Mars avek Fidelite i anmenn Lazwa

“Benediksyon Zeova—se sa ki fer ris, e i pa azout okenn douler avek.”—PROVERB 10:22.

1, 2. Akoz i pa bon pour tro mazin lavenir?

“KAN nou tro pe mazin lavenir . . . sa i anpes nou apresye sa ki nou annan la konmela.” Sa i parol ki en filozof Ameriken ti dir. Par egzanp, serten zanfan zot toultan pe priye kan zot pou vin adilt, e sa i fer zot pa vwar byenfe ki lanfans i anmennen, nek ler zot in vin adilt ki zot konmans reflesir lo letan ki zot ti ankor zanfan.

² Menm bann serviter Zeova, parfwa zot konsantre zis lo lavenir. Annou vwar en sitiasyon ki kapab arive. Avek enpasyans nou pe espere kan Bondye pou fer later vin en paradi parey i’n promet. Nou enpasyan pour viv en lavi kot nou pa pou malad, vye, kot pou napa douler ek soufrans. I normal pour nou anvi vwar tousala. Me ki pou arive si nou telman anvi ganny sa bann benediksyon fizik dan paradi, ki nou pa arive vwar bann benediksyon spirityel ki nou pe gannyen la konmela? Nou kapab dekouraze e dezespere akoz sa ki nou pe ekspekte i paret pe tarde. Sa i pou vreman domaz! (Proverb 13:12) Problenm ek difikilte dan lavi i kapab fer nou tonm dan depresyon oubyen dan sagrinasyon. Olye esey fer fas avek sa bann difikilte nou kapab konmans konplent. Nou kapab anpes tousala arive si avek lapresyasyon nou reflesir lo bann benediksyon ki nou pe gannyen la konmela.

3. Ki nou pou egzaminen dan sa lartik?

³ Proverb 10:22 i dir: “Benediksyon Zeova—se sa ki fer ris, e i pa azout okenn douler avek.” Lefe ki nou pe prospere spirityelman ozordi, eski pa sa i en benediksyon ki devret fer nou zwaye? Annou egzamin serten laspe dan  nou paradi spirityel e ki sinifikasyon zot annan pour nou personnelman. Kan nou pran letan pour reflesir lo sa kantite benediksyon ki Zeova in donn ‘sa enn drwat e fidel,’ sa pou fer nou pli determinen pour kontinyen servi nou Papa dan lesyel avek lazwa.—Proverb 20:7.

‘Benediksyon ki fer nou ris’ ozordi

4, 5. Ki lansennyman dan Labib ou vreman kontan, e akoz?

⁴ En konnesans egzakt lo Labib. Bann larelizyon Kretyen i dir ki zot krwar dan Labib, me zot pa dakor avek sa ki Labib i dir. Menm bann ki dan menm larelizyon souvan zot annan diferan krwayans. Sa i vreman diferan avek bann serviter Zeova! Nenport ki nasyonalite, kiltir oubyen landrwa kot nou sorti nou ador sa vre Bondye ki nou konn son non. I pa en bondye an trwa personn ki nou pa kapab konpran. (Deterononm 6:4; Psonm 83:18; Mark 12:29) Nou osi konnen ki byento Bondye pou rezourd sa premye kestyon ki’n ganny souleve an rapor avek sa drwa ki i annan pour dirize. Alors, kan nou reste fidel avek li, nou tou nou enplike dan sa sitiasyon. Nou konn laverite lo lanmor, e nou napa lafreyer ki Bondye pou bril imen dan lanfer oubyen anvoy zot dan pirgatwar.—Eklezyast 9:5, 10.

⁵ Deplis, pa nou kontan pour konnen ki nou pa’n vin a legzistans par evolisyon, par azar! Okontrer nou konnen ki nou’n ganny kree par Bondye dan son resanblans. (Zenez 1:26; Malaki 2:10) Dan en psonm ki en psalmis ti sante pour Bondye i ti dir: “Mon pou loue ou parski mon’n ganny fer dan en fason merveye, e sa i fer annan lakrent pour ou. Sa ki ou’n fer i merveye, e mon konn sa byen.”—Psonm 139:14.

6, 7. Ki sanzman ou’n fer oubyen ki lezot in fer, ki’n vin en benediksyon?

⁶ Ganny libere avek bann labitid ek pratik danzere. Deplizanpli medya pe kontinyen averti dimoun kont danze ki fimen, bwar tro bokou ek en lavi dezord i anmennen. An zeneral dimoun pa fatig zot avek sa bann lavertisman. Me ki arive kan en dimoun senser i aprann ki Bondye pa kontan sa bann move pratik e ki i sagren ler i vwar imen pe fer tousala? Be sa dimoun pou santi ki i bezwen aret fer sa bann keksoz. (Izai 63:10; 1 Korentyen 6:9, 10; 2 Korentyen 7:1; Efezyen 4:30) Sa lanvi pour fer plezir Zeova ki pous li pour aret fer sa ki mal, e kan i fer sa i pou ganny lezot byenfe, tel parey en meyer lasante e son lespri pou anpe.

⁷ Pour bokou dimoun i pa fasil pour zot aret bann move labitid. Me kantmenm sa, tou le zan plizyer milye dimoun i arive fer bann sanzman dan zot lavi. Zot dedye zot lavi avek Zeova e apre zot batize dan delo pour montre piblikman ki zot in rezet bann keksoz ki pa fer plezir Bondye. Pa sa i vreman ankouraz nou! Ler nou vwar lezot fer bann sanzman dan zot lavi sa i fer nou pli determinen pour refize vin lesklav pese e anmenn en lavi ki danzere pour nou lasante.

8. Ki bann konsey dan Labib ki fer nou annan en lavi fanmiy ere?

⁸ En lavi fanmiy ere. Dan bokou pei, lavi fanmiy pe degrade. I annan en kantite divors, e souvannfwa bann zanfan ki soufer. Dan serten pei Lerop, apepre 20 poursan  fanmiy i annan zis en paran tousel. Ki mannyer Zeova in ed nou mars dan semen fidelite dan sa domenn? Silvouple, lir Efezyen 5:22–6:4 e remark bann bon konsey ki Labib i donn bann mari, madanm ek zanfan. Kan nou aplik zot ek lezot konsey sorti dan Labib, sa i fer maryaz vin pli solid, i osi ed bann paran pour byen elve zot zanfan e annan en lavi fanmiy ere. Eski pa sa i en benediksyon ki devret fer nou zwaye?

9, 10. Akoz nou pa get lavenir parey bann dimoun lemonn?

⁹ Nou asire ki byento pou nepli annan bann problenm dan lemonn. Malgre i’n annan en kantite lavans dan domenn syantifik ek teknolozi e menm si serten dirizan pe senserman fer zefor, bann gro problenm dan nou letan i ankor egziste. Pa tro lontan Klaus Schwab, fondater World Economic Forum, ti dir: “Pli ale lemonn pe fer fas avek plis problenm, e i napa ase letan pour rezourd sa bann problenm.” I ti koz lo “bann danze ki afekte lemonn antye tel parey terorism, polisyon ek problenm finans.” Pour konklir, Schwab ti dir: “Plis ki zanmen oparavan, lemonn i bezwen fer fas avek larealite, e nou bezwen korpere e azir vitman pour kapab met keksoz anba kontrol.” Anmezir ki lannen pe ale dan sa 21 tyenm syek, lavenir limanite i dan sonm.

¹⁰ Pa nou vreman apresye pour konnen ki Zeova in deza fer en laranzman pour rezourd problenm limanite! I pou fer sa par mwayen son Rwayonm dan lanmen Zezi Kri. Bondye pou servi son Rwayonm pour ‘fer lager arete’ e anmenn “lape” partou lo later. (Psonm 46:9; 72:7) Zezi Kri, sa Lerwa ki’n ganny swazir, ‘pou delivre sa enn pov, sa enn ki pe soufer, ek bann dernyen dimoun dan lopresyon ek vyolans.’ (Psonm 72:12-14) Kan Rwayonm Bondye pou dirize, pou napa lafamin. (Psonm 72:16) Zeova “pou eswiy tou larm dan [nou] lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:4) Sa Rwayonm in fini ganny etabli dan lesyel, e byento i pou rezourd tou sa bann problenm lo later.—Danyel 2:44; Revelasyon 11:15.

11, 12. (a) Eski plezir i anmenn boner ki dirab? Eksplike. (b) Kwa ki anmenn vre boner?

¹¹ Nou konnen kwa ki anmenn vre boner. Kwa ki anmenn vre boner? En psikolog ti dir ki i annan trwa keksoz ki anmenn lazwa dan lavi. Plezir, langazman (par egzanp dan en travay oubyen dan en fanmiy) ek en bi dan lavi (parey ler nou fer en keksoz avek en lobzektif par deryer oubyen pour ki lezot i benefisye). Parmi sa trwa keksoz, i ti fer resorti ki plezir i sa enn ki mwen enportan. E i ti dir: “Sa i enteresan akoz en kantite dimoun i viv zis pour plezir.” Ki Labib i annan pour dir lo sa?

¹² Lerwa Salomon dan ansyen Izrael ti dir: “Menm mwan, mon’n dir dan mon leker:  ‘Vini aprezan, les mwan teste ou avek lazwa. E osi vwar sa ki bon.’ Gete! Sa osi i anven. Mon ti dir avek riye: ‘Lafoli!’ e avek lazwa: ‘Ki sa pe fer?’” (Eklezyast 2:1, 2) Dapre Labib, sa lazwa ki plezir i anmennen i zis tanporer. Me konsernan langazman dan en travay? Nou annan en travay vreman enportan pour fer. Sa i travay predikasyon e fer disip. (Matye 24:14; 28:19, 20) Kan nou partaz avek lezot sa mesaz delivrans dan Labib, nou pe fer en travay ki kapab sov nou lavi ek sa bann ki ekout nou. (1 Timote 4:16) Lefe ki ‘nou pe travay ansanm avek Bondye,’ nou’n arive vwar ki “i annan plis lazwa pour donnen ki pour resevwar.” (1 Korentyen 3:9; Akt 20:35) Sa travay i fer nou lavi annan en sans, e nou pe donn nou Kreater en larepons pour reponn Satan, sa enn ki pe provok li. (Proverb 27:11) Anfet, gras a Zeova nou’n arive konpran ki nou devosyon avek Li i donn nou vre boner ki dirab.—1 Timote 4:8.

13. (a) Dan ki fason Lekol Minister Teokratik i en benediksyon ki fer nou zwaye? (b) Ki mannyer ou’n benefisye avek Lekol Minister Teokratik?

¹³ En formasyon enportan e efikas. Gerhard ki ozordi i en ansyen dan en kongregasyon, i mazin en kou son zenes. I dir: “Kan mon ti ankor zenn, mon ti vwar li difisil pour koze. Kan mon ti anba presyon i ti preski enposib pour mwan eksprim mon lekor e mon ti konmans begeye. Mon ti konmans santi ki mon napa valer e ki mon enferyer. Mon paran ti fer laranzman pour mwan al kot en spesyalis ki ti pou ed mwan kapab koze, me zot zefor pa ti abouti dan nanryen. Mon pa ti annan en problenm fizik me psikolozik. Me kantmenm sa, Zeova in donn mwan en led ekstraordiner, sa i Lekol Minister Teokratik. Kan mon ti antre dan sa lekol, sa ti redonn mwan kouraz. Mon ti fer mon mye pour met an pratik sa ki mon ti pe aprann. E mon ti reisi! Mon ti kapab koz byen, mon ti nepli dan depresyon e mon ti kapab pres pli byen. E ozordi mon pe menm fer diskour piblik. Mon vreman remersye Zeova en kantite pour sa lekol ki’n ed mwan pour annan en lavi pli satisfezan.” Eski pa lafason ki Zeova i form nou pour akonpli son travay i en lot rezon pour nou zwaye?

14, 15. Ki led nou gannyen kan nou dan latristes? Donn legzanp.

¹⁴ En relasyon avek Zeova ek sipor nou bann frer ek ser ki ini dan lemonn antye. Katrin ki reste Lalmanny, ti vreman enkyet kan i ti tande ki dan sid les Lazi ti annan tranbleman-d-ter ki ti fer annan en tsounami. I ti enkyet akoz son fiy ti an vakans Taylenn ler tousala ti arive. Pour 32 er-d-tan, Katrin pa ti konnen si son fiy ti ankor vivan oubyen si i ti parmi sa kantite viktim ki ti pe kontinyen ogmante. Katrin ti vreman soulaze kan i ti ganny en koud telefonn, kot i ti ganny enformen ki son fiy i sen e sof.

¹⁵ Ki led i ti gannyen pandan sa moman vreman enkyetan? I ekrir: “Mon ti pas preski tou mon letan pour priy Zeova. Plizyer fwa, mon ti remarke ki lapriyer ti pe donn mwan sa lafors ek lape lespri. Anplis ki sa, mon bann frer ek ser spirityel ki kontan mwan ti vizit e ankouraz mwan.” (Filipyen 4:6, 7) Son sitiasyon ti pou pli pir ankor si pandan sa moman tris i pa ti priy Zeova e pa ganny rekonfor avek son bann frer ek ser spirityel. Sa relasyon entim ki nou annan avek Zeova ek son Garson e osi sa bon lanmitye avek nou bann frer ek ser i en benediksyon ki nou pa kapab konpar avek nanryen. I tro presye pour nou pran li alalezer.

16. Rakont en leksperyans pour montre ki valer sa lespwar rezireksyon i annan.

¹⁶ Sa lespwar pour vwar nou bann defen ki nou ti kontan. (Zan 5:28, 29) En zenn garson ki apel Matthias, ti’n grandi dan en fanmiy Temwen Zeova. I pa ti realize ki sa ti en benediksyon pour li. Me malerezman, kan i ti en adolesan i ti nepli asosye avek kongregasyon. I ekrir: “Mon pa’n zanmen annan en gran konversasyon avek mon  papa. Pandan bann lannen ki’n pase nou’n toultan pe argimante. Me kantmenm sa, papa ti toultan anvi sa ki bon pour mwan. I ti kontan mwan en kantite, me mon pa ti rekonnet sa. An 1996, kan mon ti pe asize lo lili obor li, mon ti atrap son lanmen e mon ti konmans plere avek regre. Mon ti demann li pour pardonn mwan pour tou sa ki mon ti’n fer e mon ti dir li ki mon kontan li en kantite. Me i pa ti kapab tann mwan. Apre ki i ti’n tonm malad, pa bokou letan apre i ti ferm son lizye. Si mon vivan kan mon papa i ganny resisite, nou pou fer tou sa ki nou pa’n kapab fer avan. Sirman i pou byen kontan konnen ki ozordi mon en ansyen e ki mon madanm avek mwan pe fer pionye.” Pa lespwar rezireksyon i en benediksyon pour nou!

“I pa azout okenn Douler avek”

17. Ki led nou gannyen ler nou reflesir lo bann benediksyon ki Zeova i donn nou?

¹⁷ Zezi ti dir sa lo son Papa dan lesyel: “I fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:45) Si Zeova i beni bann dimoun mesan, eski pa i pou pli beni sa bann ki pe mars dan semen fidelite? Psonm 84:11 i dir: “Zeova li menm pa pou kasyet nanryen ki bon kont bann ki pe mars avek fidelite.” Kan nou reflesir lo sa latansyon spesyal ek lentere ki Zeova i montre anver sa bann ki kontan li, pa nou leker i deborde avek lapresyasyon ek lazwa!

18. (a) Akoz nou kapab dir ki Zeova pa azout okenn douler avek son benediksyon? (b) Akoz bokou serviter fidel Bondye i soufer?

¹⁸ “Benediksyon Zeova,” i sa keksoz ki’n fer son pep prospere spirityelman. E nou asire ki i “pa azout okenn douler avek.” (Proverb 10:22) Me akoz bokou serviter fidel Bondye i pas dan bann leprev ek difikilte ki fer zot soufer? I annan trwa rezon prensipal akoz nou rankontre difikilte e nou soufer. (1) Nou prop lenperfeksyon. (Zenez 6:5; 8:21; Zak 1:14, 15) (2) Satan ek son bann demon. (Efezyen 6:11, 12) (3) Sa lemonn mesan. (Zan 15:19) Menm si Zeova i les nou soufer, pa li ki responsab pour nou soufrans. Anfet, “tou don ekselan, tou kado parfe i sorti lao, kot Bondye, Papa tou lalimyer.” (Zak 1:17) Benediksyon Zeova pa fer nou soufer.

19. Ki rekonpans bann ki kontinyen mars dan semen fidelite pou gannyen?

¹⁹ Pour kapab prospere spirityelman nou bezwen vin pros avek Bondye. Kan nou devlop en relasyon entim avek li nou pe ‘anmas en bon e solid trezor pour lavenir, e koumsa nou ava ganny vre lavi,’ savedir lavi eternel. (1 Timote 6:12, 17-19) Dan nouvo lemonn Bondye nou pa pou zis ganny beni spirityelman, me osi fizikman. Tou sa bann ki “kontinyen ekout lavwa Zeova” pou arive ganny sa vre lavi. (Deterononm 28:2) Avek determinasyon annou kontinyen mars dan semen fidelite.

Ki ou’n aprann?

• Akoz i pa bon pour tro mazin lavenir?

• Ki benediksyon nou pe gannyen la konmela?

• Akoz bann serviter fidel Bondye i soufer?

[Kestyon]