Eski ou’n pare pour sirviv sa Destriksyon?
Eski ou’n pare pour sirviv sa Destriksyon?
“Ale, ou avek ou fanmiy, antre dan lars, akoz ou sa enn ki mon’n vwar i drwat parmi sa zenerasyon.”—ZENEZ 7:1.
1. Ki laranzman Zeova ti fer pour ki dimoun i sirviv sa destriksyon dan letan Noe?
ZEOVA “ti anvoy deliz lo bann move zabitan” dan letan Noe, me i ti osi fer laranzman pour bann bon dimoun sirviv sa destriksyon. (2 Pyer 2:5) Sa vre Bondye ti donn Noe, en zonm drwat, lenstriksyon byen detaye konman i pou fer en lars pour sov lavi dimoun zour deliz. (Zenez 6:14-16) Parey nou ekspekte avek en serviter fidel Zeova, “Noe ti fer tou dapre sa ki Bondye ti’n donn li lord pour fer.” Anfet, “i ti fer egzakteman parey.” Alors, dan en sans nou kapab dir ki gras akoz lobeisans Noe ki ozordi nou vivan.—Zenez 6:22.
2, 3. (a) Ki mannyer bann dimoun ti reazir kan zot ti vwar Noe pe fer en lars? (b) Ki konfyans Noe ti annan ler i ti antre dan lars?
2 I pa ti en pti zafer pour fer sa lars. I paret ki bokou dimoun ti enpresyonnen kan zot ti vwar Noe ek son fanmiy pe fer sa travay. Me kantmenm sa, sa pa ti ase pour konvenk zot ki zot ti pou bezwen antre dan lars si zot ti anvi ganny sove. Finalman, Bondye ti nepli kapab kontinyen siport sa move lemonn.—Zenez 6:3; 1 Pyer 3:20.
3 Apre plizyer lannen ki Noe ek son fanmiy ti’n travay dir pour akonpli zot latas, Zeova ti dir Noe: “Ale, ou avek ou fanmiy, antre dan lars, akoz ou sa enn ki mon’n vwar i drwat parmi sa zenerasyon.” Avek lafwa ek konfyans dan sa ki Zeova ti dir, “Noe ansanm avek son madanm, son bann garson ek zot madanm ti antre dan lars.” Apre sa, Zeova ti ferm laport lars pour protez son bann serviter. Kan deliz ti arive, tou sa ki ti dan sa lars ki Bondye ti’n fer konstri ti sirviv.—Zenez 7:1, 7, 10, 16.
Letan Noe i parey avek nou Letan
4, 5. (a) Avek kwa Zezi ti konpar son prezans? (b) Ki annan an komen ant nou letan ek letan Noe?
4 “Larive Fis-de-Lonm pou parey sa ki ti arive dan letan Noe.” (Matye 24:37) Kan Zezi ti dir sa parol, i ti pe fer resorti ki sa letan kot i pou prezan dan en fason envizib, pou parey avek letan Noe. E ozordi nou vwar ki sa in vreman vin vre. Depi 1919, en mesaz parey avek sa enn ki Noe ti prese, pe ganny proklanmen dan lemonn antye. An zeneral reaksyon piblik i parey avek bann dimoun dan letan Noe.
5 Zeova ti anvoy deliz pour detrir sa lemonn ki ti “ranpli avek vyolans.” (Zenez 6:13) Tou dimoun ti kapab vwar ki Noe ek son fanmiy pa ti enplik dan sa bann vyolans, okontrer zot ti kontinyen konstri zot lars dan lape. Sa i en lot keksoz an komen ant nou letan ek letan Noe. Ozordi, bann dimoun senser i kapab “vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.” (Malaki 3:18) Lefe ki bann Temwen Zeova i onnet, bon, viv anpe avek lezot e travay dir, bann dimoun ki pa fer lapliferans i admir zot, e sa bann kalite i fer pep Bondye diferan avek tou lezot dimoun dan lemonn. Bann Temwen i rezet tou sort kalite vyolans, e zot les lespri sen azir lo zot. Se pour sa rezon ki zot viv anpe e fer sa ki drwat.—Izai 60:17.
6, 7. (a) Ki bann dimoun dan letan Noe pa ti rekonnet, e konman i parey ozordi? (b) Ki legzanp nou annan pour montre ki dimoun i rekonnet ki bann Temwen Zeova i diferan?
6 Bann dimoun pa ti rekonnet ki Bondye ti avek Noe e ki i ti pe swiv direksyon sorti kot Bondye. Alors, zot pa ti pran mesaz Noe oserye, e zot pa ti vwar li neseser pour fer sa ki Noe ti pe dir zot. Me ozordi? Menm si bokou dimoun i enpresyonnen par travay ek kondwit bann Temwen Zeova, laplipar zot pa pran sa bon nouvel ek lavertisman sorti dan Labib oserye. Vwazen, anplwayer oubyen fanmiy i kapab koz an byen lo bann bon kalite ki bann vre Kretyen i demontre. Me kantmenm sa zot dir, “Plito zot pa ti Temwen Zeova!” En keksoz ki zot pa arive vwar, i ki bann Temwen i kapab demontre bann kalite parey lanmour, lape, labonte, ladouser ek kontrol, gras akoz zot les lespri sen azir lo zot. (Galat 5:22-25) Lefe ki zot demontre sa bann kalite, sa ti devret pous plis dimoun pour krwar sa mesaz.
7 Kan bann Temwen Zeova ti pe konstri en Lasal Rwayonm Larisi, en zonm ti arete e dir avek en travayer: “Pa sa i drol, personn pa pe fimen, koz brit avek kanmarad, e personn pa sou! Dir mwan, eski ou en Temwen Zeova?” Sa travayer ti reponn li: “Si mon dir ou non, eski ou pou krwar mwan.” Deswit sa zonm ti reponn: “Pa vreman.” Dan en lot lavil Larisi, mer sa lavil ti vreman enpresyonnen kan i ti vwar bann Temwen Zeova pe konstri zot Lasal Rwayonm. I ti dir ki menm si avan sa i ti konsider tou larelizyon parey, me apre ki i ti’n vwar bann Temwen demontre zot lanmour an aksyon, sa ti fer li sanz son pwennvi. Sa i zis de legzanp ki montre ki pep Zeova i diferan avek sa bann ki pa viv dapre bann standar dan Labib.
8. Ki nou bezwen fer si nou anvi sirviv sa destriksyon ki devan nou?
8 Ler sa “lemonn ansyen” ti pros pour ganny balye avek deliz, Noe ti en “predikater lazistis” fidel. (2 Pyer 2:5) Dan sa bann dernyen zour ozordi, pep Zeova pe fer dimoun konn bann standar drwat Bondye, e zot pe proklanm sa bon nouvel pour fer tou dimoun konsyan ki zot kapab sirviv sa destriksyon ki pe vini e antre dan en nouvo lemonn. (2 Pyer 3:9-13) Noe ek son fanmiy ki ti annan respe pour Bondye ti ganny proteze dan sa lars. Pareyman ozordi, bann ki oule sirviv sa destriksyon ki devan nou, i bezwen annan lafwa e asosye avek lorganizasyon Zeova lo later e reste lanmenm.
Lafwa i esansyel pour sirviv sa Destriksyon
9, 10. Akoz nou bezwen annan lafwa si nou anvi sirviv kan Bondye i detri sa lemonn?
9 Ki en dimoun i bezwen fer pour sirviv kan Bondye i detrir sa lemonn ki dan pouvwar Dyab? (1 Zan 5:19) Premyerman i bezwen rekonnet sa nesesite pour ganny proteze. Apre i bezwen pran bann pa pour kapab ganny sa proteksyon. Bann dimoun dan letan Noe ti kontinyen viv zot lavi parey labitid e zot pa ti vwar li neseser pour esey fer keksoz pour sov zot lavi. Zot ti mank en lot keksoz. Sa i lafwa dan Bondye.
10 De lot kote, Noe ek son fanmiy ti rekonnet ki i enportan pour zot ganny proteze e delivre. Zot ti osi demontre lafwa dan Zeova, sa enn ki pli o dan liniver. Zapot Pol ti ekrir: “San lafwa personn pa kapab fer plezir [Zeova.] Sa ki apros kot Bondye i devre krwar ki i egziste e ki i rekonpans tou bann ki rod li.” Apre Pol ti azoute: “Par lafwa, Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars pour sov son fanmir; ensi i ti kondann lemonn, e i ti ganny konsidere konman en zeritye lazistis ki nou ganny par lafwa.”—Ebre 11:6, 7.
11. Ki nou aprann avek lafason ki Zeova ti protez son pep dan lepase?
11 Pour kapab sirviv kan Bondye i detri sa lemonn ozordi, nou bezwen fer plis ki zis krwar ki sa lemonn pour trouv son lafen. I neseser ki nou demontre lafwa, e servi o maksimonm tou bann provizyon ki Zeova i donn nou pour ed nou sirviv sa destriksyon. Byensir nou bezwen annan lafwa dan sa sakrifis ki Zezi Kri, Garson Bondye, in fer. (Zan 3:16, 36) Annou pa zanmen bliye ki selman bann ki ti dan lars ki ti sirviv sa deliz. Pareyman, si en dimoun dan ansyen Izrael ti’n touy en lot par aksidan, i ti pou kapab ganny proteze si i ti al dan enn sa bann lavil refiz e reste laba ziska lanmor gran pret. (Nonm 35:11-32) Kan Bondye ti anvoy sa dizyenm fleo lo Lezip, bann premye ne Ezipsyen ti mor me pa bann premye ne Izraelit. Akoz sa? Byen boner Zeova ti’n dir Moiz: “Zot [bann Izraelit] bezwen pran en pe disan [mouton pour Lapak] e pas sa disan lo lankadreman laport, lo son de kote ek son bout anler, dan bann lakaz kot zot pou manze. . . . E personn pa devret sorti an deor larantre son lakaz ziska bomaten.” (Egzod 12:7, 22) Lekel sa premye ne parmi bann Izraelit ki ti pou inyor lavertisman Bondye, savedir ki ti pou al an deor bann lakaz ki ti annan disan lo lankadreman laport?
12. Ki kestyon nou tou nou devret demann nou lekor, e akoz?
12 Alors, i byen pour nou reflesir seryezman lo nou sitiasyon. Eski nou pe swiv sa laranzman ki Zeova in fourni pour protez nou spirityelman? Kan gran ladetres pou konmanse, bann ki’n swiv laranzman Zeova pou plere avek lazwa e zot pou vreman remersye Bondye en kantite. Me bann ki pa’n swiv laranzman Zeova, pou plere akoz latristes ek regre.
Bann Azisteman i prepar nou
13. (a) Ki rezilta sa bann sanzman dan lorganizasyon in anmennen? (b) Nonm serten azisteman ki’n ganny fer.
13 Gradyelman, Zeova in fer bann azisteman dan son lorganizasyon isi lo later. Sa bann azisteman in fer sa bann laranzman pour protez nou spirityelman vin pli agreab, stab, e pli for. Depi 1870 ziska 1932, bann ansyen ek dyak ti ganny elekte par kongregasyon. An 1932, olye elekte bann ansyen, kongregasyon ti elekte en komite servis pour ed sa enn ki’n ganny apwente konman direkter servis. An 1938, olye ganny elekte, tou bann serviter dan kongregasyon ti ganny apwente dan en fason teokratik. Anba gidans Konsey Direkter Temwen Zeova, depi 1972 bann frer i ganny rekomande pour vin bann sirveyan ek asistan ministeryel, e apre bann kongregasyon i ganny let ki konfirm lapwentman bann frer dan en fason teokratik. Avek letan, lakantite travay Konsey Direkter in ogmante e plizyer sanzman in ganny fer pour fasilit son travay.
14. Ki lekol ki ti ganny fer pour premye fwa an 1959?
14 An 1950, apre ki zot ti’n egzamin pli oprofon Psonm 45:16, zot ti entrodwir plis kour. Sa Psonm i dir: “Dan plas ou bann zanset i pou annan ou bann garson, ki ou pou apwent konman bann prens lo later antye.” Bann ansyen ki okip kongregasyon dan nou letan, pe ganny diferan kour pour kapab byen akonpli zot travay teokratik konmela menm e apre Armagedon. (Revelasyon 16:14, 16) Par egzanp, an 1959, en nouvo lekol ki apel Lekol Minister Rwayonm ti ganny fer pour premye fwa. Sa letan, sa kour ti dir pour en mwan, e i ti ganny fer pour bann serviter kongregasyon ki ozordi i apel ansyen. Me ozordi tou bann ansyen ek asistan ministeryel i osi kapab asiste sa lekol. E an retour, zot pas sa ki zot in aprann avek lezot frer ek ser dan zot kongregasyon. Anfet, tou dimoun i ganny sa sipor ki zot bezwen spirityelman, ek led pour zot vin bann proklanmater pli efikas.—Mark 13:10.
15. Nonm de fason ki kongregasyon i ganny proteze.
15 Tou bann ki anvi form parti kongregasyon Kretyen, i bezwen swiv serten laranzman. Byensir, bann ki abitye sikann bann Kretyen ozordi pa kapab form parti kongregasyon Kretyen, zis parey bann ki ti sikann Noe pa ti kapab antre dan lars. (2 Pyer 3:3-7) An 1952, Temwen Zeova in siport plis sa laranzman pour ekskli bann peser ki pa repantir afen pour protez kongregasyon. Me nou kapab asire ki bann peser ki senserman repantir, avek lanmour pou ganny led pour ‘fer en semen byen drwat pour zot lipye.’—Ebre 12:12, 13; Proverb 28:13; Galat 6:1.
16. Ki kondisyon pep Bondye spirityelman?
16 Lefe ki pep Zeova pe prospere, sa i pa en keksoz ki’n arive san ekspekte oubyen par azar. Profet Izai i dir nou sa ki Zeova ti dir: “Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte. Gete! Mon prop serviter pou kriye avek lazwa akoz zot annan lakontantman dan zot leker, me zot zot pou kriye akoz douler dan zot leker e zot pou irle senpleman akoz depresyon.” (Izai 65:13, 14) Zeova pe kontinyen donn nou en kantite nouritir ki byen nourisan e ki vin zis atan. Tousala i ed nou pour reste for spirityelman.—Matye 24:45.
Met ou pare pour sirviv sa Destriksyon
17. Konman nou kapab prepar pour nou sirviv sa destriksyon?
17 Plis ki zanmen oparavan, la i lemoman pour ‘rode konman pous kanmarad pour annan lanmour e fer sa ki byen. Pa abandonn nou lasanble parey labitid serten parmi nou.’ (Ebre 10:23-25) Kan nou reste pros e aktif dan enn parmi sa plis ki 98,000 kongregasyon, sa pou prepar nou pour sirviv sa destriksyon ki devan nou. Nou pou ganny sipor lezot frer ek ser ki pe fer bokou zefor pour “vin en dimoun konpletman nouvo,” e ler nou fer tou sa ki nou kapab pour ed lezot aprann konsernan sa provizyon ki Zeova in fer pour nou kapab ganny sove.—Efezyen 4:22-24; Kolosyen 3:9, 10; 1 Timote 4:16.
18. Akoz ou determinen pour reste pros avek kongregasyon Kretyen?
18 Satan ek son move lemonn pe fer tou sa ki i kapab pour atir nou e fer nou kit kongregasyon Kretyen. Me kantmenm sa, nou kapab reste fidel e sirviv kan Bondye i detrir sa lemonn ozordi. Annou les lanmour pour Zeova ek lapresyasyon pour tou sa bann provizyon ki i donn nou, pous nou pour pli determinen pour reziste tou taktik Satan. Kan nou reflesir lo benediksyon ki nou gannyen ozordi, sa pou fer nou pli determinen pour reste fidel. Dan nou lot lartik nou pou egzamin serten sa bann benediksyon.
Ki ou pou reponn?
• Ki mannyer nou letan i parey avek letan Noe?
• Ki nou bezwen fer pour sirviv sa destriksyon ki devan nou?
• Ki diferan azisteman ki’n amelyor laranzman Zeova pour protez nou?
• Ki mannyer nou kapab prepar nou pour sirviv sa destriksyon?
[Kestyon]
[Portre lo paz 8]
Bann dimoun pa ti pran oserye mesaz Noe
[Portre lo paz 9]
I vo lapenn pran lavertisman Bondye oserye
[Portre lo paz 10]
Pour ki rezon Lekol Minister Rwayonm i ganny fer?
[Portre lo paz 11]
La i lemoman pour reste pros avek kongregasyon Kretyen