Ne dan en Nasyon ki Bondye ti’n swazir
Ne dan en Nasyon ki Bondye ti’n swazir
“Zeova ou Bondye in swazir ou pour vin son pep.” —DETERONONM 7:6.
1, 2. Ki sa bann gran aksyon Zeova ti fer pour son pep, e ki relasyon bann Izraelit ti annan avek Zeova?
AN 1513 A.N.L., Zeova ti konmans en nouvo relasyon avek son bann serviter lo later. Sa letan i ti imilye en pouvwar mondyal e sov bann Izraelit dan lesklavaz. Kan i ti fer sa, i ti vin zot Sover ek Propriyeter. Avan ki i ti delivre bann Izraelit, Bondye ti dir Moiz: “Dir bann garson Izrael, ‘Mwan mon Zeova, e sirman mon pou tir zot anba sa bann fardo ki bann Ezipsyen in met lo zot e mon pou delivre zot anba zot lesklavaz, mon pou anvoy mon lanmen pour sov zot e avek gran zizman. Sirman mon pou pran zot konman en pep pour mwan, e mon pou montre ki mon zot Bondye.’”—Egzod 6:6, 7, not anba lo paz; 15:1-7, 11.
2 Pa bokou letan apre ki zot ti’n sorti Lezip, bann Izraelit ti fer en lalyans avek zot Bondye, Zeova. Olye fer sa lalyans avek bann endividi, fanmiy oubyen bann group fanmiy, Zeova ti pou annan en pep organize, en nasyon lo later. (Egzod 19:5, 6; 24:7) I ti donn son pep bann lalwa ki ti gid zot dan lavi toulezour, e pli enportan dan zot ladorasyon. Moiz ti dir zot: “Lekel sa gran nasyon ki annan bann bondye pre avek li parey Zeova nou Bondye ki toultan la ler nou kriy li? Lekel sa gran nasyon ki annan bann regilasyon ek zizman ki drwat parey tou sa bann lalwa ki mon pe met devan zot ozordi?”—Deterononm 4:7, 8.
Ne dan en Nasyon ki ti bann Temwen
3, 4. Nonm en rezon enportan akoz Izrael ti egziste konman en nasyon.
3 Plizyer syek plitar, atraver son profet Izai, Zeova ti rapel bann Izraelit en rezon enportan akoz zot egziste konman en nasyon. Izai ti dir: “La sa ki Zeova in dir, Ou Kreater, O Zakob, ek sa enn ki’n form ou, O Izrael: ‘Pa bezwen per akoz mon’n aste ou. Mon’n apel ou par ou non. Ou pour mwan. Parski mwan mon Zeova ou Bondye, Sen Izrael, ou sover. . . . Anmenn mon bann garson ki sorti byen lwen, ek mon bann fiy ki sorti lo bann landrwa pli lwen lo later, tou sa ki ganny apele par mon non, e ki mon’n kree pour mon prop laglwar, ki mon’n formen, wi, sa ki mon’n fer.’ Se sa ki Zeova i dir: ‘Zot mon bann temwen, wi mon serviter ki mon’n swazir, . . . sa pep ki mon’n formen pour mwan, pour ki zot koz lo mon louanz.’”—Izai 43:1, 3, 6, 7, 10, 21.
4 Konman en pep ki port non Zeova, bann Izraelit ti pou vin son bann temwen par koz lo son drwa pour dirize devan bann nasyon. Zot ti pou vin en pep ki’n ‘ganny kree pour laglwar Zeova.’ Zot ti pou ‘koz lo louanz Zeova,’ lo son bann aksyon merveye pour delivre zot e zot ti pou osi glorifye son non sen. An bref, zot ti pou vin en nasyon ki servi konman Temwen pour Zeova.
5. Dan ki fason Izrael ti vin en nasyon ki ti’n dedye avek Zeova?
5 Dan 11 zyenm syek A.N.L., Lerwa Salomon ti fer resorti ki Zeova ti’n fer Izrael vin en nasyon ki separe avek lezot pep. Dan son lapriyer i ti dir Zeova: “Ou menm ki ti separ zot konman ou leritaz parmi tou sa bann pep lo later.” (1 Lerwa 8:53) Sak Izraelit ti osi annan en relasyon spesyal avek Zeova. Pli boner, Moiz ti dir zot: “Zot bann garson Zeova zot Bondye. . . . Parski ou en pep sen pour Zeova ou Bondye.” (Deterononm 14:1, 2) Bann zenn Izraelit pa ti bezwen dedye zot lavi avek Zeova. Sa i akoz zot ti ne dan en nasyon ki ti’n deza ganny dedye avek Bondye. (Psonm 79:13; 95:7) Sak nouvo zenerasyon ki ti ne ti ganny enstri lalwa Zeova e zot ti oblize obeir sa bann lalwa akoz sa lalyans ki pep Izrael ti’n fer avek Zeova.—Deterononm 11:18, 19.
Zot ti lib pour swazir
6. Ki swa sak Izraelit ti bezwen fer?
6 Menm si bann Izraelit ti ne dan en nasyon ki ti’n ganny dedye avek Bondye, sakenn endividyelman ti pou bezwen fer en desizyon pour servi Bondye. Avan zot ti antre dan Later Promiz, Moiz ti dir zot: “Mon pran lesyel ek later konman temwen kont zot ozordi, ki mon met lavi ek lanmor devan zot, benediksyon ek malediksyon; e ou devret swazir lavi pour ki ou reste vivan, ou ek ou desandans, par kontan Zeova zot Bondye, par ekout son lavwa e par reste atase avek li; akoz i zot lavi ek longer zot bann zour, pour ki ou kapab reste lo sa later ki Zeova ti fer serman pour donn avek zot zanset Abraam, Izaak ek Zakob.” (Deterononm 30:19, 20) Alors, sak Izraelit endividyelman ti pou bezwen swazir pour kontan Zeova, ekoute kan i koze e reste pros avek li. Vi ki zot ti lib pour swazir, alors zot ti pou bezwen fer fas avek rezilta zot swa.—Deterononm 30:16-18.
7. Ki ti arive apre ki zenerasyon Zozye ti mor?
7 Sa ki ti arive dan letan bann Ziz dan ansyen Izrael i fer nou vwar klerman rezilta fidelite ek enfidelite. Zis avan ki ti konmans annan bann Ziz Izrael, bann Izraelit ti swiv bon legzanp Zozye e zot ti ganny beni. “Sa pep ti kontinyen servi Zeova toudilon bann zour ki Zozye ti ankor vivan e toudilon bann zour bann ansyen, ki ti prolonz zot bann zour apre Zozye e ki ti’n vwar tou bann gran travay ki Zeova ti’n fer pour Izrael.” Me en pe letan apre ki Zozye ti mor, “en lot zenerasyon ti monte apre zot, ki pa ti konn ni Zeova e ni travay ki i ti’n fer pour Izrael. Bann garson Izrael ti konmans fer sa ki mal dan lizye Zeova.” (Ziz 2:7, 10, 11) Aparaman, sa nouvo zenerasyon ki ti mank leksperyans pa ti apresye ki zot ti’n ne dan en pep ki ti’n ganny dedye avek Bondye, li ki ti’n fer bann keksoz ekstraordiner pour zot dan lepase.—Psonm 78:3-7, 10, 11.
Viv an akor avek zot Dedikasyon
8, 9. (a) Ki laranzman ki ti ganny fer pour bann Izraelit montre ki zot anvi viv an akor avek zot dedikasyon konman en pep? (b) Ki sa bann ki ti ofer sakrifis volonter ti gannyen?
8 Zeova ti fer li posib pour bann Izraelit demontre si zot anvi viv an akor avek zot dedikasyon konman en pep. Par egzanp, son Lalwa ti permet zot ofer bann sakrifis oubyen lofrann, serten ti obligatwar e tandis ki en bann ti volonter. (Ebre 8:3) Serten sa bann sakrifis ki zot ti kapab ofer volonterman, ti lofrann brile, lofrann lagrenn ek lofrann konminyon, e zot ti ofer Zeova sa bann don pour ganny son faver e konman en siny remersiman.—Levitik 7:11-13.
9 Sa bann sakrifis volonter ti fer Zeova plezir. Lofrann brile ek lofrann lagrenn ti ganny konsidere konman ‘en loder agreab pour Zeova.’ (Levitik 1:9; 2:2) Pour sakrifis konminyon, disan ek lagres zannimo ti ganny donnen pour Zeova, me bann pret ek sa enn ki ti ofer sa sakrifis ti manz serten porsyon sa lavyann. Anfet, i ti en repa senbolik ki ti reprezant lape avek Zeova. Lalwa ti dir: “Si zot bezwen fer en sakrifis konminyon pour Zeova, zot devret fer sa sakrifis pour ganny laprouvasyon Zeova.” (Levitik 19:5) Menm si bann Izraelit ti ne dan en nasyon ki ti’n ganny dedye avek Zeova, bann ki ti oule personnelman demontre ki zot apresye zot dedikasyon ti ofer bann sakrifis volonter, e zot ti “ganny laprouvasyon” ek benediksyon Zeova.—Malaki 3:10.
10. Ki mannyer Zeova ti demontre son mekontantman dan letan Izai ek Malaki?
10 Me tanzantan nasyon Izrael ki ti’n ganny dedye avek Zeova ti vin enfidel. Zeova ti dir zot sa atraver son profet Izai: “Ou pa’n anmenn mouton kot mwan konman ou lofrann brile, e ou pa’n glorifye mwan avek ou bann sakrifis. Mon pa ti obliz ou pour ofer mwan en don.” (Izai 43:23) Deplis, okenn lofrann ki pa ti ganny fer volonterman avek lanmour, Zeova pa ti apresye. Par egzanp, apepre 300 zan apre Izai, bann Izraelit dan letan Malaki pa ti pe ofer bann bon zannimo konman sakrifis. Alor Malaki ti dir zot: “‘Mon pa pran okenn plezir dan zot,’ Zeova bann larme in dir, ‘e mon pa pran plezir dan lofrann ki sorti dan zot lanmen.’ . . . ‘Zot in anmenn en zannimo ki’n redi par-d-fors, enn ki bwete e enn ki malad; wi, zot in anmenn li konman lofrann. Eski mon kapab apresye sa ki sorti dan zot lanmen?”—Malaki 1:10, 13; Amos 5:22.
Rezete konman en Nasyon ki’n ganny dedye
11. Ki loportinite Izrael ti gannyen?
11 Letan bann Izraelit ti vin en nasyon ki ti’n ganny dedye avek Zeova, i ti promet zot: “Si zot pou strikteman obeir mon lavwa e pou vreman gard mon lalyans, alor zot pou sirman vin mon propriyete spesyal parmi tou lezot pep, akoz later antye i pour mwan. Zot pou vin en rwayonm pret ek en nasyon sen pour mwan.” (Egzod 19:5, 6) Mesi promiz ti pou aparet omilye zot e gras a li zot ti pou vin sa bann premye pour ganny sa loportinite pour vin manm Rwayonm Bondye. (Zenez 22:17, 18; 49:10; 2 Samyel 7:12, 16; Lik 1:31-33; Romen 9:4, 5) Me lamazorite Izraelit pa ti reste fidel avek zot dedikasyon konman en pep. (Matye 22:14) Zot ti rezet Mesi e finalman zot ti touy li.—Akt 7:51-53.
12. Ki mannyer parol Zezi i montre ki Zeova ti’n rezet Izrael konman en nasyon ki ti’n ganny dedye avek li?
12 Detrwa zour avan son lanmor, Zezi ti dir bann sef relizye Zwif: “Zanmen zot in lir sa ki’n ekri? ‘Sa ros ki bann travayer ti rezete, in vin ros prensipal dan fondasyon! Sa travay ki Senyer in fer, pa i en mervey devan nou lizye.’ Se pour sa rezon ki mon dir zot, zot pou ganny arase Rwayonm Bondye, e ganny donnen a en lot nasyon ki pou prodwi son fri.” (Matye 21:42, 43) Pour montre ki Zeova ti’n rezet zot konman en nasyon ki ti’n ganny dedye avek Li, Zezi ti dir: “Zerizalenm, Zerizalenm, ou ki touy bann profet e saboul a kou-d-ros bann ki Bondye in anvoy kot ou! Konbyen fwa mon’n oule rasanble ou zanfan ansanm parey en mer-poul i rasanble son bann piti anba son lezel, me ou pa’n oule. Lala! ou lakaz aprezan in ganny abandonnen.”—Matye 23:37, 38.
Dedikasyon en nouvo Nasyon
13. Ki Zeova ti dir dan en fason profetik dan letan Zeremi?
13 Dan letan profet Zeremi, Zeova ti predir en keksoz nouvo an rapor avek son pep. Nou lir: “Se sa ki Zeova in dir: ‘Gete! Bann zour pe vini, e mon pou fer en nouvo lalyans avek lakaz Izrael ek lakaz Zida, pa en lalyans parey sa enn ki mon ti fer avek zot zanset letan mon ti atrap zot lanmen pour tir zot Lezip, “mon lalyans ki zot ti kase, menm si mon ti konman zot msye,” se sa ki Zeova i dir.’ Zeova in dir, ‘sa i lalyans ki mon pou fer avek lakaz Izrael apre sa bann zour. Mon pou met mon lalwa dan zot, e mon pou ekrir li dan zot leker. Mon pou vin zot Bondye, e zot pou vin mon pep.’”—Zeremi 31:31-33.
14. Kan e konman en nouvo nasyon ki ti’n dedye avek Zeova ti vin an egzistans? Lekel sa nouvo nasyon?
14 Kan Zezi ti mor lannen 33 N.L., e i ti prezant son Papa valer sa disan ki ti ganny verse, sa ti fondman sa nouvo lalyans. (Lik 22:20; Ebre 9:15, 24-26) Annefe, kan lespri sen ti ganny anvoye zour Lapannkot lannen 33 N.L., zour ki en nouvo nasyon ti ne, ‘Izrael Bondye,’ sa nouvo lalyans ti konmans fonksyonnen. (Galat 6:16; Romen 2:28, 29; 9:6; 11:25, 26) Kan i ti pe ekrir bann Kretyen swazir zapot Pyer ti dir: “Zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye. Ti annan en letan ki zot pa ti son pep, me aprezan zot in vin pep Bondye.” (1 Pyer 2:9, 10) Sa relasyon spesyal ki Zeova ti annan avek nasyon Izrael pa ti dire. Lannen 33 N.L., Zeova ti nepli beni nasyon Izrael me Izrael spirityel, savedir kongregasyon Kretyen, ‘en nasyon ki pe prodwi fri’ pour sa Rwayonm dan lanmen Kris.—Matye 21:43.
Dedikasyon personnel
15. Zour Lapannkot lannen 33 N.L., ki kalite batenm Pyer ti ankouraz sa bann ki ti pe ekout li pour pran?
15 Apre Lapannkot lannen 33 N.L., sak endividi, Zwif oubyen lezot ki pa Zwif ti pou bezwen fer en dedikasyon personnel avek Bondye. Apre zot ti pou bezwen batize “o non di-Per, di-Fis e di-Sent-Espri.” * (Matye 28:19) Zour Lapannkot zapot Pyer ti dir bann Zwif ek bann ki ti’n konverti ki ti pare pour ekoute: “Sanz zot lavi e ki sakenn ant zot i ganny batize o non Zezi-Kri pour ki zot ganny pardon zot bann pese. Alor zot a resevwar kado Bondye, Sent-Espri.” (Akt 2:38) Ler zot ti batize, bann Zwif ek bann ki ti’n konverti pa ti pe zis montre ki zot in dedye zot lavi avek Zeova, me osi ki zot in aksepte Zezi konman sa enn ki fer li posib pour Zeova pardonn zot zot pese. Zot ti pou bezwen rekonnet Zezi konman sa Gran Pret ki Zeova in swazir, konman zot Lider ek Sef kongregasyon Kretyen.—Kolosyen 1:13, 14, 18.
16. Ki mannyer bann Zwif ek lezot ki ti senser dan letan zapot Pol ti vin manm Izrael spirityel?
16 Plitar, zapot Pol ti dir: “Mon’n konmans prese dan Damas, apre avek zabitan Zerizalenm, e answit dan tou bann rezyon Zide e osi parmi lezot nasyon, e demann zot pour sanz zot lavi pese e retourn ver Bondye e pratik bann keksoz ki montre vreman ki zot in repanti.” (Akt 26:20) Apre ki Pol ti’n konvenk bann Zwif ek lezot ki pa Zwif ki Zezi ti sa Mesi, i ti ed zot pour dedye zot lavi e batize. (Akt 16:14, 15, 31-33; 17:3, 4; 18:8) Kan zot ti al ver Bondye, sa bann nouvo disip ti vin bann manm Izrael spirityel.
17. Kwa ki pa reste bokou letan pour arive e ki sa keksoz ki pa pe tarde pour arive?
17 Ozordi i pa reste bokou letan avan ki bann manm Izrael spirityel ki ankor lo later i ganny sele. Kan zot tou zot in fini ganny sele, sa “kat lanz” ki pe tyonbo sa divan destriksyon, ki pou lans ‘gran ladetres,’ pou ganny demande pour larg sa divan destriksyon. Antretan, sa “gran lafoul” ki annan lespwar pour viv pour touzour lo later pa pe tarde pour ganny rasanble. Sa bann ‘lezot mouton’ i volonterman demontre lafwa dan “disan Lanyo” e batize pour montre ki zot in dedye zot lavi avek Zeova. (Revelasyon 7:1-4, 9-15; 22:17; Zan 10:16; Matye 28:19, 20) Parmi zot i annan en kantite zenn ki’n grandi dan laverite. Si ou enn parmi sa bann zenn ou pou enterese pour lir sa lot lartik.
[Not anba lo paz]
^ par. 15 Vwar Latour Veyer, 15 Me, 2003, paz 30-1 an Angle oubyen Franse.
Revizyon
• Akoz bann zenn Izraelit pa ti bezwen fer en dedikasyon personnel avek Zeova?
• Ki mannyer bann Izraelit ti kapab montre ki zot ti pe viv an akor avek zot dedikasyon?
• Akoz Zeova ti rezet Izrael konman son nasyon ki ti’n dedye avek li, e konman i ti ganny ranplase?
• Depi Lapannkot lannen 33 N.L., ki bann Zwif ek lezot ki pa ti Zwif ti bezwen fer pour vin bann manm Izrael spirityel?
[Kestyon]
[Portre lo paz 23]
Bann zenn Izraelit ti ne dan en nasyon ki Bondye ti’n swazir
[Portre lo paz 25]
Sak Izraelit ti bezwen fer en desizyon pour servi Bondye
[Portre lo paz 25]
Lofrann volonter ti donn bann Izraelit sa loportinite pour montre ki zot kontan Zeova
[Portre lo paz 27]
Apre Lapannkot lannen 33 N.L., sak disip Kris ti bezwen fer en dedikasyon avek Bondye e apre batize pour montre ki zot in dedye zot lavi