Dimoun aze—Neglize e abize

EN GARDYEN ti pe fer letour en batiman aswar, e en sel kou i ti vwar en keksoz efreyan. Zis akote en zoli blok flat, i ti dekouver de lekor mor. En koup aze ki ti reste lo wityenm letaz sa flat, ti’n zet zot lekor par lafnet. Menm si sa ti en sok, rezon akoz zot ti’n touy zot lekor ti pli sokan ankor. En not ti ganny trouve dan pos sa msye ki lir koumsa: “Nou pe al touy nou lekor akoz nou garson ek belfiy pe kontinyen abiz nou e fatig nou.”

Petet sa zistwar li menm i enn ki nou pa tann souvan, me son lakoz i en problenm toulezour ki tre alarman. Anfet, dimoun aze i ganny abize partou dan lemonn antye. Annou get detrwa legzanp.

• Dan en letid ki ti ganny fer Kanada, 4 poursan dimoun aze ti dir ki zot in deza ganny abize oubyen manipile, e laplipar-di-tan avek en dimoun dan zot prop fanmiy. Me en kantite dimoun aze i vreman kanmi oubyen per pour koz lo zot sitiasyon deplorab. Me bann eksper i dir ki an realite i kapab annan apepre 10 poursan dimoun aze ki dan sa sitiasyon.

• Magazin India Today i dir ki “Lenn ki swadizan en nasyon kot bann lyen fanmiy i for, pli ale pe annan ogmantasyon dan lakantite dimoun aze ki pe ganny rezete par zot prop zanfan.”

• En lorganizasyon Letazini ki defann drwa bann dimoun aze, ti fer resorti ki dapre sa pli bon estimasyon, 1 a 2 milyon Ameriken ki annan 65 an oubyen plis in deza ganny blese, manipile oubyen abize avek sa dimoun ki zot ti depan lo la pour protez e okip zot. En asistan pour prosekiter pour distrik San Diego, California, ti dir ki sa ka kot dimoun aze pe ganny abize “i enn bann pli gro problenm ki lalwa i bezwen fer fas avek ozordi.” I ti azoute: “Mon vwar ki sa problenm pou kontinyen ogmante dan detrwa lannen.”

• Canterbury, New Zealand, i annan en lenkyetid ki pli ale serten manm fanmiy, sirtou bann ki annan problenm drog, lalkol, oubyen zwe larzan, pe target bann aze dan zot fanmiy. Lakantite ka ki’n ganny raporte kot dimoun aze in ganny abize in ogmante en kantite dan sa lavil. Sorti 65 ka an 2002 pour ariv 107 ka an 2003. Sef egzekitif en lazans ki’n ganny met an plas pour anpes dimoun aze ganny abize, ti dir ki sa bann ka i kapab zis “bouton.”

 • The Japan Times i fer resorti ki dapre Japan Federation of Bar Associations, “dimoun aze ki ganny abize i bezwen plis latansyon ki bann viktim labi zanfan oubyen vyolans domestik.” Akoz sa? Dapre Times, “en rezon akoz se ki ler bann dimoun aze i ganny abize i pran bokou letan pour bann dimoun konsernen dekouver sa bann ka konpare avek labi zanfan ek vyolans domestik. Enn parmi bann rezon pour sa, i akoz bann aze i santi ki i zot lafot kan zot zanfan i abiz zot. E osi akoz ziska prezan gouvernman ek bann ladministrasyon pa ankor kapab trouv en fason efikas pour fer fas avek sa problenm.”

Sa detrwa legzanp lo sa ki pe arive dan lemonn i fer nou demann sa kestyon: Akoz bokou dimoun aze pe ganny neglize e abize? Eski en zour sitiasyon pou amelyore pour sa bann dimoun aze? Ki rekonfor zot kapab gannyen konmela menm?