Dinite Imen-en Drwa ki souvan ganny vyole

“Pli mon ti aprann en nouvo keksoz lo lavi dan kan, pli mon ti eksperyans imilyasyon ek mank respe pour mon dinite.”—MAGDALENA KUSSEROW REUTER, EN SIRVIVAN KAN KONSANTRASYON NAZI.

SA BANN atrosite terib ki ti arive dan kan konsantrasyon Nazi pandan Dezyenm Lager Mondyal, pa ti ni konmansman oubyen finisyon vyolasyon dinite imen. Kan nou get dan lepase e sa ki pe arive ozordi, konklizyon ki nou tire i kler: “Imilyasyon ek mank respe pour dinite imen,” i en keksoz ki en bann letan i egziste e i ankor pe kontinyen.

Anfet, i’n annan plis vyolasyon dinite imen, ki sa kantite kriyote ki’n arive dan listwar limanite. Souvannfwa dinite imen i ganny vyole dan en fason ki pa fasil pour rekonnet. Imazin en zanfan ki ganny sikannen zis akoz i annan serten defo avek son lekor. Oubyen en imigran ki ganny sikannen akoz son koutim i “pa parey” avek sa pei kot i pe reste. Ouswa en dimoun i vin viktim diskriminasyon akoz son kouler oubyen nasyonalite. Sa bann ki tret zot kanmarad dan sa fason i kapab krwar sa ki zot pe fer i gou. Me sa douler ek imilyasyon ki sa i anmennen pour bann viktim, i pa fer zot riye.—Proverb 26:18, 19.

Kisisa Dinite?

En diksyonner i dir ki dinite i kan ‘en dimoun i santi ki i annan valer, i ganny onore e respekte.’ Alors, dinite i enplik lafason ki nou get nou  lekor ek lafason ki lezot i azir anver nou. Menm si i annan en kantite keksoz ki kapab afekte lafason nou get nou lekor, me lafason ki lezot i vwar e tret nou i annan en gro lefe lo nou valer dan lavi.

Dan tou pei i annan serten dimoun ki pov, bann ki san defans e ki vilnerab. Me i pa zot sitiasyon ki neseserman fer zot santi ki zot dinite pe ganny vyole. Okontrer i latitid ek reaksyon lezot ki kapab fer en dimoun santi ki son dinite pa pe ganny respekte. Sa ki fer lapenn, se ki laplipar-di-tan dimoun dan bann sitiasyon deplorab ki zot dinite i ganny vyole, ki swa dan en pti oubyen gro fason. “Ou en bon nanryen” oubyen, “ou pa konn fer nanryen.” Konbyen fwa nou’n tann bann dimoun aze, bann pov ek bann ki malad ki swa mantalman oubyen fizikman ganny abize dan sa fason!

Akoz dimoun i abes son kanmarad? Eski sa drwa pour dinite imen ganny respekte pou vin en realite en zour? Sa lot lartik pou donn nou en bon larepons ki sorti dan Parol Bondye.