Dinite tou Dimoun pou ganny respekte
Dinite tou Dimoun pou ganny respekte
“Nou bezwen konstri en nouvo lemonn, enn ki bokou pli meyer ki sa, en lemonn kot dinite imen i ganny respekte pour touzour.”—PREZIDAN LANMERIK, HARRY TRUMAN, SAN FRANCISCO, CALIFORNIA, U.S.A., 25 AVRIL, 1945.
PAREY bokou dimoun apre Dezyenm Lager Mondyal, Prezidan Truman ti krwar ki imen i kapab aprann avek lepase e kree en nouvo lemonn kot dinite tou dimoun i ganny respekte. Me malerezman ozordi nou vwar ki sa pa leka. “Dinite imen” pa ganny respekte akoz rasin sa problenm pa sorti kot zonm, me plito kot zot pli gran lennmi.
Rasin sa Problenm
Labib i idantifye sa pli gran lennmi konman Satan oubyen Dyab. Satan i en move lanz ki depi okonmansman listwar imen ti atak sa drwa ki Bondye i annan pour dirize. Depi zour ki i ti koz avek Ev dan zarden Edenn, son lentansyon se pour anpes limanite servi zot Kreater. (Zenez 3:1-5) Zis mazin sa kantite move konsekans ki Adan ek Ev ti bezwen rekolte apre ki zot ti’n ekout Dyab! Deswit apre ki zot ti’n dezobei Bondye par manz sa fri ki i ti’n defann zot manze, zot ti sibir son konsekans, zot ti bezwen al “kasyet zot devan figir Zeova.” Akoz? Adan ti admet: “Mon ti per akoz mon ti touni, alors mon ti kasyet.” (Zenez 3:8-10) Sa relasyon ki Adan ti annan avek son Papa dan lesyel ek lafason ki i ti get son lekor, ti’n sanze. I ti kanmi e i pa ti santi li alez pour debout devan Zeova.
Akoz Dyab ti pou anvi Adan i perdi sa respe ki i ti annan pour son lekor? Akoz zonm in ganny kree dan resanblans Bondye, alors Satan i anvi ki imen i azir dan en fason kot zot pa byen reflekte laglwar Bondye. (Zenez 1:27; Romen 3:23) Sa i ed nou konpran akoz dimoun in ganny imilye toudilon listwar imen. Vi ki i ‘bondye sa syek,’ Satan in promot sa latitid pandan sa letan kot “zonm in domin zonm e sa in fer ditor zot menm.” (2 Korentyen 4:4; Eklezyast 8:9; 1 Zan 5:19) Eski sa i vedir ki vre respe pour dinite imen in disparet pour touzour?
Zeova i respe son Kreasyon
Reflesir ankor enn fwa lo sa zarden Edenn avan ki Adan ek Ev ti fer pese. Zot ti annan en kantite manze, travay satisfezan, ek sa lespwar pour annan en bon lasante e pour viv pour touzour ansanm avek zot desandans. (Zenez 1:28) Dan tou laspe zot lavi nou ti kapab vwar plan Bondye ranpli avek lanmour ek respe pour limanite.
Eski Zeova ti sanz son pwennvi lo dinite imen ler Adan ek Ev ti fer pese? Non. Menm si aprezan zot ti anbarase akoz zot ti touni, Zeova ti montre konsiderasyon pour zot. Avek lanmour, Bondye ti fer “bann gran lenz avek lapo” pour zot, zot ti koud sa bann fey fig e anmar li otour zot leren pour kouver zot. (Zenez 3:7, 21) Olye les zot dan zot laont, Bondye ti tret zot avek dinite.
Plitar, Zeova ti montre konpasyon anver bann orfelen, vev ek rezidan etranze parmi nasyon Izrael, bann dimoun ki ti ganny abize plis dan lasosyete. (Psonm 72:13) Par egzanp, kan zot ti fer rekolt, tel parey rekolte zoliv ek rezen, bann Izraelit ti napa drwa retournen pour al anmas sa ki reste. Bondye ti konmann zot pour les sa bann restan deryer “pour bann rezidan etranze, orfelen ek vev.” (Deterononm 24:19-21) Kan sa bann lalwa ti ganny aplike, sa ti anpes annan mandyan, e menm bann dimoun pli pov ti kapab ganny en travay ki respe zot dinite.
Zezi ti respe lezot
Kan i ti lo later, Garson Bondye ti montre lentere dan dinite lezot. Par egzanp, kan i ti Galile, en zonm ki ti ranpli avek lalep ti apros li. Dapre Lalwa Moiz, kan en lepre ti pe al apros lezot i ti bezwen kriye: “Enpir, enpir!” pour li pa enfekte lezot. (Levitik 13:45) Me parkont, sa zonm pa ti fer sa kan i ti pe apros Zezi. Okontrer i ti tonm lafas ater e sipliy Zezi: “Senyer, si ou oule, ou kapab fer mwan prop.” (Lik 5:12) Ki mannyer Zezi ti reazir? Zezi pa ti ankoler avek li akoz i ti’n kas Lalwa, e i pa ti ni inyor li. Okontrer pour montre ki i ti respe dinite sa lepre i ti tous li e dir: “Mon oule, vin prop.”—Lik 5:13.
Dan lezot sirkonstans, Zezi ti demontre sa abilite ki i ti annan pour geri lezot san ki i ti menm tous zot, parfwa menm si i ti lwen avek zot i ti geri zot. Me dan sa resi ki nou’n fek mansyonnen i ti deside pour tous sa zonm. (Matye 15:21-28; Mark 10:51, 52; Lik 7:1-10) Vi ki sa zonm ti “kouver avek lalep,” sirman pour bokou lannen personn pa ti’n zanmen tous li. San okenn dout sa ti’n bezwen rekonfort li kan en lot imen ti tous li. Sel keksoz ki sa zonm ti anvi, se ganny geri. Pourtan, lafason ki Zezi ti geri li ti redonn li en lot keksoz, sa i son dinite. Eski nou kapab krwar ki i ankor annan dimoun ozordi ki enterese avek dinite lezot? Si wi, konman i pou ganny demontre?
En Lareg ki promot Dinite
Zezi ti dir en keksoz ki bokou dimoun ozordi i konsider konman sa prensip pli popiler an sa ki konsern relasyon antre imen. I ti dir: “Fer pour lezot sa ki ou oule lezot i fer pour ou.” (Matye 7:12) Sa Lareg d-or, parey serten dimoun i apel li, i pous nou pour respe nou prosen e an retour nou swete ki lezot pou fer menm keksoz anver nou.
Parey nou’n kapab vwar toudilon listwar, pour aplik sa lareg i pa vin otomatik, e souvan i pli fasil pour pa aplik li. En zonm ki nou pou apel Harold ti dir: “Pour abes lezot,
sa ti en plezir pour mwan. Avek zis detrwa mo, mon ti kapab fer zot kanmi, anbarase e menm fer zot plere.” Me en keksoz ti arive dan son lavi ki ti sanz lafason ki i ti tret son kanmarad. “Plizyer Temwen Zeova ti konmans vizit li. Kan mon reflesir, mon onte pour mazin serten keksoz ki mon ti dir ek lafason ki parfwa mon ti tret zot. Me zot ti persevere, e ptit-a-pti laverite dan Labib ti konmans tous mon leker e mon ti ganny motive pour fer sanzman.” Ozordi, Harold i en ansyen dan kongregasyon Temwen Zeova.Leksperyans Harold i montre nou ki vreman “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Ebre 4:12) Parol Bondye i annan sa pouvwar pour tous leker en dimoun e sanz lafason ki i panse ek son latitid. Sa i tre enportan pour kapab respe lezot. Nou bezwen annan en dezir senser pour ed lezot plito ki fer zot ditor, pour onor zot olye imilye zot.—Akt 20:35; Romen 12:10.
Respe pour Dinite lezot i vin en Realite
Bann Temwen Zeova i osi annan sa dezir senser pour koz avek lezot lo sa lespwar merveye ki Labib i fer resorti. (Akt 5:42) Napa pli bon fason pour respe nou prosen ki partaz avek zot sa “bon nouvel konsernan en keksoz meyer.” (Izai 52:7) Sa “keksoz meyer” i enplik devlop sa “nouvo personnalite” ki pou ranplas sa “move dezir” pour imilye lezot. (Kolosyen 3:5-10) I osi enplik plan ki Zeova i annan antet pour retir sa bann kondisyon ek latitid ki fer dinite imen pa ganny respekte, ek Satan sa enn ki responsab pour tousala. (Danyel 2:44; Matye 6:9, 10; Revelasyon 20:1, 2, 10) Apre kan later pou’n “ranpli avek konnesans Zeova,” dinite tou dimoun pou ganny respekte.—Izai 11:9.
Nou envit ou pour aprann konsernan sa lespwar merveye. Si ou asosye avek bann Temwen Zeova, ou pou trouve ki ler nou aplik bann prensip Labib, sa i fer nou respe lezot. Ou pou osi aprann konman ki Rwayonm Bondye pou byento etabli ‘en nouvo e pli meyer lemonn.’ En lemonn kot “dinite imen” pou egziste, kot i pou toultan ganny respekte.
[Bwat lo paz 6]
Zot Fidelite ti prezerv zot Dinite
Pandan Dezyenm Lager Mondyal, plis ki 2,000 Temwen Zeova
ti ganny anvoye dan kan konsantrasyon Nazi akoz zot lafwa. Kan
i ti pe koz lo sa fason remarkab ki zot ti demontre zot fidelite, en
ansyen prizonnyen Ravensbrück, Gemma La Guardia Gluck, ti dir
dan son liv My Story: “A en serten moman, Gestapo ti fer resorti ki okenn Etidyan Labib ki abandonn son lafwa, e ki siny en papye
pour montre ki i’n rezet son lafwa, ti pou ganny large e nepli ganny persekite.” I ti osi ekrir konsernan bann ki ti refize siny sa papye:
“Zot ti plifere soufer e esper avek pasyans sa zour ki zot ti pou ganny libere.” Akoz zot ti pare pour fer sa? Magdalena, ki nou ti mansyonnen dan premye lartik e ki ozordi i dan son 80 an montan i dir nou akoz: “Reste fidel avek Zeova ti pli enportan ki esey fer tou pour reste vivan. Pour prezerv nou dinite ti vedir prezerv nou fidelite.” *
[Not anba lo paz]
^ par. 23 Pour plis lenformasyon lo lafanmiy Kusserow, vwar Latour Veyer le 1 Septanm 1985, paz 10-15. (Angle/Franse)
[Portre lo paz 5]
Zezi ti respekte dinite sa bann ki i ti geri
[Portre lo paz 7]
Temwen Zeova i respekte dinite lezot par partaz sa “bon nouvel konsernan en keksoz meyer” avek zot