Annan Lakrent pour Zeova e ou pou ere!

“Ere sa zonm ki annan lakrent pour Zeova.”—PSONM 112:1.

1, 2. Ki lakrent pour Zeova i kapab anmennen?

BONER pa vin fasilman. Nou kapab trouv vre boner akondisyon nou fer bann bon swa, fer sa ki byen e rezet sa ki mal. Nou Kreater, Zeova, in donn nou son Parol, Labib, pour ansenny nou ki mannyer pour rezwir sa pli bon fason viv. Ler nou rod e swiv gidans Zeova, savedir annan lakrent pour li, nou kapab vreman satisfe e ere.—Psonm 23:1; Proverb 14:26.

² Dan sa lartik, nou pou vwar bann legzanp dan letan Labib ek nou letan ki montre ki mannyer vre lakrent pour Bondye i ed en dimoun reziste presyon pour fer sa ki mal e donn li kouraz pour fer sa ki byen. Nou pou vwar ki lakrent pour Bondye i kapab fer nou ere par pous nou pour koriz en move kondwit, parey Lerwa David ti bezwen fer. Nou pou osi vwar ki lakrent pour Zeova i en leritaz tre presye ki bann paran i kapab pas avek zot zanfan. Wi, Parol Bondye i asir nou: “Ere sa zonm ki annan lakrent pour Zeova.”—Psonm 112:1.

Retrouv Boner

3. Apre ki David ti fer pese, kwa ki ti ed li pour rekipere?

³ Parey nou’n vwar dan lartik avan, trwa fwa David pa ti arive montre en bon lakrent pour Bondye e i ti fer pese. Me fason ki i ti reazir anver disiplin Zeova i montre ki kantmenm sa i ti en dimoun ki ti annan lakrent pour Bondye. Son profon respe pour Bondye ti pous li pour admet e koriz son fot e reganny en bon relasyon avek Zeova. Menm si son bann fot ti fer li ek lezot soufer, son repantans senser ti fer li kontinyen ganny led ek benediksyon Zeova. Legzanp David i kapab sirman ankouraz  bann Kretyen ki kapab fer serten pese grav ozordi.

4. Ki mannyer lakrent pour Bondye i kapab ed en dimoun retrouv boner?

⁴ Pran legzanp Sonja. * Menm si i ti en proklanmater aplentan, Sonja ti tonm dan move frekantasyon, i ti devlop en move konportman e i ti bezwen ganny retire dan kongregasyon. Ler i ti retourn alarezon, Sonja ti fer tou sa ki neseser pour repar son relasyon avek Zeova. Avek letan, i ti reganny aksepte dan kongregasyon. Malgre tousala, Sonja pa ti zanmen abandonn son dezir pour servi Zeova. Finalman, i ti revin en pionye ordiner. Plitar, i ti marye avek en ansyen egzanpler, e konmela i pe servi avek son msye dan kongregasyon. Menm si Sonja i regrete pour kit semen laverite pour en pe letan, i kontan ki son lakrent pour Bondye ti ed li retourn ver Zeova.

Plito soufer ki fer Pese

5, 6. Eksplike konman e akoz de fwa David ti evite touy Sail.

⁵ Byensir, i pli bon ler lakrent pour Bondye i ed en dimoun evite fer en pese grav. Sa ti leka avek David. Ler Sail ek trwa mil solda ti pe tay deryer David, a en serten moman zot ti antre dan sa menn kavern ki David ek son bann zonm ti pe kasyet. Bann zonm David ti ankouraz li pour touy Sail. Pa Zeova ti pe met lennmi David dan son lanmen? San fer tapaz, David ti al kot Sail ti ete e koup en morso son lenz. Menm si sa ki David ti fer pa ti fer ditor Sail, sa ti tourmant konsyans David, akoz i ti annan lakrent pour Bondye. David ti fer son bann zonm azite ale an dizan: “I pa posib, lo mon kote, dapre pwennvi Zeova, ki mon devret fer sa keksoz avek mon senyer, sa enn ki Zeova in swazir.” *—1 Samyel 24:1-7.

⁶ En lot fwa, Sail ti pe repoze pandan lannwit, e li ek tou son zonm ti tonm dan “en gran sonmey sorti kot Zeova.” David ek son neve brav Abisai ti antre omilye sa kan e zot ti ariv kot Sail ti pe dormi. Abisai ti anvi fer fini avek Sail deswit enn fwa pour tou. David ti anpes Abisai fer sa, par demann li: “Lekel ki’n deza anvoy son lanmen kont sa enn ki Zeova in swazir e i’n reste inosan?”—1 Samyel 26:9, 12.

7. Kwa ki ti anpes David fer pese?

⁷ Menm si de fwa David ti ganny loportinite pour touy Sail, akoz i pa ti fer li? Akoz i ti annan plis lakrent pour Zeova ki pour Sail. Akoz son lakrent pour Bondye, David ti pare pour soufer si neseser olye fer pese. (Ebre 11:25) I ti annan konfyans total dan lentere ki Zeova i annan pour Son pep e pour li personnelman. David ti konnen ki obeir e met konfyans dan Bondye ti pou anmenn boner ek benediksyon, tandis ki inyor Bondye ti pou fer li perdi son faver. (Psonm 65:4) David ti osi konnen ki Bondye ti pou akonpli Son promes pour fer li vin lerwa e pour retir Sail dan Son prop letan ek fason.—1 Samyel 26:10.

Lakrent pour Bondye i anmenn Boner

8. Ki mannyer konportman David anba presyon i servi konman en legzanp pour nou?

⁸ Konman Kretyen, nou kapab ekspekte persekisyon, ganny ridikilize ek lezot leprev. (Matye 24:9; 2 Pyer 3:3) Parler, nou kapab ganny difikilte avek lezot frer ek ser Kretyen. Me nou konnen ki Zeova i vwar tou keksoz, antann nou lapriyer e dan sa bon moman, i pou koriz keksoz dapre son lavolonte. (Romen 12:17-21; Ebre 4:16) Alor, olye per nou lennmi, nou annan lakrent pour Bondye e nou les li delivre nou. Parey David, nou pa revanze, nou pa ni fer konpromi bann prensip drwat pour evite soufer. Alafen, sa i anmenn boner. Me ki mannyer?

9. Mansyonn en legzanp ki mannyer lakrent pour Bondye i anmenn lazwa malgre persekisyon.

 ⁹ En misyonner depi lontan dan Lafrik i rakonte: “Mon mazin en serten manman ek son zenn fiy ki ti refize aste kart parti politik akoz zot pozisyon konman Kretyen. En group zonm ti maltret zot severman e apre dir zot al kot zot. Lo semen, sa manman ti esey konsol son fiy ki ti pe plere e pa ti pe konpran akoz sa in arive. Sa letan zot pa ti dan lazwa, me zot ti annan en konsyans kler. Plitar, zot ti kontan en kantite ki zot ti’n obeir Bondye. Si zot ti aste sa kart, sa lafoul ti pou dan lazwa. Sa bann zonm ti pou donn zot limonnad e danse otour zot toudilon semen ziska kot zot. Me sa fiy ek son manman ti pou vin sa de dimoun pli malere akoz zot ti pou konnen ki zot in fer konpromi.” Me zot pa ti santi koumsa akoz zot lakrent pour Bondye ti anpes zot fer konpromi.

10, 11. Ki bon rezilta en madanm ti gannyen apre ki i ti montre lakrent pour Bondye?

¹⁰ Montre lakrent pour Bondye i osi anmenn boner ler pe fer fas avek leprev ki enplik respe pour lavi ki sakre. Ler Mary ti pe al ganny son trwazyenm zanfan, dokter ti ankouraz li pour fer en avortman. Dokter ti dir li: “Ou sitiasyon i danzere. Nenport ler ou kapab ganny bann konplikasyon e mor dan lespas 24 er-d-tan. Apre sa baba osi pou mor. Antouleka, napa garanti ki sa pti baba pou normal.” Sa letan Mary ti pe etidye Labib avek Temwen Zeova me i pa ti ankor batize. Mary i dir: “Kantmenm sa, mon ti’n deside pour servi Zeova, e mon ti’n determinen pour obeir li nenport kwa ki arive.”—Egzod 21:22, 23.

¹¹ Pandan son lansentman, Mary ti kontinyen etidye Labib e okip son fanmiy. Finalman sa pti baba ti ne. Mary i rakonte: “Son nesans ti en pe pli difisil ki sa de premye, me ti napa gro konplikasyon.” Lakrent pour Bondye ti ed Mary gard en konsyans kler e en pe letan apre i ti batize. Anmezir sa pti baba ti grandi, li osi i ti aprann annan lakrent pour Zeova, e konmela i pe servi dan en biro brans Temwen Zeova.

Les Zeova fortifye ou

12. Ki mannyer lakrent pour Bondye ti fortifye David?

¹² Lakrent ki David ti annan pour Zeova pa ti zis anpes li fer sa ki mal. I ti fer li azir avek determinasyon e dan en fason saz dan bann sitiasyon difisil. Diran en lannen ek kat mwan, David ek son bann zonm ti bezwen sov Sail e al kasyet Ziklag dan teritwar Filisten. (1 Samyel 27:5-7) En fwa ler bann zonm pa ti dan lavil, bann bandi Amalekit ti bril sa lavil e pran bann madanm, zanfan ek zannimo. Ler zot ti retournen e vwar sa ki ti’n pase, David ek son bann zonm ti plere. Me deswit latristes ti vin lakoler, e bann zonm David ti oule saboul li avek ros. Menm si i ti anba presyon, David pa ti dezespere. (Proverb 24:10) Son lakrent pour Bondye ti pous li pour tourn ver Zeova, e i ti les Zeova fortifye li. Avek led Bondye, David ek son bann zonm ti reisi zwenn bann Amalekit e rekiper tou keksoz ki zot ti’n pran.—1 Samyel 30:1-20.

13, 14. Ki mannyer lakrent pour Bondye ti ed en Kretyen fer bon desizyon?

¹³ Ozordi osi bann serviter Bondye i fer fas avek sitiasyon kot zot bezwen met konfyans dan Zeova e pa per pour azir. Pran par egzanp Kristina. Ler i ti ankor zenn, Kristina ti etidye Labib avek Temwen Zeova. Me i ti anvi vin en pyanis ki fer bann konser, e i ti byen avanse dan sa domenn. Deplis, i pa ti santi li alez pour prese e alor i ti per pour aksepte sa responsabilite ki ti pou vin avek batenm. Anmezir Kristina ti kontinyen etidye Parol Bondye, i ti konmans santi son pouvwar. I ti pe aprann annan lakrent pour Zeova, e i ti realize ki Zeova i ekspekte son bann serviter pour kontan li avek tou zot leker, lespri, nanm, ek lafors. (Mark 12:30) Sa  ti pous li pour dedye son lavi avek Zeova e batize.

¹⁴ Kristina ti demann led Zeova pour li progrese spirityelman. Kristina i eksplike: “Mon ti konnen ki lavi en pyanis ki fer bann konser i enplik vwayaze konstaman ek kontra pour zwe apepre 400 konser dan en lannen. Alor mon ti deside vin en ansennyan pour siport mon lekor e servi konman en proklanmater aplentan.” Sa menm letan Kristina ti deza lo progranm pour fer son premye konser dan lasal pli popiler dan son pei. I rakonte: “Mon premye konser ti vin mon dernyen konser.” Depi sa, Kristina in marye avek en ansyen. Ozordi, zot pe servi dan en biro brans Temwen Zeova. I kontan ki Zeova ti donn li sa lafors pour fer sa bon desizyon e ki aprezan i kapab servi son letan ek lenerzi dan son servis.

En Leritaz presye

15. Ki David ti oule pas avek son zanfan, e ki mannyer i ti fer sa?

¹⁵ David ti ekrir: “Vini, bann garson, ekout mwan; mon pou ansenny zot lakrent pour Zeova.” (Psonm 34:11) Konman en papa, David ti oule pas avek son zanfan sa leritaz presye—en bon lakrent pour Zeova, en lakrent ki senser e ekilibre. Par son parol ek aksyon, David ti demontre ki Zeova i pa en Bondye sever e fer per, ki pe toultan veye si nou pe kas Son lalwa, me i en Papa ki annan lanmour, lafeksyon e pare pour pardonn Son bann zanfan lo later. David ti demande: “Lekel ki kapab konn son bann fo pa?” Apre David ti montre son konfyans ki Zeova pa pe toulezour tir lizye lo nou bann fot, an dizan: “Pirifye mwan avek keksoz mal ki ganny fer an kasyet.” David ti asire ki si i fer son mye, Zeova i kapab  trouv son parol ek panse akseptab.—Psonm 19:12, 14, Bible de Jérusalem.

16, 17. Ki mannyer bann paran i kapab ansenny zot zanfan lakrent pour Zeova?

¹⁶ David i en legzanp pour bann paran ozordi. Ralph ki ansanm avek son frer pe servi dan en biro brans Temwen Zeova i dir: “Nou paran ti elve nou dan en fason ki ti fer laverite gou. Ler nou ti ankor zenn, nou paran ti enkli nou ler zot ti koz lo bann aktivite kongregasyon, e nou ti devlop lantouzyasm pour laverite zis parey zot. Fason ki zot ti elve nou ti fer nou krwar ki nou kapab fer bann bon keksoz dan servis Zeova. Annefe, pour detrwa lannen nou fanmiy ti reste dan en pei kot i annan en gran bezwen pour proklanmater, e nou ti ede etablir bann nouvo kongregasyon.”

¹⁷ “I pa ti en bann lareg strik ki ti ed nou reste lo sa bon semen, me se ler nou ti vwar ki pour nou paran, Zeova ti reel e vreman vreman zantiy e bon. Zot ti oule konn Zeova pli byen e fer li plezir, e nou ti aprann atraver zot lakrent senser pour Bondye e zot lanmour pour li. Menm ler nou ti fer en keksoz mal, nou paran pa ti fer nou santi ki Zeova i nepli kontan nou; ni avek lakoler enpoz restriksyon ki pa neseser lo nou. Laplipar-di-tan, zot ti met nou asize e zis koz avek nou. Parler avek larm dan son lizye, manmi ti esey tous nou leker. E i ti marse. Nou ti aprann atraver parol ek aksyon nou paran ki lakrent pour Zeova i en zoli keksoz e i en lazwa ek en plezir pour vin enn son Temwen me pa en fardo.”—1 Zan 5:3.

18. Ki nou pou gannyen par annan lakrent pour sa vre Bondye?

¹⁸ Parmi bann “dernyen parol David,” nou lir: “Ler sa enn ki pe diriz bann imen i drwat, i pe diriz avek lakrent pour Bondye, alor i parey lalimyer dan bomaten, ler soley i leve.” (2 Samyel 23:1, 3, 4) Salomon ki ti garson e sikseser David ti konpran sa parol, akoz i ti demann Zeova pour donn li “en leker obeisan” ek abilite “pour konpran sa ki byen ek sa ki mal.” (1 Lerwa 3:9) Salomon ti realize ki annan lakrent pour Zeova i anmenn lasazes ek boner. Plitar, i ti rezim liv Eklezyast avek sa bann parol: “Konklizyon apre ki tou keksoz in ganny tande, i: Annan lakrent pour sa vre Bondye e gard son bann komannman. Akoz sa i tou lobligasyon zonm. Akoz sa vre Bondye li menm pou ziz tou kalite aktivite an rapor avek tou keksoz kasyet, si i bon oubyen move.” (Eklezyast 12:13, 14) Si nou pran aker sa konsey, nou pou vreman vwar ki “limilite ek lakrent pour Zeova i anmenn” pa zis lasazes ek boner me osi “larises ek laglwar e lavi.”—Proverb 22:4.

19. Kwa ki pou ed nou konpran “lakrent pour Zeova”?

¹⁹ Atraver bann legzanp dan Labib ek ozordi, nou vwar ki en bon lakrent pour Bondye i zwe en rol pozitif dan lavi bann vre serviter Zeova. Nou’n vwar ki lakrent pa zis anpes nou fer sa ki nou Papa dan lesyel pa kontan me i osi donn nou kouraz pour fer fas avek nou lennmi ek lafors pour andir leprev ek difikilte ki nou rankontre. Alors, zenn konman vye, annou fer en gro zefor pour etidye Parol Bondye, reflesir lo sa ki nou aprann, e vin pros avek Zeova atraver lapriyer senser. Ler nou fer sa, nou pa pou zis trouv “konnesans Bondye” me osi konpran “lakrent pour Zeova.”—Proverb 2:1-5.

[Not anba lo paz]

Eski ou kapab eksplike?

Ki mannyer lakrent pour Bondye i kapab

• ed en dimoun pour rekipere apre ki i’n fer en pese grav?

• anmenn lazwa dan moman leprev ek persekisyon?

• donn nou lafors pour fer lavolonte Bondye?

• vin en leritaz presye pour nou zanfan?

[Kestyon]

[Portre lo paz 28]

Lakrent pour Zeova ti anpes David touy Lerwa Sail

[Portre lo paz 31]

Lakrent pour Bondye i en leritaz presye ki paran i kapab pas avek zot zanfan