Reini Keksoz dan Lesyel ek Keksoz lo Later
Reini Keksoz dan Lesyel ek Keksoz lo Later
“I kontan . . . pour reini ankor tou keksoz dan Kris, keksoz dan lesyel ek keksoz lo later.”—EFEZYEN 1:9, 10, NW.
1. Ki Zeova “i kontan” pour akonpli pour lesyel ek later?
LAPE partou kote! Sanmenm sa ki Zeova “Bondye lape” i oule akonpli. (Ebre 13:20) I ti enspir zapot Pol pour ekrir ki “i kontan” pour “reini ankor tou keksoz dan Kris, keksoz dan lesyel ek keksoz lo later.” (Efezyen 1:9, 10, NW) Ki zapot Pol ti oule dir ler i ti dir “reini ankor”? Dapre en spesyalis Labib apele John Lightfoot, sa lekspresyon i vedir ki dan liniver antye pou annan larmoni, e i pou nepli annan bann keksoz etranz ki kree divizyon. Me ki tou keksoz pou ini ansanm gras a Kris. I pou nepli annan pese, lanmor, dezapwentman, ek soufrans.
“Keksoz dan Lesyel”
2. Lekel sa bann “keksoz dan lesyel” ki bezwen ganny reini?
2 Dan zis detrwa mo zapot Pyer ti fer resorti sa zoli lespwar ki bann vre Kretyen i annan. I ti ekrir: “Nou pe espere dapre son promes en nouvo lesyel ek en nouvo later kot pou annan lazistis.” (2 Pyer 3:13) Sa “nouvo lesyel” ki Bondye i promet la i sa Rwayonm dirize par Kris, ki en nouvo gouvernman. “Keksoz dan lesyel” ki Pol ti mansyonnen dan son let pour bann Efezyen pou ganny reini “dan Kris.” Zot sa pti group dimoun ki Bondye in swazir pour diriz avek Kris dan lesyel. (1 Pyer 1:3, 4) Sa 144,000 Kretyen i ganny ‘swazir lo later,’ ‘swazir parmi bann imen’ pour vin zeritye ansanm avek Kris dan son Rwayonm.—Revelasyon 5:9, 10; 14:3, 4; 2 Korentyen 1:21; Efezyen 1:11; 3:6.
3. Dan ki fason bann Kretyen swazir i “renny ansanm avek li dan lesyel” menm ler zot ankor lo later?
3 Sa bann Kretyen swazir i ne ankor par lespri sen pour vin bann garson spirityel Zeova. (Zan 1:12, 13; 3:5-7) Zot vin bann frer Zezi akoz Zeova i adopte zot konman son bann “garson.” (Romen 8:15; Efezyen 1:5) Lefe ki zot bann frer Zezi, menm ler zot ankor lo later, Labib i dir ki Zeova i donn zot en o pozisyon e zot renny ansanm avek li dan lesyel dan Kris Zezi. (Efezyen 1:3; 2:6) Zot ganny sa o pozisyon spirityel akoz zot “in ganny sele avek Lespri Sen ki i ti’n promet, sa i garanti [zot] leritaz” rezerve pour zot dan lesyel. (Efezyen 1:13, 14; Kolosyen 1:5) Alor, zot sa bann “keksoz dan lesyel” e zot tou ki Zeova in swazir i bezwen ganny reini.
I konmans reini zot
4. Kan e ki mannyer bann “keksoz dan lesyel” ti konmans ganny reini?
4 An armoni avek “ladministrasyon” Zeova oubyen son fason diriz keksoz, bann “keksoz dan lesyel” ti pou konmans ganny reini “alafen letan fikse.” (Efezyen 1:10) Sa letan fikse ti ariv zour Lapannkot lannen 33 nou lepok. Sa zour, lespri sen ti desann lo bann zapot ek en group disip, zonm ek fanm. (Akt 1:13-15; 2:1-4) Sa ti montre ki sa nouvo lalyans ti’n vin an mars. Sa levennman ti osi konmansman kongregasyon Kretyen ek sa nouvo nasyon Izrael spirityel, ‘Izrael Bondye.’—Galat 6:16; Ebre 9:15; 12:23, 24.
5. Akoz Zeova ti kree en nouvo “nasyon” pour ranplas nasyon Izrael?
5 Bann Izraelit ki ti anba lalyans Lalwa pa ti reisi vin “en rwayonm pret ek en nasyon sen” ki ti pou servi pour touzour dan lesyel. (Egzod 19:5, 6) Zezi ti dir bann sef relizye Zwif son letan: “Zot pou ganny arase Rwayonm Bondye, e ganny donnen a en lot nasyon ki pou prodwi son fri.” (Matye 21:43) Bann Kretyen swazir ki’n antre dan sa nouvo lalyans ki form parti sa nasyon, Izrael spirityel. Zapot Pyer ti ekrir sa pour zot: “Zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye. Ti annan en letan ki zot pa ti son pep, me aprezan zot in vin pep Bondye.” (1 Pyer 2:9, 10) Nasyon Izrael ti kas zot lalyans avek Zeova, e zot ti nepli son pep. (Ebre 8:7-13) Parey Zezi ti’n predir, zot ti perdi sa privilez pour form parti sa Rwayonm e Zeova ti donn sa 144,000 manm Izrael spirityel sa privilez.—Revelasyon 7:4-8.
Lalyans pour en Rwayonm
6, 7. Ki lalyans spesyal Zezi ti fer avek son bann frer swazir e ki sa i vedir pour zot?
6 Sa zour swar ki Zezi ti entrodwir Memoryal son lanmor, i ti dir son bann zapot fidel: “Zot, zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar [oubyen fer en lalyans avek mwan] pour gouvern son Rwayonm, mwan osi, mon donn zot menm pouvwar [oubyen fer en lalyans avek zot]; pour ki zot osi zot a manze e bwar atab avek mwan dan mon Rwayonm, e zot ava asiz lo tronn pour ziz douz tribi Izrael.” (Lik 22:28-30) La Zezi ti pe refer avek en lalyans spesyal ki i ti fer avek son 144,000 frer swazir, ki pou “reste fidel ziska lanmor” e ganny “laviktwar.”—Revelasyon 2:10; 3:21.
7 Sa bann ki form parti sa pti group i aksepte pour pa zanmen viv ankor lo later konman imen. Zot pou diriz ansanm avek Kris dan lesyel, e osi asiz lo tronn pour ziz limanite. (Revelasyon 20:4, 6) Aprezan, annou vwar lezot verse Labib ki aplik selman avek sa bann Kretyen ki pe al dan lesyel e ki osi fer nou vwar akoz ‘lezot mouton’ pa pran sa dipen ek diven zour Memoryal.—Zan 10:16.
8. Ler bann Kretyen swazir i pran sa dipen, ki zot pe montre? (Vwar bwat lo paz 15.)
8 Bann Kretyen swazir i partisip dan soufrans Kris e zot pare pour mor parey li. Zapot Pol ki dan sa group ti dir ki i ti pare pour fer nenport sakrifis pour li “kapab ganny Kris . . . pour konn Kris ek pisans son rezireksyon, e partisip dan son soufrans.” Wi, Pol ti pare “pour vin parey li dan son lanmor.” (Filipyen 3:8, 10) Bokou Kretyen swazir in sibir “lagoni Zezi” ler zot ankor lo later.—2 Korentyen 4:10.
9. Sa dipen Memoryal i reprezant lekor lekel?
9 Zour Zezi ti entrodwir Repa Senyer, i ti dir: ‘Sa i [reprezant] mon lekor.’ (Mark 14:22) Zezi ti pe refer avek son lekor imen, ki en pe letan plitar ti pou ganny bate e ansan. Dipen san lelven ti apropriye pour reprezant lekor Zezi. Akoz? Parski dan Labib, lelven i kapab senboliz pese oubyen lemal. (Matye 16:4, 11, 12; 1 Korentyen 5:6-8) Zezi ti parfe e son lekor imen ti san okenn pese. Alor i ti kapab ofer sa lekor parfe pour pardonn pese. (Ebre 7:26; 1 Zan 2:2) Tou Kretyen fidel, ki swa zot ti annan lespwar pour viv dan lesyel oubyen viv pour touzour dan paradi lo later, ti pou benefisye par sa ki Zezi ti fer.—Zan 6:51.
10. Dan ki fason sa bann ki pran diven Memoryal i ‘partisip dan disan Kris’?
10 Pol ti ekrir konsernan sa diven ki bann Kretyen swazir i bwar zour Memoryal: “Sa lakoup benediksyon ki nou beni, pa i en partisipasyon dan disan Kris?” (1 Korentyen 10:16) Dan ki fason sa bann ki bwar sa diven i ‘partisip dan disan Kris’? Sirman zot pa partisip par sakrifye zot lavi pour fourni sa ranson, vi ki zot menm zot bezwen ganny pardonnen. Lefe ki zot krwar ki disan Kris i kapab delivre zot, Zeova i pardonn zot pese e i konsider zot drwat pour viv dan lesyel. (Romen 5:8, 9; Tit 3:4-7) Sa 144,000 zeritye avek Kris i ganny “pirifye,” met dekote, e zot ganny lave avek zot pese pour vin “bann sen” gras a disan ki Kris in verse. (Ebre 10:29; Danyel 7:18, 27; Efezyen 2:19) Wi, avek son disan ki i’n verse, Kris in ‘raste pour Bondye zonm dan tou ras, tou langaz, tou pep ek tou nasyon e fer zot vin en rwayonm pret pour servi non Bondye, e zot pou rennyen lo later.’—Revelasyon 5:9, 10.
11. Ler bann Kretyen swazir i bwar diven zour Memoryal, ki sa i endike?
11 Ler Zezi ti entrodwir Memoryal son lanmor, i ti pas lakoup diven avek son bann zapot fidel e i ti dir zot: “Bwar zot tou. Sa i [reprezant] mon disan, disan lalyans ki [pou] koule pour bokou, pour pardon pese.” (Matye 26:27, 28) Zis parey Zeova ti aksepte fer en lalyans avek nasyon Izrael avek disan kabri ek toro, i ti osi aksepte fer en nouvo lalyans avek Izrael spirityel gras a disan Zezi. Sa nouvo lalyans ti konmans zour Lapannkot lannen 33 nou lepok. (Egzod 24:5-8; Lik 22:20; Ebre 9:14, 15) Ler bann Kretyen swazir i bwar sa diven ki reprezant “disan lalyans,” zot montre ki zot in antre dan sa nouvo lalyans e zot pe benefisye avek sa lalyans.
12. Ki mannyer bann Kretyen swazir i batiz dan lanmor Kris?
12 Zezi ti osi fer bann Kretyen swazir mazin en lot keksoz, i ti dir son bann disip fidel: “Zot pou, annefe, bwar sa lakoup ki mon pou bwar, e zot pou ganny batize avek sa batenm mon pou ganny batize.” (Mark 10:38, 39) Plitar, zapot Pol ti dir ki bann Kretyen i ganny “batize dan lanmor [Kris].” (Romen 6:3) Bann Kretyen swazir i viv en lavi sakrifis. Zot lanmor i en sakrifis akoz zot aksepte pour pa zanmen viv ankor lo later. Zot ganny batize konpletman dan lanmor Kris ler zot ganny resisite konman en lespri pour rennyen avek Kris dan lesyel, apre ki zot in mor fidelman.—2 Timote 2:10-12; Romen 6:5; 1 Korentyen 15:42-44, 50.
Pran Dipen ek Diven Zour Memoryal
13. Akoz sa bann ki pou viv lo later pa pran dipen ek diven zour Memoryal, me akoz zot asiste Memoryal?
13 Vi ki manz sa dipen e bwar sa diven zour Memoryal i enplik tousala, i kler ki i pa apropriye pour bann ki annan lespwar pour viv lo later manz sa dipen e bwar sa diven. Sa bann ki annan lespwar pour viv lo later i rekonnet ki zot pa’n ganny swazir pour vin manm lekor Kris. Zot pa ni form parti dan sa nouvo lalyans ki Zeova ti fer avek sa bann ki pou dirize avek Zezi Kri. Vi ki sa “lakoup” i reprezant sa nouvo lalyans, selman bann ki dan sa nouvo lalyans ki manz sa dipen e bwar sa diven. Sa bann ki annan lespwar pour viv pour touzour avek en lekor parfe lo later anba Rwayonm pa ni ganny batize dan lanmor Kris oubyen ganny apele pour diriz avek li dan lesyel. Si zot ti pran sa dipen ek sa diven, zot ti pou fer en keksoz ki pa aplik avek zot. Pour sa rezon, zot pa fer li, menm si zot asiste Memoryal e obzerv sa ki pe pase avek respe. Zot apresye tou sa ki Zeova in fer pour zot atraver son Garson, enkli pardon zot pese gras a disan ki Kris in verse.
14. Ki mannyer bann Kretyen swazir i ganny lafors spirityel ler zot pran sa dipen ek sa diven?
14 I pa reste bokou letan pour sa pti group Kretyen ki’n ganny swazir pour renny avek Kris dan lesyel ganny sele. Ziska lafen zot lavi lo later ki zot pou sakrifye, bann Kretyen swazir i ganny lafors spirityel ler zot pran sa dipen ek diven zour Memoryal. Zot santi sa linite ki egziste antre zot konman bann manm lekor Kris. Ler zot pran sa dipen ek diven zour Memoryal, sa i rapel zot, zot responsabilite pour reste fidel ziska lanmor.—2 Pyer 1:10, 11.
Reini “Keksoz lo Later”
15. Lekel ki’n ralye avek bann Kretyen swazir?
15 Depi omilye bann lannen 1930, en gran kantite ‘lezot mouton’ ki pa form parti sa “pti troupo” e ki zot lespwar se pour viv lo later, in ralye avek bann Kretyen swazir. (Zan 10:16; Lik 12:32; Zekarya 8:23) Zot in vin konpanyon fidel bann frer Kris. Zot pe ede en kantite pour anons partou dan lemonn sa bon nouvel Rwayonm pour dimoun dan tou nasyon konnen. (Matye 24:14; 25:40) Ler zot fer sa, zot ganny sa loportinite pour Kris met zot lo son “kote drwat” konman son “bann mouton.” Sa i vedir ki zot pou ganny en zizman favorab ler Kris i vini pour ziz bann nasyon. (Matye 25:33-36, 46) Akoz zot lafwa dan disan Kris, zot pou vin sa “gran lafoul” ki pou sirviv ‘gran ladetres.’—Revelasyon 7:9-14.
16. Lekel ki pou parmi bann “keksoz lo later,” e ki mannyer zot tou zot pou ganny sa loportinite pour vin “bann zanfan Bondye”?
16 Kan larestan sa 144,000 in fini ganny sele, “divan” destriksyon pou ganny large lo sa move sistenm Satan lo later. (Revelasyon 7:1-4) Pandan Renny mil an Kris ek son 144,000 lerwa ek pret, en gran kantite dimoun pou resisite e pou zwenn sa gran lafoul. (Revelasyon 20:12, 13) Zot pou ganny sa loportinite pour vin bann sitwayen permanan Lerwa, Kris Zezi. Alafen sa Renny Milener, tou bann “keksoz lo later” pou pas atraver en tes final. Sa ki reste fidel pou ganny adopte konman “bann zanfan Bondye” lo later.—Efezyen 1:10; Romen 8:21; Revelasyon 20:7, 8.
17. Ki mannyer plan Zeova pou ganny akonpli?
17 Alor par son “ladministrasyon” oubyen fason diriz keksoz ki telman saz, Zeova pou akonpli son plan “pour reini tou keksoz ankor dan Kris, keksoz dan lesyel ek keksoz lo later.” Tou lanz dan lesyel ek imen lo later pou ganny reini dan lape, e avek lazwa zot pou soumet anba dominasyon zot gran Bondye, Zeova, ki akonpli son plan.
18. Ki mannyer bann Kretyen swazir ek zot konpanyon i benefisye par asiste Memoryal?
18 Wi, le 12 Avril, 2006, lafwa sa pti gin Kretyen swazir ek zot plizyer milyon konpanyon, lezot mouton, pou vin pli for! Zot pou obzerv Memoryal lanmor Kris, parey Zezi in demande: ‘Kontinyen fer sa an mon memwar.’ (Lik 22:19) Tou dimoun ki la sa zour i devret mazin sa ki Zeova in fer pour zot atraver son Garson byenneme, Zezi Kri.
Revizyon
• Ki plan Zeova pour bann keksoz dan lesyel ek keksoz lo later?
• Lekel sa bann “keksoz dan lesyel,” e ki mannyer zot in ganny reini?
• Lekel sa bann “keksoz lo later,” e ki zot lespwar?
[Kestyon]
[Bwat lo paz 15]
“Lekor Kris”
Dan 1 Korentyen 10:16, 17, ler Pol ti koz lo ki sa dipen i vedir pour bann Kretyen swazir, i ti servi sa mo “lekor” dan en sans spesyal. I ti dir: “Sa dipen ki nou kase, pa i en partisipasyon dan lekor Kris? Akoz i annan en sel dipen, menm si i annan en kantite nou, nou form en sel lekor, parski nou partisip dan en menm dipen.” Ler bann Kretyen swazir i pran sa dipen zour Memoryal, zot montre zot linite dan kongregasyon bann Kretyen swazir, ki parey en lekor e Latet sa lekor i Kris.—Matye 23:10; 1 Korentyen 12:12, 13, 18.
[Portre lo paz 15]
Akoz zis bann Kretyen swazir ki pran sa dipen ek diven?
[Portre lo paz 17]
Atraver ladministrasyon Zeova, tou kreasyon dan lesyel e lo later pou ini