‘Swazir Lavi pour reste vivan’
‘Swazir Lavi pour reste vivan’
“Mon met lavi ek lanmor devan zot, benediksyon ek malediksyon; e ou devret swazir lavi pour ki ou reste vivan.” —DETERONONM 30:19.
1, 2. Dan ki fason zonm in ganny kree dan resanblans Bondye?
“ANNOU fer zonm parey nou, dan nou resanblans.” Sa parol ki Bondye ti dir i trouve dan premye sapit dan Labib. Bondye ti fer parey i ti’n dir e i “ti kree zonm dan son resanblans.” (Zenez 1:26, 27) Sa ti fer sa premye imen diferan avek tou lezot kreasyon lo later. I ti resanble son Kreater, i ti kapab imit Bondye par reflesir, montre lanmour, lazistis, lasazes, ek lafors. I ti annan en konsyans pour ed li fer desizyon ki ti bon pour li e fer plezir son Papa dan lesyel. (Romen 2:15) Andotmo, Adan ti annan liberte pour swazir. Ler Zeova ti obzerv fason ki i ti’n fer son garson lo later, i ti dir: “Gete! i tre bon.”—Zenez 1:31; Psonm 95:6.
2 Nou ki desandans Adan, nou osi nou’n ganny kree dan resanblans Bondye. Me eski nou vreman annan en swa dan sa ki nou fer? Menm si Zeova i kapab konnen davans sa ki pou arive, i pa determinen avan ler aksyon ek desten sak dimoun. Zeova in swazir ki nou lavi pa ganny kontrole par okenn keksoz ki i’n fini konnen davans. Pour ed nou konpran lenportans pour servi nou liberte pour swazir pour fer bann bon swa, annou premyerman aprann en leson avek nasyon Izrael.—Romen 15:4.
Bann Izraelit ti annan Liberte pour swazir
3. Nonm sa premye komannman, e ki mannyer bann Izraelit fidel ti swazir pour obeir sa komannman?
3 “Mwan Zeova zot Bondye, ki ti tir zot dan pei Lezip, dan lakaz lesklav.” (Deterononm 5:6) An 1513 A.N.L., Zeova ti liber nasyon Izrael dan en fason mirakile anba lesklavaz bann Ezipsyen e alor zot ti napa rezon pour dout sa parol. Sa premye parmi sa Dis Komannman ki Zeova ti donn pep Izrael atraver Moiz, ti dir: “Ou pa devret annan okenn lezot bondye kont mwan.” (Egzod 20:1, 3) E sa zour, nasyon Izrael ti swazir pour obeir. Zot ti volonterman donn Zeova tou zot devosyon.—Egzod 20:5; Nonm 25:11.
4. (a) Ki sa swa Moiz ti met devan Izrael? (b) Ki swa nou annan ozordi?
4 Apepre 40 an plitar, Moiz ti bezwen rapel en lot zenerasyon Izraelit sa swa ki zot ti annan pour fer. “Mon pran lesyel ek later konman temwen kont zot ozordi, ki mon met lavi ek lanmor devan zot, benediksyon ek malediksyon; e ou devret swazir lavi pour ki ou reste vivan, ou ek ou desandans.” (Deterononm 30:19) Pareyman ozordi, nou kapab swazir. Wi, nou kapab fer en swa pour servi Zeova fidelman avek lespwar lavi eternel, oubyen nou kapab swazir pour dezobei li e soufer son konsekans. Annou get de legzanp ki montre de swa diferan ki serten dimoun ti fer.
5, 6. Ki swa Zozye ti fer, e avek ki rezilta?
5 An 1473 A.N.L., Zozye ti diriz bann Izraelit dan Later Promiz. Atraver bann parol byen ankourazan ki i ti dir avan son lanmor, Zozye ti enplor sa nasyon: “Aprezan si i pa byen dan zot lizye pour servi Zeova, swazir pour zot menm ozordi lekel ki zot pou servi, si bann bondye ki zot zanset ki ti lot kote Larivyer ti servi oubyen bann bondye Amorit dan pei kot zot pe reste.” Apre, Zozye ti refer avek son fanmiy: “Mwan ek mon fanmiy, nou pou servi Zeova.”—Zozye 24:15.
6 Pli boner, Zeova ti’n ankouraz Zozye pour pa perdi kouraz e vin for, e i ti enstri li pour pa aret obeir Lalwa Bondye. Okontrer par lir liv Lalwa avwabas lizour konman aswar, Zozye ti pou reisi dan sa ki i fer. (Zozye 1:7, 8) E sanmenm sa ki Zozye ti fer e i ti reisi. Swa ki Zozye ti fer ti anmenn benediksyon. Zozye ti dir: “Napa en promes parmi tou sa bann bon promes ki Zeova in fer avek bann Izraelit ki pa’n ganny akonpli, zot tou zot in vin vre.”—Zozye 21:45.
7. Dan letan Izai, ki swa serten Izraelit ti fer, e avek ki konsekans?
7 Aprezan, konsider sa sitiasyon ki ti egziste Izrael apepre 700 zan plitar. Sa letan la, bokou Izraelit ti pe swiv bann koutim payen. Par egzanp, dernyen zour lannen, bann dimoun ti zwenn ansanm otour en latab ranpli avek bon manze ek diven dou. Sa ti plis ki zis en rankont an fanmiy, i ti en seremoni relizye ki ti onor de bondye payen. Profet Izai ti ekrir pwennvi Zeova konsernan sa aksyon enfidel: “Me zot, zot pe kit Zeova, zot pe oubliy mon montanny sen, zot pe prepar en latab pour bondye Lasans, e zot pe ranpli diven ki’n melanze pour bondye Desten.” Dapre zot, zot ti bezwen fer plezir “bondye Lasans” ek “bondye Desten” pour zot ganny en bon rekolt me zot pa ti krwar ki sa ti depan lo faver Zeova. Me an realite, zot move konportman ek zot swa ti pou fer zot konn en move finisyon. Zeova ti dir: “Mon pou fer lepe vin zot desten, e zot tou zot pou bes anba pour ganny egzekite; akoz mon ti apele, me zot pa ti reponn, mon ti koze, me zot pa ti ekoute, e zot ti kontinyen fer sa ki mal dan mon lizye, e zot ti swazir bann keksoz ki mon pa ti pran okenn plezir ladan.” (Izai 65: 11, 12) Zot move swa ti fer zot trouv destriksyon, e bann bondye Desten ek Lasans pa ti kapab fer nanryen pour anpes sa arive.
Fer sa bon Swa
8. Dapre Deterononm 30:20, kwa ki enplike pour fer sa bon swa?
8 Ler Moiz ti enplor bann Izraelit pour swazir lavi, i ti montre ki ti annan trwa diferan pa ki zot ti devret pran: “Par kontan Zeova zot Bondye, par ekout son lavwa e par reste atase avek li.” (Deterononm 30:20) Annou get ansanm sak sa bann pa pour ki nou kapab fer sa bon swa.
9. Ki mannyer nou kapab montre nou lanmour pour Zeova?
9 Par kontan Zeova nou Bondye: Nou swazir pour servi Zeova akoz nou kontan li. Ler nou pran aker bann lavertisman atraver legzanp nasyon Izrael, nou reziste tou tantasyon pour fer limoralite e evit bann stil lavi ki kapab fer nou ganny enfliyanse avek lanmour pour larzan. (1 Korentyen 10:11; 1 Timote 6:6-10) Nou reste pros avek Zeova e gard son bann regilasyon. (Zozye 23:8; Psonm 119:5, 8) Avan bann Izraelit ti antre dan Later Promiz, Moiz ti konsey zot: “Gete, mon’n ansenny zot regilasyon ek zizman, zis parey mon Bondye in donn mwan lord pour fer, pour ki zot swiv sa fason dan sa pei ki zot pe al pran posesyon. E zot devret gard e aplik zot, akoz sa pou vin lasazes lo zot par e konprenezon lo zot par devan lizye tou dimoun ki pou antann tou sa bann regilasyon.” (Deterononm 4:5, 6) Ozordi i lemoman pour nou montre nou lanmour pour Zeova par met son lavolonte premye dan nou lavi. Si nou swazir pour fer sa, nou pou sirman ganny beni.—Matye 6:33.
10-12. Ki leson nou aprann ler nou egzamin sa ki ti arive dan letan Noe?
10 Par ekout lavwa Bondye: Noe ti “en predikater lazistis.” (2 Pyer 2:5) Avan Deliz ti arive, preski tou dimoun ti les zot ganny distrer e “pa ti pran kont” lavertisman Noe. Son konsekans? “Deliz ti vini e balye zot tou.” Zezi ti averti ki nou letan, pandan ‘prezans Fis-de-Lonm,’ i pou parey. Sa ki ti arive dan letan Noe i servi konman en lavertisman serye pour dimoun ozordi ki swazir pour pa ekout mesaz Bondye.—Matye 24:39.
11 Sa bann ki pa pran oserye lavertisman Bondye ki son bann serviter ozordi pe anonse i devret realize ki pou arive avek zot si zot inyor lavertisman. Zapot Pyer ti dir konsernan sa bann moker: “Zot oubliye par ekspre, ki depi byen lontan lesyel ek later in ganny formen par parol Bondye. Later in sorti dan delo, e in ganny formen avek delo, egalman, lemonn ansyen ti ganny detri par delo, sa gran deliz. Me lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.”—2 Pyer 3:3-7.
12 Noe ek son fanmiy ti fer en swa ki ti tou lekontrer avek pour sa bann dimoun. “Par lafwa, Noe ti ekout lavertisman ki Bondye ti donn li konsernan keksoz ki ziska prezan personn pa ti ankor war. Noe ti obei e konstri en lars.” Fanmiy Noe ti reisi sove akoz i ti ekout lavertisman. (Ebre 11:7) Annou pa tarde pour ekout mesaz Bondye e apre aplik li.—Zak 1:19, 22-25.
13, 14. (a) Akoz i enportan pour “reste atase avek Zeova”? (b) Dan ki fason nou devret les Zeova, “nou Potye,” moul nou?
13 Par reste atase avek Zeova: Pour ‘swazir lavi e reste vivan’ fodre pa ki nou zis kontan Zeova e ekout li, me nou bezwen osi “reste atase avek Zeova,” savedir nou persiste pour fer son lavolonte. Zezi ti dir: “Par zot perseverans zot a sov zot lavi.” (Lik 21:19) Annefe, sa swa ki nou fer dan sa domenn i revele sa ki annan dan nou leker. Proverb 28:14 i fer resorti: “Ere sa zonm ki pe santi lafreyer toultan, me sa enn ki pe andirsi son leker pou tonm dan maler.” Faraon dan ansyen Lezip ti montre ki parol dan sa Proverb i vre. Anmezir ki sak sa Dis Fleo ti ariv lo Lezip, olye devlop lafreyer pour Bondye, Faraon ti andirsi son leker. Zeova pa ti fors Faraon pour dezobei me i ti les sa dirizan arogan fer en swa. Antouleka, lavolonte Zeova ti ganny akonpli, parey zapot Pol ti eksplik pwennvi Zeova lo Faraon: “Mon’n etabli ou konman lerwa ekspre pour montre par ou mon pisans, pour ki mon non i ganny proklanmen lo later an antye.”—Romen 9:17.
14 Plizyer santenn lannen apre ki Izrael ti ganny delivre anba kontrol Faraon, profet Izai ti anonse: “O Zeova, ou nou Papa. Nou, nou later, e ou nou Potye; e nou tou nou travay ou lanmen.” (Izai 64:8) Ler nou les Zeova moul nou atraver nou letid personnel e ler nou aplik son Parol, ptit-a-pti nou devlop sa nouvo personnalite. Sa i fer nou devlop plis limilite, Zeova i kapab moul nou, e i vin pli fasil pour nou reste fidel avek Zeova akoz nou senserman anvi fer li plezir.—Efezyen 4:23, 24; Kolosyen 3:8-10.
“Ou bezwen rakont sa bann Keksoz”
15. Dapre Deterononm 4:9, ki sa de responsabilite Moiz ti rapel Izrael?
15 Zis avan ki nasyon Izrael ti’n met zot pare pour antre dan Later Promiz, Moiz ti dir: “Selman vey byen ou lekor e fer byen atansyon, pour ki ou pa oubliy bann keksoz ki ou lizye in vwar e ki zot pa elwannyen avek ou leker toudilon ou lavi; e ou bezwen rakont sa bann keksoz avek ou bann garson ek ou bann pti zanfan.” (Deterononm 4:9) Pour zot ganny benediksyon Zeova e prospere dan sa pei ki zot ti pe al erite, i ti annan de responsabilite ki sa pep ti bezwen akonpli devan Zeova zot Bondye. Zot ti pou bezwen rapel sa bann keksoz merveye ki zot ti’n vwar Zeova fer, e zot ti pou bezwen ansenny sa bann keksoz avek bann fitir zenerasyon. Ozordi, konman pep Bondye nou bezwen fer menm keksoz si nou anvi ‘swazir lavi e reste vivan.’ Ki bann keksoz ki nou’n vwar Zeova fer pour nou?
16, 17. (a) Ki bann misyonner ki’n sorti Gilead in reisi akonpli dan travay predikasyon Rwayonm? (b) Ki legzanp serten dimoun ki’n reste devoue ki ou konnen?
16 Nou kontan en kantite pour vwar ki mannyer Zeova in beni nou predikasyon ek travay fer disip. Depi ki Lekol Gilead in ouver an 1943, bann misyonner in devlop sa travay fer disip dan bokou pei. Ziska ozordi, serten frer ek ser ki’n asiste sa lekol depi byen lontan i ankor devoue pour pres sa bon nouvel, menm si zot aze e serten i limite pour rezon lasante. En tre bon legzanp i Mary Olson, ki ti fini lekol Gilead an 1944. I’n fer travay misyonner—premye Irigway, apre Kolonbi e konmela Puerto Rico. Menm si son lavyeyes i limit lakantite ki i kapab fer, Ser Olson pa perdi son lantouzyasm pour predikasyon. I servi son konnesans lo langaz Espanyol, e i organiz li pour pres avek bann proklanmater dan son kongregasyon sak semenn.
17 Nancy Porter li ti fini Lekol Gilead an 1947, e ozordi i en vev e i ankor pe servi Bahamas. I en lot misyonner ki reste okipe dan travay predikasyon. Ler i ti rakont son leksperyans, Ser Porter ti dir: “Ansenny lezot laverite dan Labib in vin en sours lazwa merveye. I ed mwan pour annan en progranm spirityel byen organize e i fer mon lavi stab e annord.” * Ler Ser Porter ek lezot fidel serviter i reflesir lo zot lavi, zot pa oubliy sa ki Zeova in fer. Be nou? Eski nou apresye fason ki Zeova in beni travay predikasyon dan nou pei?—Psonm 68:11.
18. Ki nou kapab aprann par lir leksperyans bann misyonner?
18 Nou vreman enpresyonnen par sa ki’n ganny akonpli e ankor pe ganny akonpli par sa bann ki’n depans bokou lannen dan servis Zeova. Lir zot leksperyans i en sours lankourazman pour nou akoz nou vwar sa ki Zeova in fer pour sa bann fidel. Sa i donn nou plis determinasyon pour servi Zeova. Eski ou lir regilyerman e reflesir lo sa bann resi enteresan pibliye dan Latour Veyer?
19. Ki mannyer bann paran i kapab servi byen leksperyans lezot ki dan Latour Veyer?
19 Moiz ti rapel bann Izraelit ki zot pa devret oubliy tou sa bann keksoz ki Zeova ti’n fer pour zot e ki sa bann keksoz i devret reste dan zot leker toudilon zot lavi. Apre sa, i ti dir ki zot bezwen fer en lot keksoz: “Ou bezwen rakont sa bann keksoz avek ou bann garson ek ou bann pti zanfan.” (Deterononm 4:9) Leksperyans lezot dimoun i fer en bon lefe lo nou. Bann zenn ki pe grandir i bezwen bann bon legzanp. Bann ser selibater i kapab tir bann leson avek legzanp bann ser pli aze ki zot leksperyans i trouve dan Latour Veyer. Servi dan en teritwar langaz etranze dan zot prop pei i donn bann frer ek ser plis loportinite pour okipe dan travay predikasyon. Bann paran Kretyen, akoz zot pa servi leksperyans bann fidel misyonner ki sorti Gilead ek lezot pour motiv ou zanfan pour swazir servis aplentan?
20. Ki nou bezwen fer pour “swazir lavi”?
20 Alor, ki mannyer sakenn antre nou i kapab “swazir lavi”? Par servi nou liberte pour swazir, ki en zoli kado, pour montre Zeova ki nou kontan li e par kontinyen fer nou mye dan son servis osi lontan ki i donn nou sa privilez. “Akoz” parey Moiz ti dir, Zeova i ‘nou lavi ek longer nou bann zour.’—Deterononm 30:19, 20.
[Not anba lo paz]
^ par. 17 Vwar sa lartik “Joyeuse et reconnaissante malgré une perte déchirante,” pibliye dan Latour Veyer le 1 Zen, 2001, paz 23-7 (Angle/Franse).
Eski ou rapel?
• Ki ou’n aprann atraver sa de diferan kalite swa ki nou’n egzaminen?
• Nonm diferan pa nou bezwen pran pour “swazir lavi.”
• Ki sa de responsabilite nou ganny ankouraze pour akonpli?
[Kestyon]
[Portre lo paz 24]
“Mon’n met lavi ek lanmor devan ou”
[Portre lo paz 27]
Noe ek son fanmiy ti ganny sove akoz zot ti ekout lavwa Bondye
[Portre lo paz 28]
Mary Olson
[Portre lo paz 28]
Nancy Porter
[Portre lo paz 28]