Zeova ti’n deside ki en pli gran temwannyaz pou ganny fer avan i met en lafen avek sa lemonn antye kontrole par Satan.
Sa Temwannyaz ozordi
12. Ki mannyer bann premye Etidyan Labib ti konpran sa lord pour prese?
12 Vre ladorasyon ti ganny reetablir ver lafen 19 vyenm syek, apre ki fo lansennyman relizye ti’n dominen pour en bon pe letan. Bann Etidyan Labib, parey bann Temwen Zeova ti ganny apele sa letan, ti klerman konpran sa lord pour fer disip partou dan lemonn. (Matye 28:19, 20) Apartir 1914, ti annan apepre 5,100 dimoun ki ti partisip aktivman dan travay predikasyon, e sa bon nouvel ti’n tous 68 pei. Me sa bann premye Etidyan Labib pa ti konpran totalman sinifikasyon Matye 24:14. Alafen 19 vyenm syek, Labib ki kontyen sa bon nouvel oubyen levanzil, ti’n ganny tradwir e enprimen par bann sosyete Labib dan bokou langaz e distribye partou dan lemonn. Alor avan bann lannen 1920, bann Etidyan Labib ti krwar ki tou nasyon in fini deza ganny en temwannyaz.
13, 14. Ki sa pli bon konprenezon lo lavolonte ek plan Bondye ki ti ganny prezante dan en nimero Latour Veyer 1928?
13 Ptit-a-pti, Zeova ti donn son pep en pli bon konprenezon lo son lavolonte ek plan. (Proverb 4:18) Latour Veyer le 1 Desanm 1928 an Angle ti dir: “Eski nou kapab dir ki [sa] distribisyon Labib in akonpli sa travay pour pres levanzil lo Rwayonm ki ti ganny predir? San okenn dout, non! Kantmenm Labib in ganny distribye, i ankor neseser pour sa pti group temwen Bondye lo later enprim piblikasyon ki eksplik [plan] Bondye e pour vizit bann lakour kot sa bann Labib in ganny kite. Si zot pa fer sa, dimoun pa pou konn konsernan letablisman Rwayonm Mesi dan nou letan.”
14 Sa nimero Latour Veyer ti azoute: “An 1920, . . . bann Etidyan Labib ti arive konpran byen profesi nou Senyer dan Matye 24:14. Sa moman zot ti realize ki ‘sa levanzil’ ki ti pou ganny prese dan tou nasyon, pa ti en levanzil konsernan en rwayonm ki pe vini me en levanzil ki anonse ki Kris in vin Lerwa.”
15. Dan ki fason sa travay predikasyon in ogmante depi bann lannen 1920?
15 Sa “pti group temwen” dan bann lannen 1920 pa ti reste ptipti. Dan bann lannen ki ti swiv, en “gran lafoul” ‘lezot mouton’ ti ganny idantifye e zot ti konmans ganny rasanble. (Revelasyon 7:9; Zan 10:16) Ozordi, i annan apepre 6,613,829 proklanmater sa bon nouvel dan 235 pei. Vreman sa profesi in trouv en lakonplisman merveye! Sa i premye fwa dan listwar imen ki “sa Bonn Nouvel Rwayonm” in ganny prese ziska sa degre. Zanmen avan i’n annan sitan bokou serviter fidel Zeova lo later.
16. Kwa ki’n ganny akonpli dan sa lannen servis ki’n pase? (Vwar latab lo paz 23-26.)
16 Ansanm, sa gran lafoul Temwen in reste tre okipe pandan lannen servis 2005. Zot in depans plis ki en bilyon er-d-tan pour anons sa bon nouvel dan 235 pei. Zot in fer plizyer milyon retourn vizit ek letid Labib. Sa travay in ganny akonpli par bann Temwen Zeova, ki’n pare pour donn zot letan ek resours pour partaz Parol Bondye avek lezot. (Matye 10:8) Par mwayen son lespri sen pwisan, Zeova pe kontinyen donn lafors son bann serviter pour akonpli son lavolonte.—Zekarya 4:6.
Travay dir pour donn en Temwannyaz
17. Ki mannyer pep Bondye pe reazir anver parol Zezi konsernan pres sa bon nouvel?
17 Menm si preski 2,000 an in pase depi ki Zezi ti dir ki sa bon nouvel pou ganny anonse, devouman pep Bondye pour fer sa travay pa’n diminyen. Nou konnen ki ler nou persevere pour fer sa ki byen, nou pe reflekte lanmour, mizerikord ek pasyans Zeova. Parey li, nou pa oule personn i ganny detrir me nou anvi ki dimoun i repantir e rekonsilye avek Zeova. (2 Korentyen 5:18-20; 2 Pyer 3:9) Pouse par lespri Bondye, bann Temwen Zeova i kontinyen avek devouman pour anons sa bon nouvel partou dan lemonn. (Romen 12:11) An rezilta, dan tou kwen lemonn dimoun pe aksepte laverite e pe swiv bon gidans sorti kot Zeova. Annou vwar detrwa legzanp.
18, 19. Rakont serten leksperyans bann dimoun ki’n aksepte sa bon nouvel.
18 Charles ti en fermye dan was Kenya. An 1998 i ti vann plis ki 8,000 kilogranm taba e pour sa zot ti donn li en sertifika konman sa pli bon prodikter taba. Sa letan i ti konmans etidye Labib. En pe letan apre, i ti realize ki si en dimoun i enplike dan prodiksyon taba i pe dezobei parol Zezi, ki dir nou devret kontan nou prosen. (Matye 22:39) Ler i ti realize ki ‘sa pli bon prodikter taba’ ti an realite sa ‘pli gran kriminel,’ Charles ti aroz son plantasyon taba avek pwazon. I ti progrese ziska i ti dedye son lavi e batize. Ozordi i en pionye ordiner ek en asistan ministeryel.
19 I tre evidan ki Zeova pe sekwe bann nasyon par mwayen sa travay predikasyon mondyal, e bann keksoz presye, setadir bann dimoun, pe vini. (Agai 2:7) Pedro, ki reste Portigal, ti antre dan en kouvan ler i ti annan 13 zan. I ti anvi vin en misyonner e ansenny lezot Labib. Me pa bokou letan apre, i ti kit sa kouvan akoz zot pa ti diskit preski ditou lo Labib dan son laklas. Sis an plitar i ti antre dan en liniversite Lisbonn pour etidye psikolozi. Sa letan i ti pe reste avek son tantin, ki en Temwen Zeova, e i ti ankouraz li pour etidye Labib. Me Pedro pa ti asire si Bondye i egziste, e i pa ti ni kapab fer en desizyon si i pou etidye Labib oubyen non. Lefe ki i pa ti kapab fer en desizyon, i ti al koz avek son profeser psikolozi. Sa profeser ti dir li ki dapre bann prensip psikolozi, en dimoun ki pa kapab fer desizyon i tant pour fer ditor son lekor. Ler i ti tann sa, Pedro ti deside pour etidye Labib. Pa bokou letan pase i ti batize e ozordi i pe kondwir bann letid Labib.
20. Akoz nou kontan ki sa travay predikasyon pe ganny akonpli lo sa nivo ozordi?
20 Nou pa ankor konnen ziska ki degre sa temwannyaz pou ganny donnen dan lemonn antye. Nou pa ni konn zour ek ler ki lafen pou vini. Selman nou konnen ki i pou byento. Nou kontan akoz sa travay predikasyon lo later antye ek lezot laspe sa siny i montre ki ler pe arive pour Rwayonm Bondye ranplas bann gouvernman imen. (Danyel 2:44) Sak lannen ki pase, plizyer milyon dimoun pe ganny en loportinite pour montre zot pozisyon anver sa bon nouvel, e sa i glorifye nou Bondye, Zeova. Wi, annou determinen pour reste fidel e ansanm avek nou bann frer ek ser partou dan lemonn kontinyen travay dir pour anons sa bon nouvel avek tou dimoun. Ler nou fer sa, nou pou sov nou menm ek sa bann ki ekout nou.—1 Timote 4:16.
Eski ou rapel?
• Akoz Matye 24:14 i en profesi remarkab?
• Ki zefor bann premye Kretyen ti fer pour prese, e ki rezilta zot ti gannyen?
• Ki mannyer bann Etidyan Labib ti arive konpran sa nesesite pour pres dan lemonn antye?
• Kwa ki’n enpresyonn ou ler ou egzamin aktivite pep Zeova pour sa lannen servis ki’n pase?
[Kestyon]
[Tablo lo paz 23-26]
RAPOR MONDYAL LANNEN SERVIS 2005 BANN TEMWEN ZEOVA
(Vwar piblikasyon)
[Portre lo paz 20]
Zeova ti gid Pyer pour pres avek Korney ek son fanmiy
[Portre lo paz 21]
Pol ti vwayaz plizyer milye kilomet lo lanmer e lo later pour pres sa bon nouvel