Annou reste lwen avek fo Larelizyon!
Annou reste lwen avek fo Larelizyon!
“Pour sa rezon, sorti parmi zot, e separe avek zot, Senyer i dir. Pa tous okenn keksoz enpir.”—2 KORENTYEN 6:17.
1. Ki bokou dimoun senser pa konnen?
BOKOU dimoun senser pa konn laverite lo Bondye e lo lavenir limanite. Vi ki zot pa konn vre larepons sa bann kestyon enportan, zot konfize e pa tro asire sa ki zot krwar. Plizyer milyon dimoun in vin lesklav siperstisyon, bann koutim ek lafet ki zot Kreater pa kontan. I tre probab serten ou bann vwazen oubyen fanmiy i krwar dan lanfer, dan en Bondye an trwa personn, ki nanm i kontinyen viv apre lanmor oubyen lezot krwayans ankor.
2. Ki bann sef relizye in fer e avek ki rezilta?
2 Lekel ki responsab pour sa fernwanr spirityel? Petet ou pou vwar li drol, me se larelizyon, e sirtou bann lorganizasyon ek sef relizye ki’n promot bann krwayans ki tou lekontrer avek pwennvi Bondye. (Mark 7:7, 8) Finalman, bokou dimoun in ganny anbete pour krwar ki zot pe ador sa vre Bondye kan an realite zot pe fer bann keksoz ki ofans li. Fo larelizyon i responsab pour sa sitiasyon deplorab.
3. Lekel ki’n toultan promot fo larelizyon, e ki Labib i dir lo li?
3 Zapot Pol ti koz lo sa enn ki par deryer fo larelizyon kan i ti dir: “Pour bann enkredil, ki [bondye] sa syek i’n avegle zot lentelizans, pour ki zot pa war lalimyer Bonn Nouvel, konsernan laglwar Kris, ki zimaz Bondye.” (2 Korentyen 4:4) ‘Bondye sa syek’ i pa lot ki Satan oubyen Dyab. Li menm ki’n toultan promot fo larelizyon. Pol ti ekrir: “Satan limenm i degiz konman lanz lalimyer. Alor i pa etonnan non pli ki son bann serviter osi i degiz konman serviter lazistis.” (2 Korentyen 11:14, 15) Satan i fer sa ki mal paret byen e anbet dimoun pour krwar sa bann mansonz.
4. Ki Lalwa Bondye pour bann Izraelit ti dir lo bann fo profet?
4 Alor, nou konpran akoz Labib i rezet net fo larelizyon! Par egzanp dan Lalwa Moiz, Bondye ti averti son pep kont bann fo profet. Si en dimoun ti ansenny bann fo lansennyman oubyen promot ladorasyon bann fo bondye, i ti bezwen ganny ‘met amor akoz i ti koz lo revolte kont Zeova.’ Bondye ti demann bann Izraelit pour ‘tir sa ki mal parmi zot.’ (Deterononm 13:1-5) Wi, pour Zeova fo larelizyon i mal.—Ezekyel 13:3.
5. Ki lavertisman nou devret swiv ozordi?
5 Parey Zeova, Zezi ek son bann zapot ti vreman ay fo larelizyon. Zezi ti averti son bann disip: “Mefye ou bann fo profet. Zot vin kot ou parey mouton, me anndan zot bann loulou feros.” (Matye 7:15; Mark 13:22, 23) Pol ti dir: “Bondye i montre son lakoler depi lesyel pour tou bann pese ek bann lenzistis ki zonm lo later i fer, e par kwa zonm i anpes laverite prodwi rezilta.” (Romen 1:18) I vreman enportan ki bann vre Kretyen i ekout sa bann lavertisman e ki zot reste lwen avek bann ki kasyet laverite oubyen fann bann fo lansennyman!—1 Zan 4:1.
Sorti dan “Gran Babilonn”
6. Ki mannyer Labib i dekrir “Gran Babilonn”?
6 Annou gete konman liv Revelasyon dan Labib i dekrir fo larelizyon. I pran legzanp en prostitye ki’n sou ki domin bann rwayonm ek bann pep. Sa fanm i annan bann relasyon imoral avek en bann lerwa e i sou avek disan bann vre serviter Bondye. (Revelasyon 17:1, 2, 6, 18) I annan en non lo son fron ki al byen avek son kondwit sal e degoutan. I apel “Gran Babilonn, manman tou bann prostitye ek tou bann laksyon imoral lo later.”—Revelasyon 17:5.
7, 8. Dan ki sans fo larelizyon i parey en prostitye, e ki rezilta sa in anmennen?
7 Fason ki Labib i dekrir Gran Babilonn i al tre byen avek tou bann fo larelizyon. Menm si tou sa bann larelizyon pa ofisyelman ini ansanm konman en sel larelizyon, zot lanmen dan lanmen dan zot bi ek aksyon. Parey sa fanm imoral dan Revelasyon, fo larelizyon i annan en kantite lenfliyans lo bann gouvernman. Fo larelizyon i parey en fanm enfidel ki’n al fer prostitisyon, akoz i’n asosye li avek bann pouvwar politik enn deryer lot. Zak en disip Zezi ti dir: “Bann [fanm] enfidel ki zot ete! Pa zot konnen ki lanmour pour lemonn i fer vin lennmi Bondye? Sa ki oule fer zanmi avek lemonn i vin lennmi Bondye.”—Zak 4:4.
8 Bokou imen in soufer akoz fo larelizyon ek politik in mars ansanm. En eksper Afriken dan politik Xolela Mangcu ti dir ki toudilon listwar imen, i annan en kantite dimoun ki’n mor akoz larelizyon in asosye avek politik. Tou dernyenman en zournal ti dir: ‘Bann konfli pli danzere e ki’n koz plis lanmor i annan pour fer avek larelizyon.’ Plizyer milyon dimoun in ganny touye dan bann lager kot larelizyon ti enplike. Gran Babilonn in menm persekit e touy bann vre serviter Bondye, pour sa rezon liv Revelasyon i dir ki i’n sou avek zot disan.—Revelasyon 18:24.
9. Ki mannyer liv Revelasyon i montre ki Zeova i deteste fo larelizyon?
9 I evidan ki Zeova i deteste fo larelizyon ler ou vwar sa ki pou arive avek Gran Babilonn. Revelasyon 17:16 i dir: “Sa dis korn ki ou ti war, zot ek sa bebet pou ay sa prostitye. Zot pou depouy li avek tou sa ki i posede e kit li touni. Zot pou devor son laser e bril li avek dife.” Premye, sa gro bebet pou depouy, touy e devor sa fanm. Epi sa ki reste pou ganny brile konpletman. Parey avek sa prostitye, Bondye pou pous bann gouvernman imen pour atak fo larelizyon. (Revelasyon 17:17) Nou kapab asire ki Gran Babilonn setadir tou bann fo larelizyon pa pou kapab sap destriksyon. “Personn pa pou trouv li ankor.”—Revelasyon 18:21.
10. Ki latitid nou devret annan vizavi fo larelizyon?
10 Ki latitid bann vre serviter Bondye i devret annan vizavi Gran Babilonn? I tre kler, Labib i averti nou: “Sorti dan sa lavil, mon pep, pour ou pa partisip dan son bann pese e ki ou pa resevwar en par son bann fleo.” (Revelasyon 18:4) Bann ki oule ganny sove i devret sorti dan fo larelizyon avan i tro tar. Kan Zezi ti lo later, i ti dir ki dan bann dernyen zour bokou dimoun ti pou pretann zot pe obeir li. (Matye 24:3-5) Avek sa bann i dir: “Mon pa’n zanmen konn zot. Sorti la, zot ki pratik lemal!” (Matye 7:23) Lerwa Zezi dan lesyel napa nanryen pour fer avek fo larelizyon.
Ki mannyer nou kapab reste lwen avek fo Larelizyon?
11. Ki nou bezwen fer pour reste lwen avek fo larelizyon?
11 Bann vre Kretyen i reste lwen avek fo larelizyon e zot rezet bann fo lansennyman relizye. Sa i vedir ki nou pa ekout oubyen get bann progranm relizye lo radyo oubyen televizyon, nou pa lir okenn keksoz ki ansenny bann mansonz lo Bondye oubyen Labib. (Psonm 119:37) I osi fer sans ki nou pa partisip dan bann fonksyon oubyen bann aktivite rekreasyonnel ki ganny organize par bann group ki asosye avek fo larelizyon. Deplis nou pa siport fo larelizyon dan okenn fason. (1 Korentyen 10:21) Si nou fer tousala, nou pa pou ‘tonm dan pyez personn avek zot bann fo largiman [ek] filozofi, ki pa baze lo Kris, me lasazes imen, e ki fonde lo tradisyon zonm, ek bann [keksoz] lemonn.’—Kolosyen 2:8.
12. Ki mannyer en dimoun i kapab sorti net dan fo larelizyon?
12 Si en dimoun i en manm dan en fo larelizyon e i oule vin en Temwen Zeova, ki i bezwen fer? Laplipar-di-tan, sa dimoun pou ekrir en let pour dir ki i nepli en manm dan sa larelizyon. I tre enportan ki sa dimoun i evit konpletman ganny sali ankor avek fo larelizyon. I pou fer kler avek sa group relizye ek bann lezot dimoun an zeneral ki i’n sorti net dan sa larelizyon.
13. Ki konsey Labib i donnen konsernan reste lwen avek fo larelizyon?
13 Zapot Pol ti ekrir: “Pa bezwen asosye zot avek bann non-krwayan. Ki i annan an komen ant lazistis ek mesanste? Ki linyon i kapab annan ant lalimyer avek fernwanr? Ki mannyer Kris i kapab tonm dakor avek Dyab? Ki mannyer en krwayan i kapab partisip avek en non-krwayan? Ki Tanp Bondye i annan an komen avek bann zidol? . . . ‘Pour sa rezon, sorti parmi zot, e separe avek zot,’ Senyer i dir. ‘Pa tous okenn keksoz enpir.’” (2 Korentyen 6:14-17) Nou swiv sa konsey si nou reste lwen avek fo larelizyon. Eski sa i vedir nou devret osi evit bann dimoun ki dan fo larelizyon?
Kontinyen “fer tou Keksoz avek Sazes”
14. Eski nou devret evit konpletman bann dimoun ki dan fo larelizyon? Eksplike.
14 Eski nou devret evit konpletman bann dimoun dan fo larelizyon? Eski nou devret pa antren zot akoz zot napa menm krwayans avek nou? Non, i pa neseser. Dezyenm pli gran komannman i dir: “Kontan ou prosen parey ou kontan ou prop lekor.” (Matye 22:39) Nou demontre sa lanmour ler nou anons sa bon nouvel Rwayonm avek nou prosen, etidye Labib avek zot e ed zot pour sorti dan fo larelizyon.
15. Ki savedir “pa fer parti lemonn”?
15 Menm si nou anons sa bon nouvel avek nou prosen, nou mazinen ki konman disip Zezi nou “pa fer parti lemonn.” (Zan 15:19) Sa mo “lemonn” pe refer avek tou bann ki pa ador sa vre Bondye. (Efezyen 4:17-19; 1 Zan 5:19) Ler nou dir nou separe avek lemonn, sa i vedir ki nou rezet latitid, fason koze ek kondwit ki Zeova pa kontan. (1 Zan 2:15-17) Deplis, nou rapel ki “move frekantasyon, i gat [bann bon labitid]” alor nou pa vin pros avek bann ki pa anmenn en lavi Kretyen. (1 Korentyen 15:33) Andotmo, pa fer parti lemonn i vedir pa ‘ganny sali par move lenfliyans sa lemonn.’ (Zak 1:27) Alors, ler nou reste separe avek lemonn i pa vedir ki nou evit tou kontak avek lezot dimoun.—Zan 17:15, 16; 1 Korentyen 5:9, 10.
16, 17. Ki mannyer nou konport nou avek bann dimoun ki pa konn laverite dan Labib?
16 Be alor, ki mannyer nou pou konport nou avek bann dimoun ki pa konn laverite dan Labib? Zapot Pol ti dir sa parol avek kongregasyon Kolos: “[Kontinyen] fer tou keksoz avek sazes, dan zot konportman avek bann non-krwayan, e servi byen tou lokazyon ki prezant avek zot. Ki zot parol i touzour agreab e enteresan, pour zot kapab donn bann repons valab tou dimoun.” (Kolosyen 4:5, 6) Zapot Pyer li ti dir: “Me rann glwar dan zot leker Kris konman zot Senyer. Zot devre touzour pare pour donn en repons bann ki demann zot leksplikasyon konsernan lesperans ki dan zot. Me fer li avek labonte ek respe.” (1 Pyer 3:15, 16) E Pol ti konsey bann Kretyen pour pa “malparl personn, me ki zot evit tou kerel e montre zot zanmi e poli avek tou dimoun.”—Tit 3:2.
17 Nou Temwen Zeova, nou bezwen byen poli e pa arogan avek lezot. Nou pa anvi malparl bann dimoun dan lezot larelizyon. Plito nou gard nou kalm e vey nou parol menm si sa dimoun dan predikasyon, sa vwazen oubyen koleg travay i fer nou kanmi oubyen menm zour nou.—Kolosyen 4:6; 2 Timote 2:24.
Kontinyen ‘tenir for Model Parol Laverite’
18. Ki sitiasyon deplorab bann ki’n retourn dan fo larelizyon?
18 Pa i vreman regretab ler en dimoun i retourn dan fo larelizyon! Labib i dekrir sa sitiasyon ler i dir: “Annefe, si apre ki zot in arive sape dan bann move lenflians lemonn an konnesan nou Senyer e Sover Zezi-Kri, zot les zot reganny atrape e reganny anpaye, e ganny bate, zot kondisyon pou vin pir ki avan. . . . Sa ki’n ariv zot i parey sa ki sa proverb i dir e i vre: ‘Lisyen in retourn dan son vomi’ e ‘Koson ki’n fek fini lave, in retourn dan son labou.’”—2 Pyer 2:20-22.
19. Akoz nou bezwen vey bann danze pour nou spirityalite?
19 Nou devret veye ki nanryen pa vin en danze pour nou spirityalite, e danze i lanmenm. Zapot Pol ti averti nou klerman ki dan bann “dernyen tan, serten dimoun pou abandonn lafwa pour atas zot avek bann [parol] tronper, e swiv bann lansennyman demon.” (1 Timote 4:1) Nou pe viv dan sa bann “dernyen tan.” Bann ki pa reste lwen avek fo larelizyon i kapab “ganny trennen par laroul, e pouse partou par nenport divan lansennyman ki dimoun tronper i fannen, bann ki antrenn dimoun dan lerer par tou sort riz ki zot envante.”—Efezyen 4:13, 14.
20. Ki mannyer nou kapab protez nou kont bann move lenfliyans fo larelizyon?
20 Ki mannyer nou kapab protez nou kont bann move lenfliyans fo larelizyon? I annan diferan fason ki Zeova pe prepar nou. Nou annan Parol Bondye Labib. (2 Timote 3:16, 17) Zeova in osi donn bokou manze spirityel atraver ‘lesklav fidel e pridan.’ (Matye 24:45) Pli nou progrese dan laverite, pli nou devret kontan ‘nouritir solid ki pour bann adilt’ e zwenn ansanm pour aprann plis ankor lo bann laverite dan Labib. Eski ou santi koumsa? (Ebre 5:13, 14; Psonm 26:8) Alors annou determinen pour byen servi tou sa ki Zeova i donn nou pour kontinyen ‘tenir byen for konman en model, parol laverite’ ki nou’n ganny ansennyen e reste lwen avek fo larelizyon.—2 Timote 1:13.
Ki ou’n aprann?
• Kisisa “Gran Babilonn”?
• Ki nou bezwen fer pour reste lwen avek fo larelizyon?
• Ki danze nou bezwen evite?
[Kestyon]
[Portre lo paz 14]
Akoz liv Revelasyon i dir ki “Gran Babilonn” i parey en prostitye?
[Portre lo paz 15]
“Gran Babilonn” pou sirman ganny detri
[Portre lo paz 17]
Nou demontre “labonte ek respe” avek bann ki napa menm krwayans avek nou