Mars dan sa Semen ki pe vin pli kler
Mars dan sa Semen ki pe vin pli kler
“Santye bann dimoun drwat i parey sa lalimyer briye ki pe vin deplizanpli kler ziska gran lizour.”—PROVERB 4:18.
1, 2. Lefe ki pep Bondye in ganny plis lalimyer sorti kot Zeova ki rezilta sa in anmennen?
LEKEL ki pli byen kapab eksplik nou lefe ki lalimyer soley dan bomaten i annan lo fernwanr apard ki sa Sours lalimyer, Zeova? (Psonm 36:9) ‘Kan lalimyer i tyonbo tou kwen later, later i transform son lekor parey labou anba en stanp, e bann keksoz i pran zot plas konmsi zot in met zot lenz.’ (Zob 38:12-14) Pli soley i klere dan bomaten, pli ou kapab vwar bann diferan laform bann keksoz ki annan lo later zis parey labou anba en stanp i pran en serten laform.
2 Zeova i osi sours lalimyer spirityel. (Psonm 43:3) Menm si lemonn i ankor dan fernwanr, sa vre Bondye pe kontinyen ekler son pep. Ki rezilta sa in anmennen? Labib i dir: “Santye bann dimoun drwat i parey sa lalimyer briye ki pe vin deplizanpli kler ziska gran lizour.” (Proverb 4:18) Plis lalimyer sorti kot Zeova pe kontinyen ekler semen son pep, e sa in fer li posib pour zot aziste lafason ki zot organize, aziste zot krwayans ek lafason zot kondwir zot.
Plis Lalimyer, plis Amelyorasyon dan Fason organize
3. Ki promes nou vwar dan Izai 60:17?
3 Profet Izai i devwal sa ki Zeova ti predir: “Olye kwiv mon pou anmenn lor, olye feray mon pou anmenn larzan, olye dibwa, kwiv, e olye bann ros, feray.” (Izai 60:17) Zis parey ler nou ranplas en keksoz par enn ki pli bon, i’n annan amelyorasyon dan lafason ki bann Temwen Zeova i organiz zot. Sa in leka depi ki nou’n antre dan letan “lafen” oubyen “dan bann dernyen zour.”—Matye 24:3; 2 Timote 3:1.
4. Ki nouvo laranzman ki ti ganny entrodwir an 1919, e ki byenfe sa ti anmennen?
4 Okonmansman bann dernyen zour, bann Etidyan Labib ki plitar ti apel Temwen Zeova, ti elekte bann ansyen ek dyak dan en fason demokratik. Sa letan serten ansyen pa ti vreman anvi pres sa bon nouvel. Serten pa ti zis refize pour al prese, me zot ti menm dekouraz lezot pour fer li. Alors, an 1919 ti annan en nouvo responsabilite dan kongregasyon. Sa ti en direkter servis. Direkter servis pa ti ganny elekte par kongregasyon, i ti ganny apwente dan en fason teokratik par biro brans bann Etidyan Labib. Sa direkter servis ti bezwen organiz travay predikasyon, prepar bann teritwar e ankouraz lezot pour al dan predikasyon. Pandan bann lannen apre, bann proklanmater ti sitan eksite pour al pres sa bon nouvel.
5. Ki lezot keksoz ki ti arive dan bann lannen 1920 an montan?
5 Tou dimoun dan kongregasyon ti ganny pouse plis ankor par sa ki en orater ti dir dan en lasanble Cedar Point, Ohio, U.S.A. an 1922. I ti dir: “Anonse, anonse, anons sa Lerwa ek son rwayonm.” An 1927, travay predikasyon ti ganny organize dan en fason ki tou le Dimans bann proklanmater ti kapab al prese port an port. Akoz Dimans? Akoz sa zour laplipar dimoun ti kot zot. Pareyman ozordi, bann Temwen Zeova i demontre sa menm leta lespri par fer zefor pour al prese kan lamazorite dimoun i kot zot. Par egzanp dan wikenn oubyen dan apremidi apre travay.
6. Ki rezolisyon ki ti ganny pran an 1931 e ki lefe sa ti annan lo sa travay predikasyon?
6 En pli gran lankourazman pour pres sa bon nouvel ti ganny donnen en zour Dimans apremidi, le 26 Zilyet an 1931. Sa ti dan en lasanble Columbus, Ohio, U.S.A. ler zot ti pran en rezolisyon e plitar partou dan lemonn zot ti aksepte sa rezolisyon. En bout dan sa rezolisyon ti dir: “Nou bann serviter Zeova ki’n ganny sa manda pour fer en travay an son non, e nou obeir son komannman pour pres sa mesaz ki Zezi Kri ti prese e pour fer dimoun konnen ki Zeova i sa vre Bondye Tou pwisan. Alors avek lazwa nou aksepte sa non ki Senyer Bondye in donnen, e nou anvi ki dimoun i konn nou e apel nou par sa non. Sa non i Temwen Zeova.” (Izai 43:10) Pa sa nouvo non ti klerman fer resorti aktivite prensipal sa bann ki’n aksepte sa non! Wi, Zeova ti annan ase travay pour tou son bann serviter. An zeneral, lamazorite ti byen kontan sa rezolisyon.
7. Ki sanzman ki ti arive an 1932 e akoz?
7 Avek limilite, en kantite ansyen ti partisip dan predikasyon avek devouman. Me kantmenm sa, serten ansyen ki ti’n ganny elekte ti ankor pe ensiste ki pa neseser ki tou dimoun dan kongregasyon i al prese. Me byento ti pou annan plis amelyorasyon. An 1932, en Latour Veyer ti sorti ki ti demann tou bann kongregasyon pour aret elekte bann ansyen ek dyak. Okontrer zot ti pou bezwen elekte en komite servis ki ti pou enkli bann zonm spirityel, ki ti partisip dan travay predikasyon. Selman bann ki ti aktif dan predikasyon ki ti ganny sa responsabilite pour okip kongregasyon. Koumsa, sa travay predikasyon ti progrese.
Plis Lalimyer, plis Amelyorasyon
8. Ki amelyorasyon ti annan an 1938?
8 Lalimyer ti pe vin “deplizanpli kler.” An 1938 zot ti aret net elekte bann frer. Tou bann serviter dan kongregasyon ti pou ganny apwente dan en fason teokratik anba direksyon “lesklav fidel e pridan.” (Matye 24:45-47, NW) Sa sanzman ti ganny byen aksepte par lamazorite kongregasyon, e sa travay predikasyon ti kontinyen raport fri.
9. Ki laranzman ki ti ganny fer an 1972, e akoz sa ti en amelyorasyon?
9 Apartir le 1 Oktob 1972, en lot azisteman dan kongregasyon ti ganny fer. Olye zis en serviter oubyen sirveyan ki okip kongregasyon, depi sa zour laranzman ti ganny fer pour ki bann kongregasyon partou dan lemonn i ganny okipe par en konsey ansyen. Sa nouvo laranzman ti vreman ankouraz bann zonm matir dan kongregasyon pour kalifye pour vin bann ansyen. (1 Timote 3:1-7) An rezilta, sa in fer ki en kantite frer in ganny leksperyans konman pour desarz zot responsabilite dan kongregasyon. Pa zot in vreman zwe en gran rol pour pran swen avek bann nouvo ki’n vin dan laverite depi sa lannen!
10. Ki laranzman ki ti ganny fer an 1976?
10 Konsey Direkter ti form sis komite. Diferan manm dan Konsey Direkter ti form parti sa bann komite, e depi le 1 Zanvye 1976 tou bann aktivite ki annan pour fer avek lorganizasyon ek kongregasyon dan lemonn antye ti tonm anba sa sis komite. I’n vreman en benediksyon lefe ki tou bann aktivite an rapor avek sa travay predikasyon i ganny dirize par “en kantite konseye.”—Proverb 15:22; 24:6.
11. Ki laranzman ki ti ganny fer an 1992, e akoz?
11 An 1992 nou ti vwar ankor en lot amelyorasyon. Sa enn li i parey avek sa ki ti arive apre ki bann Izraelit ek lezot ti sorti an egzil Babilonn. Sa letan ti napa ase Levit pour fer bann travay kot tanp. Alors bann Netinim, ki pa ti bann Izraelit, ti ganny plis travay pour fer akoz zot ti bezwen ed bann Levit. Pour ed lesklav fidel e pridan pran swen avek bann byen ki ti pe kontinyen ogmante lo later, an 1992 serten manm ‘lezot mouton’ ti ganny plis responsabilite. Zot ti ganny demande pour vin ede lo bann komite Konsey Direkter.—Zan 10:16.
12. Ki mannyer Zeova in apwent ‘lape konman nou sirveyan’?
12 Ki rezilta sa in anmennen? Zeova i dir: “Mon pou apwent lape konman ou bann sirveyan e ladrwatir konman bann ki donn ou latas.” (Izai 60:17) Parmi bann serviter Zeova ozordi i annan “lape,” e lanmour pour “ladrwatir” in vin “sa bann ki donn [zot] latas.” Andotmo i sa keksoz ki pous zot pour servi Bondye. Zot in byen organize pour fer sa travay predikasyon e pour fer disip.—Matye 24:14; 28:19, 20.
Plis Lalimyer lo nou Krwayans
13. Dan bann lannen 1920 an montan, ki mannyer Zeova in donn son pep plis leklersisman lo zot krwayans?
13 Ptit-a-pti Zeova pe donn son pep plis leklersisman lo zot krwayans. Annou vwar en legzanp dan Revelasyon 12:1-9. Sa resi dan Revelasyon i koz lo “en fanm” ki ansent e ki ganny en zanfan, i osi koz lo en “dragon” ek “en garson.” Tousala i senbolik. Eski ou konnen ki sakenn i reprezante? Dan en lartik dan Latour Veyer le 1 Mars 1925 an Angle, ki ti annan pour tit “Nesans en Nasyon,” ti eksplike ki zot reprezante. Sa lartik ti fer pep Bondye pli byen konpran bann profesi lo nesans sa Rwayonm. Sa lartik ti fer kler ki i annan de lorganizasyon, enn pour Zeova ek lot pour Satan. Answit, an 1927/28 pep Bondye ti dekouver ki Nwel ek lanniverser nesans pa baze lo Labib, alors zot ti arete fer li.
14. Ki leklersisman pep Bondye ti gannyen lo zot krwayans dan bann lannen 1930?
14 Dan bann lannen 1930, plis leklersisman ti ganny donnen lo trwa krwayans. Pour plizyer lannen bann Etidyan Labib ti konnen ki sa “gran lafoul” dan Revelasyon 7:9-17 pa ti form parti avek sa 144,000, ki pou dirize avek Kris konman bann lerwa ek pret. (Revelasyon 5:9, 10; 14:1-5) Me kantmenm sa, zot pa ti ankor asire lekel zot. Zis parey dan bomaten, anmezir ki i vin pli kler ou kapab konmans vwar byen bann keksoz ek kouler, an 1935 zot ti dekouver ki sa gran lafoul i sa bann ki pou sirviv sa ‘gran ladetres,’ e ki annan sa lespwar pou viv pour touzour lo later. Plitar sa menm lannen en lot leklersisman ti ganny donnen ki ti annan en lefe direk lo bann zanfan Temwen Zeova ki ti ankor pe lekol dan serten pei. Menm si dimoun partou dan lemonn ti pe devlop lafyerte pour zot pei, bann Temwen Zeova ti vwar ki salye paviyon i en keksoz serye. An 1936 zot ti konpran ki Kris pa ti mor lo en lakrwa me lo en poto.—Akt 10:39, NW.
15. Kan e ki mannyer lanfaz ti ganny mete lo disan ki sakre?
15 Zis apre Dezyenm Lager Mondyal zot ti fer transfizyon disan lo bann solda. Pandan sa menm letan, pep Bondye ti ganny plis leklersisman lo disan ki sakre. Latour Veyer le 1 Zilyet 1945 an Angle, ti ankouraz “tou bann adorater Zeova ki anvi ganny lavi eternel dan nouvo lemonn drwat Bondye pour respe disan ki sakre, e pour obeir bann lareg drwat Bondye lo sa size tre enportan.”
16. Kan ki Les Saintes Écritures, Traduction du monde nouveau an antye ti sorti? Nonm de laspe enteresan dan sa Labib.
16 An 1946 pep Bondye ti vwar ki i neseser fer en nouvo tradiksyon Labib ki ti pou servi bann dernyen resers lo Labib e ki pa ganny enfliyanse par bann fo lansennyman relizye. Sa proze pour tradwir Labib ti konmanse an Desanm 1947. An 1950 zot ti kapab ganny Les Écritures grecques chrétiennes, Traduction du monde nouveau an Angle. An 1953 zot ti konmans ganny Lekritir Ebre an Angle, ki ti sorti an senk volim enn apre lot. Finalman sa dernyen volim ti sorti an 1960, en pti pe plis ki 12 an apre ki sa proze tradiksyon ti konmanse. Sa Saintes Écritures, Traduction du monde nouveau an antye an Angle dan en sel volim ti sorti an 1961. Ozordi sa Labib i disponib dan plizyer langaz, e i annan plizyer laspe byen enteresan dan sa Labib. I’n ranplas non Bondye, Zeova, partou kot i ti devret ete. Deplis, lefe ki i en tradiksyon tre pros avek langaz orizinal, sa in fer li posib pour pep Bondye pli byen konpran laverite.
17. Ki leklersisman pep Bondye ti gannyen an 1962?
17 An 1962, plis leklersisman ti ganny donnen lo lekel sa bann “lotorite ki gouvernen” dan Romen 13:1 e ziska ki degre bann Kretyen i bezwen soumet avek zot. Apre ki zot ti’n etidye Romen sapit 13 ek lezot teks parey Tit 3:1, 2 ek 1 Pyer 2:13, 17 pli oprofon, zot ti konpran ki sa lekspresyon “lotorite ki gouvernen” i refer avek bann gouvernman imen, olye ki avek Zeova ek Zezi Kri.
18. Ki serten krwayans ki ti vin pli kler dan bann lannen 1980?
18 Dan bann lannen ki ti swiv apre, semen bann dimoun drwat ti kontinyen vin deplizanpli kler. An 1985, zot ti pli byen konpran ki savedir ganny konsidere drwat pour “lavi” e drwat konman zanmi Bondye. (Romen 5:18; Zak 2:23) An 1987, zot ti ganny en leksplikasyon pli profon lo ki savedir Zibile Kretyen.
19. Ki mannyer Zeova in eklersi son pep spirityelman tou dernyenman?
19 An 1995, zot ti pli byen konpran ki savedir sa separasyon ant “mouton” ek “kabri.” An 1998, plis leksplikasyon an detay ti ganny donnen lo sa tanp ki Ezekyel ti vwar dan en vizyon, e ki pe deza akonpli. An 1999, zot ti ganny leklersisman lo kan e ki mannyer sa keksoz degoutan i “debout dan landrwa Sen.” (Matye 24:15, 16; 25:32) An 2002, zot ti ganny plis konprenezon lo ki savedir ador Bondye “an-espri e an verite.”—Zan 4:24.
20. Dan ki lot domenn pep Bondye in fer amelyorasyon?
20 I pa’n zis annan amelyorasyon dan lafason ki zot organize oubyen dan zot krwayans, in osi annan amelyorasyon dan zot kondwit. Par egzanp, an 1973 zot ti konsider fimen konman en keksoz ki “sali lekor,” e zot ti vwar sa konman en pese grav. (2 Korentyen 7:1) Dizan plitar, Latour Veyer le 15 Zilyet 1983 an Angle ti eksplik nou pwennvi an rapor avek zarm. Sa i zis detrwa legzanp ki montre ki mannyer lalimyer in vin pli kler dan nou letan.
Annou kontinyen mars dan Semen ki pe vin pli kler
21. Kwa ki pou ed nou kontinyen mars dan sa semen ki pe vin pli kler?
21 En frer ki’n servi konman ansyen pour bokou lannen ti dir: “I kapab difisil pour aksepte e adapte avek en sanzman.” Kwa ki’n ed li aksepte sa kantite sanzman pandan sa 48 an ki i’n en proklanmater? Les li dir nou: “Reste pozitif, sa i keksoz pli enportan. Kan nou refize aksepte en sanzman i konmsi nou reste dernyen e lorganizasyon li i al an avan. Si i arive ki mon vwar li difisil pour aksepte serten sanzman, mon mazin sa ki Pyer ti dir Zezi: ‘Senyer, kot lekel nou pou ale? Ou annan parol lavi eternel.’ Apre mon demann mon lekor, ‘Kote mon pou ale dan sa lemonn ki dan fernwanr?’ Sa i ed mwan pour reste fidel avek lorganizasyon Bondye.”—Zan 6:68.
22. Ki byenfe nou gannyen ler nou mars dan lalimyer?
22 Sirman sa lemonn otour nou i dan en gran fernwanr. Anmezir ki Zeova i kontinyen ekler son pep, pli ale pli ou vwar sa gran diferans ki egziste ant nou ek sa lemonn. Ki sa lalimyer i fer pour nou? Eski ou’n deza alim en tors dan fernwanr e la ou vwar en trou dan semen? Definitivman sa lalimyer pa fer sa trou disparet. Pareyman, sa lalimyer ki sorti dan Parol Bondye pa retir bann latrap dan nou semen. Me kantmenm sa, sa lalimyer i ed nou pour evite tonm dan sa bann latrap, pour ki nou kapab kontinyen mars dan sa semen ki pe vin pli kler. Alors, annou kontinyen ekout parol profetik Zeova, zis parey “en lalimyer ki briye dan en fernwanr.”—2 Pyer 1:19.
Eski ou rapel?
• Ki amelyorasyon Zeova in fer dan lafason ki son pep i organize?
• Ki leklersisman nou’n gannyen lo nou bann krwayans?
• Ki sanzman ou menm ou’n vwar e kwa ki’n ed ou pour aksepte zot?
• Akoz ou anvi kontinyen mars dan sa semen ki pe vin pli kler?
[Kestyon]
[Portre lo paz 18]
© 2003 BiblePlaces.com
[Portre lo paz 19]
Sa lasanble Cedar Point, Ohio, ti pous bann Etidyan Labib pour fer travay Bondye
[Portre lo paz 21]
An 1950, frer N. Knorr ti ofisyelman lans “New World Translation of the Christian Greek Scriptures”