Eski ou vwar li fasil pour kominike?

“LET damour par en dimoun 60 tan.” Sa ti tenm en konkour organize par en labank Zapon detrwa lannen pase. Sa konkour ti ankouraz bann Zaponnen dan zot 50 tan ek 60 tan an montan pour ‘senserman eksprim zot santiman’ avek zot msye ouswa madanm. En partisipan ti dir son madanm dan en let: “Petet sa pou fer ou riye, me si mon pa dir ou sa mon pou regrete. Mersi pour vin mon madanm.”

Dan serten kiltir, par egzanp dan serten pei les Lazi, dimoun pa’n ganny ankouraze pour eksprim zot santiman. Me kantmenm sa, en pe plis ki 15,000 dimoun ti partisip dan sa konkour let damour. Dimoun ti sitan apresye sa konkour ki zot ti bezwen organiz ankor en lot zis apre, e bann liv baze lo sa bann let ti ganny pibliye. Sa i montre nou ki ofon zot leker, bokou i anvi eksprim zot santiman anver zot msye ouswa madanm ki zot kontan. Me i annan lezot ki ezite eksprim zot santiman. Akoz sa? Petet akoz i demann bokou zefor ek abilite pour les lezot konpran zot santiman, espesyalman sa dimoun ki zot in marye avek.

Hitoshi Kato, ki ti ekrir en liv lo bann dimoun ki’n pran retret, ti dir ki parmi bann vye koup Zapon, en kantite madanm pe demann divors e sa i akoz zot in gard rankin dan zot leker pour plizyer lannen. I ti azoute: “En lot rezon, i ki bann koup pa dir nanryen kanmarad kan en keksoz i pa mars byen.”

Zis apre ki en msye in pran son retret e la en sel kou son madanm i demann divors, sa i kapab sok li. I kapab ki sa koup pa’n dir kanmarad zot santiman pour plizyer lannen.  Petet zot in esey eksprim zot santiman, me zot pa’n kapab kontinyen fer bann bon konversasyon. Olye vin pli pros avek kanmarad, zot in vin parey sat ek lisyen.

Ki mannyer bann koup i kapab regle zot problenm dan lape e eksprim zot santiman dan en bon fason? Petet ou pou sirprann pour konnen ki bann pli bon sizesyon pratik, pa sorti dan en liv ki en konseye lo maryaz in fek ekrir. Me plito dan en vye liv ki’n ganny byen apresye pour plizyer syek. Sa liv i apel Labib.