Pa les Dyab antre dan ou Lavi

“Pa donn Dyab en sans.”—EFEZYEN 4:27, Byington.

1. Akoz bokou dimoun i doute si Dyab i egziste?

POUR plizyer syek, en kantite dimoun ti mazin Dyab konman en kreatir ki’n sanz tout an rouz, ki annan korn ek sabo, avek en fourset pare pour zet bann move dimoun dan lanfer. Me Labib pa ansenny sa. San dout sa bann fo konsep in fer plizyer milyon dimoun doute si vreman Dyab i egziste, oubyen mazinen ki i senpleman lemal.

2. Ki serten lenformasyon Labib i fourni lo Dyab?

² I annan en kantite levidans dan Labib ki prouve ki Dyab i vreman egziste. Zezi Kri ti vwar li parmi lezot lanz dan lesyel e i ti menm aparet avek li lo later. (Zob 1:6; Matye 4:4-11) Labib pa dir ki mannyer sa lanz ti apele avan son rebelyon. Me i ganny apele Dyab akoz i ti koz manti pour sali repitasyon Bondye. I osi ganny apele Satan akoz i ti opoz Zeova. Labib i osi refer avek Satan konman “serpan lantikite,” petet akoz i ti servi en serpan pour anbet Ev. (Revelasyon 12:9; 1 Timote 2:14) I osi ganny apele “sa enn mesan.”—Matye 6:13, NW. *

3. Ki kestyon nou pou egzaminen?

³ Konman bann serviter Zeova nou pa pou zanmen anvi vin parey Satan dan okenn fason, li ki pli gran lennmi sa sel vre Bondye. Alor nou bezwen pran aker konsey Pol: “Pa donn Dyab en sans.” (Efezyen 4:27, Byington) Ki serten latitid dan Satan ki nou pa devret imite?

Pa imit sa pli gran Manter

4. Ki mannyer “sa enn mesan” ti koz manti lo Bondye?

⁴ “Sa enn mesan” i merite ganny apele Dyab, akoz i en manter. I koz manti, i annan move lentansyon e i aranz keksoz pour sali repitasyon en lot dimoun. Bondye ti donn Adan sa lord: “Me an sa ki konsern sa pye konnesans bon e move, ou pa devret manze, parski sa zour ki ou manz son fri, sirman ou pou mor.” (Zenez 2:17) Ev osi ti konn sa, me par mwayen en serpan, Satan ti dir li: “Non, zot pa pou mor. Akoz Bondye i konnen, ki sa zour menm ki zot pou manz li, zot lizye pou sirman ouver e sirman zot pou vin parey Bondye, zot pou konn sa ki bon ek sa ki move.” (Zenez 3:4, 5) Sa ti en mansonz ki ti’n ganny fer avek move lentansyon kont Bondye!

5. Akoz Dyotref ti bezwen rann kont pour mansonz ki i ti pe fannen?

⁵ Bann Izraelit ti ganny sa lord pour pa malparl lezot. (Levitik 19:16) Zapot Zan ti ekrir lo en dimoun dan son letan ki ti  kontan propaz mansonz: “Mon’n ekri en let [kongregasyon]; me Dyotref ki kontan plas sef, pa aksepte mon lotorite. Pour sa rezon, si mon vini, mon pou montre tou sa ki i pe fer, bann parol mesanste ek kalomni ki i pe dir lo mwan.” (3 Zan 9, 10) Dyotref ti pe fann mansonz lo zapot Zan e i ti pou bezwen rann kont pour sa. Lekel sa Kretyen fidel ozordi ki ti pou kontan vin parey Dyotref e imit Satan, sa pli gran manter?

6, 7. Akoz nou pa devret koz manti lo lezot?

⁶ Souvannfwa dimoun i koz manti e fer fo lakizasyon lo bann serviter Zeova. “Bann sef-pret ek bann profeser lalwa ki ti pe debout lanmenm ti akiz [Zezi] avek tou zot lafors.” (Lik 23:10) Gran Pret Ananyas ek lezot ti fer fo lakizasyon kont Pol. (Akt 24:1-8) Labib i dekrir Satan konman “lakizater nou bann frer devan Bondye lizour konman aswar.” (Revelasyon 12:10) Sa bann frer ki pe ganny akize, i bann Kretyen swazir dan bann dernyen zour.

⁷ Bann Kretyen pa devret koz manti oubyen fer fo lakizasyon lo lezot. Me sa i kapab arive si nou blanm en lot dimoun san ki nou annan tou lenformasyon. Dapre Lalwa Moiz, en dimoun ki ti akiz en lot san laprev ti kapab ganny met amor. (Egzod 20:16; Deterononm 19:15-19) Deplis “en fo temwen ki pe propaz mansonz,” i enn parmi bann keksoz ki Zeova i deteste. (Proverb 6:16-19) Alors, definitivman nou pa pou anvi imit sa pli gran manter ek fo lakizater.

Rezet move Semen sa premye Kriminel

8. Ki mannyer Dyab ti “en kriminel” depi okonmansman?

⁸ Dyab i en kriminel. Zezi ti dir: “Depi okonmansman i en kriminel.” (Zan 8:44) Satan ti vin en kriminel ler i ti fer Adan ek Ev rebel kont Bondye. I ti fer zot ek zot desandans perdi lavi. (Romen 5:12) Pour arive fer tousala i bezwen ki Dyab i en vre personnaz, pa senpleman lemal.

9. Konman nou kapab vin en kriminel, dapre 1 Zan 3:15?

⁹ “Ou pa devret touy personn.” Sa i enn parmi sa dis komannman ki nasyon Izrael ti gannyen. (Deterononm 5:17) Kan i ti pe ekrir bann Kretyen, Pyer ti dir: “Personn parmi zot pa [devret] soufer konman en kriminel.” (1 Pyer 4:15) Alors, bann serviter Zeova pa pou touy personn. Me Bondye pou vwar nou koupab si nou ay enn nou frer oubyen ser Kretyen e swete ki i mor. Zapot Zan ti ekrir: “Dimoun ki ay son frer i en kriminel e zot konnen ki napa kriminel ki posed lavi eternel dan li.” (1 Zan 3:15) Bann Izraelit ti ganny sa komannman: “Ou pa devret ay ou frer dan ou leker.” (Levitik 19:17) Omoman ki en problenm i leve antre nou, nou devret regle zot san tarde. Si non, Satan sa kriminel i kapab afekte sa linite ki egziste parmi nou.—Lik 17:3, 4.

Reziste sa pli gran Manter

10, 11. Ki nou bezwen fer pour reziste sa pli gran manter?

¹⁰ Dyab i en manter. Zezi ti dir ki “ler i koz manti, i koz selon son natir, akoz i manter e papa tou mansonz.” (Zan 8:44) Satan ti koz manti avek Ev. Me Zezi li, i ti vin dan lemonn pour servi temwen pour laverite. (Zan 18:37) Konman bann disip Kris, si nou anvi reziste Dyab, nou pa kapab koz manti e fer trik. Nou bezwen “koz laverite.” (Zekarya 8:16; Efezyen 4:25) “Zeova sa Bondye laverite” i beni zis son bann Temwen ki koz laverite. Bann dimoun mesan pa kapab reprezant li.—Psonm 31:5; 50:16; Izai 43:10.

¹¹ Vi ki nou’n aprann laverite dan Labib, nou lib akoz nou’n ganny libere avek bann mansonz Satan. Alors, si nou vreman apresye sa liberte nou pou fer tou sa ki nou kapab pour reste lo “semen laverite.” (2 Pyer 2:2; Zan 8:32) Lansennyman Kretyen i baze lo ‘laverite dan levanzil.’ (Galat 2:5, 14) Pour ganny lavi i depan lo si nou pe “swiv laverite,”  reste atase avek laverite e reziste “papa tou mansonz.”—3 Zan 3, 4, 8.

Reziste sa pli gran Rebel

12, 13. Ki mannyer nou devret tret bann fo ansennyan?

¹² Dyab ti deza dan laverite. Me Zezi ti dir: “I pa’n zanmen kontan laverite, akoz napa laverite dan li.” (Zan 8:44) Sa pli gran rebel in vir kont “Bondye laverite,” e i pa pou zanmen sanze. Serten Kretyen dan premye syek ti tonm ‘dan pyez Dyab.’ Aparaman zot ti vin son viktim akoz zot ti’n ganny anbete e ganny trennen an deor laverite. Alors, Pol ti ankouraz Timote, pour ansenny zot avek ladouser pour ki zot kapab repran spirityelman e sorti dan latrap Satan. (2 Timote 2:23-26) Byensir, i pli byen pour reste ferm dan laverite pour ki nou pa zanmen tonm dan latrap bann ki’n rezet laverite.

¹³ Lefe ki zot ti ekout Dyab e zot pa ti rezet son bann mansonz, Adan ek Ev ti osi rebel kont Bondye. Alors, eski nou devret ekout bann ki’n rezet oubyen kritik laverite, lir zot bann magazin oubyen al egzamin zot sit lo Internet? Si nou kontan Bondye ek laverite, nou pa pou fer sa. Nou pa devret les sa bann dimoun antre se nou, oubyen menm dir zot bonzour. Akoz si nou fer sa, nou pe ‘partisip avek zot dan zot bann move laktivite.’ (2 Zan 9-11) Fotespere ki nou pa zanmen les nou ganny anbete par bann trik Satan e abandonn “semen laverite” zis pour swiv bann fo ansennyan. Sa bann fo ansennyan ki oule “anmenn bann lansennyman mansonz e destrikter,” e zot pe esey ‘eksplwat nou par bann fo zistwar pour trik nou.’—2 Pyer 2:1-3.

14, 15. Kont kwa Pol ti averti Timote ek bann ansyen dan kongregasyon Efez?

¹⁴ Pol ti dir bann ansyen dan Kongregasyon Efez: “Vey byen zot lekor e pran swen troupo ki Sent-Espri in konfye zot konman bann gardyen. Pran swen [kongregasyon] ki Bondye in gannyen par disan son prop Garson. Mon konnen ki apre mon depar pou annan bann zonm parey loulou feros ki pou vin parmi zot e ki pa pou eparny personn dan troupo. Menm parmi zot pou annan dimoun ki pou leve pour ansenny bann mansonz pour fer bann krwayan swiv zot.” (Akt 20:28-30) Avek letan, serten dan kongregasyon ti konmans “ansenny bann mansonz.”

¹⁵ Apepre lannen 65 N.L., zapot Pol ti ankouraz Timote pour “anons byen mesaz laverite.” Pol ti ekrir: “Evit bann diskisyon vid, kontrer avek lafwa; sa i antrenn dimoun pli lwen avek Bondye. Sa bann kalite diskisyon i manz lekor konman lakangrenn. Parmi sa bann dimoun i annan Imene ek Filet, ki’n ekart zot avek laverite e an dizan ki larezireksyon in fini pase, e an fezan sa, zot pe detourn lafwa serten dimoun.” Laverite ti pe deza ganny atake! Pol ti azoute: “Pourtan, sa baz solid ki Bondye in poze i reste ferm.”—2 Timote 2:15-19.

16. Kwa ki’n ed nou reste fidel avek Bondye ek son Parol, menm si Satan pe esey anbet nou?

 ¹⁶ Souvan Satan in servi serten dimoun pour esey detrir vre ladorasyon. Me son lesey pa’n marse. Ver lannen 1868, Charles Russell, ti konmans egzamin bann lansennyman bann larelizyon Kretyen ki i ti’n aksepte pour plizyer lannen. Dan son egzaminasyon i ti dekouver plizyer mal enterpretasyon lo Labib. Frer Russell avek enn de lezot ki ti pe rod laverite, ti form en group letid Labib Pittsburgh, Pennsylvania, Letazini. Ozordi i fer apepre 140 an depi ki sa group in formen, e bann serviter Zeova in ganny plis konnesans e zot lanmour pour Bondye ek son Parol in ogmante. Menm si Satan pe esey anbet zot, lesklav fidel e pridan in reste vizilan spirityelman. Zot vizilans in ed bann vre Kretyen pour reste fidel avek Zeova ek son Parol.—Matye 24:45.

Pa zanmen les Sef Lemonn kontrol ou

17-19. Lekel sa lemonn ki anba pouvwar Dyab e akoz nou pa devret kontan li?

¹⁷ Satan i osi servi en lot mwayen pour fer nou tonm dan son latrap. I esey fer nou kontan sa lemonn, sa lemonn enzis ki elwannyen avek Bondye. Zezi ti dekrir Dyab konman “sa enn ki gouvern lemonn,” e i ti dir ki “i napa okenn pouvwar lo” li. (Zan 14:30) Annou pa les Satan poz son lanmen lo nou! Sirman nou konnen ki “lemonn antye i dan pouvwar Dyab.” (1 Zan 5:19) Se pour sa rezon ki i ti kapab ofer Zezi “tou bann rwayonm partou lo later.” Zezi ti pou ganny tousala si i ti ador Satan zis enn fwa. Me i ti rezet net son lof. (Matye 4:8-10) Sa lemonn ki Satan pe dirize i ay bann disip Kris. (Zan 15:18-21) I pa drol alors ki zapot Zan ti averti nou pour pa kontan sa lemonn!

¹⁸ Zan ti ekrir: “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn. Lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:15-17) Nou pa devret kontan sa lemonn, akoz dimoun dan lemonn zot viv zis pour akonpli zot bann move dezir. Deplis sa bann move dezir i tou lekontrer avek bann standar Zeova.

¹⁹ Me si dan nou leker nou kontan sa lemonn? Si sa i leka, annou priy Bondye pour li ed nou pa kontan sa lemonn e rezet son bann move dezir. (Galat 5:16-21) Si nou toultan gard antet ki sa bann “move lespri” i bann dirizan envizib ki pe diriz sa lemonn enzis, sirman nou pou kontinyen fer zefor pour nou pa “ganny sali” par sa lemonn.—Zak 1:27; Efezyen 6:11, 12; 2 Korentyen 4:4.

20. Akoz nou kapab dir ki nou “pa fer parti lemonn”?

²⁰ Kan i ti pe koz lo son bann disip, Zezi ti dir: “Zot pa fer parti lemonn parey mwan mon pa fer parti lemonn.” (Zan 17:16) Bann Kretyen swazir ansanm avek bann ki annan lespwar pour viv lo later, i fer bokou zefor pour reste prop moralman, spirityelman e reste lwen avek sa lemonn. (Zan 15:19; 17:14; Zak 4:4) Sa lemonn enzis i ay nou akoz nou reste separe avek li e ‘pres lazistis.’ (2 Pyer 2:5) I vre, nou pe viv parmi bann dimoun lemonn ki fer bann akt imoral, adilter, ki akapar byen zot prosen, ador zidol, vole, koz manti e ki soular. (1 Korentyen 5:9-11; 6:9-11; Revelasyon 21:8) Me nou pa respir sa ler dan sa “lemonn,” akoz nou pa ganny kontrole par sa lafors ki pous dimoun pour fer sa ki mal.—1 Korentyen 2:12.

Pa les Dyab antre dan ou Lavi

21, 22. Ki mannyer ou kapab aplik konsey ki Pol in donnen dan Efezyen 4:26, 27?

²¹ Olye les ‘lespri lemonn’ motiv nou, nou  ganny motive par lespri Bondye, ki fer nou devlop bann kalite parey lanmour ek kontrol lo nou lekor. (Galat 5:22, 23) Sa bann kalite i ed nou pour reziste bann latak ki Satan i anvoye lo nou pour detrir nou lafwa. Satan i anvi nou ankoler “zis pour fer sa ki mal,” me lespri Bondye i ed nou pour “met lakoler dekote e rezet firer.” (Psonm 37:8) I vre ki parfwa nou kapab annan bon rezon pour ankoler. Me Pol i donn nou sa konsey: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.”—Efezyen 4:26, 27.

²² Si nou pa kontrol nou lakoler sa i kapab fer nou fer pese. Si nou kontinyen ankoler, sa i kapab donn Dyab en sans pour kree diskord dan kongregasyon oubyen pous nou pour fer bann move aksyon. Anfet nou pa devret tarde pour regle okenn malantandi ki’n arive, dan lafason ki Bondye i oule. (Levitik 19:17, 18; Matye 5:23, 24; 18:15, 16) Alors, annou les lespri Bondye gid nou. Annou demontre kontrol lo nou lekor e pa zanmen les lakoler dire ziska ki i devlop dan nou rankin, laenn oubyen lanvi pour fer lezot ditor.

23. Ki bann kestyon nou pou egzaminen dan lartik swivan?

²³ Nou’n diskit serten move latitid Satan ki nou pa devret imite. Me serten dimoun ki pou lir sa lartik i kapab demande: Eski nou devret per Satan? Akoz i fer bann Kretyen ganny persekite? E ki mannyer nou kapab anpes li ganny nou?

[Not anba lo paz]

Ki ou pou reponn?

• Akoz nou pa devret koz manti lo personn?

• An akor avek 1 Zan 3:15, ki mannyer nou kapab evite vin bann kriminel?

• Konman nou devret konsider bann ki’n rezet laverite, e akoz?

• Akoz nou pa devret kontan lemonn?

[Questions]

[Portre lo paz 5]

Nou pa pou zanmen les Satan detrir nou linite Kretyen

[Portre lo paz 7]

Akoz zapot Zan ti ankouraz nou pour pa kontan lemonn?