Zenn, swazir pour servi Zeova

“Swazir pour zot menm ozordi lekel ki zot pou servi.”—ZOZYE 24:15.

1, 2. Ki kalite batenm bann larelizyon Kretyen in fer ki mal?

“LES bann [zanfan] vin Kretyen ler zot in konn Kris.” Sa i parol ki en ekriven ki apel Tertullian ti ekrir ver lafen dezyenm syek N.L. I ti pe koz kont batenm pti baba ki ti pe ganny byen etablir par sa bann dan son letan ki ti’n rezet vre lansennyman Kretyen. En pret ki apel Augustine pa ti dakor avek sa ki Tertullian ek sa ki Labib i dir, akoz i ti dir ki batenm pti baba i retir sa tas ki pese orizinal in anmennen e si en zanfan i mor san ki i’n batize, i pou ganny anvoye dan lanfer. Sa krwayans ti pous dimoun pour batiz zot pti baba oplivit posib apre ki zot ti’n ne.

² En kantite gran larelizyon Kretyen i ankor pe batiz bann pti baba. Deplis, toudilon listwar, bann dirizan ek sef relizye ki ti apel zot lekor Kretyen, ti obliz bann “payen” ki ti’n ganny konkerir pour batize. Me batenm pti baba oubyen batenm kot en adilt i ganny forse pa an akor avek Labib.

Dedikasyon i pa otomatik

3, 4. Kwa ki kapab ed bann zanfan pour zot osi volonterman dedye zot lavi avek Zeova parey zot paran?

³ Labib i fer resorti ki devan lizye Zeova, bann zanfan i sen menm si zis enn zot paran ki en vre Kretyen fidel. (1 Korentyen 7:14) Eski sa i fer sa bann zanfan vin bann serviter ki’n dedye zot lavi avek Zeova? Non. Parkont, bann zanfan ki’n grandi avek zot paran ki’n dedye zot lavi avek Zeova, i ganny sa formasyon ki kapab pous zot pour volonterman dedye zot lavi avek Zeova. Lerwa Salomon ki ti saz ti ekrir:  “O mon garson, obzerv komannman ou papa, e pa rezet lalwa ou manman. . . . Kan ou marse partou, i pou gid ou, kan ou dormi i pou vey ou, e kan ou leve i pou okip ou. Parski komannman i en lalanp, e lalwa i en lalimyer, e bann reprimann ki vin atraver disiplin i semen lavi.”—Proverb 6:20-23.

⁴ Konsey ki bann paran Kretyen i donnen i kapab protez bann zenn, si zis zot pare pour ekout sa bann konsey. Salomon ti osi dir: “En garson ki saz i fer son papa rezwir, e en garson ki bet i fer son manman sagren.” “Ou, O mon garson, ekoute e vin saz, diriz ou leker lo semen.” (Proverb 10:1; 23:19) Wi zenn, pour ou kapab benefisye avek sa formasyon ki ou paran pe donn ou, ou bezwen pare pour aksepte zot konsey ek disiplin. Ou pa’n ne avek lasazes, me kantmenm sa ou kapab “vin saz” si ou volonterman pare pour swiv “semen lavi.”

Ki savedir Lenstriksyon Zeova?

5. Ki konsey Pol ti donn bann papa ek zanfan?

⁵ Zapot Pol ti ekrir: “Zanfan, i zot devwar obei zot paran dan Senyer, akoz sa i byen. ‘Respekte zot papa ek zot manman’: Sa i premye komannman avek en promes; ‘Pour ki ou a viv ere e lontan lo later.’ Zot, bann papa, pa eksit lakoler zot zanfan, me okontrer, elve zot dan en ledikasyon ek lenstriksyon Senyer.”—Efezyen 6:1-4.

6, 7. Ki i enplike pour enstri en zanfan dan “lenstriksyon Senyer,” e akoz sa pa vedir ki bann paran pe fors zot zanfan?

⁶ Eski bann paran Kretyen pe fors zot zanfan ler zot pe elve zot “dan ledikasyon oubyen lenstriksyon Senyer”? Be ditou. Lekel ki kapab kritik bann paran pour ansenny zot zanfan sa ki zot zot vwar i byen e akseptab moralman? Bann ki pa krwar dan Bondye pa ganny kritike pour ansenny zot zanfan ki Bondye pa egziste. Bann Katolik Romen i vwar li en lobligasyon pour elve zot zanfan dapre krwayans Katolik, e pa souvan ki zot ganny kritike pour fer sa. Pareyman, bann Temwen Zeova pa devret ganny akize konmkwa zot pe anbet zot zanfan zis akoz zot pe enstri zot pour annan menm pwennvi avek Zeova lo bann laverite debaz ek prensip moral.

⁷ Dapre Theological Dictionary of the New Testament, sa mo Grek ki’n ganny tradwir “lenstriksyon Senyer” dan Efezyen 6:4 dan Nouvo Testaman, i refer avek en prosesis kot ou pe fer “zefor pour koriz fason ki en dimoun i panse, pour retir sa ki mal e met sa ki byen dan li, pour ed en dimoun annan en pli bon spirityalite.” Me si en zenn pa aksepte sa formasyon ki son paran i donn li akoz sa presyon ki lezot zenn dan son laz i mete lo li pour li fer parey zot? Lekel ki nou pou dir pe met presyon lo sa zenn, sa paran oubyen bann lezot zenn? Si lezot zenn pe ankouraz en zenn Kretyen pour pran drog, bwar en kantite, fer sèks, eski bann paran i devret ganny kritike pour esey aziste pwennvi zot zanfan e ed zot realize ki konsekans sa bann move kondwit i kapab anmennen?

8. Konman Timote ti ganny ‘persyade’ pour krwar?

⁸ Zapot Pol ti ekrir zenn Timote: “Me ou, reste ferm dan sa ki ou’n aprann, e dan sa ki [ou ti ganny persyade pour] krwar: ou konnen ou menm avek ki ou’n ganny sa lansennyman. Depi ou lanfans ou konn Lekritir sakre, ki kapab donn ou lasazes ki kondir dan lavi eternel par lafwa dan Kris Zezi.” (2 Timote 3:14, 15) Depi ki Timote ti ankor pti pti, son manman ek granmanman ti ed li annan en lafwa solid dan Bondye par etidye Lekritir Sen avek li. (Akt  16:1; 2 Timote 1:5) Plitar, kan zot ti vin Kretyen, zot pa ti fors Timote pour krwar sa ki zot krwar, me zot ti ‘persyad’ li pour krwar, par rezonn avek li lo Lekritir.

Zeova i envit ou pour fer en Swa

9. (a) Ki mannyer Zeova in kree nou e akoz? (b) Ki mannyer sel Garson Bondye ti servi son liberte?

⁹ Zeova ti’n kapab kree nou parey bann robot, progranm nou pour fer son lavolonte, san okenn swa me pour zis servi li. Me i pa’n fer sa, i’n les nou lib. Nou Bondye i anvi ki nou servi li akoz nou ki anvi. I fer li plezir kan i vwar son bann zanfan, zenn konman vye pe servi li akoz zot kontan li. Son sel Garson ki i ti kree li tousel, in kit en zoli legzanp an sa ki konsern soumisyon anver lavolonte Bondye. Zeova ti dir sa lo li: “Sa mon Garson byenneme, ki donn mwan bokou lazwa.” (Matye 3:17) Zezi ti dir avek son Papa: “O mon Bondye, mon’n pran plezir pour fer ou lavolonte, e ou lalwa i oprofon dan mwan.”—Psonm 40:8; Ebre 10:9, 10.

10. Ki nou bezwen fer pour byen servi Zeova?

¹⁰ Zeova i ekspekte sa bann ki pe servi anba direksyon son Garson pour demontre sa menm leta lespri, savedir pour volonterman soumet avek Son lavolonte. Dan en fason profetik en psalmis ti sante: “Ou pep pou ofer zot lekor volonterman zour ou lafors militer. Parey laroze dan granmaten, ou annan ou latroup zenn zan ki zoli akoz zot sen.” (Psonm 110:3) Lorganizasyon Zeova, ki swa sa parti dan lesyel oubyen lo later, pe al an avan akoz avek lanmour i soumet avek lavolonte Bondye.

11. Ki swa bann zenn ki zot paran i Temwen i kapab fer?

¹¹ Alors zenn, ou bezwen realize ki ou paran oubyen bann ansyen dan kongregasyon pa pou zanmen fors ou pour batize. Ou menm ki bezwen anvi servi Zeova. Zozye ti dir bann Izraelit: “Servi [Zeova] dan en fason san defo e dan laverite . . . Swazir pour zot menm ozordi lekel ki zot pou servi.” (Zozye 24:14-22) Pareyman, ou menm ki bezwen swazir pour dedye ou lavi avek Zeova e fer tou sa ki ou kapab pour fer son lavolonte.

Pran ou Responsabilite

12. (a) Menm si bann paran i kapab form zot zanfan, ki zot pa kapab fer pour zot? (b) Kan ki en zenn i responsab devan Zeova pour bann swa ki i fer?

¹² Zenn, i pou ariv en letan kot ou pou nepli ganny proteze par fidelite ou paran. (1 Korentyen 7:14) Disip Zak ti ekrir: “Tou dimoun ki konn sa ki byen ki i devre fer e ki pa fer li, i koupab, i komet en pese.” (Zak 4:17) Bann paran pa kapab servi Bondye pour zot zanfan zis parey bann zanfan pa kapab servi Bondye pour zot paran. (Ezekyel 18:20) Eski ou’n konn Zeova ek son plan? Eski ou ase gran pour konpran sa ki ou’n aprann, e pour konmans en relasyon avek Zeova? Alor pa i lozik pour konklir ki Bondye i vwar ki ou kapab servi li!

13. Ki kestyon bann zenn adolesan ki pa ankor batize i devret demann zot lekor?

¹³ Eski ou en zenn ki ou paran i Temwen, ou pa ankor batize, me ou pe asiste bann renyon e ou pe menm pres sa bon nouvel Rwayonm? Si wi, onnetman demann ou  lekor: ‘Akoz mon pe fer tousala?’ Eski mon pe fer li akoz mon paran i oule mon fer li, oubyen akoz mwan ki anvi fer plezir Zeova? Eski ou menm ou “konpran lavolonte Bondye: Sa ki bon, sa ki fer li plezir”?—Romen 12:2.

Akoz ezite pour batize?

14. Ki legzanp dan Labib ki montre ki en dimoun pa devret ezite pour batize?

¹⁴ “Napa okenn rezon ki anpes mwan ganny batize.” Sa Etyopyen ki ti dir sa parol avek Filip, en evanzelizater, ti’n fek konnen ki Zezi i Mesi. Me sa Etyopyen ti annan sifizaman konnesans lo Lekritir pour li realize ki i pa devret ezite pour montre piblikman ki depi sa zour i pou zwenn kongregasyon Kretyen pour servi Zeova. E sa ti anmenn bokou lazwa pour li. (Akt 8:26-39) Pareyman apre ki en madanm ki ti apel Lydia ti’n “ekout byen tou sa ki Pol ti pe dir,” deswit apre, li ek son fanmiy “ti batize.” (Akt 16:14, 15) En lot legzanp ti en gard prizon dan lavil Filip ki ti ekout Pol ek Silas anmezir ki zot ti “anons li Parol Senyer.” E “deswit li ek son fanmiy antye ti ganny batize.” (Akt 16:25-34) Si ou annan en konnesans debaz lo Zeova ek son plan, ou senserman anvi fer son lavolonte, ou annan en bon repitasyon dan kongregasyon, ou asiste tou renyon e ou pe prese, pour ki rezon ou ezite batize?—Matye 28:19, 20.

15, 16. (a) Kwa ki kapab anpes serten zenn batize? (b) Ki mannyer dedikasyon ek batenm i kapab protez bann zenn?

¹⁵ Eski ou ezite pour batize pangar ou a fer en keksoz mal apre? Si wi, reflesir en kou lo sa: Eski ou ti pou refize rod en laysenns pour dray zis akoz ou per pangar en zour ou a fer aksidan? Definitivman non! Alors, ou pa devret ezite pour batize si ou kalifye. Anfet, si ou’n dedye ou lavi avek Zeova e ou’n dakor pour fer son lavolonte, ou pou santi ou ganny pouse pour fer tou sa ki ou kapab pour reziste sa ki mal. (Filipyen 4:13) Zenn, pa krwar ki ler ou ezite pour batize sa i vedir ki ou pa pou rann kont pour sa ki ou pe fer. Ler ou’n ariv en laz kot ou kapab pran ou responsabilite, ou pou bezwen rann kont Zeova pour lafason ki ou viv, ki swa ou’n batize oubyen non.—Romen 14:11, 12.

¹⁶ En kantite Temwen Zeova partou dan lemonn, i santi ki zot desizyon pour batize byen zenn ti ed zot en kantite. Annou pran par egzanp en zenn Temwen dan Was Lerop ki annan 23 zan. I dir ki lefe ki i ti batize alaz 13 zan, sa ti motiv li pour fer byen atansyon ki i pa ganny anbete par “sa bann pasyon lazenes.” (2 Timote 2:22) Depi byen pti i ti annan sa lobzektif pour  vin en serviter aplentan. Ozordi, avek lazwa i pe servi dan enn bann biro brans Temwen Zeova. Bann zenn ki deside pour servi Zeova pou ganny en kantite benediksyon, enkli ou osi.

17. Dan ki laspe nou lavi i enportan pour nou ‘konpran konman Zeova i oule nou azir’?

¹⁷ Dedikasyon ek batenm i konmansman en nouvo lavi, kot nou pran an konsiderasyon lavolonte Zeova dan tou sa ki nou fer. Nou bezwen fer letan pour kapab akonpli nou dedikasyon. Ki mannyer nou fer sa? Dan plas fer bann keksoz initil, nou kapab servi sa letan pour etidye Labib seryezman, pour asiste tou renyon, e fer tou sa ki nou kapab pour pres sa “Bonn Nouvel Rwayonm.” (Efezyen 5:15, 16; Matye 24:14) Kan nou’n dedye nou lavi avek Zeova e nou anvi fer son lavolonte sa pou benefisye nou dan tou laspe nou lavi. Par egzanp dan lafason ki nou detann, sa ki nou manze e bwar, ek kalite lanmizik ki nou ekoute. Akoz ou pa swazir bann aktivite pour detann ki ou pou kapab fer pour leternite? Plizyer milye zenn Temwen ki zwaye, pou dir ou ki i annan en kantite fason pour anmize san ki nou bezwen al kont lafason ki ‘Zeova i oule nou azir.’—Efezyen 5:1, 7-19.

“Nou pou al avek zot”

18. Ki kestyon bann zenn i devret demann zot lekor?

¹⁸ Depi 1513 A.N.L. ziska zour Lapannkot lannen 33 N.L., Zeova ti annan en pep organize lo later ki i ti’n swazir pour ki zot ador li e vin son bann Temwen. (Izai 43:12) Bann zenn Izraelit ti ne dan sa nasyon. Me depi zour Lapannkot, Zeova ti annan en nouvo “nasyon” lo later, sa i Izrael spirityel, “en pep pour son non.” (1 Pyer 2:9, 10; Akt 15:14; Galat 6:16) Zapot Pol ti dir ki Kris in pirifye pour li menm “en pep ki apartenir a li, en pep zele pour fer dibyen.” (Tit 2:14) Zot bann zenn, zot lib pour rode kote sa pep i ete. Lekel ozordi ki sa “nasyon drwat ki pe kontinyen kondwir li fidelman,” e ki pe anmenn zot lavi dapre bann prensip Labib? Lekel ki pe fidelman rann temwannyaz lo Zeova e ki pe fer dimoun konnen ki son Rwayonm i sa sel lespwar pour limanite? (Izai 26:2-4) Get bann larelizyon Kretyen ek lezot larelizyon, apre konpar sa ki zot fer avek sa ki Labib i demann bann vre serviter Bondye pour fer.

19. Ki plizyer milyon dimoun dan lemonn antye in arive konvenki?

¹⁹ Plizyer milyon dimoun dan lemonn, enkli bann zenn, in konvenki ki bann Kretyen swazir parmi bann Temwen Zeova ki ankor lo later, se zot menm sa “nasyon drwat” ozordi. Zot dir avek Izrael spirityel: “Nou pou al avek zot, akoz nou’n antann ki Bondye i avek zot.” (Zekarya 8:23) Avek tou nou leker nou swete e priye ki zot bann zenn, zot pou deside pour servi Zeova ansanm avek son pep e “swazir lavi,” savedir lavi eternel dan nouvo lemonn ki Zeova pou etablir.—Deterononm 30:15-20; 2 Pyer 3:11-13.

Revizyon

• Ki i enplike pour enstri zanfan dan lenstriksyon Senyer?

• Ki kalite servis ki fer plezir Zeova?

• Ki swa tou bann zenn ki zot paran i Temwen i kapab fer?

• Akoz i pa bon pour toultan anvoy batenm pour en lot zour?

[Kestyon]

[Portre lo paz 28]

Lekel ki ou pou ekoute?

[Portre lo paz 30]

Ki mannyer dedikasyon ek batenm i kapab protez ou?

[Portre lo paz 31]

Kwa ki anpes ou batize?