Bann Berze ki “en Model pour Troupo”
Bann Berze ki “en Model pour Troupo”
“Pran byen swen troupo Bondye ki’n ganny konfye avek zot konman berze . . . avek bonn volonte . . . , devouman . . . , vin en model pour troupo.”—1 PYER 5:2, 3.
1, 2. (a) Ki privilez Zezi ti donn zapot Pyer, e akoz i ti annan rezon pour annan konfyans dan li? (b) Ki mannyer Zeova i vwar bann berze dan kongregasyon?
EN PE letan avan Lapannkot lannen 33 N.L., borlanmer Galile, Pyer ek sis lezot disip ti pe manz sa ki Zezi ti’n prepare pour zot. Pa ti premye fwa ki Pyer ti vwar Zezi depi ler i ti’n resisite. Pyer ti vreman kontan ki Zezi ti vivan. Me kekfwa Pyer ti osi enkyet akoz detrwa zour pase i ti dir devan dimoun ki i pa ti konn Zezi ditou. (Lik 22:55-60; 24:34; Zan 18:25-27; 21:1-14) Eski Zezi ti blanm li akoz i ti’n mank lafwa? Non, okontrer Pyer ti’n repantir e Zezi ti donn li privilez pour nouri e pran swen avek son bann pti mouton. (Zan 21:15-17) I evidan ki Zezi ti annan rezon met son konfyans dan Pyer ler ou lir listwar bann premye Kretyen dan Labib. Pyer ek lezot zapot ek ansyen Zerizalenm ti vreman pran swen kongregasyon Kretyen dan en letan kot i ti annan bokou persekisyon ek nouvo disip.—Akt 1:15-26; 2:14; 15:6-9.
2 Ozordi osi, atraver Zezi, Zeova in apwent bann zonm kalifye konman bann berze oubyen ansyen pour diriz Son bann mouton dan lepok pli difisil dan listwar imen. (Efezyen 4:11, 12; 2 Timote 3:1) Eski Zeova ti annan rezon pour annan konfyans dan sa bann zonm? I evidan ler ou get sa gran fanmiy frer ek ser ki servi Bondye anpe lo later antye. Parey Pyer, i vre ki sa bann berze i fer fot parler. (Galat 2:11-14; Zak 3:2) Toudmenm, Zeova i annan konfyans ki zot pe pran swen avek son bann mouton ki i’n “gannyen par disan son prop garson.” (Akt 20:28) Zeova i vreman kontan sa bann zonm e i vwar ki zot “merit resevwar en doub loner.”—1 Timote 5:17.
3. Konman bann ansyen i kontinyen servi avek bonn volonte ek devouman?
3 Ki mannyer bann ansyen i kontinyen pran swen avek kongregasyon avek bonn volonte, devouman e zot reste bann model pour troupo? Parey Pyer ek lezot ansyen sa letan, bann berze i depan lo lespri sen pour ganny sa lafors pour desarz zot responsabilite. (2 Korentyen 4:7) Lespri sen i osi ed zot devlop son fri dan zot e sa i lanmour, lazwa, lape, pasyans, labonte, lafwa, ladouser, kontrol son prop lekor. (Galat 5:22, 23) Alor prezan annou vwar an detay konman sa bann berze i montre legzanp pour devlop fri lespri dan lafason ki zot pran swen avek troupo Bondye.
Bann Ansyen i kontan Troupo e osi sak Mouton
4, 5. (a) Ki mannyer Zeova ek Zezi i demontre zot lanmour pour troupo? (b) Mansyonn serten keksoz ki bann berze i fer pour demontre zot lanmour pour kongregasyon.
4 Lanmour i kalite pli enportan ki lespri sen Bondye i ed nou devlope. Zeova i montre ki i kontan troupo an antye letan i donn li en kantite manze spirityel. (Izai 65:13, 14; Matye 24:45-47) Me i pa selman nouri troupo, i osi annan zentere sak mouton aker. (1 Pyer 5:6, 7) Zezi osi i kontan kongregasyon, i ti donn son lavi pour li. I konn sak mouton “par son non.”—Zan 10:3, 14-16.
5 Bann berze dan kongregasyon i fer parey Zeova ek Zezi. Zot demontre sa lanmour pour troupo Bondye an antye ler zot fer zefor pour ansenny kongregasyon. Zot bann diskour baze lo Labib i nouri e protez kongregasyon. Tou dimoun i vwar ki zot travay dir. (1 Timote 4:13, 16) Me i annan lezot louvraz ki pa sitan remarkab parey okip bann fayl kongregasyon, fer bann progranm, e okip lezot keksoz ankor pour ki pandan bann renyon kongregasyon ek lezot aktivite, tou keksoz i mars “byen e avek lord.” (1 Korentyen 14:40) Kongregasyon pa toultan vwar e remersye zot pour en bon pe sa bann louvraz vi ki i ganny fer an prive. Me lanmour ki fer zot servi kongregasyon koumsa.—Galat 5:13.
6, 7. (a) Ki fason bann ansyen i kapab konn pli byen bann dimoun dan kongregasyon? (b) Akoz nou pa devret ezite pour partaz nou santiman avek bann ansyen?
6 Lanmour sa bann berze i evidan ler zot demontre en lentere personnel avek sak dimoun dan kongregasyon. (Filipyen 2:4) En fason ki ed zot pli byen konn sak dimoun, i ler zot travay kotakot dan predikasyon avek bann proklanmater. Souvan-d-fwa, Zezi ti travay ansanm avek son bann disip dan predikasyon e servi sa bann lokazyon pour ankouraz zot. (Lik 8:1) En ansyen ki annan bokou leksperyans ti dir: “Mon santi ki enn bann pli bon fason pour konn pli byen e ankouraz en frer oubyen en ser, se ler ou travay avek li dan predikasyon.” Si i fer en pti pe letan ou pa’n travay avek en ansyen dan predikasyon, akoz ou pa fer laranzman konmela?
7 Akoz son lanmour pour son bann disip, Zezi ti partaz zot lazwa ek zot lapenn. Par egzanp, Zezi ti ‘ranpli avek lazwa’ kan swasanndis son bann disip ti retournen dan lazwa apre ki zot ti’n al prese. (Lik 10:17-21) Parkont, “Zezi ti plere” ler i ti vwar ki mannyer Mari, son fanmiy ek zanmi ti tris apre lanmor Lazar. (Zan 11:33-35) Bann bon berze i parey, se pa konmsi zot pa tro tro fatig zot avek santiman ki bann dan kongregasyon i annan. Akoz zot kontan troupo, zot “rezoui avek sa ki dan lazwa, e pran lapenn avek sa ki dan lapenn.” (Romen 12:15) Alor si ou dan lapenn ouswa dan lazwa, pa ezite pour eksprim ou santiman avek bann ansyen. Ou lazwa pou ankouraz zot. (Romen 1:11, 12) Si zot konnen ki ou dan lapenn, zot pou anvi ankouraz e rekonfort ou.—1 Tesalonisyen 1:6; 3:1-3.
8, 9. (a) Ki mannyer en ansyen ti demontre lanmour pour son madanm? (b) Akoz i vreman enportan pour en berze demontre lanmour pour son fanmiy?
8 Lanmour ki en berze i annan i vreman evidan dan lafason ki i tret son prop fanmiy. (1 Timote 3:1, 4) Si i marye, i devret en legzanp dan lafason ki i kontan e respekte son madanm. (Efezyen 5:25; 1 Pyer 3:7) Linda i en ser ki son mari ti ansyen pour plis ki 20 an avan son lanmor. La sa ki i dir: “Mon msye ti toultan byen okipe pe pran swen avek kongregasyon. Me i ti fer mwan santi ki nou ti en tim. Souvan-d-fwa, i ti remersye mwan pour mon sipor e i ti pas son letan lib avek mwan. Se pour sa rezon ki mon ti santi i kontan mwan e mon pa ti zalou akoz i ti pas letan pour okip kongregasyon.”
9 Si en berze i annan zanfan, i pou osi en legzanp dan lafason ki i disiplin avek lanmour e kontan felisit zot. (Efezyen 6:4) An realite, ler i toultan demontre lanmour pour son fanmiy, sa i demontre ki i merit sa responsabilite ki i ti gannyen ler i ti ganny apwente par lespri sen.—1 Timote 3:4, 5.
Bon Kominikasyon i promot Lazwa ek Lape
10. (a) Kwa ki kapab afekte lazwa ek lape dan en kongregasyon? (b) Ki sitiasyon ki ti’n kapab detri lape dan kongregasyon premye syek, e ki zot ti fer pour regle sa sitiasyon?
10 Lespri sen i kapab devlop lazwa ek lape dan leker en Kretyen, dan en konsey ansyen e dan en kongregasyon an antye. Me si kominikasyon pa fran e senser, sa i kapab afekte sa lazwa ek lape ki ti annan. Byen lontan, Salomon ti dir: “Bann plan pa pou reisi kan napa konversasyon konfidansyel.” (Proverb 15:22) De lot kote, si i annan en kominikasyon fran e avek respe, sa pou promot lazwa ek lape. Par egzanp dan premye syek, kongregasyon ti’n kapab perdi son lape akoz zot pa ti dakor si zot devret sirkonsi oubyen non. Alor Zerizalenm, konsey direkter ti rod gidans lespri sen. Bann ansyen ti eksprim zot diferan pwennvi lo sa size. E apre en bon pti diskisyon, zot tou ti tonm dakor lo en desizyon. Zot ti fer bann kongregasyon konn zot desizyon e bann frer ti “ranpli avek lazwa pour sa mesaz lankourazman.” (Akt 15:6-23, 25, 31; 16:4, 5) Lafason ki bann ansyen ti azir ti promot lazwa ek lape.
11. Ki mannyer bann ansyen i kapab promot lazwa ek lape dan kongregasyon?
11 I parey ozordi, bann berze pe promot lazwa ek lape letan zot kominik dan en bon fason. Ler en problenm i leve dan kongregasyon, zot zwenn ansanm e eksprim fransman zot pwennvi. Avek respe zot ekout sa ki lezot berze i annan pour dir. (Proverb 13:10; 18:13) Zot priye pour ganny led lespri sen e zot fer en desizyon dapre bann prensip dan Labib ek gidans ki ‘lesklav fidel e pridan’ in donnen. (Matye 24:45-47; 1 Korentyen 4:6) Apre ki en desizyon in ganny fer dapre bann prensip Labib, sak ansyen i soumet avek direksyon lespri sen menm si son pwennvi pa’n ganny aksepte par lamazorite ansyen. Ler en ansyen i modes dan sa fason, sa i promot lazwa ek lape e i donn en bon legzanp kongregasyon lo konman pour mars avek Bondye. (Mika 6:8) Eski ou osi ou modes? Eski ou kontan pour aksepte swiv desizyon ki bann berze i fer dan kongregasyon?
Pasyan e bon
12. Akoz Zezi ti bezwen pasyan e bon avek son bann zapot?
12 Zezi ti pasyan e bon dan lafason ki i ti tret son bann zapot menm si aswiv zot ti fer bann fot. Par egzanp, souvan-d-fwa i ti bezwen montre zot lenportans pour annan limilite. (Matye 18:1-4; 20:25-27) Sa dernyen zour swar ki Zezi ti lo later, i ti ansenny zot en leson lo limilite ler i ti lav zot lipye. Pourtan, tanpet ti leve ler zot ti “konmans diskite antre zot lekel parmi zot ki ti pou ganny konsidere pli enportan.” (Lik 22:24; Zan 13:1-5) Eski Zezi ti reprimann zot avek lakoler? Okontrer i ti rezonn avek zot: “Lekel ki pli enportan, sa ki asiz atab oubyen sa ki pe servi? Pa sa enn ki asiz atab? Me mwan, mon parmi zot konman enn ki pe servi.” (Lik 22:27) Pasyans ek labonte Zezi e osi son bon legzanp ti finalman tous leker son bann zapot.
13, 14. Kan bann berze i byen bezwen demontre labonte?
13 Ozordi osi, parler bann berze dan kongregasyon i bezwen konsey en menm dimoun plizyer fwa konsernan en serten febles. Sa ansyen ti kapab konmans fatige avek sa dimoun. Me si i gard antet son prop defo, sa ansyen pou kapab pasyan e bon anver sa dimoun. Koumsa i pou imit Zezi ek Zeova ki demontre sa bann kalite anver tou Kretyen enkli bann ansyen ladan.—1 Tesalonisyen 5:14; Zak 2:13.
14 Parler i arive ki bann ansyen i bezwen donn bann konsey serye avek en dimoun ki’n fer en fot grav. Si i pa repantir, bann berze pa pou kapab gard li dan kongregasyon. (1 Korentyen 5:11-13) Menm dan en ka parey, zot pou tret sa dimoun dan en fason ki i montre ki zot ay sa pese, pa sa dimoun. (Zid 23) Deplis ler bann berze i demontre labonte dan sa fason, sa pou fer li pli fasil pour sa mouton perdi retournen en zour.—Lik 15:11-24.
Lafwa i motiv zot pour fer bann bon Aksyon
15. Mansyonn en fason ki bann berze i imit labonte Zeova, e kwa ki motiv zot pour fer sa?
15 “Zeova i bon avek tou dimoun,” menm bann ki pa apresye sa ki i pe fer pour zot. (Psonm 145:9; Matye 5:45) Labonte Zeova i evidan akoz i’n anvoy son pep anons sa “Bonn Nouvel Rwayonm.” (Matye 24:14) Bann berze i imit Bondye dan sa domenn par pran latet dan predikasyon. Kote zot ganny sa kouraz pour kontinyen persevere dan sa travay? Se zot lafwa dan Zeova ek son bann promes.—Romen 10:10, 13, 14.
16. Ki mannyer bann berze i “fer dibyen” bann mouton Bondye?
16 Dan predikasyon bann berze i fer “dibyen tou dimoun” me zot osi annan sa responsabilite pour fer dibyen “sirtou [zot] bann frer dan lafwa.” (Galat 6:10) Zot fer sa ler zot fer bann vizit pour ankouraz bann frer ek ser dan kongregasyon. En ansyen i dir: “Mon kontan fer bann vizit pour ankouraz bann frer ek ser, akoz sa i donn mwan lokazyon pour felisit zot e fer zot konnen ki tou zot travay i vreman ganny apresye.” Parler bann berze i kapab fer bann pti sizesyon pour ki bann frer ek ser i amelyor zot servis pour Zeova. Zot kontan imit legzanp Pol ki ti dir kongregasyon Tesalonik: “Senyer i donn nou sa lasirans, e nou krwar ki zot pe fer e ki zot pou kontinyen fer sa ki nou’n demann zot.” (2 Tesalonisyen 3:4) Ler bann ansyen i eksprim en tel konfyans, sa i motiv bann mouton Bondye e i fer li pli fasil pour zot “obeir zot bann dirizan.” (Ebre 13:17) Akoz ou pa remersye zot prosenn fwa ki bann ansyen i fer en vizit pour ankouraz ou?
Ladouser i mars avek Kontrol
17. Ki leson Pyer ti aprann avek Zezi?
17 Zezi ti reste dous menm ler lezot ti met li anba presyon. (Matye 11:29) Kan Zida ti trai li e bann gard ti tyonbo li, i ti demontre ladouser ek bokou kontrol. Pyer li ti reakte deswit par tir son lepe e rann mal pour mal. Me Zezi ti dir li: “Zot pa konnen ki mon kapab demann mon papa led, e deswit i a anvoy mwan plis ki douz larme lanz?” (Matye 26:51-53; Zan 18:10) Pyer ti aprann byen son leson e plitar i ti rapel bann Kretyen: “Kris limenm in soufer pour zot, an lesan pour zot en legzanp pour zot swiv. . . . Kan zot ti ensilte li, i pa ti reponn par lensilt. Dan son soufrans, i pa’n fer okenn menas.”—1 Pyer 2:21-23.
18, 19. (a) Kan bann berze i byen bezwen demontre ladouser ek kontrol? (b) Ki kestyon nou pou egzaminen dan lot lartik?
18 Demenm bann berze i reste dous oubyen kalm menm si lezot i tret zot dan en fason enzis. Meton zot pe sey ed serten dan kongregasyon me zot mal reazir. Petet si sa dimoun i feb oubyen malad spirityelman i kapab reponn “san reflesir konmsi i pe donn bann kou lepe.” (Proverb 12:18) Me parey Zezi, bann berze pa rann mal pour mal an aksyon ou an parol. Plito, zot kontrol zot lekor e demontre ki zot konpran lezot. Sa pou kapab vin en benediksyon pour bann ki bezwen led. (1 Pyer 3:8, 9) Eski ou swiv legzanp bann ansyen par demontre ladouser ek kontrol ler ou ganny konseye?
19 I evidan ki Zeova ek Zezi i vreman apresye ki tou bann ansyen pe travay dir pour pran swen avek troupo lo later antye. Zeova ek son garson i osi kontan tou sa bann asistan ministeryel ki pe ed bann ansyen pour ‘servis ki zot pe rann bann sen.’ (Ebre 6:10) Alor akoz serten frer batize i ezite pour progrese pour okip sa “fonksyon nob”? (1 Timote 3:1) Ki mannyer Zeova i form sa bann ki vin bann berze dan kongregasyon? Nou pou reponn sa bann kestyon dan lot lartik.
Eski ou rapel?
• Dan ki fason bann berze i demontre lanmour pour troupo?
• Ki mannyer tou dimoun i kapab promot lazwa ek lape dan kongregasyon?
• Akoz bann berze i pasyan e bon ler zot konsey lezot?
• Konman bann ansyen i demontre lafwa ek labonte?
[Kestyon]
[Portre lo paz 19]
Se lanmour ki motiv bann ansyen pour servi kongregasyon
[Portre lo paz 19]
Zot pas letan avek zot fanmiy dan bann moman detant . . .
[Portre lo paz 19]
. . . e dan predikasyon
[Portre lo paz 20]
Bon kominikasyon i promot lazwa ek lape dan kongregasyon