Zeova pe form bann Berze pour Son Troupo

“Zeova i donn lasazes; dan son labous i annan konnesans ek disernman.”—PROVERB 2:6.

1, 2. Akoz bann zonm ki’n batize i anvi fer plis dan kongregasyon?

“MON ti vreman kontan letan mon ti ganny apwente konman ansyen. Mon ti vwar li en privilez ek en loportinite pour fer plis dan servis Zeova. Mon ti santi mon drwa li pour tou sa ki i’n fer pour mwan. Mon ti osi anvi ed bann frer ek ser dan kongregasyon mannyer mon kapab, mon ti oule fer pour lezot sa ki bann ansyen ti’n fer pour mwan.” Sa i parol Nick ki’n servi konman sirveyan pour set an. Me menm si i ti kontan son privilez, i ti osi annan serten lenkyetid, i ti dir: “Vi ki mon pa ti ankor annan 30 an ler mon ti ganny apwente, mon pa ti santi mwan ase kalifye, petet mon ti mank disernman ek lasazes pour pran swen avek kongregasyon dan en bon fason.”

² Bann ki Zeova i servi pour pran swen avek son troupo i annan en kantite rezon pour zot dan lazwa. Zapot Pol ti rapel bann ansyen Efez enn sa bann rezon kan i ti mansyonn parol Zezi: “I annan plis lazwa pour donnen ki pour resevwar.” (Akt 20:35) Bann zonm ki’n batize e ki asistan ministeryel oubyen ansyen i annan sa loportinite pour donn plis ankor Zeova ek kongregasyon. Par egzanp, bann asistan ministeryel i travay ansanm avek bann ansyen. Bann asistan i pas bokou letan pour okip bann latas neseser. Se zot lanmour pour Zeova ek zot prosen ki motiv zot pour rann sa servis presye.—Mark 12:30, 31.

3. Akoz serten i ezite pour aksepte bann privilez dan kongregasyon?

³ Be si en zonm ki’n batize i ezite pour vin en asistan ministeryel e plitar ansyen akoz i pa santi li kalifye pour fer li? Parey Nick, i kapab enkyet akoz i krwar i mank sa bann abilite pour vin en bon berze. Eski ou en frer ki santi koumsa? An realite i normal ki nou santi koumsa. Bann ansyen pou rann kont Zeova lo lafason ki zot tret kongregasyon. Zezi ti dir: “Sa ki resevwar bokou pou bezwen rann kont bokou; e sa ki’n ganny konfye bokou par zonm pou annan plis pour rann kont.”—Lik 12:48.

4. Ki mannyer Zeova i ed bann ki i’n apwente pour pran swen avek son troupo?

⁴ Eski Zeova i ekspekte bann ki ganny apwente konman ansyen oubyen asistan desarz sa bann responsabilite san okenn led? Tou lekontrer, dan diferan fason Zeova i ed zot pour desarz zot responsabilite e menm reisi dan zot travay. Parey nou ti vwar dan lartik avan, Zeova i donn zot son lespri sen, e fri lespri sen i ed zot pour pran swen avek tandres bann mouton Bondye. (Akt 20:28; Galat 5:22, 23) Deplis, Zeova i donn sa bann zonm lasazes, konnesans ek disernman. (Proverb 2:6) Ki mannyer i fer sa? Annou vwar trwa fason ki Zeova i form bann ki i’n apwente pour pran swen avek son troupo.

 En Formasyon avek bann Berze pli eksperyanse

5. Akoz Pyer ek Zan ti bann bon berze?

⁵ Kan zapot Pyer ek Zan ti pas devan lakour Sannedren, sa bann gran ziz dapre lemonn, ti konsider sa bann zapot konman “bann zonm senp san gran ledikasyon.” Byensir zot ti konn lir e ekrir me zot pa ti’n etidye bann Lekritir dan bann gran lekol bann profeser Lalwa. Toudmenm, Pyer ek Zan ek lezot disip ti bann bon ansennyan ki ti’n kapab motiv bann gran lafoul pour aksepte lansennyman Kris. Ki mannyer sa bann zonm ordiner ti kapab vin bann bon ansennyan koumsa? Lakour ti ekout zot e “rekonnet ki sa bann zonm ti avek Zezi.” (Akt 4:1-4, 13) I vre ki zot ti’n resevwar lespri sen. (Akt 1:8) Me i ti evidan menm pour sa bann ziz aveg ki sa bann zonm ti’n ganny formen par Zezi. Kan i ti lo later, Zezi ti montre son bann zapot konman pour rasanble son bann mouton epi pour pran swen avek zot osi.—Matye 11:29; 20:24-28; 1 Pyer 5:4.

6. Ki mannyer Zezi ek Pol ti form lezot?

⁶ Apre son rezireksyon, Zezi ti kontinyen form sa bann berze. (Revelasyon 1:1; 2:1–3:22) Par egzanp, li menm i ti swazir e form Pol. (Akt 22:6-10) Pol ti apresye son formasyon e i ti partaz sa ki i ti’n aprann avek lezot ansyen. (Akt 20:17-35) Par egzanp, Pol ti donn bokou letan ek zefor pour form Timote pour li vin en “zouvriye” dan servis Bondye ki “napa nanryen pour onte.” (2 Timote 2:15) Pol ek Timote ti vin de bon zanmi. Avan sa, Pol ti ekrir lo Timote: “[I’n] travay ansanm avek mwan konman en garson avek son papa dan servis levanzil.” (Filipyen 2:22) Pol pa ti anvi ki Timote oubyen lezot i vin son disip okontrer i ti ankouraz lezot dan kongregasyon pour ‘imit li parey i imit Kris.’—1 Korentyen 11:1.

7, 8. (a) Ki leksperyans ki montre ki i bon pour bann ansyen imit legzanp Zezi ek Pol? (b) Kan bann ansyen i devret konmans form bann frer ki kapab vin asistan oubyen ansyen?

⁷ Parey Zezi ek Pol, bann berze eksperyanse i pran linisyativ pour form bann frer batize e zot ganny bann bon rezilta osi. Get leksperyans Chad. Serten son fanmiy pa ti Temwen, me tou dernyenman i’n ganny apwente konman ansyen. I dir: “I’n toultan annan bann ansyen eksperyanse pour ed mwan progrese spirityelman. Vi ki papa pa ti Temwen, sa bann ansyen ti pran lentere dan mwan e zot ti vin parey bann papa spirityel pour mwan. Zot ti pran letan pour form mwan dan predikasyon, e plitar en ansyen ti form mwan pour okip mon bann responsabilite dan kongregasyon.”

⁸ Parey leksperyans Chad i montre, bann berze pou remarke lekel zot kapab konmans formen pour vin ansyen oubyen asistan ministeryel byen lontan avan ki zot vreman pare pour resevwar sa bann privilez. Akoz? Akoz dapre Labib ansyen konman asistan ministeryel i bezwen ariv lo standar moral e spirityel onivo avan ki zot ganny apwente. “Fodre premyerman teste zot.”—1 Timote 3:1-10.

9. Ki responsabilite bann berze eksperyanse i annan e akoz?

⁹ Si sa bann frer pou ganny teste, i toutafe  normal ki zot resevwar en formasyon avan. Meton en zelev pe al ganny teste lo en size difisil e i pa’n ganny okenn led avek son ansennyan, eski nou ekspekte li pas sa tes? Tre probab, i pa pou reisi. Se pour sa ki en formasyon i neseser e en bon ansennyan pou fer sir ki son bann zelev i pas tes me osi ki zot kapab servi plitar sa ki zot in aprann lekol. Bann ansyen i fer parey e donn en formasyon spesifik bann frer batize pour ed zot devlop bann kalite neseser. Zot fer sa pa selman pour ki sa bann frer i ganny apwente me osi pour ed zot okip byen troupo Bondye. (2 Timote 2:2) Byensir bann frer batize i bezwen pran zot responsabilite e travay dir pour devlop bann kalite ki en ansyen oubyen en asistan ministeryel i devret annan. (Tit 1:5-9) Parkont, ler bann berze eksperyanse i volonterman form bann ki aksepte responsabilite, alor zot pou progrese pli vitman.

10, 11. Konman bann berze i form lezot pour plis privilez?

¹⁰ Be ki mannyer egzakteman bann berze eksperyanse i kapab form lezot pour okip bann responsabilite dan kongregasyon? Premyerman, bann ansyen i pran lentere dan bann frer par travay avek zot dan predikasyon e ed zot amelyor lafason ki zot ‘anons mesaz laverite.’ (2 Timote 2:15) Sa bann berze i eksprim sa lazwa ki zot annan ler zot servi lezot e ki mannyer zot kontan pour annan e pourswiv bann lobzektif spirityel. Zot osi donn avek labonte bann pti sizesyon pour ki sa frer i progrese pour vin en “model pour troupo.”—1 Pyer 5:3, 5.

¹¹ Ler en frer i vin asistan ministeryel, bann bon berze i kontinyen form li. Bruce ki’n servi konman ansyen pour preski 50 an ti dir: “Mon asiz en kou avek sa nouvo asistan e revwar avek li bann lenstriksyon ki lesklav fidel e pridan in fourni. Nou osi lir lenformasyon disponib konsernan son responsabilite epi mon kontan ed li dan son travay ziska ler i konn byen son louvraz.” Ler en asistan i annan plis leksperyans i pou kapab ganny formen pour vizit bann frer ek ser. Bruce ti osi dir: “Mon ed sa asistan ministeryel pour swazir bann verse Labib ki pou ankouraz e motiv sa dimoun oubyen sa fanmiy ki nou pe al vizite. Pour ki en asistan i vin en bon berze i esansyel ki i aprann konman pour servi Labib dan en fason ki tous leker.”—Ebre 4:12; 5:14.

12. Ki mannyer bann berze eksperyanse i form bann nouvo ansyen?

 ¹² Ler bann berze i fek ganny apwente, zot pou benefisye osi avek plis formasyon ankor. Nick ki ti ganny mansyonnen taler ti dir: “Mon ti ganny formen par de sirveyan pli aze e sa ti vreman ed mwan. Sa bann frer ti konpran konman pour tret serten sitiasyon. Zot ti toultan pran letan pour ekout mwan e vreman reflesir lo mon pwennvi menm si zot pa ti dakor. Mon’n aprann en kantite par obzerv lafason ki zot ti tret bann frer ek ser dan kongregasyon avek respe ek limilite. Zot in ed mwan realiz lenportans pour byen servi Labib pour ed lezot rezourd bann problenm oubyen donn lankourazman.”

En Formasyon avek Parol Bondye

13. (a) Ki en frer i bezwen pour vin en bon berze? (b) Akoz Zezi ti dir: “Lansennyman ki mon donnen i pa mon prop lansennyman”?

¹³ Lalwa, prensip ek legzanp ki dan Parol Bondye Labib i vreman ed en berze pour “byen prepare e byen ekipe pour fer tou aksyon ki bon.” (2 Timote 3:16, 17) Kekfwa en frer i annan en bon ledikasyon me son konnesans Labib e lafason ki i aplik li ki pou fer li vin en bon berze. Get legzanp Zezi. Lo later ti napa en dimoun ki ti konn plis ki li, ki ti annan plis disernman oubyen lasazes ki li, me selman i pa ti zanmen depan lo son prop lasazes ler i ti pe ansenny bann mouton Zeova. I ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” Akoz Zezi ti donn tou laglwar son Papa? I reponn: “En dimoun ki koz par son prop lotorite i pe rod [son prop] laglwar.”—Zan 7:16, 18.

14. Ki mannyer bann berze pa rod zot prop laglwar?

¹⁴ Bann berze fidel pa rod zot prop laglwar. Tou konsey ek lankourazman ki zot donnen i pa baze lo sa ki zot krwar i byen me lo Parol Bondye. Zot konnen ki zot louvraz se pour ed bann frer ek ser ganny “Lespri Kris,” pa pwennvi bann ansyen. (1 Korentyen 2:14-16) Fer konmsi en ansyen pe ed en koup ki annan bann problenm dan lakour. Ki pou arive si son konsey i baze lo  son leksperyans plito ki lo Labib ek konsey ‘lesklav fidel e pridan’? (Matye 24:45) Petet son konsey pou ganny tro bokou enfliyanse par bann koutim lokal oubyen petet son leksperyans personnel i kapab pti gin dan en serten domenn. I vre ki pa tou koutim ki mal e sa ansyen i kapab annan en bon pe leksperyans dan lavi. Me kongregasyon pou pli byen benefisye ankor ler bann berze i ankouraz zot pour ekout lavwa Zezi e sa ki Zeova i dir olye ekout bann pwennvi imen oubyen bann koutim lokal.—Psonm 12:6; Proverb 3:5, 6.

En Formasyon avek ‘Lesklav fidel e pridan’

15. Ki travay Zezi in donn ‘lesklav fidel e pridan’ e kwa ki fer zot reisi dan sa louvraz?

¹⁵ Pyer, Zan ek Pol ti tou le trwa bann berze ki ti form parti ‘lesklav fidel e pridan’ ki Zezi ti mansyonnen. Lesklav fidel e pridan i sa group bann frer swazir Zezi ki annan lespwar pour vin lerwa dan lesyel ansanm avek li. (Revelasyon 5:9, 10) Parey nou ti espekte dan sa bann dernyen zour, lakantite frer Zezi lo later in diminyen. Parkont travay pour pres sa bon nouvel Rwayonm avan lafen, ki Zezi ti donn zot, i deplizanpli gran. Ki mannyer ‘lesklav fidel’ in kapab sitan byen reisi! En rezon se ki zot in form bann ki fer parti ‘lezot mouton’ pour travay ansanm avek zot dan predikasyon ek lansennyman. (Zan 10:16; Matye 24:14; 25:40) Aprezan laplipar sa louvraz pe ganny fer fidelman par ‘lezot mouton.’

16. Ki mannyer lesklav in form bann ansyen ek bann asistan?

¹⁶ Konman bann Kretyen swazir in form lezot? Dan premye syek, bann reprezantan sa lesklav fidel ti annan lotorite pour form e apwent bann sirveyan dan bann kongregasyon. E sa bann sirveyan zot, zot ti form bann frer dan kongregasyon. (1 Korentyen 4:17) I parey ozordi, lesklav fidel e pridan i ganny reprezante par Konsey Direkter ki en pti group ansyen ki bann Kretyen swazir. Konsey Direkter in donn son bann reprezantan lotorite pour form e apwent bann asistan ek bann ansyen dan tou bann kongregasyon dan lemonn. Deplis Konsey Direkter i organiz diferan lekol pour form bann manm lo Komite Biro brans, bann sirveyan rezyonal, bann ansyen ek bann asistan ministeryel pour ki zot pli byen okip kongregasyon. Lezot konsey ankor i ganny donnen atraver let, Latour Veyer ek lezot liv parey Organized to Do Jehovah’s Will. *

17. (a) Ki mannyer Zezi in montre ki i annan konfyans dan lesklav fidel? (b) Konman bann berze i montre ki zot annan konfyans dan lesklav fidel?

¹⁷ Zezi i telman annan konfyans dan sa lesklav ki i’n met li ansarz “tou son byen,” sa i reprezant tou son bann lentere spirityel lo later. (Matye 24:47) Sa bann berze osi zot montre ki zot annan konfyans dan sa lesklav fidel ler zot swiv gidans ki zot gannyen avek Konsey Direkter. Wi, kan bann berze i form lezot e zot aksepte pour ganny formen par Parol Bondye e par lesklav fidel, zot promot linite dan kongregasyon Bondye. Pa nou rekonesan ki Zeova in form sa bann zonm ki vreman annan zentere sak manm kongregasyon aker!

[Not anba lo paz]

Ki ou pou reponn?

• Ki mannyer bann berze i form lezot?

• Akoz bann berze pa ansenny zot prop pwennvi?

• Ki mannyer e akoz bann berze i demontre ki zot annan konfyans dan lesklav fidel?

[Kestyon]

[Portre lo paz 25]

Bann ansyen i form bann frer pli zenn dan kongregasyon

[Portre lo paz 26]

‘Lesklav fidel e pridan’ in fer bokou pour form bann ansyen