Sakenn i devret pran son Responsabilite
Sakenn i devret pran son Responsabilite
“Sakenn antre nou pou bezwen rann kont devan Bondye pour son prop lekor.”—ROMEN 14:12.
1. Ki mannyer sa trwa Ebre ti pran zot responsabilite?
TRWA zenn Ebre ti bezwen fer en gro desizyon, ganny met amor oubyen reste vivan. Eski zot ti pou tonm azenou devan sa manman stati annor parey zot ti oblize dapre lalwa Babilonn? Oubyen eski zot ti pou refize ador li e ganny brile amor dan en four dife? Sadrak, Mesak ek Abednego ti napa letan pour demann konsey e zot pa ti bezwen osi. Deswit zot ti dir: “Ou devret konnen, O lerwa, ki ou bann bondye i pa sa bann ki nou pe servi, e sa stati annor ki ou’n met debout la, nou pa pou adore.” (Danyel 3:1-18) Sa trwa Ebre ti pran zot responsabilite.
2. Lekel ki ti enfliyans Pilat kan i ti ziz Zezi? Eski sa i vedir ki i pa ti responsab pour son desizyon?
2 Apepre sis san zan apre, en gouverner ti ekout sa bann dimoun pe akiz sa zonm. I ti reflesir lo sa ka e konmans realize ki sa zonm ti inosan. Selman sa lafoul ti pe demann li pour egzekit sa zonm. Premye kou, sa gouverner ti esey reziste. Me finalman anba presyon sa lafoul, i pa ti pran son responsabilite e i ti aksepte sa ki lafoul ti demande. I ti lav son lanmen e dir: “Mon pa responsab disan sa zonm!” E i ti les zot pran li pour ganny kloute lo en poto. Olye pran son responsabilite pour fer en bon desizyon konsernan Zezi Kri, Pons Pilat ti plito les lezot fer desizyon dan son plas. Menm si i ti lav son lanmen, i ti responsab pour pas sa zizman enzis lo Zezi.—Matye 27:11-26; Lik 23:13-25.
3. Akoz nou pa devret les lezot fer desizyon dan nou plas?
3 Be ou, eski ou pran ou responsabilite? Ler ou bezwen fer en desizyon, eski ou parey sa trwa Ebre? Oubyen eski ou les lezot deside dan ou plas? I vre ki fer desizyon pa touzour fasil e se bann dimoun matir ki fer bann bon swa. Par egzanp, paran i bezwen fer bann bon desizyon pour zot zanfan miner. Natirelman, parler fer desizyon i tre difisil si sitiasyon i konplike ouswa i annan plizyer keksoz pour pran an konsiderasyon. Toudmenm, nou bezwen pran nou responsabilite pour fer en desizyon akoz i pa sitan difisil. I pa enn sa bann “fardo” oubyen “keksoz penib” ki bann ki annan kalifikasyon spirityel dan kongregasyon i bezwen anmennen pour nou. (Galat 6:1, 2; not anba lo paz dan Traduction du monde nouveau) Okontrer, i nou responsabilite e “sakenn antre nou pou bezwen rann kont devan Bondye pour son prop lekor.” (Romen 14:12) Labib i dir ki “sakenn i devre anmenn son prop fardo [oubyen responsabilite].” (Galat 6:5) Alors, ki mannyer nou kapab fer bann bon desizyon dan nou lavi? Dabor, nou devret aksepte ki konman imen nou annan bann limit e aprann ki nou bezwen fer pour sirmont zot.
En Keksoz esansyel pour fer en bon Desizyon
4. Ki leson enportan nou kapab tire avek dezobeisans Adan ek Ev?
4 I pa ti pran bokou letan dan listwar imen pour sa premye koup fer en desizyon avek bann move konsekans. Zot ti deside pour manz fri sa pye konnesans bon e move. (Zenez 2:16, 17) Akoz zot ti fer sa desizyon? Labib i dir ki Ev ti vwar ki sa pye ti zoli, e i ti gou pour gete. Alors, i ti pran sa fri e manze. Apre, i ti donn en pe son msye e i ti manze li osi. (Zenez 3:6) Ev ti fer sa desizyon akoz dezir egois e Adan ti fer parey li. Se pour sa rezon ki pese ek lanmor “in pas avek tou dimoun.” (Romen 5:12) I annan en leson enportan pour nou tire avek dezobeisans Adan ek Ev. I fasil pour fer bann move desizyon si nou pa les Bondye gid nou.
5. Ki mannyer Zeova i gid nou, e konman nou kapab byen servi son gidans?
5 Pa nou kontan ki Zeova i donn nou gidans! Labib i dir nou: “Ou zorey pou tann en parol deryer ou dir: ‘La sa semen. Mars lo la,’ si fodre al adrwat oubyen si fodre al agos.” (Izai 30:21) Atraver son Parol enspire Labib, Zeova pe koz avek nou. Se pour sa ki nou bezwen etidye Labib pour annan en konnesans egzakt. Pour nou kapab fer bann bon desizyon, nou devret pran ‘nouritir solid ki pour bann adilt.’ “Par leksperyans,” nou pou devlop abilite pour “fer diferans ant sa ki byen ek sa ki mal.” (Ebre 5:14) Nou kapab devlop sa abilite si nou met an pratik sa ki nou aprann dan Parol Bondye.
6. Ki nou bezwen fer pour nou konsyans mars byen?
6 Nou tou nou’n ne avek en konsyans, e i vreman enportan ki nou servi li ler nou fer desizyon. Nou konsyans i annan sa abilite pour ziz en sitiasyon, e i kapab ‘akiz oubyen defann’ nou. (Romen 2:14, 15) Si nou oule nou konsyans i mars byen, nou devret les konnesans egzakt lo Parol Bondye enfliyans li. Nou osi bezwen aplik Parol Bondye e sa pou fer nou konsyans vin pli sansib. Si nou pa fer tousala, bann labitid, koutim, lantouraz, ek lopinyon lezot i kapab fasilman enfliyans li e i kapab diriz nou dan en move semen. Ki pou arive si nou abitye pa ekout nou konsyans e kas lalwa Bondye? Avek letan nou konsyans i kapab ganny marke “avek en fer rouz,” i pou parey en sikatris kot ou nepli santi nanryen e i nepli annan okenn reaksyon. (1 Timote 4:2) Parkont, nou kapab depan lo en konsyans ki ganny dirize par Parol Bondye.
7. Kwa ki esansyel pour nou fer bann bon desizyon?
7 Alors, en keksoz esansyel pour nou pran nou responsabilite e fer bann bon desizyon, se annan en konnesans egzakt lo Parol Bondye e sa abilite pour met an pratik sa ki nou aprann. Olye fer bann desizyon vit vit, nou devret pran letan pour rod bann prensip dan Labib e byen reflesir konman pour met an pratik sa bann prensip. Menm si nou bezwen fer en desizyon deswit parey Sadrak, Mesak ek Abednego, nou pou byen prepare si nou annan en konnesans egzakt lo Parol Bondye e si nou’n les sa konnesans diriz nou konsyans. Pli nou vin bann dimoun matir pli nou pou fer bann bon desizyon. Annou vwar de laspe dan nou lavi.
Lekel ou pou frekante?
8, 9. (a) Ki prensip ki kapab ed nou evit bann move frekantasyon? (b) Eski bann move frekantasyon i selman bann dimoun ki annan en move lavi? Eksplike.
8 Zapot Pol ti dir: “Pa les zot ganny anbete: ‘Move frekantasyon, i gat [bann bon labitid].’” (1 Korentyen 15:33) Zezi ti dir son bann disip: “Zot pa fer parti lemonn.” (Zan 15:19) Dek ki nou konpran sa bann prensip, nou vwar deswit sa nesesite pour evit frekant bann dimoun ki annan en lavi seksyel imoral, adilter, bann voler, soular, oubyen ki annan lezot move konportman. (1 Korentyen 6:9, 10) Pli nou agrandi nou konnesans laverite lo Labib, pli nou pou realize ki danze i annan pour pas letan avek sa bann dimoun atraver bann film, progranm televizyon, konpiter ek liv. Sa i aplik osi avek bann chat rooms lo Internet kot nou kapab frekant “bann ki kasyet sa ki zot ete.”—Psonm 26:4.
9 Eski nou devret frekant bann ki kapab anmenn en bon lavi me ki pa vreman annan lafwa dan sa vre Bondye? Labib i dir nou byen kler: “Lemonn antye i dan pouvwar dyab.” (1 Zan 5:19) Alor nou realize ki bann move frekantasyon i pa selman bann dimoun ki annan en move lavi oubyen ki aksepte sa ki mal. Pour sa rezon, nou fer en bon swa pour vin bon zanmi selman avek bann ki kontan Zeova.
10. Kwa ki kapab ed nou fer bann desizyon dan nou relasyon avek dimoun dan lemonn?
10 Byensir, i pa posib pour napa okenn kontak avek bann dimoun dan lemonn, e Labib pa demann sa osi. (Zan 17:15) Ler nou dan predikasyon, kot lekol ouswa dan travay, nou bezwen annan serten lasosyasyon avek bann dimoun lemonn. En Kretyen ki marye avek en dimoun ki pa Temwen pou frekant en dimoun dan lemonn plis ki lezot. Me selman, si nou konn byen fer diferans ant sa ki byen ek sa ki mal, nou pou konpran ki i annan en diferans ant asosye kot i neseser avek lemonn e vin pros avek lemonn kan i pa neseser. (Zak 4:4) Alor si nou matir spirityelman, nou pou kapab deside si i bon pour partisip dan bann aktivite an deor lekol parey sport, ladans, oubyen pour al bann dinen ek parti ki ganny organize pour bann travayer.
Ki Travay ou pou swazir?
11. Ki premye keksoz nou bezwen pran an konsiderasyon kan nou pe rod en plas travay?
11 En lot laspe kot nou kapab met an pratik bann prensip Labib pour fer bann bon desizyon, se ki mannyer nou desarz nou responsabilite pour pran ‘swen avek bann ki viv dan nou lakaz.’ (1 Timote 5:8) Premye keksoz ki nou bezwen konsidere se kalite travay ki nou pou rode, andotmo sa ki nou pou fer dan sa travay. Par egzanp, en travay i mal si i direkteman siport sa ki Labib i defann. Se pour sa ki bann vre Kretyen pa pou aksepte en travay kot zot pou bezwen ankouraz ladorasyon zidol, vole, mal servi disan oubyen lezot pratik ki Labib i kont. Nou pa pou kapab koz manti ouswa anbet lezot, menm si nou anplwayer i demann nou pour fer li.—Akt 15:29; Revelasyon 21:8.
12, 13. Ki lezot prensip ki kapab ed nou fer en bon desizyon an sa ki konsern aksepte en travay?
12 Prezan, eski i annan lezot keksoz ki kapab ed nou swazir en travay apropriye, espesyalman si sa ki nou fer dan sa travay pa direkteman kas lalwa Bondye? Pli nou konnesans laverite i grandi e pli nou devlop nou abilite pour fer diferans ant sa ki byen ek sa ki mal, nou pou vwar ki i annan lezot keksoz ki nou bezwen konsidere. Ki nou pou fer si nou travay i annan pour fer avek bann pratik ki pa akseptab dapre Labib, parey en resepsyonnis dan en landrwa kot dimoun i zwe larzan. Kekfwa nou pou osi pran an konsiderasyon lekel ki pey nou, e kote nou pou travay. Par egzanp, si nou en kontrakter, eski nou pou aksepte en kontra pour penn en legliz e dan sa fason promouvwar fo larelizyon?—2 Korentyen 6:14-16.
13 Ki nou pou fer si nou anplwayer i pran en louvraz kot nou pou bezwen penn en legliz? Dan en ka parey, nou bezwen vwar si nou annan ase lotorite pour pa fer sa louvraz e ki kantite nou pou enplike dan sa louvraz. Eski nou kapab aksepte en louvraz ki napa nanryen mal avek parey fakter, kot nou bezwen anmenn let dan bann letablisman ki ankouraz bann keksoz mal? Petet prensip dan Matye 5:45 i kapab ed nou fer en desizyon? Nou bezwen mazinen osi si partisip dan en tel travay lannen ale lannen vini i kapab afekte nou konsyans. (Ebre 13:18) Parey nou’n vwar, nou bezwen pran nou responsabilite e fer bann bon desizyon konsernan travay ki nou aksepte. Nou bezwen devlop nou abilite pour fer diferans ant sa ki byen ek sa ki mal e edik nou konsyans.
“Dan tou ou Semen pran li an Konsiderasyon”
14. Kan nou fer bann desizyon ki nou bezwen konsidere?
14 Ki mannyer nou kapab fer bann desizyon dan lezot domenn parey pourswiv en ledikasyon ouswa aksepte oubyen refiz serten tretman medikal? Nenport desizyon ki nou fer, nou devret rod bann prensip Labib ki aplikab e byen reflesir pour vwar konman pour aplik zot. Lerwa Salomon ti dir: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.”—Proverb 3:5, 6.
15. Ki nou aprann avek bann premye Kretyen konsernan bann desizyon ki nou fer?
15 Nou bezwen gard antet ki souvan bann swa ki nou fer i afekte lezot. Par egzanp, bann Kretyen dan premye syek ti nepli anba Lalwa Moiz konsernan sa ki zot kapab manze. Zot ti kapab deside pour manz bann manze ki Lalwa ti enterdi avan, si ti napa lezot lalwa ki ti anpes sa. Toudmenm, konsernan lavyann ki ti’n kapab ganny servi dan bann tanp kot zot ti ador zidol, zapot Pol ti dir: “Si sa ki mon manze i fer mon frer tonm dan pese, mon pa pou manz lavyann, pour ki mon pa fer mon frer tonbe.” (1 Korentyen 8:11-13) Bann premye Kretyen ti ganny ankouraze pour pran an konsiderasyon konsyans lezot pour pa fer zot tonbe. Pareyman, nou bann desizyon pa devret fer tonbe lezot.—1 Korentyen 10:29, 32.
Rod Lasazes Bondye
16. Ki mannyer lapriyer i kapab ed nou fer bann bon desizyon?
16 Lapriyer i kapab ed nou en kantite pour fer bann bon desizyon. Zak en disip Zezi ti dir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Nou kapab annan konfyans ki Zeova pou ekout nou lapriyer ler nou pe demann li lasazes ki nou bezwen pour fer bann bon desizyon. Kan nou eksplik Zeova nou problenm e demann li pour gid nou, lespri sen i kapab ed nou pli byen konpran bann verse ki nou ti pe egzaminen e fer nou mazin serten verse ki kekfwa nou pa ti pe pran an konsiderasyon.
17. Ki mannyer lezot i kapab ed nou fer desizyon?
17 Eski lezot i kapab ed nou fer desizyon? Wi, gras a Zeova, nou annan bann dimoun matir dan kongregasyon. (Efezyen 4:11, 12) Si sa desizyon i enportan, nou kapab demann led. Bann dimoun ki annan en tre bon zizman spirityel e ki annan en bon leksperyans dan lavi i kapab ed nou vwar lezot prensip dan Labib ki kapab relye avek nou desizyon e ed nou pour “verifye sa ki pli enportan.” (Filipyen 1:9, 10) Selman atansyon pangar nou les lezot fer desizyon dan nou plas. Nou bezwen pran nou responsabilite e fer nou desizyon.
Eski Rezilta pou touzour bon?
18. Ki nou kapab dir lo rezilta en bon desizyon?
18 Si nou’n byen reflesir lo bann prensip Labib avan nou fer en desizyon, eski sa i vedir ki tou desizyon pour annan en bon rezilta? Wi, rezilta final pou touzour bon. Selman, antretan parfwa nou kapab eksperyans serten difikilte. Par egzanp, Sadrak, Mesak ek Abednego ti konnen ki zot kapab mor akoz zot ti deside pour pa ador sa manman stati annor. (Danyel 3:16-19) Bann zapot osi ti ganny fwete avan zot ganny large akoz zot ti deside obeir Bondye plito ki zonm. (Akt 5:27-29, 40) Deplis, “letan ek levennman san ekspekte” i kapab fer nenport desizyon annan en move konsekans. (Eklezyast 9:11) Alors si nou soufer menm ler nou’n fer en bon desizyon, nou kapab asire ki Zeova pou ed nou andire e beni nou alafen.—2 Korentyen 4:7.
19. Konman nou kapab pran nou responsabilite avek kouraz pour fer bann desizyon?
19 Nou’n byen konpran lenportans pour rod bann prensip dan Labib e byen reflesir lo zot pour fer bann bon desizyon. Pa nou vreman kontan ki Zeova i donn nou son lespri sen ek bann dimoun matir dan kongregasyon pour ed nou. Alor avek gidans ek led sorti kot Zeova, avek kouraz annou pran nou responsabilite pour fer bann bon desizyon!
Ki ou’n aprann?
• Ki keksoz esansyel pour fer en bon desizyon?
• Si nou vin pli matir lo plan spirityel, lekel nou pou swazir pour frekante?
• Ki nou bezwen pran an konsiderasyon ler nou pe rod en plas travay?
• Ki led nou kapab gannyen pour fer en bon desizyon?
[Kestyon]
[Portre lo paz 9]
Dezobeisans Adan ek Ev i donn nou en bon leson
[Portre lo paz 10]
Avan fer en desizyon enportan, rod bann prensip dan Labib