“Mon avek zot Lepep”
“Mon avek zot Lepep”
“Mesaze Zeova ti dir: . . . ‘“Mon avek zot lepep,” se sa ki Zeova in anonse.’”—AGAI 1:13.
1. Avek ki levennman Zezi ti konpar nou letan?
NOU pe viv dan en letan vreman enportan dan listwar imen. Parey profesi Labib i montre, depi 1914 nou dan “Zour Senyer.” (Revelasyon 1:10) Parey ou’n vwar dan ou letid, Zezi ti konpar “lepok Fis-de-Lonm” ler i o pouvwar dan Rwayonm avek “letan Noe” ek “lepok Lot.” (Lik 17:26, 28) Labib i montre ki sa bann levennman dan letan Noe ek Lot i en konparezon profetik. Me i annan en lot konparezon ki merit nou latansyon.
2. Ki Zeova ti demann Agai ek Zekarya fer?
2 Annou egzamin en sitiasyon ki ti egziste dan letan de profet Ebre, Agai ek Zekarya. Ki mesaz sa de profet fidel ti donnen ki aplik pour pep Zeova dan nou letan? Agai ek Zekarya ti ‘mesaze Zeova’ pour bann Zwif apre ki zot ti’n retournen sorti an egzil Babilonn. Zot ti ganny anvoye pour asir bann Izraelit ki Zeova pou siport zot ler zot rekonstri tanp. (Agai 1:13; Zekarya 4:8, 9) Menm si liv ki Agai ek Zekarya ti ekrir i pti pti, zot form parti “tou Lekritir [ki] enspire par Bondye e i itil pour ansennyen, pour koriz lerer, pour remet drwat.”—2 Timote 3:16.
Zot merit nou Latansyon
3, 4. Akoz nou devret enterese avek mesaz Agai ek Zekarya?
3 Mesaz Agai ek Zekarya ti sirman benefisye bann Zwif sa letan, e zot profesi ti ganny akonpli a en serten degre sa letan. Be kwa ki fer nou asire sa de liv i merit nou latansyon ozordi? Nou vwar larepons dan Ebre 12:26-29. Dan sa bann verse, zapot Pol i sit Agai 2:6, ki koz lo ler Zeova pe “sekwe lesyel ek later.” Sa pou “ranvers tronn bann rwayonm e detri lafors rwayonm bann nasyon.”—Agai 2:22.
4 Zapot Pol ti sit Agai pour montre sa ki pou arive avek “rwayonm bann nasyon” e i ti osi fer resorti siperyorite sa Rwayonm ki bann Kretyen swazir pou gannyen ki pa kapab ganny ranverse. (Ebre 12:28) Ou kapab vwar alor ki bann profesi dan liv Agai ek Zekarya pa ti ankor ganny akonpli ler liv Ebre ti ganny ekrir dan premye syek nou lepok. Ozordi i ankor annan en pe Kretyen swazir lo later, ki zeritye Rwayonm Bondye ansanm avek Zezi. Alors, profesi Agai ek Zekarya i bezwen annan lenportans pour nou letan.
5, 6. Ki bann levennman ki ti anmenn Agai ek Zekarya pour profetize?
5 Liv Ezra i donn nou serten lenformasyon lo konteks istorik liv Agai ek Zekarya. Apre ki bann Zwif ti retournen sorti an egzil Babilonn an 537 A.N.L., Gouverner Zorobabel ek Gran Pret Zozye (oubyen Yesoua) ti siperviz travay lo fondasyon sa nouvo tanp an 536 A.N.L. (Ezra 3:8-13; 5:1) Menm si sa ti anmenn bokou lazwa, me en pe letan apre lafreyer ti konmans pran bann Zwif. Bann lennmi, “zabitan sa pei,” parey Ezra 4:4 i dir, ti pe “kontinyen kas moral lepep Zida e dekouraz zot pour konstri.” Sa bann lennmi, sirtou bann Samariten ti fer bann fo lakizasyon kont bann Zwif. Zot ti reisi fer lerwa Pers donn lord pour aret konstriksyon tanp.—Ezra 4:10-21.
6 Sa lantouzyasm ki bann Zwif ti annan okonmansman pour travay lo tanp ti diminyen. Zot ti perdi lentere e konmans preokip zot avek zot keksoz personnel. Me an 520 A.N.L., 16 zan apre ki fondasyon tanp ti’n ganny fer, Zeova ti anvoy Agai ek Zekarya pour ankouraz lepep pour rekonmans travay lo tanp. (Agai 1:1; Zekarya 1:1) Bann Zwif ti ganny motive par mesaze Bondye e par levidans ki Zeova ti pou siport zot. Sa ti pous zot pour repran travay lo tanp ziska i ti finalman konplete an 515 A.N.L.—Ezra 6:14, 15.
7. Dan ki fason bann levennman dan letan sa de profet i konparab avek nou letan?
7 Eski ou konnen ki sinifikasyon tousala i annan pour nou? Ozordi, nou annan travay pour fer an rapor avek pres “sa bonn nouvel Rwayonm.” (Matye 24:14) Apre Premye Lager Mondyal, bann vre Kretyen ti met bokou lanfaz lo sa travay. Zis parey bann Zwif ti ganny libere avek Babilonn, pareyman pep Zeova ozordi ti ganny libere avek Gran Babilonn, savedir tou fo larelizyon dan lemonn. Bann Kretyen swazir ti dedye zot dan sa travay pour prese, ansennyen e diriz bann dimoun ver vre ladorasyon. Sa travay i kontinyen ozordi lo en pli gran nivo, e petet ou pe partisip ladan. La i lemoman pour sa travay ganny fer, akoz lafen sa move sistenm i pros! Sa travay ki Bondye in demann nou fer i bezwen kontinyen ziska ki Zeova i entervenir dan bann zafer imen zour ‘gran ladetres.’ (Matye 24:21) Sa pou retir tou mesanste e permet vre ladorasyon ganny etablir partou lo later.
8. Akoz nou kapab annan konfyans ki Bondye pou siport nou travay?
8 Parey profesi Agai ek Zekarya i montre, nou kapab kont lo sipor Zeova ek son benediksyon anmezir ki nou partisip dan sa travay avek tou nou leker. Malgre serten in esey opoz serviter Bondye oubyen met restriksyon lo zot travay, napa okenn gouvernman ki’n kapab aret progre sa travay predikasyon. Mazinen ki mannyer avek benediksyon Zeova sa travay pour pres lo Rwayonm in agrandir depi bann lannen apre Premye Lager Mondyal ziska nou letan. Me i annan ankor bokou pour fer.
9. Ki sa sitiasyon dan letan pase ki nou devret port latansyon, e akoz?
9 Ki nou kapab aprann avek Agai ek Zekarya ki pou motiv nou plis ankor pour obeir lord Bondye pour prese e ansennyen? Annou port latansyon lo serten leson ki nou kapab tire dan sa de liv Labib. Par egzanp, annou vwar ennde detay an rapor avek konstriksyon tanp ki bann Zwif ti sipoze fer. Parey nou’n mansyonnen pli boner, bann Zwif ki ti retourn Zerizalenm sorti Babilonn pa ti persevere dan zot travay lo tanp apre ki zot ti’n poz fondasyon. Zot ti aret dan semen. Ki move pwennvi ki ti’n devlope parmi zot? Ki nou kapab aprann atraver sa?
Devlop en bon Pwennvi
10. Ki sa move pwennvi bann Zwif ti devlope, e avek ki rezilta?
10 Bann Zwif ki ti’n retourn dan zot pei ti pe dir: “Pa ankor ler.” (Agai 1:2) Kan zot ti konmans travay lo tanp, zot ti poz son fondasyon an 536 A.N.L., zot pa ti dir “pa ankor ler.” Me pa bokou letan apre, zot ti les lopozisyon zot vwazen ek gouvernman afekte zot. Bann Zwif ti konmans met plis lanfaz lo zot prop lakaz ek zot prop konfor. Ler ou pran konsiderasyon diferans ant zot lakaz ki ti ganny fer avek bon kalite dibwa ek tanp ki pa ti ankor fini, Zeova ti annan rezon demann zot: “Eski la en ler pour zot reste dan zot lakaz byen dekore, kan sa lakaz li i abandonnen?”—Agai 1:4.
11. Akoz Zeova ti bezwen konsey bann Zwif dan letan Agai?
11 Wi, bann Zwif ti’n sanz zot priyorite. Olye gard plan Zeova pour konstri tanp premye dan zot lavi, pep Bondye ti pe konsantre lo zot menm ek zot lakaz. Zot ti negliz travay lo lakaz ladorasyon Bondye. Dan Agai 1:5, Zeova ti ankouraz bann Zwif pour ‘reflesir lo sa ki zot ti pe fer.’ I ti pe demann zot pour aret en kou e reflesir lo sa ki zot ti pe fer. Koumsa zot ti ava vwar konman zot ti pe ganny afekte akoz zot pa ti pe gard konstriksyon tanp premye dan zot lavi.
12, 13. Ki mannyer Agai 1:6 i dekrir sitiasyon bann Zwif, e ki sa verse i vedir?
12 Parey ou kapab mazinen, bann Zwif ti ganny afekte lefe ki zot ti’n mal kalkil zot priyorite. Remark pwennvi Bondye dan Agai 1:6: “Zot in senm bokou, me en pti gin ki antre. Zot manze, me zot pa rasazye. Zot bwar, me pa ziska zot sou. Zot met lenz, me personn pa ganny sofe; e sa ki anploye i anploy pour en sak ki annan trou ladan.”
13 Kantmenm bann Zwif ti dan sa landrwa ki Bondye ti’n donn zot, zot pa ti pe rekolte parey zot ti a anvi. Zeova pa ti pe beni zot, parey i ti’n averti zot. (Deterononm 28:38-48) San sipor Zeova, kantmenm zot ti senmen, rekolt ti pti gin. Ti napa ase manze pour satisfer zot. San son benediksyon, zot pa ti kapab ganny lenz pour sof zot. Menm sa saler ki zot ti gannyen pour zot travay ti napa okenn profi, ti konmsi i’n pas an pasan dan en sak ki annan en ta trou. Ki sa parol: “Zot bwar, me pa ziska zot sou” i vedir? I pa vedir ki ler zot sou sa i en laprev benediksyon Bondye. Bondye pa tolere ki nou bwar pour sou. (1 Samyel 25:36; Proverb 23:29-35) Okontrer, sa i en lot lekspresyon ki endike ki Bondye pa ti pe beni bann Zwif. Okenn diven ki zot ti kapab fer ti limite. I pa ti ase pour fer zot sou. Revised Standard Version i tradwir Agai 1:6 koumsa: “Zot bwar, me zot pa zanmen bwar ase.”
14, 15. Ki leson nou aprann dan Agai 1:6?
14 Leson ki nou devret aprann avek sa lenformasyon i pa annan pour fer avek dekorasyon nou lakaz. Byen lontan avan ki bann Zwif ti al an egzil, profet Amos ti reprimann bann dimoun ris dan Izrael konsernan zot “lakaz ivwar” e konsernan “alonze lo bann lili ivwar.” (Amos 3:15; 6:4) Sa bann zoli lakaz ek meb dekore pa ti dire. Zot lennmi ki ti anvair zot ti pran tou sa bann keksoz. Me plizyer lannen plitar, apre 70 lannen an egzil, bokou parmi pep Bondye pa ti’n aprann nanryen atraver sa bann levennman. Eski nou nou pou aprann? I apropriye ki sakenn antre nou nou demande: ‘Fransman, ki kantite lanfaz mon mete lo mon lakaz e pour dekor li? Ki nou pou dir konsernan ledikasyon avanse, ki kapab dir pour detrwa lannen, e ki etouf nou bann aktivite spirityel?’—Lik 12:20, 21; 1 Timote 6:17-19.
15 Sa ki nou lir dan Agai 1:6 i devret fer nou mazin konsernan sa bezwen ki nou annan pour ganny benediksyon Bondye dan nou lavi. Bann Zwif dan sa letan pa ti ganny benediksyon Bondye e an rezilta zot ti soufer. Ki swa nou annan en kantite keksoz oubyen non, si nou pa ganny benediksyon Zeova, sa pou definitivman afekte en kantite nou relasyon avek li. (Matye 25:34-40; 2 Korentyen 9:8-12) Me ki mannyer nou kapab ganny sa benediksyon?
Zeova i ede par Mwayen Son Lespri
16-18. Dapre sitiasyon ki ti egziste sa letan, ki Zekarya 4:6 i vedir?
16 Zekarya ki ti osi en profet dan letan Agai, ti ganny enspire pour fer resorti sa mwayen ki Zeova ti motiv e beni bann ki ti annan devosyon pour li sa letan. E sa i montre ki mannyer i pou beni nou osi. Nou lir: “‘Pa par en lafors militer, ni par pouvwar, me par mon lespri,’ Zeova bann larme in dir.” (Zekarya 4:6) Petet ou tann sa verse ganny site souvan, me ki sinifikasyon i ti annan pour bann Zwif dan letan Agai ek Zekarya, e ki son laplikasyon pour nou?
17 Gard antet ki parol enspire Agai ek Zekarya ti fer en zoli lefe sa letan. Sa ki sa de profet ti dir ti vreman redonn lafors bann Zwif fidel. Agai ti konmans profetize dan sizyenm mwan lannen 520 A.N.L. Zekarya ti konmans profetize dan wityenm mwan sa menm lannen. (Zekarya 1:1) Parey ou kapab vwar dan Agai 2:18, zot ti rekonmans travay seryezman lo fondasyon dan nevyenm mwan. Alors bann Zwif ti’n ganny motive pour fer keksoz, e zot ti obeir Zeova avek konfyans ki i ti pou siport zot. Sa parol dan Zekarya 4:6 pe koz lo sipor ki Zeova ti pou donn zot.
18 Ler bann Zwif ti retourn dan zot pei natal an 537 A.N.L., zot ti napa okenn lafors militer. Pourtan Zeova ti protez zot e gid zot lo zot vwayaz sorti Babilonn. Deplis ler zot ti konmans travay lo tanp, en pe letan apre son lespri sen ti diriz sa travay. Dek ki zot ti rekonmans travay avek tou zot leker ankor, Zeova ti pou siport zot par son lespri sen.
19. Ki sa gro lenfliyans lespri Bondye ti sirmonte?
19 Zekarya ti ganny lasirans atraver wit vizyon enspire ki Zeova ti pou avek son pep, ki apre zot ti pou travay lo tanp fidelman ziska ki i fini. Katriyenm vizyon, rikorde dan sapit 3, i montre ki Satan ti pe kontinyen reziste zefor bann Zwif pour fini konstri tanp. (Zekarya 3:1) Definitivman Satan pa ti pou kontan vwar Gran Pret Zozye pe rann servis lepep dan en nouvo tanp. Kantmenm Satan ti pe fer tou pour anpes bann Zwif konstri tanp, lespri Zeova ti pou zwe en rol enportan pour retir sa bann lobstak e donn lafors bann Zwif pour kontinyen ziska zot fini fer tanp.
20. Ki mannyer lespri sen ti ed bann Zwif akonpli lavolonte Bondye?
20 I paret ki ti annan en gro lobstak, ki ti difisil pour sirmonte. Sa ti sorti kot bann zofisye gouvernman ki ti’n reisi fer aret sa travay. Me Zeova ti promet ki sa ki paret en “montanny” pou ganny tire e vin “ora later.” (Zekarya 4:7) Se sa ki ti arive! Lerwa Daryis 1 ti fer en lenspeksyon e vwar sa let ki Siris ti ekrir pour donn lotorizasyon bann Zwif pour rekonstri tanp. Alor, Daryis 1 ti retir sa restriksyon e fer donn bann Zwif larzan dan trezor rwayal pour ede pey depans pour sa travay. I enkrwayab ki mannyer sitiasyon ti sanze koumsa! Eski lespri sen Zeova ti zwe en rol ladan? Byensir. Tanp ti fini an 515 A.N.L., dan sizyenm lannen renny Daryis 1.—Ezra 6:1, 15.
21. (a) Dan letan bann Zwif, ki mannyer Bondye ti “sekwe tou bann nasyon” e ki mannyer “bann keksoz presye” in sorti? (b) Ki son lakonplisman dan nou letan?
21 Dan Agai 2:5, sa profet ti rapel bann Zwif sa lalyans ki Zeova ti fer avek zot kot montanny Sinai an 1513 A.N.L. Sa letan, “montanny antye ti pe sekwe en kantite.” (Egzod 19:18) Dan letan Agai ek Zekarya, Zeova ti pou fer keksoz sekwe ankor, parey i ganny dekrir dan en fason senbolik dan verse 6 ek 7. Sitiasyon Lanpir Pers ti pou enkyetan, tandis ki travay tanp ti pou progrese ziska i fini. Serten dimoun ki pa ti Zwif, savedir “bann keksoz presye sorti dan tou nasyon,” ti pou arive donn laglwar Bondye ansanm avek bann Zwif dan sa landrwa ladorasyon. Dan en fason remarkab dan nou letan, Bondye in sekwe bann nasyon par nou travay predikasyon, e “bann keksoz presye sorti dan tou nasyon” in vin ador Bondye ansanm avek larestan Kretyen swazir. Vreman, ozordi, bann Kretyen swazir avek lezot mouton pe ranpli lakaz Zeova avek laglwar. Sa bann vre adorater i esper avek lafwa sa letan ler Zeova pou ‘sekwe lesyel ek later’ dan en lot sans. Sa pou arive pour retir e detrir rwayonm bann nasyon.—Agai 2:22.
22. Ki mannyer bann nasyon pe ganny ‘sekwe,’ avek ki rezilta, e ki pou arive byento?
22 Sa i fer nou mazin bann gran boulversman ki’n arive dan bann diferan eleman reprezante par “lesyel ek later, lanmer ek later sek.” Par egzanp, Satan ek son bann demon ti ganny zete lo later. (Revelasyon 12:7-12) Deplis, sa travay predikasyon dirize par bann Kretyen swazir in definitivman sekwe bann eleman lo sa later. (Revelasyon 11:18) Malgre sa, “en gran lafoul” bann keksoz presye sorti dan tou nasyon in zwenn avek Izrael spirityel pour servi Zeova. (Revelasyon 7:9, 10) Sa gran lafoul i travay kotakot avek bann Kretyen swazir pour pres sa bon nouvel ki byento Bondye pou sekwe bann nasyon zour Armagedon. Sa levennman pou permet vre ladorasyon vin dan en kondisyon parfe partou dan lemonn.
Eski ou rapel?
• Kan e dan ki sitiasyon Agai ek Zekarya ti servi konman profet?
• Ki mannyer ou kapab aplik mesaz ki Agai ek Zekarya ti transmet?
• Akoz ou trouv Zekarya 4:6 ankourazan?
[Kestyon]
[Portre lo paz 8]
Mesaz Agai ek Zekarya i asir nou sipor Bondye
[Portre lo paz 10]
“Eski la en ler pour zot reste dan zot lakaz byen dekore, kan sa lakaz li i abandonnen?”
[Portre lo paz 12]
Pep Zeova pe fer zefor pour trouv ‘bann keksoz presye dan tou nasyon’