Bondye i enterese avek Dimoun aze

I PA drol ki ozordi partou dan lemonn bann dimoun aze pe ganny abize. Depi byen byen lontan, Labib ti predir ki dan bann “dernyen zour” dan sa sistenm ozordi, dimoun ‘pou vin egois, napa okenn lafeksyon natirel.’ (2 Timote 3:1-3) Sa mo Grek ki’n ganny tradwir ‘napa okenn lafeksyon natirel’ i kapab vedir sa lanmour ki egziste antre fanmiy. Sa ki Labib i dir i vre, akoz ozordi nou kapab vwar ki sa kalite lafeksyon i manke dan lasosyete.

Kontrerman avek sa bann ki pa tret byen bann dimoun aze, Bondye, Zeova, i vreman apresye e enterese avek sa bann ki’n antre dan zot trwazyenm az. Annou vwar laprev dan Labib.

“En Ziz pour bann Vev”

Nou kapab vwar klerman dan Lekritir Ebre ki Zeova i enterese avek bann dimoun aze. Par egzanp, dan Psonm 68:5, David i apel Bondye “en ziz pour bann vev.” E laplipar-di-tan sa bann vev i aze. * Dan lezot versyon Labib, sa mo “ziz” in ganny tradwir “defanser,” “protekter” e “sanpyon.” I kler ki Zeova i enterese avek bann vev. Anfet, Labib i dir ki si lezot dimoun pa byen tret zot, Zeova pou vreman ankoler. (Egzod 22:22-24) Bondye ek son bann serviter, i apresye en kantite bann vev ek dimoun aze ki fidel. Proverb 16:31 i montre pwennvi Zeova ek son pep. Sa proverb i dir: “Seve blan i en kouronn labote kan i ganny trouve dan semen ladrwatir.”

I pa drol alor ki respe pour bann dimoun aze ti en parti fondamantal dan Lalwa ki Zeova ti donn bann Izraelit. Zot  ti ganny demande: “Devan bann seve blan ou devret leve, e ou merit montre konsiderasyon pour en vye dimoun, e ou devret annan lakrent pour ou Bondye. Mwan mon Zeova.” (Levitik 19:32) Anfet, lafason ki bann Izraelit ti azir anver bann dimoun aze ti annan en lyen direk avek zot relasyon avek Zeova. Personn pa ti pou kapab dir i kontan Bondye si i pa ti byen tret en dimoun aze.

Ozordi bann Kretyen pa swiv Lalwa Moiz. Me zot swiv “lalwa Kris.” Sa lalwa i annan en gro lefe lo zot kondwit, latitid, e i enkli montre lanmour ek lentere anver bann paran ek dimoun aze. (Galat 6:2; Efezyen 6:1-3; 1 Timote 5:1-3) Bann Kretyen i montre lanmour anver lezot pa zis akoz i en komannman ki zot bezwen swiv, me akoz zot leker ki pous zot pour fer sa. Zapot Pyer ti ankouraz bann Kretyen pour “kontan kanmarad bokou avek tou zot leker.”—1 Pyer 1:22.

Disip Zak i donn nou lezot rezon akoz nou devret enterese avek bann dimoun aze. I ti ekrir: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans, e pa les zot ganny sali par move lenflians sa monn.” (Zak 1:27) Zak i fer resorti en keksoz ki vreman tousan. I fer nou vwar ki bann dimoun aze i vreman presye dan lizye Zeova.

Alors, i enplik plis ki zis byen tret bann dimoun aze. Nou devret osi annan lentere senser dan zot ki pous nou pour fer keksoz pour zot. (Vwar sa bwat “Lanmour an aksyon,” lo paz 6-7.) Zak ti ekrir: “Lafwa san bann laksyon i mor.”—Zak 2:26.

Rekonfort zot “dan zot Soufrans”

I annan en lot keksoz enteresan nou kapab vwar dan sa ki Zak ti ekrir. Remarke ki Zak ti demann bann Kretyen pour pran swen avek bann vev “dan zot soufrans.” Sa mo Grek ki’n ganny tradwir “soufrans” i vedir sagrinasyon, difikilte oubyen soufrans ki nou rankontre akoz sa presyon lavi. San okenn dout, en kantite dimoun aze i pas atraver bann moman difisil. Serten i tousel, e lezot i dekouraze akoz zot pa kapab fer parey ler zot ti ankor zenn. Menm sa bann ki aktif dan servis Bondye i kapab dekouraze. Annou egzamin sitiasyon Zan * ki pe fidelman pres lo Rwayonm Bondye pour plis ki karant an. E pour sa dernyen trant an in pas son lavi dan servis aplentan. Ozordi i dan son 80 an montan, e Zan i fer resorti ki parfwa i santi li dekouraze. I dir: “Souvan mon asize e mazin lepase e la mon rapel mon bann fot, en kantite fot. Mon toultan pe dir mon lekor ki mon ti’n kapab fer pli byen.”

Menm si Bondye i parfe, i pa ekspekte nou pour parfe parey li. Alors, kan zot gard sa antet, sa i kapab ankouraz bann ki santi parey Zan. Menm si i konn tou nou bann fot, Labib i dir sa lo li: “Si ou ti vey bann fot, O Ya, O Zeova, lekel ki ti pou kapab debout devan ou?” (Psonm 130:3) Wi, Zeova pa tir lizye lo nou bann fot, okontrer i vwar kwa ki dan nou leker. Ki mannyer nou konn sa?

Lerwa David, ki konnen ki savedir lenperfeksyon, ti ganny enspire par Bondye pour ekrir sa bann parol dan Psonm 139:1-3: “O Zeova, ou’n egzamin mwan, e ou konn mwan. Ou’n arive konnen ler mon asize e ler mon leve. Depi dan lwen ou’n obzerv mon panse. Kan mon vwayaze e kan mon alonze, tousala ou’n mezire. Ou’n abitye avek tou mon bann fason.” Sa mo “mezire” i literalman vedir “separe” dan menm fason ki en fermye i separ lapay ek lagrenn. I prezerv bann lagrenn, me i zet lapay. David i asir nou ki Zeova i konnen konman pour separ e prezerv nou bann bon travay dan son memwar.

Nou Papa ki montre mizerikord, i rapel e apresye nou bann bon travay osi lontan ki nou reste fidel avek li. Anfet, Labib i dir ki Bondye pou vwar sa enzis lo son par si i oubliy nou travay ek lanmour ki nou’n montre pour son non.—Ebre 6:10.

“Lemonn ansyen in disparet”

Labib i montre ki i pa ti dan plan Bondye pour dimoun vin vye. Lavyeyes ek tou son problenm in vin en par nou lavi apre ki nou  premye paran, sa premye zonm ek fanm, ti rebel kont zot Kreater. (Zenez 3:17-19; Romen 5:12) Me i pa pou reste koumsa pour touzour.

Parey nou’n dir pli boner, tou sa bann problenm ki egziste ozordi, enkli sa ka kot bann dimoun aze pe ganny abize, tousala i laprev ki nou pe viv dan “bann dernyen zour.” (2 Timote 3:1) Bondye pou retir bann konsekans ki pese in anmennen, sa i enkli lavyeyes ek lanmor. Labib i dir: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.

Dan nouvo lemonn Bondye, douler ek soufrans ki lavyeyes in anmennen e sa problenm kot dimoun aze i ganny abize, tousala pou bann keksoz lepase. (Mika 4:4) Menm sa bann ki’n mor e ki dan memwar Bondye, zot pou ganny resisite pour zot ganny sa loportinite pour viv pour touzour dan paradi lo later. (Zan 5:28, 29) Kan tousala i arive, nou pou annan plis levidans ki Bondye pa zis enterese avek bann aze, me osi avek bann ki obeir li.

[Not anba lo paz]

 [Bwat/Portre lo paz 6, 7]

Lanmour an Aksyon

Parmi bann Temwen Zeova, bann ansyen dan kongregasyon i donn legzanp an sa ki konsern pran swen avek bann aze. Zot pran oserye konsey ki Pyer ti donnen: “Pran byen swen troupo Bondye ki’n ganny konfye avek zot.” (1 Pyer 5:2) Pran swen avek bann aze dan en fason pratik i en fason ki bann ansyen i pran swen troupo Bondye. Me ki sa i kapab enplike?

I demann pasyans e petet plizyer vizit ek konversasyon amikal pour kapab byen konnen ki en dimoun aze i bezwen. Petet i kapab bezwen en dimoun pour fer son konmisyon e netway lakaz. Oubyen en transpor pour anmenn li renyon, en dimoun pour lir Labib ek bann piblikasyon avek li, ek plizyer lezot keksoz ankor. Kan i posib, en bon laranzman pratik i devret ganny fer, e fer sir ki i ganny akonpli. *

Me ki pou fer si en frer oubyen ser aze i dan en sitiasyon kot i bezwen led san tarde, petet led finansyel? Premyerman, i pou bon pour rode si i annan zanfan oubyen fanmiy ki kapab ede. Sa pou an akor avek sa ki 1 Timote 5:4 i dir: “Si en vev i annan zanfan oubyen pti zanfan, fodre ki sa bann zanfan i aprann met an pratik premyerman zot lafwa anver zot prop fanmiy, e ensi, ranpli zot devwar anver zot paran ek gran paran. Se sa ki fer plezir Bondye.”

Kekfwa en aze i bezwen led pour konnen si i kalifye pour ganny led ki gouvernman i ofer. Petet serten dan kongregasyon i kapab ed li. Si sa dimoun aze pa kapab ganny led avek gouvernman, bann ansyen i kapab diskite si i kapab ganny led avek kongregasyon. Dan kongregasyon dan premye syek, serten ti ganny sa kalite led akoz dan let ki zapot Pol ti ekrir son koleg travay Timote, i ti dir: “Pour azout non en vev lo lalis fodre pa ki i annan mwens ki swasant an, e fodre ki i’n marye en sel fwa. Fodre ki i annan en bon repitasyon dan bann travay byenfe ki i fer. Fodre ki i’n byen elve son bann zanfan, ki i’n montre lospitalite, ki i’n montre limilite an lavan lipye bann krwayan, ki i’n port sekour bann malere, e pratik bann bonn aksyon.”—1 Timote 5:9, 10.

[Not anba lo paz]

[Portre lo paz 5]

Dorkas ti pran swen avek bann vev ki ti dan bezwen.—Akt 9:36-39