‘Evite mirmire’
‘Evite mirmire’
‘Fer tou san mirmire.’—FILIPYEN 2:14.
1, 2. Ki konsey Pol ti donn bann Kretyen Filip ek Korent, e akoz?
DAN let enspire ki zapot Pol ti ekrir kongregasyon Filip dan premye syek, i ti koz lo plizyer bon keksoz ki zot ti fer. I ti felisit son bann frer ek ser Kretyen dan sa lavil pour zot zenerozite ek zot devouman. I ti osi eksprim son lakontantman pour sa bann bon travay ki zot ti pe fer. Me Pol ti osi rapel zot ki fodre zot ‘fer tou san mirmire.’ (Filipyen 2:14) Akoz zapot Pol ti donn sa konsey?
2 Pol ti konnen ki move rezilta mirmire i anmennen. Ennde lannen avan, i ti rapel kongregasyon Korent ki i danzere pour mirmire. Pol ti fer remarke ki ler bann Izraelit ti dan dezer, zot ti toultan pe eksit lakoler Zeova. Ki mannyer? Zot ti anvi bann move keksoz, zot ti ador zidol e fer fornikasyon, zot ti teste Zeova e zot ti mirmire. Pol ti ankouraz bann Korentyen pour tir en leson atraver zot legzanp. I ti ekrir: “Fodre pa . . . ni plennyen parey serten antre zot ti fer e zot ti ganny eksterminen.”—1 Korentyen 10:6-11.
3. Akoz sa topik mirmire i enteres nou ozordi?
3 Nou bann serviter Zeova ozordi, nou annan preski menm leta lespri avek kongregasyon Filip. Nou devoue pour fer bann bon travay, e nou kontan kanmarad. (Zan 13:34, 35) Me ler nou realize ki mannyer pep Bondye dan lepase ti ganny afekte ler zot ti mirmire, nou annan bon rezon pour pran aker sa konsey: ‘Fer tou san mirmire.’ Premyerman, annou get legzanp bann dimoun ki ti mirmire dan Labib. Apre nou a diskit serten keksoz ki nou kapab fer pour anpes sa latitid mirmire afekte nou ozordi.
En move Lasanble ti mirmire kont Zeova
4. Ki bann Izraelit ti mirmire dan dezer?
4 Mo Ebre ki donn sa lide ‘mirmire, plennyen, konplent, oubyen gronnyen’ i ganny servi dan Labib an rapor avek bann levennman ki ti pase pandan ki nasyon Izrael ti dan dezer pour 40 an. Parfwa bann Izraelit ti mekontan avek zot sitiasyon e zot ti eksprim sa par mirmire. Par egzanp, zis detrwa semenn apre ki zot ti’n ganny delivre konman lesklav Lezip, “lasanble antye bann garson Izrael ti konmans mirmire kont Moiz ek Aaron dan dezer.” Bann Izraelit ti konplent manze, an dizan: “Si zis nou ti’n mor par lanmen Zeova Lezip kan nou ti pe asize obor bann marmit lavyann, e kan nou ti pe manz dipen ziska nou ti rasazye! Ou’n anmenn nou dan sa dezer pour fer sa kongregasyon antye mor lafen.”—Egzod 16:1-3.
5. Ler bann Izraelit ti konplent, kont lekel vreman zot ti pe konplet?
5 An realite, Zeova ti donn bann Izraelit sa ki zot ti bezwen dan dezer. Avek lanmour, i ti fourni zot manze ek delo. Ti napa okenn risk ki pep Izrael ti pou mor lafen dan dezer. Me zot, dan zot mekontantman, zot ti egzazer zot sitiasyon e konmans mirmire. Kantmenm zot ti pe konplent kont Moiz ek Aaron, dan lizye Zeova zot ti pe konplent kont li menm. Moiz ti dir bann Izraelit: “Zeova in tann zot mirmire kont li. Ki nou ete nou? Zot pa pe mirmir kont nou, me kont Zeova.”—Egzod 16:4-8.
6, 7. Parey Nonm 14:1-3 i montre, ki mannyer latitid bann Izraelit ti sanze?
6 Pa ti pran bokou letan pour bann Izraelit konmans mirmire ankor. Moiz ti’n anvoy 12 zonm espyonn Later Promiz. Dis zot ti retournen avek en move rapor. Ki ti son rezilta? “Tou bann garson Izrael ti konmans mirmire kont Moiz ek Aaron, e lasanble antye ti dir kont zot: ‘Si zis nou ti’n mor Lezip, oubyen si zis nou ti’n mor dan sa dezer! Akoz Zeova pe anmenn nou dan sa pei [Kanaan] pour nou mor par lepe? Nou madanm ek nou zanfan pou ganny pran par-d-fors. Pa plito nou retourn Lezip?’”—Nonm 14:1-3.
7 Latitid bann Izraelit ti’n vreman sanze! Apre ki zot ti’n ganny libere Lezip e travers Lanmer Rouz sen e sof, zot lapresyasyon ti pous zot pour sante e loue Zeova. (Egzod 15:1-21) Me lapresyasyon pep Bondye ti ganny ranplase avek mekontantman dek ki zot ti rankontre difikilte dan dezer e akoz zot ti per bann Kananeen. Olye remersye Bondye pour liber zot, zot ti blanm li akoz dapre zot i ti pe priv zot. Par mirmire, zot ti montre en mank lapresyasyon pour sa ki Zeova ti donn zot. Sanmenm Zeova ti dir: “Ziska ki tan sa move lasanble pou kontinyen mirmire kont mwan?”—Nonm 14:27; 21:5.
Mirmire dan Premye Syek
8, 9. Donn legzanp kot serten dimoun ti mirmire dan Lekritir Grek Kretyen.
8 Sa bann legzanp konplent ki nou’n vwar ti enkli bann group dimoun ki aparaman ti eksprim zot mekontantman byen for. De lot kote, ler Zezi Kri ti Zerizalenm alokazyon Lafet bann Payot lannen 32 N.L., en ‘lafoul ti pe diskit bokou lo son size.’ (Zan 7:12, 13, 32) Aparaman zot ti pe koz dousman antre zot. Serten ti pe dir i en bon dimoun, lezot non.
9 En lot fwa, Zezi ek son bann disip ti ganny envite kot Levi oubyen Matye, ki ti en kolekter taks. “Bann Farizyen ek bann profeser Lalwa, ti mirmire kont disip Zezi. Zot ti dir, ‘Akoz, zot manze e bwar avek kolekter taks ek bann ki viv dan pese?’” (Lik 5:27-30) En pe letan plitar Galile, “bann Zwif ti konmans mirmire kont li, akoz i ti dir, ‘Mwanmenm dipen ki’n sorti dan lesyel.’” Menm serten disip Zezi ti ofanse par sa ki i ti dir e zot ti konmans mirmire.—Zan 6:41, 60, 61.
10, 11. Akoz bann Zwif ki ti koz Grek ti mirmire, e ki mannyer bann ansyen i kapab benefisye avek lafason ki sa ka ti ganny trete?
10 Pa bokou letan apre Lapannkot lannen 33 N.L., ti annan en ka kot bann Kretyen ti pe mirmire. Me sa ti anmenn en bon rezilta. Bokou disip sorti dan lezot pei ki ti fek konverti ti pe rezwir lospitalite zot bann frer ek ser Kretyen an Zide. Me en problenm ti leve konsernan lafason ki keksoz ti pe ganny distribye. Labib i rakonte: “Ti annan mirmirasyon ant bann Zwif ki koz Grek ek bann Zwif natif. Bann Zwif ki koz Grek ti plennyen an dizan ki zot bann vev ti pe ganny neglize dan distribisyon toulezour.”—Akt 6:1.
11 Sa bann Kretyen ki ti pe mirmire pa ti parey bann Izraelit dan dezer. Bann Zwif ki ti koz Grek pa ti pe konsantre zis lo zot sitiasyon e eksprim zot mekontantman. Zot ti atir latansyon lo serten vev ki ti pe ganny neglize. Deplis, sa bann ki ti pe mirmire pa ti pe rebele e zot pa ti pe lev zot lavwa kont Zeova. Zot ti fer zot konplent avek bann zapot, ki ti azir deswit akoz sa konplent ti zistifye. Pa en bon legzanp ki bann zapot in kite pour bann ansyen ozordi! Sa bann berze spirityel i fer sir ki zot pa ‘bous zot zorey ler en malere pe plennyen.’—Proverb 21:13; Akt 6:2-6.
Fer atansyon, mirmire i kapab gat nou
12, 13. (a) Donn en legzanp pour montre ki lefe mirmire i annan. (b) Kwa ki kapab fer en dimoun mirmire?
12 Laplipar legzanp ki nou’n vwar, i montre ki mirmire ti afekte pep Bondye bokou dan lepase. Alors, nou bezwen mazin seryezman lo lefe destriktif ki i kapab annan ozordi. Annou pran en legzanp pour konpran sa pli byen. Plizyer kalite metal i annan sa tandans pour rouye. Si nanryen pa ganny fer dek ki en metal i konmans rouye, i kapab rouye ziska en pwen ki ou nepli kapab servi li. Bokou loto i ganny zete, pa akoz masin nepli bon, me akoz son metal i sitan rouye ki sa loto nepli an sekirite. Ki mannyer sa legzanp i parey avek mirmire?
13 Zis parey metal i tant pour rouye, bann imen enparfe i annan en tandans pour konplent. Nou bezwen vey sa tandans dan nou. Limidite ek salen i fer en keksoz rouy vitman. Pareyman, en sitiasyon difisil i tant pour fer nou pli mirmire ankor. Presyon i kapab fer en senp pti keksoz ki irit nou vin en gran zafer. Pli kondisyon dan bann dernyen zour i kontinyen deteryore, pli nou pou vwar rezon pour konplent. (2 Timote 3:1-5) En serviter Zeova i kapab konplent kont son frer Kretyen pour senp rezon ki i pa satisfe avek son abilite, privilez, oubyen akoz son febles.
14, 15. Akoz nou devret koriz nou tandans pour konplent?
14 Nenport rezon ki nou annan pour konplent, si nou pa kontrol sa tandans, i kapab devlop dan nou en mekontantman e fer nou mantoun zanmen fini. Wi, mirmire i kapab detrir nou spirityalite e gat nou konpletman. Ler bann Izraelit ti mirmire akoz zot sitiasyon dan dezer, zot ti al ziska pour blanm Zeova. (Egzod 16:8) Fotespere sa pa zanmen ariv avek nou!
15 Nou kapab redwir tandans en metal pour rouye par pas en kous lapentir antirouy lo la e vitman tret bann pti tas larouy ki nou vwar. Pareyman, si nou remarke nou annan en tandans pour konplent, nou kapab gard li anba kontrol si nou pa tarde pour priy lo la e fer zefor pour koriz li. Ki mannyer nou fer sa?
Vwar Keksoz parey Zeova i vwar
16. Si nou annan en tandans pour konplent, ki mannyer nou kapab sirmont li?
16 Mirmire i fer nou konsantre zis lo nou lekor ek nou problenm, e pa vwar bann benediksyon ki nou gannyen konman Temwen Zeova. Si nou anvi sirmont nou tandans pour konplent, nou bezwen toultan mazin sa bann benediksyon. Par egzanp, nou tou nou’n ganny sa loner pour port non personnel Zeova. (Izai 43:10) Nou kapab devlop en relasyon pros avek li, e nou kapab koz avek li, “ki ekout lapriyer,” nenport ler ki nou anvi. (Psonm 65:2; Zak 4:8) Nou lavi i annan en vre sans akoz nou konpran sa kestyon ki’n ganny leve lo drwa Zeova pour dirize e nou mazinen ki i nou privilez pour reste fidel avek li. (Proverb 27:11) Nou osi annan en par dan sa travay pour pres sa bon nouvel lo Rwayonm Bondye regilyerman. (Matye 24:14) Lafwa dan sakrifis Zezi Kri i fer nou annan en konsyans kler. (Zan 3:16) Sa i bann benediksyon ki nou annan, kantmenm nou bezwen andir serten difikilte.
17. Akoz nou devret vwar keksoz parey Zeova i vwar kantmenm nou annan en bon rezon pour konplent?
17 Annou sey vwar keksoz parey Zeova i vwar li, olye depan zis lo nou prop pwennvi. Psalmis David ti sante: “Fer mwan konn ou bann semen, O Zeova; ansenny mwan ou bann santye.” (Psonm 25:4) Si nou annan en bon rezon pour konplent, Zeova i vwar sa li osi. I ti kapab koriz keksoz deswit. Me akoz parfwa i les problenm kontinyen? Petet pour ed nou devlop bann bon kalite parey pasyans, landirans, ek lafwa.—Zak 1:2-4.
18, 19. Donn en legzanp pour montre ki lefe i kapab annan ler nou siport bann lenkonvenyans san konplent.
18 Ler nou siport bann lenkonvenyans san konplent, sa pa zis ed nou amelyor nou personnalite me i osi kapab enpresyonn bann dimoun ki pe obzerv nou. An 2003, en group Temwen Zeova ti sorti Lalmanny pour al en lasanble Laongri par bis. Sa drayver bis pa ti en Temwen e i pa ti tro anvi pas dis zour avek bann Temwen dan bis. Me alafen sa vwayaz, son pwennvi ti’n sanz konpletman. Akoz?
19 Pandan sa vwayaz, plizyer keksoz ti al mal. Me bann Temwen pa ti konplent ditou. Sa drayver ti dir ki sa i pli bon group pasaze ki i’n deza gannyen! I ti menm promet ki prosenn fwa bann Temwen i pas kot li, i pou envit zot anndan e ekout zot byen. Vreman sa bann pasaze in donn en bon lenpresyon par ‘fer tou san mirmire’!
Pardonnen i promot Linite
20. Akoz nou devret pardonn kanmarad?
20 Be si nou annan en konplent pour fer kont enn nou frer oubyen ser Kretyen? Si i en keksoz serye, nou devret aplik sa ki Zezi ti dir dan Matye 18:15-17. Me petet nou pa pou bezwen toultan fer sa, akoz laplipar konplent ki nou annan i konsernan bann keksoz ki pa sitan grav. Akoz nou pa vwar sa sitiasyon konman en loportinite pour pardonn lezot? Pol ti ekrir: “Siport kanmarad, pardonn kanmarad sak fwa ki enn ant zot i ofans en lot. Parey [Zeova] ti pardonn zot, zot osi pardonn kanmarad. E par lao tousala, annan lanmour ki soud tou keksoz parfetman ansanm dan larmoni.” (Kolosyen 3:13, 14) Eski i annan en plas dan nou leker pour pardonnen? Pa Zeova i annan rezon pour konplent kont nou? Pourtan, i toultan montre konpasyon e i pardonn nou.
21. Ler nou mirmire, ki lefe sa i kapab fer lo lezot?
21 Nenport problenm ki nou kapab annan, konplent pa solisyon. Sa mo Ebre pour “mirmire” i kapab osi donn sa lide “gronnyen.” Normalman, nou pa tro santi nou alez obor en dimoun ki pe toultan gronnyen e nou sey gard nou zistans avek li. Be si nou konplent oubyen gronnyen nou osi, lezot osi pou santi parey anver nou. Zot menm kapab gard zot zistans avek nou akoz nou rann zot mal alez! Wi, ler nou gronnyen nou kapab kapte latansyon en dimoun, me definitivman nou pa pou atir personn anver nou.
22. Ki en fiy ti dir lo Temwen Zeova?
22 Ler nou toultan pare pour pardonnen, sa i promot linite, en keksoz ki pep Zeova i kontan. (Psonm 133:1-3) En fiy Katolik aze 17 an dan en pei Lerop, ti ekrir biro brans Temwen Zeova pour eksprim son ladmirasyon pour zot. I ti dir: “Zot sel lorganizasyon ki mon konnen ki zot manm pa divize par laenn, vorasite, entolerans, legoism, oubyen en mank linite.”
23. Ki nou pou diskite dan lartik swivan?
23 Lapresyasyon pour tou benediksyon spirityel ki nou gannyen konman adorater sa vre Bondye, pou ede promot linite parmi nou e anpes nou mirmire kont lezot dan bann zafer personnel. Lartik swivan pou montre ki mannyer bann bon kalite Kretyen pou anpes nou mirmire kont lorganizasyon Zeova lo later, ki pli danzere ankor.
Eski ou rapel?
• Ki mirmire i enplike?
• Ki legzanp nou kapab servi pour montre lefe ki mirmire i annan?
• Kwa ki kapab ed nou sirmont nou tandans pour mirmire?
• Ki mannyer ler nou anvi pardonnen i anpes nou mirmire?
[Kestyon]
[Portre lo paz 8/9]
An realite, bann Izraelit ti mirmire kont Zeova li menm!
[Portre lo paz 11]
Eski ou sey vwar keksoz parey Zeova i vwar?
[Portre lo paz 12]
Pardonnen i promot linite antre Kretyen