‘Ale e fer Disip, batiz zot’
‘Ale e fer Disip, batiz zot’
“Ale e fer tou pep vin mon bann disip. Batiz zot. . . . Ansenny zot pour obei tou sa ki mon’n konmande.” —MATYE 28:19, 20.
1. Ki desizyon bann Izraelit ti fer devan montanny Sinai?
APEPRE 3,500 zan pase, en nasyon ti pret serman avek Bondye. Bann Izraelit ti’n rasanble devan montanny Sinai, kan zot ti dir piblikman: “Tou sa ki Zeova in dir nou pare pour fer.” Depi sa zour zot ti vin en nasyon ki’n dedye zot lavi avek Bondye, e zot ti vin son “propriyete spesyal.” (Egzod 19:5, 8; 24:3) Sa letan zot ti vreman enpasyan pour ganny proteksyon Bondye, e pour vwar zot zenerasyon apre zenerasyon viv dan en pei “ki koule avek dile ek dimyel.”—Levitik 20:24.
2. Ki relasyon i posib pour annan avek Bondye ozordi?
2 Me malerezman parey psalmis Azaf ti dir, bann Izraelit “pa ti gard lalyans Bondye e zot ti refize mars dapre son lalwa.” (Psonm 78:10) Zot pa ti reste fidel avek sa promes ki zot zanset ti’n fer avek Zeova. Finalman zot ti perdi sa relasyon spesyal ki zot ti annan avek Bondye. (Eklezyast 5:4; Matye 23:37, 38) Alors, Bondye ti konmans montre lentere dan bann dimoun dan lezot nasyon “pour swazir parmi zot en pep pour son non.” (Akt 15:14) E dan sa bann dernyen zour ozordi, i pe rasanble ‘en gran lafoul ki personn pa kapab konte, sorti dan tou nasyon, tribi, pep ek lalang.’ En lafoul ki avek lazwa zot dir: “Nou delivrans i sorti kot nou Bondye ki asize lo tronn ek kot Lanyo!”—Revelasyon 7:9, 10.
3. Ki en dimoun i bezwen fer pour li kapab vin pros avek Bondye?
3 Pour en dimoun benefisye avek en relasyon spesyal avek Bondye, i pou bezwen dedye son lavi avek Zeova epi demontre sa ve piblikman par batenm. Sa i an akor avek sa komannman ki Zezi ti donn son bann disip: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Bann Izraelit ti ekoute kan Moiz ti lir sa “liv lalyans.” (Egzod 24:3, 7, 8) Alors, zot ti byen konpran ki Zeova ti ekspekte zot fer. Pareyman ozordi, avan ki en dimoun i batize, i bezwen etidye Labib pour ganny en konnesans egzakt lo lavolonte Bondye.
4. Ki en dimoun i bezwen fer pour kapab batize? (Enkli bwat anler.)
4 I kler ki Zezi ti anvi son bann disip i annan en baz solid pour zot lafwa avan zot batize. I pa ti zis demann son bann disip pour ale e fer lezot disip, me i ti osi demann zot pour ansenny sa bann nouvo ‘pour obei tou sa i’n konmande.’ (Matye 7:24, 25; Efezyen 3:17-19) Alors, normalman bann ki kalifye pour batize, zot in bezwen etidye Labib pour plizyer mwan, oubyen menm enn ouswa de zan. Sa i neseser pour ki zot pa fer en desizyon tro vit oubyen san byen konpran ki savedir batenm. Zour batenm, bann kandida i reponn wi apre ki zot in ganny demande de kestyon enportan. Vi ki Zezi ti dir ki ler nou dir wi, i devret reste wi, e ler nou dir non i devret reste non, nou pou benefisye si nou revwar an detay ki sa de kestyon i vedir.—Matye 5:37.
Repantans ek Dedikasyon
5. Ki sa de keksoz enportan sa premye kestyon batenm i met lanfaz lo la?
5 Eski ou’n repantir avek ou bann pese e ou’n dedye ou lekor avek Zeova pour fer son lavolonte? Sa i premye kestyon ki bann kandida batenm i ganny demande. Sa kestyon i met lanfaz lo de keksoz enportan ki bezwen ganny fer avan batenm. Sa i repantans ek dedikasyon.
6, 7. (a) Akoz repantans i enportan avan nou batize? (b) Ki sanzman en dimoun i bezwen fer apre ki i’n repantir?
6 Akoz en dimoun i bezwen repantir avan i ganny batize? Les zapot Pol eksplik nou: “Nou tou, avan . . . nou ti swiv bann dezir nou lekor.” (Efezyen 2:3) Avan ki nou ti konn laverite, nou ti viv dapre lemonn, savedir dapre son bann prensip ek standar. Nou lavi ti pe ganny kontrole par Satan ki bondye sa lemonn. (2 Korentyen 4:4) Me apre ki nou’n konn lavolonte Bondye, nou determinen pour nepli viv selon “dezir imen, me selon lavolonte Bondye.”—1 Pyer 4:2.
7 Sa nouvo fason viv i anmenn en kantite benediksyon pour nou. Premyerman, i’n fer li posib pour nou annan en relasyon spesyal avek Zeova, e David ti konpar sa avek en lenvitasyon pour antre dan “latant” Bondye ek son “montanny sen.” Pa sa i en gran privilez! (Psonm 15:1) Byensir, Zeova pa pou envit nenport ki, selman bann “ki san defo e ki pe fer sa ki drwat, e ki pe koz laverite dan [zot] leker.” (Psonm 15:2) Depandan lo nou sitiasyon avan nou ti konn laverite, petet nou’n bezwen fer serten sanzman dan nou kondwit ek personnalite pour kapab ariv dan sa kondisyon. (1 Korentyen 6:9-11; Kolosyen 3:5-10) Ler nou repantir, se sa ki pou pous nou pour fer sa bann sanzman. Savedir nou pou annan en profon regre pour nou move lavi dan lepase, e nou pou vreman anvi fer plezir Zeova. Ler nou fer sa, nou konpletman sanze, nou rezet legoism ek fason viv sa lemonn e nou viv nou lavi dan en fason ki fer plezir Bondye.—Akt 3:19.
8. Ki mannyer nou fer nou dedikasyon e ki lyen i annan avek batenm?
8 Eski ou’n dedye ou lekor avek Zeova pour fer son lavolonte? Sa i dezyenm bout dan sa premye kestyon ki bann kandida batenm i ganny demande. Dedikasyon i en pa enportan ki nou bezwen pran avan batize. Nou fer sa dan lapriyer ler nou dir Zeova ki nou anvi servi li pour touzour e nou fer sa atraver Zezi. (Romen 14:7, 8; 2 Korentyen 5:15) Ler nou’n fer sa, Zeova i vin nou Met ek Propriyeter, e parey Zezi nou anvi fer son lavolonte. (Psonm 40:8; Efezyen 6:6) Nou fer sa promes tre serye avek Zeova zis enn fwa. Vi ki nou ti fer nou dedikasyon avek Zeova an prive, alors ler nou reponn wi devan tou dimoun zour nou batenm, nou pe fer zot konnen ki nou’n dedye nou lavi avek nou Papa dan lesyel.—Romen 10:10.
9, 10. (a) Ki i enplike pour fer lavolonte Bondye? (b) Ki mannyer bann zofisye Nazi ti rekonnet ki nou’n dedye nou lekor avek Bondye?
9 Ki enplike ler nou swiv legzanp Zezi pour fer lavolonte Bondye? Zezi ti dir son bann disip: “Si en dimoun i oule vin avek mwan, fodre ki i aret mazin zis li menm e pran son poto martir e kontinyen swiv mwan.” (Matye 16:24, NW) Dan sa verse nou vwar ki Zezi i fer resorti trwa keksoz ki nou bezwen fer. Premyerman nou bezwen ‘aret mazin zis nou menm.’ Andotmo nou devret rezet nou bann dezir egois, sa tandans dan nou pour fer sa ki mal, e aksepte konsey ek direksyon sorti kot Bondye. Dezyenmman, nou pran nou “poto martir.” Dan letan Zezi en poto martir ti reprezant laont ek soufrans. Konman Kretyen nou aksepte ki parfwa nou bezwen soufer akoz sa bon nouvel. (2 Timote 1:8) Kantmenm sa lemonn i kapab boufonn nou oubyen kritik nou, parey Kris nou pa “pran kont laont” akoz nou kontan ki nou pe fer plezir Bondye. (Ebre 12:2) Finalman nou “kontinyen swiv” Zezi.—Psonm 73:26; 119:44; 145:2.
10 I enteresan pour note ki menm serten nou bann lennmi i rekonnet ki bann Temwen Zeova in dedye zot lekor pour servi Bondye avek tou zot leker. Par egzanp dan kan konsantrasyon Nazi Buchenwald Lalmanny, bann ki pa ti oule aret ganny rekonnet konman Temwen Zeova, ti ganny demande pour siny en dokiman. Dan sa dokiman i dir: “Mon ankor en etidyan Labib e mon pa pou zanmen kas sa ve ki mon’n fer avek Zeova.” Sirman sa i byen dekrir latitid bann serviter fidel e ki’n dedye zot lekor avek Bondye!—Akt 5:32.
Rekonnet konman en Temwen Zeova
11. Ki privilez nou gannyen ler nou batize?
11 Eski ou konpran ki ou batenm i idantifye ou konman en Temwen Zeova? Sa i dezyenm kestyon ki bann kandida batenm i ganny demande. Apre ki nou’n batize, nou vin en minis ki port non Zeova. Sa i en gran privilez ek en gro responsabilite. Ler nou batize nou annan sa lespwar pour ganny lavi eternel, akondisyon ki nou reste fidel avek Zeova.—Matye 24:13.
12. Ki responsabilite ki mars ansanm avek sa loner pour port non Zeova?
12 Sirman i en gran loner pour port non Bondye tou pwisan, Zeova. Profet Mika ti dir: “Tou bann pep zot, zot pou mars sakenn onon zot bondye, me nou, nou pou mars onon nou Bondye Zeova pour en letan endefini, wi pour touzour.” (Mika 4:5) Menm si sa i en loner i osi annan son responsabilite. Nou devret fer bokou zefor pour viv en lavi ki anmenn loner pour Zeova. Parey Pol ti deza rapel bann Kretyen Ronm, si en dimoun pa fer sa ki i prese, lezot dimoun pou “koz kont Bondye” oubyen sali Son repitasyon.—Romen 2:21-24.
13. Akoz bann ki’n dedye zot lavi avek Zeova i annan sa responsabilite pour koz lo zot Bondye?
13 Kan en dimoun i vin en Temwen Zeova i osi aksepte sa responsabilite pour koz lo son Bondye. Zeova ti envit nasyon Izrael ki ti’n dedye zot lavi avek li pour vin son bann temwen, pour fer lezot dimoun konnen ki i Bondye pour leternite. (Izai 43:10-12, 21) Me sa nasyon pa ti reisi akonpli sa, e finalman zot ti perdi laprouvasyon Bondye. Ozordi bann vre Kretyen i fyer ki zot annan sa privilez pour koz lo Zeova. Nou koz lo li akoz nou kontan li e nou anvi ki son non i ganny glorifye. I enposib pour nou reste labous fermen ler nou konn laverite lo nou Papa dan lesyel e lo son plan. Nou santi menm parey avek zapot Pol ki ti dir: “Mon trouv mwan dan lobligasyon. Maler pour mwan si mon pa anons Levanzil!”—1 Korentyen 9:16.
14, 15. (a) Ki mannyer lorganizasyon Zeova i ed nou progrese spirityelman? (b) Ki provizyon Zeova in fer pour ed nou spirityelman?
14 Sa dezyenm kestyon i osi rapel bann kandida batenm ki zot bezwen korpere avek lorganizasyon ki Zeova pe dirize par son lespri sen. Nou pa pe servi Bondye nou tousel, e deplis nou bezwen led, sipor ek lankourazman sorti kot nou “bann frer dan lafwa.” (1 Pyer 2:17; 1 Korentyen 12:12, 13) Lorganizasyon Bondye i zwe en gran rol pour ed nou progrese spirityelman. I donn nou en kantite piblikasyon baze lo Labib ki ed nou ganny plis konnesans egzakt, azir avek lasazes ler nou fer fas avek problenm, e pour annan en relasyon pros avek Bondye. ‘Lesklav fidel e pridan’ i donn nou bann nouritir spirityel an abondans e ki vin zis atan pour ed nou progrese spirityelman. Ler i fer sa, i parey en manman ki byen nouri e byen pran swen avek son zanfan.—Matye 24:45-47; 1 Tesalonisyen 2:7, 8.
15 Dan bann renyon tou le semenn, pep Zeova i ganny sa formasyon ki zot bezwen ek lankourazman pour kontinyen servi li fidelman. (Ebre 10:24, 25) Lekol Minister Teokratik i ed nou pour koz devan en lodyans, e Renyon Servis i ekip nou pour pres avek lefikasite. Ler nou pe asiste renyon oubyen pe lir bann piblikasyon baze lo Labib, nou kapab vwar ki Zeova pe servi son lespri sen pour diriz son lorganizasyon. Par mwayen sa bann provizyon, Bondye i averti nou kont bann danze, i ekip nou pour vin bann proklanmater efikas, e i ed nou reste eveye spirityelman.—Psonm 19:7, 8, 11; 1 Tesalonisyen 5:6, 11; 1 Timote 4:13.
Rezon par deryer nou Desizyon
16. Kwa ki pous nou pour dedye nou lavi avek Zeova?
16 Sa de kestyon batenm i rapel bann kandida ki savedir ganny batize dan delo e ki responsabilite sa i anmennen. Alors, kwa ki devret pous nou pour batize? Nou deside pour batize pa akoz en dimoun i fors nou pour fer li, me akoz Zeova ki “atir” nou. (Zan 6:44) Vi ki “Bondye i lanmour,” i pa diriz liniver parey bann dimoun dominer i fer, me i diriz avek lanmour. (1 Zan 4:8) Son bann zoli kalite ek lafason i azir avek nou ki atir nou anver li. Zeova in donn son sel garson pour mor pour nou, e in ofer nou sa pli meyer lavenir. (Zan 3:16) An retour sa i pous nou pour ofer li nou lavi oubyen dedye nou lavi pour servi li.—Proverb 3:9; 2 Korentyen 5:14, 15.
17. Avek kwa ki nou pa’n dedye nou lavi?
17 Nou pa dedye nou lavi anver en serten krwayans oubyen avek en travay, me avek Zeova tousel. Travay ki Zeova i annan pour son pep pou sanze, me zot dedikasyon ki zot in fer avek li pa zanmen sanze. Par egzanp, sa ki i ti demann Abraam pour fer ti konpletman diferan avek sa ki i ti demann Zeremi. (Zenez 13:17, 18; Zeremi 1:6, 7) Me tou le de ti akonpli sa ki Zeova ti demann zot akoz zot ti kontan Zeova e zot ti anvi fer son lavolonte. Pandan sa letan lafen, tou bann disip Kris ki’n batize i fer bokou zefor pour obeir komannman Zezi pour pres sa bon nouvel Rwayonm e fer disip. (Matye 24:14; 28:19, 20) Kan nou fer sa avek tou nou leker, sa i en bon fason pour montre nou Papa dan lesyel ki nou kontan li e ki nou’n vreman dedye nou lavi pour servi li.—1 Zan 5:3.
18, 19. (a) Kan nou batize ki nou pe fer resorti piblikman? (b) Ki nou pou egzaminen dan nou lot lartik?
18 San okenn dout, ler nou batize nou pou ganny bokou benediksyon, me i pa en keksoz ki nou devret pran alalezer. (Lik 14:26-33) Batenm i devret ganny konsidere konman pli enportan ki tou lezot keksoz. (Lik 9:62) Kan nou batize, an realite nou pe dir piblikman: “Sa Bondye i nou Bondye pour en letan endefini, wi pour touzour. Li menm ki pou gid nou ziska nou mor.”—Psonm 48:14.
19 Sa lot lartik pou egzamin lezot kestyon ki kapab ganny souleve an rapor avek batenm. Eski i kapab annan bann rezon valab pour en dimoun refize batize? Eski laz i annan en rol pour zwe ladan? Ki mannyer nou tou nou kapab montre respe pour sa lokazyon?
Eski ou kapab eksplike?
• Akoz tou Kretyen i bezwen repantir avan batize?
• Ki enplike ler nou dedye nou lavi avek Bondye?
• Lefe ki nou annan sa loner pour port non Zeova, ki responsabilite sa i anmennen?
• Kwa ki devret pous nou pour anvi batize?
[Kestyon]
[Bwat/Portre lo paz 20]
Sa de Kestyon Batenm
Lo baz sakrifis Zezi Kri, eski ou’n repantir ou bann pese e dedye ou lekor avek Zeova pour fer son lavolonte?
Eski ou konpran ki ou dedikasyon ek batenm i idantifye ou konman en Temwen Zeova e ki ou form par lorganizasyon Bondye dirize par lespri sen?
[Portre lo paz 21]
Dedikasyon i en promes tre serye ki nou fer avek Zeova dan lapriyer
[Portre lo paz 23]
Nou travay predikasyon i montre ki nou’n dedye nou lavi avek Bondye