Trouv Laverite

ITI le 18 Desanm 1810. Fernwanr ti a pe fer. Dan en gro move tan lo en lanmer lwen avek sides Lekos, en korvet Angle, HMS Pallas, ti’n perdi direksyon. Vi ki i ti pe vin pli fernwanr e lanez ti pe tonbe, sa ti fer li pli difisil pour bann manm lekipaz vwar kote far i ete pour zot kapab ariv ater sen e sof. Esey mazin sa soulazman ki zot ti’n bezwen santi ler zot ti vwar lalimyer e diriz bato ver sa direksyon! Me malerezman i pa ti sa vre lalimyer ki zot ti bezwen pour gid zot. Sa ti en dife ki bann travayer ti’n alimen obor lakot. Akoz sa, Pallas ti al rann lapel lo bann ros e kraz net. Onz maren abor ti noye. Pa sa i vreman fer lapenn!

Dan ka Pallas, zis en fot ti anmenn maler. Me parfwa bann maren i bezwen fer fas avek en pli gro danze ki sa. Sa i bann far ki’n ganny mete par ekspre pour tronp zot. Dapre liv Wrecks, Wreckers and Rescuers, sa bann far ti ganny mete avek bi pour fer bann bato al kraz lo bann ros pour zot bann keksoz ganny vole.

‘Lekritir sen i kapab sov ou Lavi’

Kan ou pe fer resers pour trouv laverite, ou kapab fer fas avek bann menm danze ki sa bann maren in rankontre. Ou kapab aksepte en fo lenformasyon oubyen menm les ou ganny anbete. Tou le de i kapab anmenn move rezilta. Konman ou kapab protez ou lekor? Fer sir sours kot ou lenformasyon i sorti pour konn laverite, i vre e ou kapab annan konfyans ladan. Pour plis ki 125 an, sa magazin in defann Labib, ki’n ganny enspire par Bondye, konman sa sours ki nou pli kapab depan lo la pour trouv laverite. Sa i akoz Labib i kontyen “bann lekritir sakre ki kapab fer ou vin saz e sov ou lavi.”—2 Timote 3:15-17, New English Bible.

Byensir, pour ou kapab annan konfyans dan Labib e vwar li konman en lalimyer ki kapab gid ou, ou bezwen verifye si i vre. (Psonm 119:105; Proverb 14:15) Pa ezite pour ekrir bann ki pibliy sa magazin, si ou  oule plis lenformasyon ki’n konvenk plizyer milyon dimoun ki Labib i vreman enspire par Bondye. Par egzanp, ou kapab lir sa brosir A book for All People. * Dan sa brosir i annan en kantite lenformasyon ki montre ki Labib i egzakt, vre, e ki i’n ganny enspire.

Bann Laverite fondamantal

Lekel serten sa bann laverite fondamantal ki annan dan “lekritir sakre?” Annou konsider serten legzanp:

I annan zis en sel Bondye Tou pwisan ek Kreater ki’n fer tou keksoz. (Zenez 1:1) Si nou vivan ozordi i gras akoz Bondye in “kree tou keksoz” e i’n donn nou lavi. (Revelasyon 4:11) Se pour sa rezon nou merite ador zis li tousel. Nou Kreater i sa pli gran Sours tou laverite. (Psonm 36:9; Izai 30:20, 21; 48:17, 18) I annan en non, e i anvi nou servi son non. (Egzod 3:15) Sa non an Ebre ki’n ganny ekrir avek kat konsonn, e ki an Angle i YHWH, i aparet apepre 7,000 fwa dan Labib. An Kreol i ganny prononse konman “Zeova.”—Psonm 83:18.

Zeova ti kree zonm ek fanm pour viv pour touzour dan Paradi lo later. I’n kree imen avek bann kalite spirityel parey li i annan. I’n donn zot talan ek abilite pour ki zot kapab rezwir en lavi satisfezan e pour touzour isi lo later. (Zenez 1:26-28) Zeova pa’n kree later pour prepar imen pour al viv konman bann lespri dan lesyel apre, konmsi fodre ekspreseman al dan lesyel pour kapab annan en relasyon avek Bondye.

Ti napa nanryen mal avek sa de premye imen ki Bondye ti kree. Lemal ti konmanse kan serten kreasyon Bondye, savedir imen ek lanz, ti mal servi zot liberte e rebel kont Bondye. (Deterononm 32:5) Nou premye paran ti deside pour swazir zot menm kwa ki byen e kwa ki mal. (Zenez 2:17; 3:1-5) Sa ti anmenn lanmor lo zot desandans. (Zenez 3:19; Romen 5:12) Pour kapab rezourd bann problenm ki sa rebelyon ti’n anmennen, Zeova ti deside permet mesanste pour en pe letan. Me i pa’n sanz son plan pour later ek imen. (Izai 45:18) Alors, en zour imen pou reste pour touzour lo en later prop ki pou’n vin en Paradi.—Matye 6:10; Revelasyon 21:1-5.

Zezi Kri pa Bondye Tou pwisan, me Garson Bondye. Zezi Kri li menm ti ansenny son bann disip pour priye: “Nou Papa ki dan lesyel ki ou non sen i ganny glorifye.” (Matye 6:9) Zanmen Zezi ti dir ki i egal avek Bondye. Okontrer i ti dir: ‘Papa i pli gran ki mwan.’—Zan 14:28.

Zezi i annan en rol tre enportan pour zwe dan plan Bondye. Bondye ti anvoy li “dan lemonn konman lalimyer pour ki tou sa ki krwar dan [li] i pa reste dan fernwanr.” (Zan 12:46) Zapot Pyer ti dir ki “napa okenn lot non dan lemonn ki Bondye in donnen par lekel nou kapab ganny sove.” (Akt 4:12) Sa i vre akoz nou delivrans i depan lo disan  presye Zezi. (1 Pyer 1:18, 19) Zezi Kri ti donn son lavi konman en sakrifis pour sov imen dan pese ki nou premye paran, Adan ek Ev, in anmennen lo nou. (Matye 20:28; 1 Timote 2:6) Bondye ti osi servi Zezi pour revel Son lavolonte ek plan.—Zan 8:12, 32, 46, 47; 14:6; Akt 26:23.

Bondye in etabli en Rwayonm dan lesyel, oubyen en gouvernman kot Zezi Kri ek lezot imen ki’n ganny swazir lo later i form par ladan. Toudilon dan Labib sa tenm i aparet. Bondye in konfye sa gouvernman sa responsabilite pour fer sir ki son lavolonte i ganny fer lo later parey dan lesyel. (Matye 6:10) I pa ti dan plan Bondye pour serten imen al dan lesyel. Zot ti pou reste lo later. Me apre ki nou premye paran ti fer pese, Bondye ti plàn en nouvo keksoz. I ti fer sa laranzman pour swazir dimoun sorti dan “tou ras, tou langaz, tou pep ek tou nasyon . . . pou rennyen” avek Kris dan en gouvernman dan lesyel. (Revelasyon 5:9, 10) Byento sa Rwayonm oubyen gouvernman, pou “kraz e met en lafen” avek tou sort kalite dominasyon imen ki’n anmenn en kantite soufrans ek douler lo limanite.—Danyel 2:44.

Nanm i mor. Sa laverite fondamantal dan Labib i donn nou bokou leklersisman lo imen ek son lespwar. I osi retir sa mal konprenezon ek fo lenformasyon ki’n konfiz dimoun.

Premye liv Labib i dir nou: “Zeova ti alor form zonm avek lapousyer sorti dan later e i ti soufle souf lavi dan son nennen, e sa zonm ti vin en nanm vivan.” (Zenez 2:7) Eski ou konpran ki savedir sa? Nanm i pa en keksoz ki egziste dan nou lekor. Imen napa en nanm. Li menm i en nanm, i’n ganny fer avek bann diferan eleman “dan later” ek sa lafors lavi ki sorti kot Bondye. Nanm i mor. Ler nou mor, nanm i mor.—Zenez 3:19; Eklezyast 9:5, 10.

Sa bann ki’n mor i kapab ganny resisite. Kan sa letan kot Bondye in permet mesanste pour egziste, i fini, “tou bann mor ki dan tonbo pou tann lavwa [Zezi,] e zot pou sorti dan zot tonbo. Bann ki’n fer sa ki byen, pou resisite pour resevwar lavi, me bann ki’n fer sa ki mal pou resisite pou ganny kondannen.” (Zan 5:28, 29; Akt 24:15) Rezireksyon pou permet bann dimoun reviv ankor, safwasi dan en paradi lo later, e zot pou viv sa kalite lavi ki Bondye ti oule pour nou depi okonmansman.

 Toulezour byen etidye Lekritir

Eski ou vwar ki mannyer en konnesans lo sa bann laverite fondamantal i kapab ed ou? Dan sa letan kritik, ranpli avek move tan, en tel konnesans i kapab protez ou kont bann “fo largiman ki zot apel konnesans,” ki Satan i promote. Satan i degiz li “konman lanz lalimyer,” e son bann serviter i osi degiz “konman serviter lazistis.” (1 Timote 6:20; 2 Korentyen 11:13-15) En konnesans egzakt lo Labib i kapab protez ou kont bann swadizan konnesans baze lo bann lide filozofi ki “bann dimoun malen e entelizan” ki’n “rezet parol Zeova” in adopte.—Matye 11:25; Zeremi 8:9.

Vi ki ti annan en kantite fo lansennyman ek lide filozofi dan son letan, zapot Zan ti averti bann Kretyen dan premye syek: “Pa bezwen krwar tou sa ki pretann ki i posed lespri.” I ti dir zot: “Teste zot pour verifye si lespri ki zot posede i sorti kot Bondye.” (1 Zan 4:1, nou ki’n met an italik) Reflesir en kou lo sa. Meton ou ti ganny en mesaz ki kapab annan en gro lefe lo ou lavi, eski zis ou ti pou aksepte li koumsan menm san reflesir lo la, zis akoz i paret ki i’n sorti dan en bon sours? Byensir non. Ou pou rode kote i sorti, ki annan dan sa let avan ou fer sa ki i’n dir ou.

Bondye in fer li posib pour nou fer sa, savedir pour fer sir ki sa lalimyer ki pe gid nou, oubyen far, i enn ki vre. Nou kapab verifye tousala atraver Labib ki’n ganny enspire e ki kontyen bann laverite fondamantal. (1 Tesalonisyen 5:21) Bann dimoun dan premye syek ki ti annan en bon latitid ti ganny felisite akoz “toulezour zot ti etidye Lekritir” pour fer sir ki sa ki zot ti’n aprann ti vre. (Akt 17:11) Ou osi ou kapab fer parey. Les Labib gid ou ver vre sekirite, zis parey “en lalimyer ki briye dan en fernwanr.” (2 Pyer 1:19-21) Si ou fer sa, “ou pou trouv konnesans Bondye,” ki pou fer ou konn laverite.—Proverb 2:5.

[Not anba lo paz]

[Portre lo paz 4]

Parol Bondye i parey en lalanp

[Portre lo paz 5]

Ki mannyer Bondye i apele?

[Portre lo paz 5]

Ki lavenir i rezerve pour imen?

[Portre lo paz 6]

Eski Zezi i Bondye Tou pwisan?

[Portre lo paz 6]

Kote bann mor i ete?

[Portre lo paz 7]

Rezireksyon i enn bann laverite fondamantal ki Labib i ansennyen