Bann Pwen enteresan dan dezyenm Liv Psonm
Parol Zeova i vivan
Bann Pwen enteresan dan dezyenm Liv Psonm
KONMAN bann serviter Zeova, nou ekspekte ki nou rankontre leprev ek difikilte. Zapot Pol ti ekrir: “Tou sa ki oule viv en lavi fidel dan Kris Zezi pou ganny persekite.” (2 Timote 3:12) Kwa ki pou kapab ed nou andir leprev ek persekisyon, e alor montre nou fidel avek Bondye?
Dezyenm liv dan sa senk koleksyon psonm i donn nou sa led. Psonm 42 ziska 72 i montre nou ki si nou anvi reisi andir leprev, nou bezwen met nou konfyans dan Zeova e aprann pour esper li pour delivre nou. Pa sa i en leson enportan pour nou! Mesaz dan sa Dezyenm Liv Psonm, zis parey larestan Parol Bondye, i vreman “vivan e i annan pisans” menm ziska ozordi.—Ebre 4:12.
ZEOVA I NOU “REFIZ EK LAFORS”
En Levit i trouv li an egzil. I dan latristes akoz i pa kapab al ador Zeova kot son tanp, i rekonfort son lekor, an dizan: “Akoz ou dan dezespwar, O mon nanm, e akoz ou azite dan mwan? Esper Bondye.” (Psonm 42:5, 11; 43:5) Sa verse ki kontinyen aparet plizyer fwa i konekte sa trwa strof dan Psonm 42 ek 43 dan en sel poenm. Psonm 44 i en siplikasyon an faver Zida, ki ti en nasyon dan detres, petet bann Asiryen ti pe menase pour anvair zot dan letan Lerwa Izkiya.
Psonm 45 i koz konsernan maryaz en lerwa, e i en psonm profetik lo Lerwa Zezi Kri. Dan sa trwa psonm ki swiv, Zeova i ganny reprezante konman “en refiz ek lafors,” “en gran Lerwa lo tou later” ek “en latour for.” (Psonm 46:1; 47:2; 48:3) Dan en zoli fason Psonm 49 i montre ki personn pa zanmen kapab kouver fot son frer! (Psonm 49:7) Sa premye wit psonm dan sa dezyenm koleksyon i konpozisyon bann garson Kora, sa enn nevyenm, Psonm 50, i en konpozisyon Azaf.
Larepons pour bann Kestyon lo Labib:
44:19—Kwa sa “landrwa bann lisyen maron”? Petet sa psalmis ti pe refer avek en fron batay, kot lisyen maron ti manz bann ki ti ganny touye.
45:13, 14a—Lekel “fiy lerwa” ki “pou ganny anmennen kot lerwa”? I reprezant fiy ‘Lerwa leternite,’ Zeova. (Revelasyon 15:3) I reprezant sa kongregasyon glorye 144,000 Kretyen, ki Zeova i adopte konman son bann zanfan par swazir zot avek son lespri sen. (Romen 8:16) Sa “fiy” Zeova ki “ti’n dekore parey en nouvel-marye” pou ganny anmenn kot nouvo marye, Lerwa Zezi Kri.—Revelasyon 21:2.
45:14b, 15—Sa “bann vyerz i reprezant lekel? Zot sa “gran lafoul” bann vre adorater, ki zwenn e siport bann Kretyen swazir ki ankor lo later. Lefe ki zot pou ‘pas par en gran ladetres’ vivan, zot pou lo later ler maryaz Lerwa Zezi Kri i fini dan lesyel. (Revelasyon 7:9, 13, 14) Sa zour, zot pou ranpli avek “lakontantman ek lazwa.”
45:16—Dan ki fason i pou annan bann garson dan plas zanset lerwa? Ler Zezi ti lo later, i ti annan bann zanset lo later. Ler i resisit zot pandan son Renny Milener, zot pou vin son bann garson. Serten parmi zot pou ganny apwente konman “bann prens lo later antye.”
50:2—Akoz Zerizalenm i ganny apele “perfeksyon labote”? I pa ti akoz laparans sa lavil. Zerizalenm ti atiran akoz Zeova ti servi sa lavil e fer li zoli par met son tanp e enstal son bann lerwa dan sa lavil.
Leson pour nou:
42:1-3. Parey en femel serf dan en landrwa sek ki anvi bwar delo, sa Levit ti anvi ador Zeova. Latristes sa zonm ti sitan gran akoz i pa ti kapab ador Zeova kot Son tanp ki ‘son larm ti vin son manze lizour konman aswar’—i ti perdi son lapeti. Eski pa nou devret devlop en profon lapresyasyon pour ador Zeova ansanm avek nou bann frer ek ser!
42:4, 5, 11; 43:3-5. Si pour serten rezon an deor nou kontrol nou pa kapab asosye avek kongregasyon pour en pe letan, ler nou mazin sa lazwa ki nou ti gannyen dan lepase pour asosye avek nou frer ek ser, sa i kapab soutenir nou. Menm si okonmansman sa i kapab fer nou santi nou pli tousel, i pou osi rapel nou ki Bondye i nou refiz e ki nou bezwen esper li pour soulaz nou.
46:1-3. Nenport maler ki nou kapab eksperyanse, nou totalman asire ki “Bondye i en refiz ek lafors pour nou.”
50:16-19. En dimoun ki pe anbet lezot e pe fer move keksoz napa drwa reprezant Bondye.
50:20. Olye fer tou dimoun konn defo lezot, nou devret inyor sa bann defo.—Kolosyen 3:13.
“ANVER BONDYE ESPER AN SILANS, O MON NANM”
Sa group psonm i konmans avek lapriyer senser ki David ti fer apre ki i ti’n komet pese avek Batseba. Psonm 52 ziska 57 i montre ki Zeova pou delivre bann ki zet zot fardo lo li e esper li pour ganny delivre. Parey Psonm 58-64 i montre, pandan tou son detres, David ti fer Zeova vin son refiz. I sante: “Vreman anver Bondye esper an silans, O mon nanm, akoz mon lespwar i sorti kot li.”—Psonm 62:5.
En relasyon pros avek sa enn ki sov nou i devret pous nou pour “fer melodi pour laglwar son non.” (Psonm 66:2) Dan Psonm 65, Zeova i ganny loue konman sa enn ki donn avek zenerozite, dan Psonm 67 ek 68 konman en Bondye ki azir pour sov lezot, e dan Psonm 70 ek 71 konman sa enn ki anmenn delivrans.
Larepons pour bann Kestyon lo Labib:
51:12—Ti lekel sa “lespri volonter” ki David ti demande? Sa i pa ni refer avek lavolonte Bondye pour ed David oubyen lespri sen Zeova, me avek lespri David li menm, son latitid. I ti pe demann Bondye pour donn li sa dezir pour fer sa ki byen.
53:1—Ki mannyer en dimoun ki rezet legzistans Bondye i “bet”? Sa dimoun bet la i pa vedir ki i napa lentelizans. Ler nou get bann problenm ki arive akoz en dimoun i rezet standar moral Bondye ki ganny dekrir dan Psonm 53:1-4, nou konpran ki sa dimoun dan sa verse i bet lo nivo moral.
58:3-5—Dan ki fason en move dimoun i parey en serpan? Bann mansonz ki zot dir lo lezot i parey pwazon serpan. Zot gat bon repitasyon zot viktim. “Parey en kobra ki bous son zorey,” sa move dimoun pa ekout gidans oubyen koreksyon.
58:7—Ki mannyer bann mesan i “fonn dan delo ki ale”? Petet David ti pe mazin delo dan serten vale toransyel dan Later Promiz. En lavalas delo i kapab ogmant nivo delo dan en vale toransyel, me deswit apre sa delo i ale e disparet. David ti pe priye ki bann mesan i disparet vitman.
68:13—Ki mannyer “lezel en pizon ti kouver avek larzan e son bout lezel avek lor zonn ver”? Serten pizon ki annan kouler ble sann, zot plim i klate. Dan soley zot plim i ganny en laparans metalik. Kekfwa David ti pe konpar bann gerye Izraelit viktorye avek en pizon ki anvol byen e ki annan en laparans klate. Parey serten spesyalis Labib i krwar, sa deskripsyon i osi kapab aplik avek bann keksoz ki ti ganny pran dan lager. Antouleka, David ti pe refer avek laviktwar ki Zeova ti donn son pep lo zot bann lennmi.
68:18—Lekel “sa bann zonm ki ti ganny donnen konman kado”? Sa ti bann zonm ki ti ganny kaptire ler bann Izraelit ti pe pran Later Promiz. Plitar sa bann zonm ti ganny dezinyen pour ed bann Levit dan zot travay.—Ezra 8:20.
68:30—Ki savedir sa demann pour “reprimann zannimo sovaz”? Dan en sans senbolik, David ti apel bann lennmi pep Zeova bann zannimo sovaz e i ti demann Bondye pour reprimann zot oubyen kontrol zot pouvwar pour fer sa ki mal.
69:23—Ki savedir ‘fer laans lennmi tranble’? Bann misk dan laans i esansyel pour fer bann gro latas, parey lev e anmenn bann gro pake. En laans oubyen lazanm ki pa stab i endike ki lafors in fini. David ti priye ki son bann lennmi i perdi zot lafors.
Leson pour nou:
51:1-4, 17. Fer pese pa neseserman afekte nou relasyon avek Bondye. Si nou repantir, nou kapab annan konfyans dan son mizerikord.
51:5, 7-10. Si nou’n fer pese, nou kapab demann Zeova pardon akoz sa tandans pour fer pese ki nou’n ne avek. Nou devret osi priy li pour pirifye nou, pour refer nou relasyon avek li, pour ed nou retir bann tandans pour fer pese dan nou leker, e pour ed nou reste ferm.
51:18. Pese ki David ti fer ti met an danze byennet antye sa nasyon. Alor i ti priye ki Bondye i azir avek labonte anver Siyon. Ler nou fer en pese grav, souvan sa i anmenn repros lo non Zeova e lo kongregasyon. Nou bezwen priy Bondye pour repar sa domaz ki nou’n kapab fer.
52:8. Nou kapab vin “parey en zoli pye zoliv dan lakaz Bondye” savedir reste pros avek Zeova e vin prodiktif dan son servis, par obeir li e par volonterman aksepte son disiplin.—Ebre 12:5, 6.
55:4, 5, 12-14, 16-18. Sa konplo ki son prop garson Absalonm ek traizon son konseye pli pros Aitofel ti bles santiman David en kantite. Me sa pa ti fer David perdi son konfyans dan Zeova. Nou pa devret les bann santiman emosyonnel fer nou perdi konfyans dan Bondye.
55:22. Ki mannyer nou zet nou fardo lo Zeova? Nou fer sa (1) par priy Zeova konsernan sa keksoz ki trakas nou, (2) par depan lo son Parol ek lorganizasyon pour gidans ek sipor, e (3) par fer sa ki nou kapab pour amelyor sa sitiasyon.—Proverb 3:5, 6; 11:14; 15:22; Filipyen 4:6, 7.
56:8. Zeova pa zis konn nou sitiasyon me i osi konnen ki lefe nou sitiasyon i fer lo nou santiman.
62:11. Bondye pa depan lo okenn sours lenerzi. Li menm i sours lafors. ‘Lafors i pour li.’
63:3. Labonte leker Bondye i “pli meyer ki lavi” akoz san li, lavi napa sans e napa valer. I saz pour nou devlop en lanmitye avek Zeova.
63:6. Aswar ler i trankil e napa distraksyon i en bon letan pour reflesir.
64:2-4. Bann move bavardaz i kapab gat repitasyon en dimoun ki inosan. Nou pa ni devret ekout sa bann kalite bavardaz oubyen propaz li.
69:4. Pour prezerv lape, parler i kapab bon pour nou “rann” savedir demann leskiz, menm si nou pa konvenki ki nou ti annan tor.
70:1-5. Zeova i antann nou lapel irzan pour led. (1 Tesalonisyen 5:17; Zak 1:13; 2 Pyer 2:9) Bondye i kapab les en leprev kontinyen, me i pou donn nou lasazes pour fer fas avek sa sitiasyon ek lafors pour andir li. I pa pou les nou ganny tante plis ki nou kapab siporte.—1 Korentyen 10:13; Ebre 10:36; Zak 1:5-8.
71:5, 17. David ti devlop kouraz ek lafors par met konfyans dan Zeova depi son zenes, menm avan i ti konfront Golyat sa Filisten zean. (1 Samyel 17:34-37) Bann zenn i devret depan lo Zeova dan tou sa ki zot fer.
“Les son Laglwar ranpli Later antye”
Dernyen sanson dan sa dezyenm koleksyon bann psonm i koz lo dominasyon Salomon, ki ti reprezant kondisyon ki pou egziste ler Mesi i dirize. I dekrir bann benediksyon merveye, lape an abondans, lafen avek lopresyon ek vyolans, ek en kantite manze lo later! Eski nou pou parmi sa bann ki pou apresye sa bann keksoz ek lezot benediksyon ki Rwayonm pou anmennen? Wi, si nou fer parey sa psalmis e nou kontan pour esper Zeova, e fer li vin nou refiz ek lafors.
“Lapriyer David . . . i ariv zot lafen” avek sa parol: “Beni Zeova, Bondye Izrael, ki li tousel pe fer bann travay merveye. E ki son non glorye i beni pour en letan endefini, e les son laglwar ranpli later antye. Amenn e Amenn.” (Psonm 72:18-20) Annou osi avek tou nou leker beni Zeova e loue son non glorye.
[Portre lo paz 9]
Eski ou konnen ki “fiy lerwa” i reprezante?
[Portre lo paz 10]
Zerizalenm i ganny apele “perfeksyon labote.” Eski ou konnen akoz?