Konpran Labib—Kwa ki pou ed ou?

“OU’N kasyet sa bann keksoz avek bann malen ek bann entelizan e ou’n revel zot avek bann pti zanfan.” (Lik 10:21) Sa parol ki Zezi ti dir son Papa dan lesyel, i montre nou ki si nou anvi konpran Labib nou bezwen annan sa bon latitid. Nou vwar ki Zeova i vreman annan lasazes, akoz i’n kapab donn nou en liv ki zis bann ki annan limilite e pare pour ganny ansennyen ki kapab konpran.

Lamazorite dimoun i vwar li difisil pour demontre limilite. Nou tou nou’n ne avek sa tandans pour montre ki nou pli siperyer ki lezot. Deplis nou pe viv dan “bann dernyen zour” kot nou antoure avek dimoun ki “egois, . . . annan karakter vif, anfle avek lorgey.” (2 Timote 3:1-4) Sa i bann latitid ki kapab anpes nou konpran Parol Bondye. Malerezman, nou tou nou ganny enfliyanse avek lezot dan en serten fason. Ki mannyer ou kapab annan sa bon latitid ki pou ed ou konpran Labib?

Prepar Leker ek Lespri

Ezra, enn bann dirizan pep Bondye dan letan lontan, ti “prepar son leker pour egzamin lalwa Zeova.” (Ezra 7:10) Eski i annan serten fason ki nou kapab prepar nou leker? Wi. Nou kapab konmans fer sa par annan en bon pwennvi lo Labib. Pol ti dir bann Kretyen: “Kan nou ti anons zot parol Bondye, zot ti ekoute e aksepte li, non pa konman parol zonm me konman parol Bondye parey i ete.” (1 Tesalonisyen 2:13) Menm si zonm ki ti ekrir Labib, sa ki zot ti ekrir ti sorti kot Zeova. Kan nou rekonnet sa, i pou pli fasil pour nou aksepte sa ki nou lir.—2 Timote 3:16.

Lapriyer i en lot mwayen pour ed nou prepar nou leker. Vi ki Bondye ti servi son lespri sen pour ed zonm ekrir Labib, alors sa menm lespri sen i kapab ed nou konpran sa ki Labib i dir. Nou bezwen priy Bondye pour ganny son lespri sen. Remarke ki mannyer en psalmis ti vreman anvi konpran Labib, i ti ekrir: “Fer mwan konpran, pour ki mon kapab obeir ou lalwa e gard li avek tou mon leker.” (Psonm 119:34) Nou pa devret zis priy Bondye pour ed nou konpran Labib, me osi pour ed nou aksepte sa ki Labib i dir. Pour kapab konpran Labib nou bezwen pare pour aksepte sa ki vre.

Anmezir ki ou esey devlop sa bon latitid, annou egzaminen ki byenfe ou kapab gannyen ler ou etidye Labib. I annan en kantite rezon akoz nou devret egzamin Parol Bondye, me rezon pli enportan se ki i ed nou pour vin pros avek Bondye. (Zak 4:8) Ler nou konn plis lo lafason ki Zeova i azir dan diferan  sirkonstans, ki mannyer i apresye sa bann ki kontan li, e ki mannyer i azir anver bann ki kit li, nou pe dekouver ki kalite Bondye i ete. Premye rezon akoz nou anvi lir Labib, i devret akoz nou anvi konn Bondye pli byen, e an retour nou relasyon avek li pou vin pli for.

Lobstak ki anpes annan sa bon Latitid

Kwa ki kapab anpes nou konpran Parol Bondye? Sa presyon pour pa dezapwent sa bann ki nou krwar nou devret fidel avek i kapab vin en lobstak. Par egzanp, ou kapab annan sa tandans pour reste atase avek krwayans ek lopinyon serten dimoun ki ou respe en kantite. Me ki ou pou fer si zot pa dakor oubyen apresye sa laverite dan Parol Bondye? Dan en sitiasyon koumsa, i kapab difisil pour en dimoun konpran sa ki Labib i ansennyen. Anfet, Labib i ankouraz nou pour byen egzamin sa ki nou’n ganny ansennyen.—1 Tesalonisyen 5:21.

Mari, manman Zezi, ti trouv li dan sa sitiasyon ki nou’n fek mansyonnen. I ti grandi dan larelizyon Zwif. I ti swiv byen Lalwa Moiz e san okenn dout i ti al dan sinagog. Me plitar dan son lavi i ti remarke ki fason adore ki son paran ti’n ansenny li, ti nepli fer plezir Bondye. Alors, Mari ti aksepte lansennyman Zezi e i ti enn bann premye Kretyen dan kongregasyon. (Akt 1:13, 14) Ler Mari ti fer sa, i pa ti pe mank respe pour son paran oubyen anver zot larelizyon, okontrer sa i demontre ki i ti kontan Bondye. Si nou anvi benefisye avek Labib, zis parey Mari nou bezwen les nou fidelite anver Bondye pas avan fidelite anver lezot dimoun.

Me malerezman bokou dimoun pa apresye laverite dan Labib. Serten i plifere swiv bann fo tradisyon relizye. Lezot i rezet laverite ki swa par zot parol oubyen par zot fason viv. Annefe i demann serten sakrifis pour aksepte laverite dan Labib. Par egzanp, ou bann zanmi, vwazen, koleg travay e menm ou fanmiy i kapab pa dakor avek sa ki ou pe fer. (Zan 17:14) Me en zonm saz ti ekrir: “Aste laverite e pa bezwen vann li.” (Proverb 23:23) Si ou vreman kontan sa ki vre, Zeova pou ed ou konpran Labib.

Refize met an pratik sa ki Labib i dir, i en lot lobstak ki kapab anpes en dimoun konpran Labib. Zezi ti dir son bann disip: “Pour zot sekre Rwayonm in ganny revele, me pa pour lezot. Akoz lespri sa pep in fermen e zot in bous zot zorey.” (Matye 13:11, 15) Lamazorite dimoun ki Zezi ti koz avek, pa ti enterese, zot pa ti pare pour sanze. Pa zot ti vreman diferan avek sa marsan ki Zezi ti koz lo la dan enn son legzanp! Apre ki i ti’n vwar sa perl ki annan gran valer, san ezite i ti vann tou sa ki i posede pour li kapab aste sa perl. Pareyman, arive konpran laverite dan Labib, i devret en keksoz presye pour nou.—Matye 13:45, 46.

Difikilte pour les en lot Dimoun ansenny nou

Nou kapab vwar li difisil pour les en lot dimoun ansenny nou. Sa i enn bann pli gro lobstak ki kapab anpes en dimoun konpran Labib. En dimoun i kapab vwar li difisil pour aksepte en nouvo lansennyman sorti kot en lot ki napa gran plas dan lasosyete. Annefe, bann zapot Zezi Kri ti “bann zonm senp san gran ledikasyon.” (Akt 4:13) Zapot Pol i eksplike akoz: ‘Bondye in apel zot: napa bokou bann saz, ni bokou bann ki annan pouvwar, ni bokou ki sorti dan fanmiy nob. Me Bondye in swazir sa ki paret bet pour lemonn pour fer onte bann saz.’ (1 Korentyen 1:26, 27) Si ou vwar li difisil pour demontre limilite akoz ou pe ganny ansennyen par en dimoun san gran ledikasyon, gard antet ki Bondye pe servi sa dimoun pour ansenny ou. Napa pli gran privilez ki ganny ansennyen par Zeova nou “Gran Enstrikter.”—Izai 30:20; 54:13.

Naamann ki ti en komandan larme Siryen ti vwar li difisil pour les li ganny enstri par en dimoun san gran ledikasyon. I ti al vwar Elisa,  en profet Zeova, pour esey geri son lalep. Me Bondye ti servi en serviter pour fer Naamann konnen ki i bezwen fer pour li ganny geri. Sa mesaz ek lafason ki i ti ganny dir, ti fer li difisil pour Naamann aksepte li avek limilite. Alors, okonmansman i ti refize obeir sa ki profet Bondye ti’n dir li. Me apre i ti sanz son latitid e ti ganny geri. (2 Lerwa 5:9-14) Kan nou lir Labib nou osi nou kapab vwar nou dan en sitiasyon parey Naamann. Nou kapab aprann ki si nou oule ganny geri spirityelman oubyen moralman, nou pou bezwen viv en nouvo kalite lavi. Eski nou pou annan limilite pour les en dimoun montre nou ki nou bezwen fer? Zis bann ki pare pour les zot ganny ansennyen ki kapab konpran Labib.

Me en lot zonm byen o plase, ki ti travay anba Kandas larenn Etyopyen, ti demontre en bon latitid. I ti pe retourn Lafrik dan son kales kan Filip, en disip, ti apros li. Filip ti demann li si i konpran sa ki i pe lir. Sa zofisye ti annan ase limilite pour dir: “Ki mannyer mon kapab konpran si personn pa eksplik mwan?” Apre ki i ti’n konpran Parol Bondye, sa zonm ti batize. Apre “i ti kontinyen son semen avek lazwa.”—Akt 8:27-39.

An zeneral, bann Temwen Zeova zot pa bann dimoun ki annan gran ledikasyon. Sak semenn zot etidye Labib avek plis ki sis milyon dimoun. Labib i montre nou sa pli bon fason pour viv, i donn nou sa sel lespwar pour limanite, e i montre nou ki mannyer pour byen konn Bondye. Lefe ki Labib i kapab fer tousala, plizyer milyon dimoun in remarke ki ler zot etidye Labib e konpran sa ki i dir, sa i anmenn en gran lazwa pour zot. Ou osi ou kapab eksperyans sa lazwa.

[Portre lo paz 7]

Naamann ti vwar li difisil aksepte lenstriksyon avek en senp serviter

[Portre lo paz 7]

Kan nou konpran Labib, sa i fer nou leker kontan