“Mon vreman apresye ou bann Rapel”

“Tou sa ki’n ganny ekri dan lepase in ganny ekri pour nou lansennyman.”—ROMEN 15:4.

1. Ki mannyer Zeova i donn nou bann rapel, e akoz nou bezwen zot?

ZEOVA i donn son pep bann rapel pour ed zot fer fas avek presyon ki egziste dan sa letan difisil. Nou ganny serten sa bann rapel ler nou personnelman lir Labib e lezot i kapab vin atraver bann lenformasyon ek komanter dan nou bann renyon. Laplipar keksoz ki nou lir oubyen tande dan sa bann moman i pa nouvo pour nou. I tre probab ki nou’n deza egzamin lenformasyon ki en pe parey avan. Me vi ki nou annan tandans pour oubliye, nou bezwen kontinyen rapel nou lekor bann lalwa, lenstriksyon ek plan Zeova. Nou devret apresye bann rapel Bondye. Zot ankouraz nou par ed nou gard antet bann rezon ki pous nou pour viv an armoni avek lavolonte Bondye. Pour sa rezon, en psalmis ti sante avek Zeova: “Mon vreman apresye ou bann rapel.”—Psonm 119:24.

2, 3. (a) Akoz Zeova ti prezerv sa bann resi lo lavi bann dimoun dan letan Labib pour nou ozordi? (b) Ki sa trwa resi dan Labib nou pou egzaminen dan sa lartik?

² Menm si i’n ganny ekrir bokou letan lepase, Parol Bondye i pwisan. (Ebre 4:12) Nou kapab lir bann vre resi lo lavi bann dimoun dan letan Labib. Menm si koutim ek pwennvi dimoun ozordi in sanz en bon pe konpare avek dimoun ki ti viv dan letan Labib, bann problenm ki nou fer fas avek ozordi i souvan parey avek sa bann dan sa letan. Bokou resi ki’n ganny prezerve dan Labib pour nou byenfe i ofer nou bann legzanp tousan lo bann dimoun ki ti kontan Zeova e ti servi li fidelman malgre difikilte. Lezot resi i fer nou vwar ki kalite konportman Bondye pa kontan. Tou sa bann resi lo bann dimoun, ki swa bon oubyen move, Zeova in enkli dan Labib pour rapel nou bann leson enportan. I parey avek sa ki zapot Pol ti ekrir: “Tou sa ki’n ganny ekri dan lepase in ganny ekri pour nou lansennyman, pour ki par pasyans ek konsolasyon ki Lekritir i donnen nou posed lesperans.”—Romen 15:4.

³ Annou konsantre lo trwa resi dan Labib: resi konsernan fason ki David ti azir avek Sail, resi lo Ananyas ek Safira, ek sa enn lo konportman Zozef avek madanm Potifar. Sak sa bann resi i ansenny nou bann leson enportan.

Fidel anver Laranzman Bondye

4, 5. (a) Ki sitiasyon ti egziste ant Lerwa Sail ek David? (b) Ki mannyer David ti reazir anver sa laenn ki Sail ti annan anver li?

⁴ Lerwa Sail ti vin enfidel avek Zeova e i ti montre ki i pa merit diriz Son pep. Alor Bondye ti rezet li e i ti fer profet Samyel swazir David konman fitir lerwa Izrael. Ler David ti prouve ki i ti en gerye brav e dimoun ti donn li loner, Sail ti konmans vwar David konman en lennmi. Plizyer fwa Sail ti esey touy li. Me sak fwa, David ti sirviv akoz Zeova ti avek li.—1 Samyel 18:6-12, 25; 19:10, 11.

 ⁵ Pour bokou lannen, David ti bezwen viv an tayan e an kasyet. Ler David ti ganny loportinite pour touy Sail, son bann konpanyon ti ankouraz li pour touy li. Zot ti dir li ki Zeova ti pe met son lennmi dan son lanmen. Me David ti refize fer sa. Son fidelite anver Zeova e son respe pour pozisyon Sail konman lerwa swazir lo pep Bondye ti pous li pour azir dan sa fason. Pa Zeova ki ti apwent Sail konman lerwa Izrael? Zeova ti pou osi tir li ler i vwar li apropriye pour fer li. David ti realize li menm ki i ti napa drwa enterfer. Apre ki i ti’n fer tou son posib pour kalme sa laenn ki Sail ti annan anver li, David ti konklir: “Zeova li menm pou donn li en kou; oubyen son zour pou arive ki i pou bezwen mor, oubyen i pou bezwen al dan batay, e i pou sirman ganny retire. I enposib, lo mon kote, dapre pwennvi Zeova, pour anvoy mon lanmen kont sa enn ki Zeova in swazir!”—1 Samyel 24:3-15; 26:7-20.

6. Akoz sa resi lo David ek Sail i enportan pour nou egzaminen?

⁶ Dan sa resi i annan en leson tre enportan. Eski ou’n deza demann ou lekor akoz serten problenm i arive dan kongregasyon? Petet en dimoun pe azir dan en fason ki pa apropriye. I pa pe fer en pese grav, me sa ki i pe fer i fatig ou. Ki mannyer ou devret reazir? Akoz ou anvi montre lentere pour ou frer e akoz ou anvi montre ou fidelite anver Zeova, ou kapab deside pour koz zantiman avek sa li, avek bi pour aranz sa sitiasyon. Me ki ou pou fer si sa problenm i kontinyen? Apre ki ou’n fer tou sa ki ou kapab, petet i pou bon pour kit sa zafer dan lanmen Zeova. Sanmenm sa ki David ti fer.

7. Parey David, ki mannyer nou devret reazir si nou eksperyans lenzistis?

⁷ Petet ou pe ganny trete dan en fason enzis dan lasosyete oubyen dimoun i annan en move pwennvi lo ou akoz ou larelizyon. Kekfwa napa gran keksoz ki ou kapab fer oubyen ou pa kapab fer nanryen konsernan sa bann sitiasyon pour lemoman. I kapab vreman difisil pour andir en sitiasyon koumsa, me nou aprann en leson avek fason ki David ti reazir anver lenzistis. Dan son bann psonm, David pa ti zis ekrir son bann lapriyer senser kot i ti demann Bondye pour anpes Sail atrap li, me osi lo son fidelite anver Zeova ek son konsern pour ki non Bondye i ganny glorifye. (Psonm 18:1-6, 25-27, 30-32, 48-50; 57:1-11) David ti reste fidel avek Zeova menm si pour plizyer lannen Sail ti kontinyen azir dan en fason enzis. Nou osi nou devret reste fidel avek Zeova ek son lorganizasyon nenport ki lenzistis nou eksperyanse e nenport kwa ki lezot i fer nou. Nou kapab  asire ki Zeova i konn tre byen nou sitiasyon.—Psonm 86:2.

8. Ki bann Temwen Zeova Mozanbik ti fer ler zot fidelite anver Zeova ti ganny teste?

⁸ Bann Kretyen Mozanbik i en legzanp modern bann ki’n reste fidel avek Zeova dan en letan leprev. An 1984, plizyer fwa bann manm arme en group rezistans ti atak zot vilaz, e zot ti vole, bril bann lakaz e touye. Ti napa preski nanryen ki sa bann vre Kretyen ti kapab fer pour defann zot lekor. Bann zabitan sa rezyon ti rankontre presyon pour antre dan en group arme oubyen forse pour siport sa group dan lezot fason. Bann Temwen Zeova ti vwar ki sa pa an armoni avek zot pozisyon konman bann Kretyen ki pa pran okenn kote. Zot desizyon ti fer sa group ankoler. Plis ki 30 Temwen ti ganny touye dan sa moman difisil, me ni menm menas lanmor pa ti kapab kas fidelite pep Bondye. * Parey David, zot ti andir lenzistis me alafen zot ti sorti viktorye.

En Rapel ki osi en Lavertisman

9, 10. (a) Dan ki fason nou kapab benefisye avek serten legzanp dan Labib? (b) Kwa ki ti mal avek aksyon Ananyas ek Safira?

⁹ Serten dimoun ki ganny mansyonnen dan Labib i fourni bann rapel ki servi konman lavertisman lo bann konportman ki nou bezwen evite. Annefe, dan Labib i annan bokou resi lo bann dimoun, menm parmi serviter Bondye, ki ti fer sa ki mal e ti sibir son konsekans. (1 Korentyen 10:11) Enn sa bann resi i konsernan Ananyas ek Safira, zot ti en koup ki ti form parti kongregasyon Kretyen Zerizalenm dan premye syek.

¹⁰ Apre Lapannkot lannen 33 nou lepok, i ti annan sa nesesite pour ed lo plan materyel bann nouvo krwayan ki ti’n reste Zerizalenm pour benefisye avek lasosyasyon bann zapot. Serten dan kongregasyon ti vann zot propriyete pour fer sir ki personn pa ti dan bezwen. (Akt 2:41-45) Ananyas ek Safira ti vann en teren e zot ti anmenn selman en pe sa larzan kot bann zapot. Zot ti fer krwar ki zot kado i reprezant tou sa larzan ki zot ti’n gannyen avek sa lavant. I vre ki Ananyas ek Safira ti annan drwa donn pti gin oubyen kantite ki zot ti anvi, me zot motivasyon ti move e zot ti azir dan en fason malonnet. Zot ti anvi fer en bon lenpresyon lo lezot e fer krwar ki zot ti pe fer  plis ki sa ki zot ti pe fer an realite. Anba lenspirasyon lespri sen, zapot Pyer ti demaske zot malonnekte ek lipokrizi, e Zeova ti met zot amor.—Akt 5:1-10.

11, 12. (a) Nonm serten rapel konsernan lonnekte. (b) Ki byenfe nou gannyen ler nou onnet?

¹¹ Si nou ganny tante pour kasyet laverite zis pour esey fer lezot annan en bon pwennvi lo nou, fotespere sa resi lo Ananyas ek Safira i vin en rapel serye pour nou. Petet nou kapab anbet lezot, me nou pa kapab anbet Zeova. (Ebre 4:13) Plizyer fwa Labib i konsey nou pour onnet avek kanmarad akoz pou napa plas pour bann manter lo en later kot pou napa lemal. (Proverb 14:2; Revelasyon 21:8; 22:15) Rezon pour sa i devret kler. Sa enn ki promouvwar tou mansonz i pa lot ki Satan li menm.—Zan 8:44.

¹² Ler nou viv en lavi onnet sa i anmenn plizyer byenfe. Serten parmi sa bann byenfe i en konsyans kler ek sa satisfaksyon ki lezot i kapab met konfyans dan nou. Plizyer fwa bann Kretyen in ganny en plas travay oubyen zot pa’n perdi zot louvraz akoz zot ti onnet. Me lanmitye avek Bondye Tou pwisan i pli gran byenfe ki nou gannyen ler nou onnet.—Psonm 15:1, 2.

Reste pir

13. Dan ki sitasyon Zozef ti vwar li ladan e ki mannyer i ti azir?

¹³ Zozef, garson patrias Zakob ti ganny vann dan lesklavaz alaz 17 an. I ti finalman vwar li dan lakour Potifar, en zofisye Ezipsyen, ki son madanm ti met son leker lo Zozef. I ti anvi fer sèks avek Zozef, ki ti en zoli garson, e toulezour i ti ensiste: “Dormi avek mwan.” Zozef ti lwen avek son fanmiy dan en pei kot personn pa ti konn li. I ti kapab fasilman sorti avek sa madanm san ki lezot dimoun i konnen. Me zour madanm Potifar ti met lanmen lo li, Zozef ti taye.—Zenez 37:2, 18-28; 39:1-12.

14, 15. (a) Akoz resi Zozef i enteres nou? (b) Akoz en ser Kretyen ti rekonesan ki i ti pran aker rapel Bondye?

¹⁴ Zozef ti’n grandi dan en fanmiy ki ti annan lakrent pour Bondye, e i ti konpran ki i mal pour de dimoun ki pa marye annan relasyon seksyel. I ti demande: “Ki mannyer mon kapab fer sa keksoz sitan mal e fer pese kont Bondye?” Petet i ti’n tir sa konklizyon akoz i ti konn standar ki Bondye ti donnen dan zarden Edenn konsernan annan en sel madanm. (Zenez 2:24) Pep Bondye ozordi i kapab benefisye par reflesir lo fason ki Zozef ti reazir dan sa sitiasyon. Dan serten landrwa, dimoun i vwar li telman normal pour  fer sèks an bonnavini, ki si en zenn i refize fer imoralite seksyel lezot son kanmarad pou sikann li. Bann relasyon an deor maryaz i popiler parmi bann adilt. Alor, resi Zozef i en rapel ki vin atan pour nou. Dapre standar Bondye fornikasyon ek adilter i ankor en pese. (Ebre 13:4) Bokou dimoun ki’n les zot tonm dan imoralite seksyel i dakor ki i annan bann rezon konvenkan pour pa fer li. Parmi bann move konsekans ki i anmennen i en santiman imilyasyon, en konsyans trouble, zalouzi, lansentman, ek maladi transmet par sèks. Zis parey Labib i rapel nou, en dimoun ki pe fer imoralite seksyel pe “fer pese kont son prop lekor.”—1 Korentyen 5:9-12; 6:18; Proverb 6:23-29, 32.

¹⁵ Jenny, * en Temwen selibater, i annan rezon pour apresye bann rapel Bondye. En zoli garson dan son travay ti fer bann lapros avek li. Ler Jenny pa ti tonm dakor, i ti fer plis pour ganny son latansyon. Sa ser i admet: “Mon ti vwar mwan pe lalit pour reste pir, akoz ler en dimoun lot sèks i pran en lentere dan ou, ou santi ou pli atiran.” Me i ti realize ki sa zennonm ti pe zis anvi azout li lo sa lalis bann madanm ki i’n dormi avek. Ler i ti santi li pe afeblir dan son rezolisyon pour reziste, i ti sipliy Zeova pour ed li reste fidel. Jenny ti vwar ki sa bann keksoz ki i ti aprann ler i ti fer resers dan Labib ek piblikasyon baze lo Labib ti parey bann “rapel ki ti sekwe li pour pa bes lebra.” Enn sa bann rapel i sa resi lo Zozef ek madanm Potifar. I ti konklir: “Si mon kontinyen rapel mon lekor ki kantite mon kontan Zeova, mon pa bezwen per ki mon pou fer sa keksoz sitan mal e fer pese kont li.”

Pran aker Rapel Bondye!

16. Ki mannyer nou kapab benefisye par revwar e reflesir lo lavi bann dimoun dan Labib?

¹⁶ Nou tou nou kapab ogmant nou lapresyasyon pour standar Zeova par fer zefor pour konpran akoz i’n prezerv serten resi dan Labib pour nou. Ki zot ansenny nou? Ki kalite oubyen tandans ki bann dimoun dan Labib ti demontre ki nou bezwen imite oubyen evite? An realite Parol Bondye i koz lo plizyer santenn dimoun. Tou dimoun ki kontan lenstriksyon Bondye i kapab benefisye par devlop en dezir pour sa lasazes ki donn lavi, enkli leson ki nou kapab aprann atraver bann legzanp ki Zeova in byen prezerve. Plizyer fwa sa magazin in prezant bann lartik lo bann dimoun ki zot zistwar i ansenny nou en keksoz. Akoz nou pa pran en pe letan pour repas lo zot?

17. Ki mannyer ou santi lo bann rapel Zeova, e akoz?

¹⁷ Pa nou apresye sa lentere ki Zeova i montre pour sa bann ki fer zefor pour fer son lavolonte! Nou pa parfe zis parey bann zonm ek fanm ki ganny mansyonnen dan Labib pa ti parfe. Me bann resi lo sa ki zot ti fer i en provizyon ki vreman benefisye nou. Ler nou pran aker bann rapel Zeova, nou kapab evite fer bann fot ki kapab kout nou bokou, e nou kapab imit bon legzanp sa bann ki ti mars avek ladrwatir. Si nou fer sa, nou pou kapab sante parey sa psalmis: “Byennere bann ki obzerv bann rapel [Zeova]; avek tou zot leker zot kontinyen rod li. Mon’n gard ou bann rapel, e mon vreman kontan zot en kantite.”—Psonm 119:2, 167.

[Not anba lo paz]

Ki ou pou reponn?

• Ki nou kapab aprann atraver latitid David anver Sail?

• Ki nou aprann lo sa resi konsernan Ananyas ek Safira?

• Akoz resi lavi Zozef i sirtou enteres nou ozordi?

[Kestyon]

[Portre lo paz 18]

Akoz David pa ti oule Sail ganny touye?

[Portre lo paz 19]

Ki nou aprann lo resi konsernan Ananyas ek Safira?

[Portre lo paz 20]

Kwa ki ti fer Zozef rezet presyon pour fer imoralite seksyel?