Bon Moman Detant ki fer nou Dibyen
Bon Moman Detant ki fer nou Dibyen
“Ki ou manze, oubyen ki ou bwar, ou nenport kwa ki ou fer fer tou pour laglwar Bondye.”—1 KORENTYEN 10:31.
1, 2. Akoz nou kapab konsider bann bon moman konman en “kado sorti kot Bondye,” me selman ki lavertisman Labib i klerman fer resorti?
I TOUTAFE normal pour nou anvi fer bann aktivite ki rann nou zwaye. Nou Bondye ere, Zeova, i anvi ki nou zwaye dan lavi, e i donn nou bokou keksoz pour fer sa posib. (1 Timote 1:11, NW; 6:17) Lerwa Salomon ki ti annan bokou lasazes ti ekrir: “Mon’n aprann ki napa nanryen pli byen pour zot ki pour rezwir e fer sa ki byen diran zot lavi; e osi ki tou zonm i devret manze, bwar e vwar rezilta pour tou son dir travay. Sa i en kado sorti kot Bondye.”—Eklezyast 3:12, 13.
2 I gou ler nou pas letan avek nou fanmiy oubyen zanmi pour koz lo bann bon travay ki nou’n akonpli. Wi, nou kapab konsider sa bann moman konman en “kado sorti kot Bondye.” Me byensir sa pa vedir ki nou bezwen anmize san en kontrol zis akoz Bondye i donn nou bokou keksoz. Dapre Labib i mal pour bwar tro bokou, manz tro bokou e annan en move konportman seksyel. Labib i averti ki bann dimoun ki kontinyen fer sa bann keksoz “pa pou erit Rwayonm Bondye.”—1 Korentyen 6:9, 10; Proverb 23:20, 21; 1 Pyer 4:1-4.
3. Kwa ki pou ed nou pa tonm dormi spirityelman e gard antet gran zour Zeova?
3 Dan sa bann dernyen zour difisil, plis ki zanmen avan, bann Kretyen i bezwen fer byen atansyon dan sa lemonn koronpi pour ki nou pa fer parey avek sa lemonn. (Zan 17:15, 16) Zis parey Labib ti predir, dimoun ozordi i “kontan plezir plis ki Bondye.” Zot telman kontan plezir ki zot pa “pran kont” levidans ki en ‘gran ladetres’ i lanmenm devan nou. (2 Timote 3:4, 5; Matye 24:21, 37-39) Zezi ti averti son bann disip: “Fer byen atansyon zotmenm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.” (Lik 21:34, 35) Nou ki serviter Bondye, nou determinen pour pa inyor lavertisman Zezi. Dimoun dan sa lemonn konmela pa enterese avek Bondye, me nou, nou fer tou nou posib pour pa tonm dormi spirityelman e gard antet gran zour Zeova.—Tsefanya 3:8; Lik 21:36.
4. (a) Akoz i difisil pour trouv bann divertisman ki apropriye pour Kretyen? (b) Ki konsey nou anvi aplike ki trouve dan Efezyen 5:15, 16?
4 I pa fasil pour evit bann move keksoz dan sa lemonn, akoz Satan in fer zot sitan atiran e sitan fasil pour fer sa bann keksoz. I sirtou difisil pour nou ler nou pe rod en divertisman oubyen en detant. Laplipar divertisman dan sa lemonn in ganny fer avek lentansyon pour atir bann move dezir. (1 Pyer 2:11) Nou kapab trouv bann move divertisman dan bann landrwa piblik me zot osi kapab antre dan nou lakour par mwayen televizyon, magazin, liv, Internet ek film. Pour sa rezon, Parol Bondye i donn nou sa bon konsey: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efezyen 5:15, 16) Si nou swiv byen sa konsey, nou kapab asire ki bann move divertisman pa pou atir nou, pran tou nou letan, menm detrir nou relasyon avek Zeova e finalman fer nou ganny detrir!—Zak 1:14, 15.
5. Ki sa keksoz ki fer nou ganny sa vre repo?
5 Lefe ki bann Kretyen i tre okipe dan lavi, i normal ki parler zot santi zot anvi fer serten aktivite ki detann zot. Annefe, Eklezyast 3:4 i dir ki i annan “en letan pour riye” e “en letan pour sotaye.” Alor sa i montre ki Labib pa konsider moman detant konman en gaspiy letan. Me ler nou detann nou, nou devret fer li dan en fason ki fer nou dibyen, me pa pour afekte nou spirityalite oubyen enterfer avek nou bann aktivite spirityel. Bann Kretyen matir in aprann par leksperyans ki ler nou fer keksoz pour lezot sa i anmenn plis lazwa. Pour zot, fer lavolonte Bondye i premye keksoz dan zot lavi e zot ganny vre “repo” par aksepte zoug Zezi ki fasil.—Matye 11:29, 30; Akt 20:35.
Swazir Moman Detant apropriye
6, 7. Kwa ki kapab ed ou konnen si en serten detant i apropriye oubyen non?
6 Ki mannyer nou kapab asire si en serten detant i apropriye pour en Kretyen? Bann paran i devret gid zot zanfan dan sa domenn e parler bann ansyen osi i kapab ede. Me an realite pa fodre ki lezot i dir nou si en serten liv, film, zwe, ladans oubyen sanson i bon oubyen non. Pol ti dir ki bann dimoun matir i kapab servi zot lespri pour “konn fer diferans ant sa ki byen ek sa ki mal.” (Ebre 5:14; 1 Korentyen 14:20) Labib li i donn nou bann prensip ki kapab gid nou. Nou konsyans ki’n ganny formen avek Parol Bondye pou ed nou si nou ekout li.—1 Timote 1:19.
7 Zezi ti dir ki nou pou “rekonnet en pye dibwa par son fri.” (Matye 12:33) Nou devret rezet okenn aktivite detant ki kapab fer nou kontan vyolans, imoralite seksyel, oubyen grigri. Si sa aktivite i met an danze nou lavi oubyen lasante, si i anmenn problenm larzan, dekourazman oubyen fer lezot tonbe, dan sa ka, sa divertisman pa apropriye. Zapot Pol ti averti nou ki si nou bles konsyans nou frer ek ser, nou pe fer pese. Pol ti ekrir: “Par en tel aksyon, ou fer pese kont ou bann frer, e ou bles zot konsyans ki feb, e ou fer pese kont Kris. Alor si sa ki mon manze i fer mon frer tonm dan pese, mon pa pou manz lavyann, pour ki mon pa fer mon frer tonbe.”—1 Korentyen 8:12, 13.
8. Ki danze i annan avek bann zwe elektronik ek video?
8 Dan bokou pei, laboutik i ranpli avek bann zwe elektronik ek video. Serten sa bann keksoz i kapab gou e napa nanryen mal avek, me pli ale dan sa bann divertisman i annan bokou keksoz ki Labib i kont. Sirman nou pa pou pran alalezer en zwe video ki annan en kantite touye ek vyolans oubyen sèks ladan! Zeova i ay sa bann ki “kontan vyolans.” (Psonm 11:5; Proverb 3:31; Kolosyen 3:5, 6) Deplis si ler ou zwe en zwe sa i fer ou vin egois, agresif, fatig ou emosyonnelman oubyen gaspiy ou letan, alor rekonnet ki mannyer sa pe afekte ou spirityelman e koriz sa sitiasyon deswit.—Matye 18:8, 9.
Ki mannyer nou kapab detann dan en bon Fason?
9, 10. Ki mannyer avek en pe refleksyon nou kapab trouv en detant ki satisfer nou?
9 Parler bann Kretyen i demande: “Kisisa en moman detant apropriye? Lemonn i ofer en kantite divertisman ki al kont standar Labib.” Kantmenm sa, i posib pour trouv en aktivite detant ki satisfe nou. Me i demann zefor. I demann en pe refleksyon ek preparasyon, sirtou delapar bann paran. Bokou nou nou rezwir bann bon moman an fanmiy e parmi bann frer ek ser dan kongregasyon. Apresye en bon repa dan en latmosfer detant kot nou pe koz lo sa ki’n pase pandan lazournen oubyen lo Labib i gou e i batir nou. Piknik, bann zwe apropriye, en pti vakans, oubyen lamars i kapab ganny organize. Sa bann bon moman detant i kapab gou e fer nou bokou dibyen.
10 En ansyen ek son madanm ki’n elve trwa zanfan i rakonte: “Depi byen zenn, nou ti les nou zanfan osi deside kote nou pou al vakans. Parler, nou ti les sakenn envit enn zot bon zanmi, e sa ti fer sa vakans pli gou. Nou ti fer bann aktivite spesyal pour serten moman enportan dan lavi nou zanfan. Detanzaot nou ti envit bann fanmiy ek zanmi dan kongregasyon kot lakour. Nou ti fer barbekyou e zwe bann zwe. Nou ti pran loto pour al dan montanny pour marse e profit sa bann moman pour aprann plis lo kreasyon Zeova.”
11, 12. (a) Ki ou kapab fer pour enkli lezot dimoun ler ou organiz en moman detant? (b) Ki rankont ki’n vin inoubliyab pour bokou?
11 Ler pe organiz bann moman detant, ki swa ou tousel oubyen an fanmiy, eski ou fer laranzman pour envit lezot ki ou pa abitye avek? Petet en vev, en dimoun tousel, oubyen en paran tousel i bezwen serten lankourazman. (Lik 14:12-14) Ou osi kapab enkli detrwa dimoun ki’n fek asosye avek kongregasyon. Me selman ou bezwen fer atansyon pour ki lezot pa ganny afekte avek bann move lenfliyans. (2 Timote 2:20, 21) Petet ou kapab anmenn en repa e manz ansanm avek bann ki annan dezabilite e pa kapab sorti deor.—Ebre 13:1, 2.
12 Bann rankont kot bann envite in apresye en pti manze ansanm, ekoute ki mannyer lezot in vin Kretyen, e konnen kwa ki’n ed zot reste fidel avek Bondye, in vin bann moman inoubliyab pour bokou nou. Dan sa bann rankont nou kapab diskit lo bann topik dan Labib kot tou dimoun enkli zanfan i partisipe. Atraver sa bann diskisyon nou kapab ankouraz kanmarad en kantite san ki personn i santi li anbarase oubyen mal alez.
13. Ki mannyer Zezi ek Pol in kit legzanp dan lafason pour montre e aksepte lospitalite?
13 Zezi in kit sa bon legzanp dan lafason pour montre e aksepte lospitalite. I ti toultan servi sa bann lokazyon pour anrisir lezot spirityelman. (Lik 5:27-39; 10:42; 19:1-10; 24:28-32) Son bann premye disip ti imit son legzanp. (Akt 2:46, 47) Zapot Pol ti ekrir: “Mon annan en gran dezir war zot pour partaz avek zot bann kado spirityel pour fer zot vin for. An plis, mon ti ava kontan prezan la parmi zot, pour ki nou kapab ansanm benefisye lankourazman: mwan par zot lafwa e zot par mon lafwa.” (Romen 1:11, 12) Nou osi ler nou fer bann rankont nou devret kree en latmosfer pour nou kapab fer konversasyon ki ankouraz kanmarad.—Romen 12:13; 15:1, 2.
Detrwa Rapel ek Danze
14. Akoz i pa en bon lide pour envit en kantite dimoun dan en rankont sosyal?
14 I pa en bon lide pour fer bann rankont sosyal kot i annan en kantite dimoun, vi ki i kapab difisil pour siperviz sa ki pe deroule. Dan en letan ki pa enterfer avek bann aktivite spirityel, detrwa fanmiy i kapab deside pour fer en piknik ansanm oubyen zwe en zwe ki pa tro konpetitif. Ler detrwa ansyen, asistan ministeryel, oubyen lezot Kretyen matir i prezan dan en rankont sosyal, zot prezans i fer en bon lenfliyans lo lezot e sa lokazyon i kapab fer nou plis dibyen ankor.
15. Akoz en dimoun ki pe organiz en rankont i devret mazin pour annan en bon sipervizyon?
15 Sa bann ki responsab pour organiz en rankont sosyal pa devret inyor sa nesesite pour annan en bon sipervizyon dan sa rankont. Menm si ou kontan montre lospitalite, pa ou ti pou regrete si ou aprann ki en keksoz ki’n arive kot ou lakour akoz serten neglizans lo ou par, in fer en envite tonbe spirityelman? Annou konsider sa prensip dan Deterononm 22:8. Lefe ki zot twa ti plat e zot ti servi li konman en landrwa pour detann avek zot envite, en Izraelit ki ti konstri en nouvo lakaz ti bezwen fer en balistrad toultour son twa. Pour ki rezon? “Pour ki ou pa koupab pour met okenn disan lo ou lakaz, akoz en dimoun i kapab sorti lo la e tonm anba.” Pareyman, san ki ou enpoz restriksyon ki pa rezonnab, nenport keksoz ki ou fer pour protez ou envite dan en rankont i devret montre konsiderasyon pour zot byennet fizik ek spirityel.
16. Si lalkol i ganny servi dan en rankont sosyal, ki prekosyon devret ganny pran?
16 Si lalkol pou ganny servi dan en rankont sosyal, fodre i ganny fer avek bokou prekosyon. Bokou Kretyen ki organiz en rankont i deside pour les zot envite servi lalkol si selman zot kapab personnelman sirvey sa ki zot envite pe ganny servi e bwar. Fodre pa ki nou permet okenn keksoz ki kapab fer tonbe lezot oubyen tant en dimoun pour bwar tro bokou. (Efezyen 5:18, 19) Pour diferan rezon, serten envite i kapab deside pour pa bwar ditou. Dan bokou landrwa, lalwa i etabli en serten laz ki en dimoun i kapab bwar, e bann Kretyen pou obeir lalwa gouvernman menm si sa bann regilasyon i paret tro strik.—Romen 13:5.
17. (a) Si i annan lanmizik dan en rankont sosyal, akoz i enportan pour sa dimoun ki pe organize vey byen kalite lanmizik ki zwe? (b) Si i annan ladans dan en rankont, ki mannyer nou pou montre nou modes?
17 En dimoun ki organiz en rankont i bezwen fer sir ki okenn lanmizik, ladans, oubyen lezot divertisman dan sa rankont i an armoni avek bann prensip Kretyen. Dimoun i prefer diferan kalite gou lanmizik e ozordi i annan en gran varyete lanmizik. Me laplipar lanmizik ozordi i promot en leta lespri rebelyon, move konportman seksyel ek vyolans. Alor, nou bezwen byen swazir kalite lanmizik ki nou zwe. Pa fodre ki neseserman sa lanmizik i dous pour li apropriye. Me anmenmtan sa lanmizik pa devret sal, eksit move dezir, oubyen annan tro bokou bas e i pa devret ganny zwe tro for. Fer atansyon pour pa swazir en dimoun ki pa ankor byen konpran lenportans pour swazir bon kalite lanmizik e pa zwe li tro for. En ladans ki enplik bann konportman endesan, avek bokou mouvman leren ek tete ki eksit dezir seksyel, pou definitivman pa apropriye pour en Kretyen.—1 Timote 2:8-10.
18. Ki mannyer bann paran i kapab protez zot zanfan par vey zot aktivite sosyal?
18 Bann paran Kretyen i bezwen konn byen sa ki pou pase dan okenn rankont sosyal ki zot zanfan i ganny envite, e laplipar-di-tan i bon pour al avek zot zanfan. Malerezman, serten paran in les zot zanfan al bann parti ki napa sipervizyon kot detrwa zot in ganny atire dan imoralite seksyel oubyen lezot konportman ki pa apropriye. (Efezyen 6:1-4) Menm si en zenn i annan 18 ouswa 19 an e i’n montre ki son paran i kapab met konfyans dan li, i ankor bezwen led pour ‘gard son lekor kont sa bann pasyon lazenes.’—2 Timote 2:22.
19. Kwa ki pou ed nou konsantre lo sa ki nou devret rode premye?
19 Bann bon moman detant oubyen divertisman ki fer nou dibyen e ki nou fer parler i kapab fer lavi pli gou. Zeova pa anpes nou anmize dan sa fason, me anmenmtan nou byen konnen ki sa bann aktivite dan zot menm pa pou ed nou akimil okenn larises spirityel dan lesyel. (Matye 6:19-21) Zezi ti fer son bann disip konpran ki keksoz pli enportan dan lavi se “rod plito Rwayonm Bondye ek son lazistis” me pa sa ki nou manze, bwar oubyen sa ki nou mete, akoz bann ki pa konn Bondye ki rod tousala.—Matye 6:31-34.
20. Ki bann bon keksoz bann serviter fidel Zeova i kapab ekspekte alavenir?
20 Wi, ki swa nou pe ‘manze oubyen ki nou bwar, ou nenport kwa ki nou fer,’ nou kapab fer “tou pour laglwar Bondye,” par remersi Zeova ki donn nou sa bann bon keksoz ki nou servi avek moderasyon. (1 Korentyen 10:31) Dan sa Paradi lo later ki Bondye pe anmase pour nou, i pou annan en kantite lokazyon pour nou apresye ankor plis zenerozite Zeova, ansanm avek bon lasosyasyon tou bann ki satisfer son standar drwat.—Psonm 145:16; Izai 25:6; 2 Korentyen 7:1.
Eski ou rapel?
• Akoz i difisil ozordi pour bann Kretyen trouv bon moman detant?
• Ki kalite moman detant bann fanmiy Kretyen in trouv satisfezan?
• Ler nou pe detann nou dan en bon fason, ki rapel ek danze nou devret gard antet?
[Kestyon]
[Portre lo paz 24]
Swazir moman detant ki prodwir bann bon fri
[Portre lo paz 25]
Ki kalite moman detant bann Kretyen i rezete?