Kestyon Lekter

Kwa ki pe fer “bann keksoz presye sorti dan tou nasyon” vin dan “lakaz” vre ladorasyon?—Agai 2:7.

Atraver profet Agai, Zeova ti predir: “Mon pou sekwe tou bann nasyon, e bann keksoz presye sorti dan tou nasyon pou vini; e mon pou ranpli sa lakaz avek laglwar.” (Agai 2:7) Lefe ki “tou bann nasyon” pe ganny sekwe, eski sa ki pe fer “bann keksoz presye” sorti dan bann nasyon, savedir bann dimoun senser, aksepte laverite? Larepons i non.

Annou egzaminen kwa ki sekwe bann nasyon e ki rezilta sa i anmennen? Labib i dir ki “bann nasyon i azite e bann pep in kontinyen mantoun en keksoz anven.” (Psonm 2:1) Sa “keksoz anven” ki zot pe kontinyen mantoun oubyen reflesir lo la, i konman zot pou kontinyen prezerv zot lotorite. Napa nanryen ki pou sekwe zot plis ki okenn menas kont zot pouvwar.

Sa travay predikasyon ki bann Temwen Zeova pe fer dan lemonn antye kot zot koz lo Rwayonm Bondye ki’n deza ganny etabli, in vin en menas pour bann nasyon. Alafendizour, Rwayonm Bondye dan lanmen Zezi Kri pou “kraz e met en lafen avek tou sa bann rwayonm [imen.]” (Danyel 2:44) Dan nou travay predikasyon nou pe osi anons en mesaz zizman, e sa mesaz pe vreman sekwe bann nasyon. (Izai 61:2) Sa sekous i vin pli for anmezir ki sa travay predikasyon i ganny fer dan plis pei e avek plis lentansite. Me kwa ki pou vin apre sa sekous ki ti ganny predir dan Agai 2:7?

Agai 2:6 i dir: “La sa ki Zeova bann larme in dir, ‘Ankor enn fwa, dan en pti moman, mon pou sekwe lesyel ek later, lanmer ek later sek.’” Zapot Pol ti pe sit sa verse kan i ti ekrir: “I’n promet nou: ‘Mon fer tranble ankor enn fwa, non selman later, me osi lesyel.’ Sa parol ‘ankor enn fwa’ i montre klerman ki bann keksoz ki’n ganny kree pou sekwe e disparet pour ki sa ki solid [setadir Rwayonm Bondye] i reste.” (Ebre 12:26, 27) Wi sa sistenm ki nou pe viv ladan pou ganny sekwe ziska ki i disparet, pour ki Bondye i met an plas son nouvo lemonn.

Bann dimoun senser pe ganny atire ver vre ladorasyon pa akoz bann nasyon pe ganny sekwe. Sa keksoz ki pe atir zot anver Zeova ek son ladorasyon i sa menm keksoz ki pe sekwe bann nasyon. Savedir i sa travay predikasyon lo Rwayonm Bondye ki’n fini ganny etabli. Sa “levanzil eternel” ki pe ganny anonse partou, i atir sa bann ki annan leker senser ver ladorasyon sa vre Bondye.—Revelasyon 14:6, 7.

I annan de mesaz ki nou pe fer pase ler nou pres lo sa Rwayonm, enn i zizman e lot i delivrans. (Izai 61:1, 2) Sa travay predikasyon ki pe ganny fer dan lemonn antye i anmenn de rezilta: premyerman se ki bann nasyon pe ganny sekwe, e lot i ki bann keksoz presye sorti dan tou nasyon pe vin donn Zeova laglwar.