Kestyon Lekter

Ki parol Zezi i vedir ler i ti dir Nikodenm: “Personn pa’n deza mont dan lesyel, eksepte Fis-de-Lonm ki’n desann sorti dan lesyel”?—Zan 3:13.

Sa letan Zezi ti ankor lo later, e i pa ti ankor mont oubyen retourn dan lesyel. Me sa ki nou konnen lo Zezi ek konteks sa verse i kapab ed nou konpran sinifikasyon son parol.

Zezi ti “desann sorti dan lesyel” akoz avan sa i ti viv dan lesyel avek son Papa, me a en serten moman, Zeova ti transfer lavi sa Garson dan vant Mari, ki finalman ti fer Zezi ne konman en imen. (Lik 1:30-35; Galat 4:4; Ebre 2:9, 14, 17) Apre son lanmor, Zezi ti pou resisite konman en lespri e retourn kot Zeova. Pour sa rezon, zis avan zot ti met li amor Zezi ti kapab dir dan lapriyer: “Papa, glorifye mwan dan ou prezans avek sa menm laglwar ki mon ti annan avek ou avan kreasyon lemonn.”—Zan 17:5; Romen 6:4, 9; Ebre 9:24; 1 Pyer 3:18.

Ler i ti pe koz avek Nikodenm, ki ti en Farizyen ek ansennyan Izrael, Zezi pa ti ankor retourn dan lesyel. Byensir, ti napa personn ki ti’n mor e mont dan lesyel avan sa. Zezi li menm ti dir ki Zan-Batis ti en gran profet Bondye, me “sa ki pli pti dan Rwayonm lesyel i pli gran ki li.” (Matye 11:11) E zapot Pyer ti eksplike ki menm Lerwa David ki ti fidel ti reste dan son tonbo apre son lanmor. David pa ti mont dan lesyel. (Akt 2:29, 34) I annan en rezon akoz David, Zan-Batis, ek lezot zonm fidel ki ti mor avan Zezi pa ti al dan lesyel. Zot ti mor avan ki Zezi ti ouver semen oubyen kree posibilite pour imen ganny resisite pour al viv dan lesyel. Zapot Pol ti ekrir ki Zezi ti antre avan zot “lo sa semen nouvo e vivan ki i’n ouver” dan lesyel.—Ebre 6:19, 20; 9:24; 10:19, 20.

Alor lefe ki Zezi pa ti ankor mor e ganny resisite, ki i ti oule dir ler i ti dir Nikodenm: “Personn pa’n deza mont dan lesyel, eksepte Fis-de-Lonm ki’n desann sorti dan lesyel.” (Zan 3:13) Annou egzamin son konteks, sa ki Zezi ti pe diskite avek Nikodenm.

Ler sa dirizan Zwif ti vin kot Zezi an kasyet dan fernwanr, Zezi ti dir li: “An verite, an verite, mon dir ou, personn pa pou antre dan Rwayonm Bondye si i pa ne de nouvo.” (Zan 3:3) Me Nikodenm ti demande, ‘Ki mannyer sa i posib? Ki mannyer en zonm i kapab ne ankor?’ I pa ti konpran sa lansennyman Bondye konsernan antre dan Rwayonm Bondye. Eski ti annan en fason ki i ti kapab aprann sa? Imen pa ti pou kapab ed li; ti napa okenn dimoun ki ti kapab ansenny li lo sa zafer akoz personn pa ti’n al dan lesyel e alor zot pa ti kapab eksplik nanryen konsernan antre dan Rwayonm. Selman Zezi. Zezi ti kapab ansenny Nikodenm ek lezot akoz I ti’n desann sorti dan lesyel e i ti kalifye pour ansenny lezot lo sa topik.

Sa kestyon lo sa verse i alor montre en pwennvi enportan konsernan etidye Parol Bondye. En dimoun pa devret annan dout akoz en verse i paret difisil pour konpran zis apre ki i’n lir li anler anler. Pour konpran en verse fodre get lezot verse e fodre ki sa verse i an armoni avek zot. Deplis, souvan konteks ki swa sitiasyon oubyen topik ki ti pe ganny diskite i kapab ed nou pour trouv en sinifikasyon rezonnab e lozik pour en verse ki paret en pe konplike pour konpran.