Fotespere ki zot Lanmen i for

“Fotespere ki zot lanmen i for, zot ki pe tann sa bann parol sorti dan labous bann profet.”—ZEKARYA 8:9.

1, 2. Akoz liv Agai ek Zekarya i merit nou latansyon?

BANN profesi Agai ek Zekarya ti ganny ekrir apepre 2,500 lannen pase, me zot sirman annan lenportans pour ou lavi. Sa bann keksoz ki ganny rakonte dan sa de liv Labib i pa zis bann zistwar konsernan lepase. Zot form parti ‘tou sa ki’n ganny ekri dan lepase pour nou lansennyman.’ (Romen 15:4) Laplipar keksoz ki nou lir dan liv Agai ek Zekarya i fer nou mazin bann vre sitiasyon ki’n arive depi ki Rwayonm Bondye in ganny etablir dan lesyel an 1914.

² Zapot Pol ti pe refer avek bann levennman ek sitiasyon ki bann Zwif dan lepase ti eksperyanse, ler i ti dir: “Tousala ti ariv zot pour servi legzanp pour lezot, me in ganny ekri konman en lavertisman pour nou, ki’n ariv dan letan lafen.” (1 Korentyen 10:11) Alors, petet ou pe demann ou lekor: ‘Ki valer liv Agai ek Zekarya i annan dan nou letan?’

3. Lo kwa Agai ek Zekarya i konsantre?

³ Parey sa lartik presedan in mansyonnen, profesi Agai ek Zekarya ti pe koz lo en letan kot bann Zwif ti’n retourn dan zot pei ki Bondye ti’n donn zot apre ki zot ti’n ganny libere an egzil Babilonn. Sa de profet ti konsantre lo travay rekonstri tanp. Bann Zwif ti poz fondasyon tanp an 536 A.N.L. Menm si serten Zwif aze ti pe mazin lepase, an zeneral i ti annan bokou ki ti “kriye avek lazwa.” Me annefe i annan en keksoz pli enportan ki’n arive dan nou letan. Ki sa keksoz?—Ezra 3:3-13.

4. Ki ti arive en pe letan apre Premye Lager Mondyal?

⁴ Pa bokou letan apre Premye Lager Mondyal, bann Kretyen swazir ti ganny libere avek Gran Babilonn. Sa ti en gran siny pour montre ki Zeova ti pe siport son pep. Avan sa, i paret ki bann sef relizye ek zot partner politik ti’n reisi met en lafen avek travay bann Etidyan Labib. (Ezra 4:8, 13, 21-24) Me Zeova ti retir sa bann lobstak ki ti pe bar sa travay pour prese e fer disip. Dan bann lannen ki’n pase depi 1919, travay predikasyon in kontinyen al an avan e nanryen pa’n kapab anpes li progrese.

5, 6. Ki Zekarya 4:7 ti endike pou arive dan nou letan?

⁵ Nou kapab asire ki sa travay predikasyon e fer disip ki bann serviter obeisan Zeova pe fer pou kontinyen avek sipor Zeova. Dan Zekarya 4:7, nou lir: “I pou sirman met dernyen ros kwen. Pou annan ki pou kriye: ‘Pa i zoli! Pa i zoli!’” Ki pli gran lakonplisman dan nou letan sa i endike?

⁶ Zekarya 4:7 ti pe endik en letan kot vre ladorasyon Souvren Senyer pou vin dan en kondisyon parfe kot son tanp spirityel. Sa tanp spirityel i laranzman ki Zeova in fer pour dimoun ador li lo baz sakrifis Zezi Kri. I vre ki sa gran tanp spirityel in egziste depi premye syek N.L. Me vre ladorasyon lo later pa ankor ariv dan son kondisyon parfe. Ozordi i annan plizyer milyon adorater ki pe servi dan lakour sa tanp spirityel lo later. Zot ek plizyer milyon dimoun ki pou resisite pou  vin parfe pandan Renny Milener Zezi Kri. Alafen sa mil an, selman bann vre adorater Bondye ki pou reste lo sa later ki pou’n ganny netwaye.

7. Ki rol Zezi i annan an rapor avek anmenn vre ladorasyon dan son kondisyon parfe dan nou letan, e akoz nou devret trouv sa ankourazan?

⁷ Gouverner Zorobabel ek Gran Pret Zozye ti la pour temwanny finisyon tanp an 515 A.N.L. Zekarya 6:12, 13 ti predir sa rol byen enportan ki Zezi ti pou zwe pour anmenn vre ladorasyon dan son kondisyon parfe: “La sa ki Zeova bann larme in dir: ‘La sa zonm ki apel Bourzon. Depi son landrwa i pou bourzonnen, wi, i pou batir tanp Zeova. Li menm . . . ki pou anmenn dinite. I pou bezwen asize e dirize lo son tronn e i pou bezwen vin en pret lo son tronn.’” Lefe ki Zezi, ki dan lesyel e ki’n fer bann lerwa desandans David bourzonnen, ki par deryer sa travay Rwayonm kot tanp spirityel, eski ou krwar i annan en dimoun ki kapab anpes sa travay progrese? Napa enn! Pa sa i ankouraz nou pour kontinyen avanse avek nou minister, olye les bann zafer toulezour distrer nou?

Priyorite

8. Akoz nou devret met sa travay kot tanp spirityel premye dan nou lavi?

⁸ Pour nou ganny sipor ek benediksyon Zeova, nou bezwen kontinyen kit sa travay kot tanp spirityel premye dan nou lavi. Kontrerman avek bann Zwif ki ti dir, “pa ankor ler,” nou bezwen gard antet ki nou pe viv dan “bann dernyen zour.” (Agai 1:2; 2 Timote 3:1) Zezi ti predir ki son bann disip fidel ti pou pres sa bon nouvel lo Rwayonm e fer disip. Nou bezwen fer atansyon ki nou pa negliz sa privilez ki nou’n gannyen. Sa travay pour prese e ansenny dimoun ki ti repran an 1919 apre ki i ti’n arete tanporerman akoz lopozisyon, pa ankor fini me definitivman i pou fini!

9, 10. Ki nou bezwen fer pour ganny benediksyon Zeova, e ki sinifikasyon sa i annan pour nou?

⁹ Osi lontan ki nou kontinyen travay dir, nou pou ganny beni konman en pep e osi endividyelman. Remark promes Zeova ki kapab donn nou lasirans. Dek ki bann Zwif ti rekonmans travay seryezman lo fondasyon tanp, Zeova ti promet: “Apartir sa zour mon pou beni.” (Agai 2:19) Zot ti pou benefisye an plen ler zot ti reganny son faver. Aprezan get sa bann benediksyon ki trouve dan promes Bondye: “Pou annan lagrenn lape; pye rezen pou donn son fri, e later pou donn son prodwi. Lesyel pou donn son laroze e mon pou fer larestan sa pep erit tou sa bann keksoz.”—Zekarya 8:9-13.

¹⁰ Zis parey Zeova ti promet bann Zwif benediksyon spirityel ek materyel, pareyman i pou beni nou ler nou seryezman fer avek tou nou leker sa travay ki i’n donn nou. Parmi benediksyon ki nou pou gannyen i lape antre nou, sekirite, prosperite, ek progre spirityel. Me nou konnen pour nou kontinyen ganny benediksyon Bondye, nou bezwen kontinyen fer sa travay kot tanp spirityel mannyer Zeova i anvi nou fer li.

11. Ki mannyer nou kapab analiz nou bann priyorite dan lavi?

¹¹ La i lemoman pour nou ‘reflesir lo sa ki nou pe fer.’ (Agai 1:5, 7) Nou tou nou devret pran en letan e egzamin nou priyorite dan  lavi. Benediksyon Zeova lo son pep ozordi i depan lo ki kantite nou glorifye son non e avanse avek sa travay kot tanp spirityel. Ou kapab demann ou lekor: ‘Eski mon’n sanz mon bann priyorite? Ki mannyer mon devouman pour Zeova, son laverite, ek son travay i ete konpare avek sa devouman ki mon ti annan ler mon ti fek batize? Eski lentere pour annan en lavi konfortab in afekte latansyon ki mon donn Zeova ek son Rwayonm? Eski lafreyer zonm, an rapor avek sa ki lezot pou panse, i anpes mwan glorifye Zeova?’—Revelasyon 2:2-4.

12. Dapre Agai 1:6, 9 ki sitiasyon ti egziste parmi bann Zwif?

¹² Nou pa anvi Zeova refiz nou son benediksyon akoz nou pe negliz sa travay ki glorifye son non. Pa bliye bann Zwif ti byen konmanse. Apre parey Agai 1:9 i dir, zot ti “pe taye sakenn avek son prop lakaz.” Zot ti pe preokip zot avek zis zot bezwen personnel ek fason viv. Pourtan, zot ti ganny “en pti gin,” ti napa ase bon manze ek bwar, e osi lenz ki sof zot. (Agai 1:6) Zeova pa ti pe beni zot. Eski i annan en leson pour nou ozordi?

13, 14. Ki mannyer nou kapab aplik sa leson ki trouve dan Agai 1:6, 9, e akoz i enportan?

¹³ Eski ou pa dakor ki pour nou kontinyen ganny benediksyon Zeova, nou bezwen veye ki nou pa tro preokip nou avek rod keksoz pour nou menm ki nou neglize glorifye Zeova? Sa i kapab arive si nou les bann aktivite parey tay deryer larises, rode konman pour fer larzan vitman, bann plan anbisye pour letid avanse pour ganny en bon karyer dan sa sistenm, oubyen bann progranm pour devlop serten skil personnel pran tou nou latansyon.

¹⁴ Sa bann keksoz dan zot menm pa en pese. Me eski ou pa rekonnet ki an rapor avek lavi eternel, sa bann keksoz i vreman “initil”? (Ebre 9:14) Dan ki sans? Zot mor, anven, e initil spirityelman. Si en dimoun i kontinyen rod sa bann keksoz, i kapab fer li mor dan en sans spirityel. I ti ariv sa avek serten Kretyen swazir dan letan bann zapot. (Filipyen 3:17-19) In ariv sanmenm sa avek serten dan nou letan. Petet ou konn serten ki’n ptit-a-pti perdi lentere dan bann aktivite Kretyen e avek kongregasyon; e konmela  zot pa montre ki zot anvi retourn dan servis Zeova. Nou swete ki sa bann dimoun pou retourn kot Zeova, me si zot kontinyen tay deryer bann “travay initil” zot pou perdi faver ek benediksyon Zeova. Ou kapab realize ki sa pou anmenn bokou latristes. I pou fer en dimoun perdi lazwa ek lape ki lespri sen Bondye i prodwir. Deplis i en gro pert pour pa benefisye avek lasosyasyon bann frer ek ser ki kontan kanmarad!—Galat 1:6; 5:7, 13, 22-24.

15. Ki mannyer Agai 2:14 i montre ki degre serye nou ladorasyon i ete?

¹⁵ Sa i en size tre serye. Gete ki mannyer Zeova ti vwar bann Zwif ki ti negliz son lakaz ladorasyon pour anbelir zot prop lakaz dan Agai 2:14. “Zeova in dir, ‘Koumsa menm sa pep i ete, e koumsa menm sa nasyon i ete devan mwan. Tou travay zot lanmen e tou sa ki zot ofer laba i koumsa menm. I sal.’” Osi lontan ki bann Zwif ti pe negliz vre ladorasyon, Zeova pa ti aksepte okenn sakrifis ipokrit ki zot ti ofer lo sa lotel tanporer Zerizalenm.—Ezra 3:3.

Bondye i garanti son Sipor

16. Baze lo bann vizyon ki Zekarya ti gannyen, ki lasirans bann Zwif ti kapab annan?

¹⁶ Atraver wit vizyon ki Zekarya ti gannyen, bann Zwif obeisan ki ti travay pour rekonstrir tanp Bondye ti ganny lasirans ki Bondye ti pou siport zot travay. Premye vizyon ti en garanti ki tanp ti pou fini fer e ki Zerizalenm ek Zida ti pou prospere osi lontan ki bann Zwif obeisan ti kontiny sa travay ki zot annan pour fer. (Zekarya 1:8-17) Dezyenm vizyon ti promet ki tou gouvernman ki opoz vre ladorasyon pou trouv zot lafen. (Zekarya 1:18-21) Lezot vizyon ti donn lasirans ki Bondye ti pou protez zot dan konstriksyon tanp, e bokou dimoun sorti dan diferan nasyon ti pou vin dan lakaz ladorasyon Zeova ler i fini. Sa bann vizyon ti osi asir zot lape ek sekirite, ki bann lobstak ki paret enposib sirmonte ti pou rezourd, ki mesanste ti pou ganny tire e zot ti pou ganny gidans ek proteksyon bann lanz. (Zekarya 2:5, 11; 3:10; 4:7; 5:6-11; 6:1-8) Ou kapab konpran alor akoz bann Zwif obeisan ti sanz zot lavi e konsantre lo sa travay ki Bondye ti’n liber zot Babilonn pour fer apre tou sa garanti ki Bondye ti pou siport zot.

17. Lefe nou annan garanti ki vre ladorasyon pou ganny laviktwar, ki kestyon nou devret demann nou lekor?

¹⁷ Pareyman, lefe ki nou annan garanti ki vre ladorasyon pou sirman ganny laviktwar, sa i devret pous nou pour fer keksoz e motiv nou pour mazin seryezman lo lakaz ladorasyon Zeova. Demann ou lekor sa kestyon: ‘Si mon krwar la i lemoman pour pres sa bon nouvel lo Rwayonm e fer disip, eski mon lobzektif ek mon fason viv i an akor  avek mon konviksyon? Eski mon pran letan pour etidye, preokip mwan avek Parol profetik Bondye, e koz lo la avek lezot enkli bann ki mon zwenn dan predikasyon?’

18. Dapre Zekarya sapit 14 ki pou arive alavenir?

¹⁸ Zekarya ti refer avek destriksyon Gran Babilonn swivi par lager Armagedon. Nou lir: “Sa pou en zour ki dimoun pou rekonnet i pour Zeova. I pa pou lizour ni aswar; e aswar pou annan lalimyer.” Wi, zour Zeova pou vreman en zour fernwanr e sonm pour son bann lennmi lo later! Me i pou en letan lalimyer ek laprouvasyon kontinyel pour bann adorater fidel Zeova. Zekarya ti osi dekrir ki mannyer tou keksoz dan sa nouvo lemonn pou fer konnen sentete Zeova. Vre ladorasyon kot gran tanp spirityel Bondye pou sa sel form ladorasyon lo later. (Zekarya 14:7, 16-19) Sa i en garanti remarkab! Nou pou eksperyans lakonplisman sa ki ti ganny predir e nou pou vwar drwa Zeova pour dirize ganny zistifye. I pou en zour spesyal pour Zeova!

Benediksyon permanan

19, 20. Akoz ou trouv Zekarya 14:8, 9 ankourazan?

¹⁹ Apre sa lakonplisman remarkab, Satan ek son bann demon pou inaktif, anprizonnen dan en labim. (Revelasyon 20:1-3, 7) Apre sa, benediksyon pou ganny deverse lo nou pandan renny milener Kris. Zekarya 14:8, 9 i dir: “Sa zour delo lavi pou sorti Zerizalenm, lanmwatye pour al dan lanmer les e lanmwatye dan lanmer was. Sa pou arive dan lete e dan liver. Zeova pou vin lerwa lo later antye. Sa zour, Zeova pou vin enn, e son non enn.”

²⁰ “Delo lavi,” oubyen “en larivyer delo lavi,” ki reprezant provizyon pour lavi eternel ki Zeova i donnen, pou kontinyen desann sorti kot Rwayonm Mesi. (Revelasyon 22:1, 2) En gran lafoul adorater Zeova, ki pou’n sirviv Armagedon, pou benefisye ler zot pou ganny libere avek lanmor. Menm bann mor pou benefisye par mwayen rezireksyon. Sa pou konmansman en nouvo letap dan dominasyon Zeova lo later antye. Dimoun partou lo later pou rekonnet Zeova konman Souvren Liniver e sa sel Bondye ki nou devret adore.

21. Ki nou devret determinen pour fer?

²¹ Apre tou sa ki Agai ek Zekarya ti predir e tou sa ki’n ganny akonpli, nou annan bon rezon pour nou avanse avek sa travay ki Zeova in donn nou pour fer dan lakour son tanp spirityel lo later. Ziska ki vre ladorasyon i ganny anmennen dan son kondisyon parfe, annou fer nou mye pour kit lentere Rwayonm dan premye plas. Zekarya 8:9 i enplor nou: “Fotespere ki zot lanmen i for, zot ki pe tann sa bann parol sorti dan labous bann profet.”

Eski ou rapel?

• Ki konparezon istorik ki fer liv Agai ek Zekarya annan valer ozordi?

• Ki nou aprann konsernan nou priyorite dan lavi avek liv Agai ek Zekarya?

• Akoz egzamin Agai ek Zekarya i fer nou annan konfyans pour lavenir?

[Kestyon]

[Portre lo paz 15]

Agai ek Zekarya ti ankouraz bann Zwif pour travay avek tou zot leker e ganny en benediksyon

[Portre lo paz 16]

Eski ou pe ‘tay avek ou prop lakaz’?

[Portre lo paz 17]

Zeova ti promet en benediksyon, e i ti donnen