Kestyon Lekter
Kestyon Lekter
Ki mannyer nou konnen ki sa deskripsyon lasazes dan Proverb 8:22-31, i aplik avek Zezi Kri ler i ti ankor dan lesyel?
Liv Proverb i dekrir lasazes dan sa fason: “Zeova li menm ti prodwir mwan konman konmansman son semen, son lakonplisman pli ansyen. . . . Avan bann montanny ti ganny etablir, avan bann oter, mon ti ganny anmennen avek douler lakousman . . . Ler i ti prepar lesyel mon ti la; . . . alor mon ti vin en zouvriye abil akote li, e mon ti sa enn ki i ti sirtou atase avek de zour an zour, mon ti toultan rezwir devan li, . . . e keksoz ki mon ti kontan ti bann garson zonm.”
Sa bann verse pa kapab pe koz lo lasazes Bondye oubyen lo sa kalite li menm. Akoz i pa leka? Akoz sa lasazes ki ganny dekrir la ti ganny “prodwir” oubyen kree, konman konmansman semen Zeova. Zeova in toultan egziste e i’n toultan annan lasazes. (Psonm 90:1, 2) Son lasazes ti napa okenn konmansman; i pa ti ni ganny kree oubyen prodwir. I pa ti “ganny anmennen avek douler lakousman.” Deplis sa bann verse i dir ki sa lasazes i koze e azir, sa i montre i reprezant en dimoun.—Proverb 8:1.
Liv Proverb i dir ki byen lontan lasazes ti akote Zeova, Kreater, konman “en zouvriye abil.” Sa i sirman aplik avek Zezi. Bokou letan avan i ti vin lo later, Zezi ti travay tre pros avek Zeova ki Parol Bondye i dir: ‘Kris i egziste avan tou keksoz, e dan li, tou keksoz in vin an egzistans.’—Kolosyen 1:17; Revelasyon 3:14.
I tou apropriye ki Garson Bondye i ganny dekrir konman lasazes, lefe i ti sa Enn ki ti revel plan ek desizyon saz Zeova. Avan i ti vin lo later, Zezi ti Parol Bondye oubyen son Portparol. (Zan 1:1) I ganny dekrir konman “pisans Bondye ek lasazes Bondye.” (1 Korentyen 1:24, 30) Sa i en zoli fason pour dekrir Garson Bondye, ki son lanmour pour limanite ti pous li pour donn son lavi konman en sakrifis pour nou!—Zan 3:16.