“Depi Okonmansman [Zeova] I Revel Konklizyon”

“Sa Enn ki depi okonmansman pe revel konklizyon, e depi byen lontan bann keksoz ki pa ankor arive.”—IZAI 46:10.

1, 2. Kwa ki remarkab konsernan bann levennman asosye avek defet Babilonn, e ki sa i endike lo Zeova?

BANN solda i avanse byen trankilman dan fernwanr obor Larivyer Efrat pour atak zot target gran lavil Babilonn. Anmezir zot apros larantre lavil, zot vwar en keksoz sirprenan. Sa de manman baro lo miray dan larantre Babilonn in reste ouver! Zot sorti dan larivyer, monte e antre dan lavil. Deswit sa lavil i tonm dan zot lanmen. Zot dirizan, Siris i vitman pran kontrol sa pei e plitar i pas en lord ki permet bann Izraelit ganny libere. Plizyer milye zot ki ti an egzil i retourn kot zot pour reetablir ladorasyon Zeova Zerizalenm.—2 Kronik 36:22, 23; Ezra 1:1-4.

² Ozordi bann istoryen in konfirmen ki sa bann levennman dan bann lannen 539-537 A.N.L. ti vreman arive. Sa ki remarkab i ki sa bann levennman ti ganny devwale apepre 200 zan avan ki i arive. Wi, sitan sa kantite letan davans, Zeova ti enspir profet Izai pour dekrir fason ki Babilonn ti pou tonbe. (Izai 44:24–45:7) Bondye pa ti zis devwal bann sitiasyon ki ti asosye avek sa levennman me osi non sa dirizan ki ti pou diriz sa latak. * Ler i ti adres bann Izraelit, ki ti son bann temwen sa letan, Zeova ti dir: “Rapel bann premye keksoz depi byen lontan, ki mwan mon Bondye e napa lot Bondye, ni personn parey mwan; sa Enn ki depi okonmansman pe revel konklizyon, e depi byen lontan bann keksoz ki pa ankor arive.” (Izai 46:9, 10a) Zeova i vreman en Bondye ki kapab konnen davans sa ki pou arive.

3. Ki bann kestyon nou pou konsidere?

³ Ki kantite Zeova i konnen lo lavenir? Eski Zeova i konnen davans ki sak dimoun pou fer? Anfet, eski Zeova in fini  determinen ki mannyer nou lavenir pou ete? Dan sa lartik ek sa lot ki swiv nou pou vwar larepons ki Labib i donnen pour sa bann kestyon ek lezot.

Zeova—En Bondye Profesi

4. Lekel ki Sours bann profesi dan Labib?

⁴ Lefe ki i kapab konn lavenir davans, Zeova ti enspir son bann serviter dan letan Labib pour ekrir bokou profesi, e sa i fer nou konnen davans sa ki Zeova in deside pour fer. Zeova ti anonse: “Bann premye keksoz—la zot in arive, me mon pe anons bann nouvo keksoz. Avan ki zot konmans zermen, mon fer zot antann sa bann keksoz.” (Izai 42:9) Vreman pep Bondye i annan en privilez spesyal!

5. Lefe ki nou konnen davans ki Zeova pou fer, ki responsabilite sa i mete lo nou?

⁵ Profet Amos i asir nou: “Souvren Senyer Zeova pa pou fer nanryen amwen ki i’n revel son keksoz konfidansyel avek son serviter bann profet.” Lefe ki Zeova in fer nou konnen davans ki i pou fer sa i anmenn en responsabilite lo nou. Remark sa bon legzanp ki Amos ti servi apre: “I annan en lyon ki’n kriye! Lekel ki pa pou per?” Zis parey ler en lyon i kriye, dimoun ek zannimo dan zalantour i reazir vitman, pareyman bann profet parey Amos ti vitman pare pour anons mesaz Zeova. “Souvren Senyer Zeova li menm in koze! Lekel ki pa pou profetize?”—Amos 3:7, 8.

“Parol” Zeova i “sirman annan Sikse”

6. Dan ki fason “konsey” Zeova ti reisi an rapor avek Babilonn?

⁶ Atraver son profet Izai, Zeova ti dir: “Mon konsey pou realize, e tou sa ki fer mwan plezir, mon pou fer.” (Izai 46:10b) “Konsey” Bondye, savedir son lavolonte oubyen plan konsernan Babilonn ti enplik fer Siris kit son pei Pers e fer li atak e kaptir Babilonn. Zeova ti revel sa plan byen lontan davans. Parey i’n deza fer resorti, sa ti ganny akonpli egzakteman dan lannen 539 A.N.L.

7. Akoz nou kapab annan konfyans ki “parol” Zeova pou toultan reisi?

⁷ Pros kat syek avan ki Siris ti kaptir Babilonn, Lerwa Zida, Yeosafat, ti fer fas avek larme Amonn ek Moab. Avek konfyans i ti priye: “O Zeova Bondye nou zanset, eski pa ou Bondye dan lesyel, e eski pa ou ki pe domin lo tou rwayonm bann nasyon, e eski pa lafors ek pwisans i dan ou lanmen, ki personn pa kapab debout kont ou?” (2 Kronik 20:6) Izai osi ti eksprim sa menm konfyans ler i ti dir: “Zeova bann larme li menm in konseye, e lekel ki kapab kas sa? E i’n avans son lanmen, e lekel ki kapab fer li retournen?” (Izai 14:27) Apre ki i ti reganny son lespri, Lerwa Neboukadnetsar Babilonn ti abes son lekor e i ti rekonnet: “Pa egziste personn ki kapab aret lanmen [Bondye] oubyen ki kapab dir li, ‘Ki ou’n fer?’” (Danyel 4:35) Wi, Zeova i asir son pep: “Mon parol . . . pa pou retourn kot  mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.” (Izai 55:11) Nou kapab annan konfyans total ki “parol” Zeova pou toultan vin vre. I enposib pour plan Bondye pa ganny akonpli!

“Plan eternel” Bondye

8. Kwa sa “plan eternel” Bondye?

⁸ Dan son let pour bann Kretyen Efez, zapot Pol ti fer resorti ki Bondye i annan en “plan eternel.” (Efezyen 3:11) Sa i pa zis en plan ki i pou fer, konmsi Bondye ti bezwen detay fason ki i ti pou akonpli en keksoz. Okontrer, i annan pour fer avek son determinasyon pour akonpli sa ki i ti anvi fer pour limanite ek later depi okonmansman. (Zenez 1:28) Annou egzamin sa premye profesi dan Labib e nou pou konpran ki plan Bondye pa kapab fel.

9. Ki mannyer Zenez 3:15 i relye avek plan Bondye?

⁹ Sa promes dan Zenez 3:15 i endike ki zis apre ki Adan ek Ev ti fer pese, Zeova ti determinen ki son madanm senbolik pou konsevwar en desandans, oubyen garson. Zeova ti osi prevwar sa ki ti pou arive akoz sa laenn ant son madanm ek Satan ek ant zot desandans. Menm si Zeova ti pou les Desandans son madanm ganny blese dan talon, dan letan fikse Bondye, sa Desandans pou bles sa serpan, oubyen Satan, dan latet. Antretan, plan Zeova ti kontinyen progrese atraver bann zanset swazir ziska ki Zezi ti aparet konman sa Mesi promiz.—Lik 3:15, 23-38; Galat 4:4.

Ki Zeova in deside davans pou arive

10. Eski Zeova ti predeterminen depi okonmansman ki Adan ek Ev ti pou fer pese? Eksplike.

¹⁰ Zapot Pyer ti koz konsernan rol ki Zezi ti zwe dan plan Bondye ler i ti ekrir: “I [Zezi] ti ganny swazir davans, avan kreasyon [oubyen fondasyon] lemonn, me i’n ganny prezante pour zot dan sa dernyen letan.” (1 Pyer 1:20; not anba lo paz dan Traduction du monde nouveau) Eski Zeova ti predeterminen depi okonmansman ki Adan ek Ev ti pou fer pese e ki sa sakrifis par mwayen Zezi Kri ti pou neseser? Non. Sa mo Grek ki ganny tradwir “kreasyon” oubyen fondasyon i literalman vedir “zet ater [lagrenn].” Eski lagrenn ti ganny “zet ater ” oubyen eski zanfan ti ganny konsevwar avan ki Adan ek Ev ti fer pese? Non. I ti apre ki Adan ek Ev ti dezobei ki zot ti fer zanfan. (Zenez 4:1) Alor, Zeova ti deside davans pour fer sa “desandans” aparet apre dezobeisans Adan ek Ev me avan ki zot ti fer zanfan. Lanmor ek rezireksyon Zezi i fer sa laranzman ranson posib, kot pese pou  ganny retire e tou zefor Satan pou’n fel.—Matye 20:28; Ebre 2:14; 1 Zan 3:8.

11. Ki sa keksoz ki Zeova ti deside davans pou arive dan lakonplisman son plan?

¹¹ I ti annan en lot keksoz dan lakonplisman son plan ki Bondye ti deside davans pou arive. Sa i evidan par sa ki Pol ti ekrir bann Efezyen, ki Bondye pou “reini ankor tou keksoz dan Kris, keksoz dan lesyel ek keksoz lo later.” Apre, konsernan “keksoz dan lesyel,” savedir sa bann ki’n ganny swazir konman zeritye avek Kris, Pol ti eksplike: “Nou ti ganny swazir davans dapre plan sa enn ki egzekit tou keksoz selon son volonte.” (Efezyen 1:10, 11, NW) Wi, Zeova ti determin davans ki en serten kantite dimoun ti pou form en parti segonder desandans madanm Bondye e ansanm avek Kris akord limanite bann byenfe sa ranson. (Romen 8:28-30) Zapot Pyer ti apel zot “en nasyon sen.” (1 Pyer 2:9) Atraver en vizyon zapot Zan ti ganny privilez pour konnen ki ti pou annan 144,000 zeritye ansanm avek Kris. (Revelasyon 7:4-8; 14:1, 3) Par siport Kris konman Lerwa, zot servi “pour laglwar [Bondye].”—Efezyen 1:12-14.

12. Ki mannyer nou konnen ki sak dimoun dan sa 144,000 pa’n ganny destinen?

¹² Lefe ki Bondye ti deside davans ki ti pou annan 144,000 dimoun ki pou al dan lesyel, sa pa vedir ki zot ti’n ganny destinen pour servi Bondye fidelman dan sa fason. Annefe, bann konsey dan Lekritir Grek Kretyen ti ganny ekrir prensipalman pour gid e fortifye bann Kretyen swazir pour reste fidel e pour pa perdi faver Bondye pour al dan lesyel. (Filipyen 2:12; 2 Tesalonisyen 1:5, 11; 2 Pyer 1:10, 11) Zeova i konnen davans ki 144,000 dimoun pou kalifye pour akonpli son plan. Ti pou lekel zot finalman? Sa ti pou tou depan lo ki mannyer sak dimoun ki ti’n ganny envite ti swazir pour viv zot lavi, e sa i en desizyon ki sakenn antre zot i bezwen fer personnelman.—Matye 24:13.

Ki Zeova i konnen davans

13, 14. Fason ki Zeova i servi son abilite pour konnen davans i an armoni avek kwa e akoz?

¹³ Vi ki Zeova i en Bondye profesi ki annan en plan, ki mannyer i servi son abilite pour konnen davans sa ki pou arive? Premyerman, nou konn byen ki Bondye i toultan azir dan en fason onnet, drwat, e avek lanmour. Ler i ti pe ekrir bann Kretyen Ebre dan premye syek N.L., zapot Pol ti konfirmen ki ve ek promes Bondye i ‘de keksoz ki pa zanmen kapab sanze e ki Bondye pa kapab manti.’ (Ebre 6:17, 18) Dan son let pour disip Tit, Pol ti osi eksprim son panse, ler i ti ekrir ki Bondye “pa zanmen manti.”—Tit 1:2.

¹⁴ Deplis, menm si Zeova i annan pouvwar san limit, i pa zanmen azir dan en fason enzis. Moiz ti dekrir Zeova konman “en Bondye fidel, avek ki napa lenzistis; i drwat e onnet.” (Deterononm 32:4) Tou keksoz ki Zeova i fer i an armoni avek son zoli personnalite. Tou sa ki i fer i an armoni  avek son bann kalite prensipal ki lanmour, lasazes, lazistis, ek pwisans.

15, 16. Ki bann swa Zeova ti met devan Adan dan zarden Edenn?

¹⁵ Annou vwar ki mannyer bann kalite prensipal Zeova ti evidan atraver bann levennman ki ti arive dan zarden Edenn. Konman en bon Papa, Zeova ti fourni tou keksoz ki imen ti bezwen. I ti donn Adan sa abilite pour reflesir, pour rezonnen, e pour tir en konklizyon. Kontrerman avek zannimo ki ganny gide par lensten, Adan li ti annan abilite pour fer bann swa. Alor apre ki Adan ti’n ganny kree, depi son tronn dan lesyel, Bondye ti gete e i ti vwar ki “tou keksoz ki i ti’n fer e, gete! i ti tre bon.”—Zenez 1:26-31; 2 Pyer 2:12.

¹⁶ Ler Zeova ti deside pour donn Adan en lord pour pa manz fri “sa pye konnesans bon e move,” I ti donn sifizaman lenformasyon pour ki Adan ti kapab deside ki pou fer. I ti permet Adan manz fri dan “tou pye dibwa sa zarden” eksepte zis enn e i ti averti li son move konsekans pour manz fri sa pye dibwa enterdi. (Zenez 2:16, 17) I ti fer byen kler avek Adan konsekans son aksyon. Ki Adan ti pou fer?

17. Akoz nou kapab dir ki Zeova i selektif dan fason ki i servi son abilite pour konn lavenir?

¹⁷ I evidan ki Zeova ti swazir pour pa prevwar sa ki Adan ek Ev ti pou fer, menm si I annan sa abilite pour konn tou keksoz davans. Alor i pa en kestyon si Zeova i kapab prevwar lavenir, me si i swazir pour fer li. Deplis, nou kapab rezonnen ki Zeova, lefe i en Bondye lanmour, pa ti pou avek tou son konnesans e dan en fason kriyel predeterminen ki sa rebelyon ek tou son move konsekans i devret arive. (Matye 7:11; 1 Zan 4:8) Alor, Zeova i selektif dan sa ki i swazir pour konnen davans.

18. Akoz lefe ki Zeova i swazir pour konnen davans sa ki pou arive pa montre ki i annan serten defo avek li?

¹⁸ Eski lefe ki Zeova i swazir ki i anvi konnen davans i vedir ki i mank lotorite, i enparfe? Non. Moiz ti dekrir Zeova konman “sa Ros,” i azoute: “Tou sa ki i fer i parfe.” Pa li ki responsab pour bann konsekans nou pese. I dezobeisans Adan ki lorizin sa bann move lefe pese ki nou tou nou eksperyanse ozordi. Zapot Pol ti klerman rezonnen ki “pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.”—Deterononm 32:4, 5; Romen 5:12; Zeremi 10:23.

19. Ki kestyon nou pou egzaminen dan lot lartik?

¹⁹ Ziska aprezan, nou’n aprann ki napa lenzistis avek Zeova. (Psonm 33:5) Okontrer, son bann abilite, kalite moral ek standar i ganny servi an armoni avek son plan. (Romen 8:28) Konman en Bondye profesi, Zeova i anons ‘depi okonmansman konklizyon, e depi byen lontan bann keksoz ki pa ankor arive.’ (Izai 46:9, 10) Nou’n osi vwar ki i swazir ki i anvi konnen davans. Alor, ki lefe sa i annan lo nou? Ki mannyer nou kapab fer sir ki nou desizyon i an armoni avek plan Bondye? E ki rekonpans nou pou gannyen si nou fer sa? Sa lot lartik pou egzamin sa bann kestyon.

[Not anba lo paz]

Eski ou kapab eksplike?

• Ki legzanp dan lepase ki prouve ki “parol” Bondye in toultan “annan sikse”?

• Ki Zeova ti’n fini deside davans pou arive an rapor avek son “plan eternel”?

• Dan ki fason Zeova i servi son abilite pour konnen davans ki pou arive?

[Kestyon]

[Portre lo paz 20]

Yeosafat ti annan konfyans dan Zeova

[Portre lo paz 21]

Bondye ti predir lanmor ek rezireksyon Zezi

[Portre lo paz 22]

Eski Zeova ti’n fini deside davans ki Adan ek Ev ti pou fer?