Konsantre lo tou bann bon Keksoz dan Lorganizasyon Zeova

“Wi, nou pou satisfe avek tou sa ki bon dan ou lakaz.”—PSONM 65:4.

1, 2. (a) Ki lefe sa laranzman tanp ti pou annan lo pep Bondye? (b) Ki mannyer David ti siport konstriksyon tanp?

DAVID ki ti viv byen lontan an Izrael, i enn bann dimoun pli remarkab ki Lekritir Ebre i koz lo la. David ki ti en berze, mizisyen, profet, ek lerwa, ti met tou son konfyans dan Zeova. Sa relasyon pros ki David ti annan avek Zeova ti fer li devlop en dezir pour konstri en lakaz pour Bondye. Sa lakaz oubyen tanp ti pou vin sant vre ladorasyon an Izrael. David ti konnen ki sa tanp ek travay ki ti pou ganny fer ladan ti pou anmenn lazwa ek benediksyon pour pep Bondye. Alors David ti sante: “Byennere sa enn ki ou [Zeova ou] swazir e fer aprose, pour li reste dan ou lakour. Wi, nou pou satisfe avek tou sa ki bon dan ou lakaz, landrwa sen ou tanp.”—Psonm 65:4.

² Zeova pa ti permet David siperviz konstriksyon Son lakaz. Sa privilez ti al plito pour son garson, Salomon. David pa ti mirmire akoz en lot dimoun ti ganny sa privilez ki li i ti telman anvi. Sa ki ti pli enportan pour li i ki tanp i ganny konstri. I ti siport sa proze avek tou son leker e donn Salomon sa plan tanp ki Zeova ti’n donn li. Deplis, David ti organiz bann Levit dan diferan servis e donn en kantite lor ek larzan konman kontribisyon pour konstri tanp.—1 Kronik 17:1, 4, 11, 12; 23:3-6; 28:11, 12; 29:1-5.

3. Ki latitid bann serviter Bondye i annan anver laranzman pour vre ladorasyon?

³ Bann Izraelit fidel ti siport sa laranzman ki ti ganny fer pour vre ladorasyon dan lakaz Bondye. Nou konman bann serviter Zeova ozordi nou fer parey. Nou siport bann laranzman ki lorganizasyon Zeova  lo later i fer pour ador Zeova. Dan sa fason, nou montre ki nou annan menm latitid ki David. Nou pa pe toultan konplent. Okontrer, nou konsantre lo tou sa ki bon dan lorganizasyon Bondye. Ou’n deza mazin lo sa kantite bon keksoz ki nou kapab vreman apresye? Annou vwar ennde.

Apresye bann ki diriz Kongregasyon

4, 5. (a) Ki mannyer ‘lesklav fidel e pridan’ i akonpli son misyon? (b) Ki mannyer serten Temwen i santi anver sa nouritir spirityel ki zot gannyen?

⁴ Nou annan bon rezon pour apresye ‘lesklav fidel e pridan’ ki Zezi Kri in apwente lo son bann byen lo later. Sa group Kretyen ki’n ganny swazir par lespri sen Zeova i diriz predikasyon, organiz renyon pour ador Zeova, e pibliy bann piblikasyon baze lo Labib dan plis ki 400 langaz. Plizyer milyon dimoun partou lo later i ganny sa nouritir spirityel zis atan. (Matye 24:45-47) Napa nanryen pour mirmire ladan.

⁵ Pour bokou lannen, en Temwen Zeova ki apel Elfi in ganny rekonfor ek sipor ler in pran aker konsey Labib dan bann piblikasyon ki lesklav i pibliye. Lapresyasyon profon ti pous Elfi pour ekrir: “Ki mon ti pou fer si mon ti napa lorganizasyon Zeova?” Peter ek Irmgard in osi servi Zeova pour bokou lannen. Irmgard i eksprim son lapresyasyon pour tou provizyon ki lorganizasyon Zeova in fer, en “lorganizasyon ki kontan e pran swen” avek nou. Sa bann piblikasyon i enkli bann ki’n ganny prepare pour dimoun avek bezwen spesyal, parey bann dimoun ki pa vwar kler oubyen sourd.

6, 7. (a) Ki mannyer aktivite bann kongregasyon partou dan lemonn i ganny sipervize? (b) Ki mannyer serten in eksprim zot santiman konsernan lorganizasyon Zeova lo later?

⁶ Sa ‘lesklav fidel’ i ganny reprezante par Konsey Direkter Temwen Zeova. Zot en pti group zonm ki’n ganny swazir par lespri sen Zeova e zot servi kot biro prensipal Temwen Zeova Brooklyn, New York. Konsey Direkter i apwent bann serviter Zeova ki annan bokou leksperyans pour servi dan bann biro brans, ki siperviz aktivite plis ki 98,000 kongregasyon partou dan lemonn. Bann zonm ki ranpli bann kondisyon biblik i ganny apwente konman ansyen ek asistan ministeryel dan sa bann kongregasyon. (1 Timote 3:1-9, 12, 13) Bann ansyen i diriz kongregasyon e avek lanmour pran  swen troupo Bondye. Pa i en benediksyon pour form parti sa troupo e eksperyans sa lanmour ek linite ki egziste parmi “bann frer dan lafwa”!—1 Pyer 2:17; 5:2, 3.

⁷ Olye konplent, bann frer ek ser i souvan eksprim zot lapresyasyon pour sa gidans spirityel ranpli avek lanmour ki zot gannyen avek bann ansyen. Annou vwar legzanp Birgit, en ser Kretyen dan son 30 an ki’n marye. Ler i ti en adolesan, i ti tonm dan en move frekantasyon e i ti pros pour fer en fot grav. Me bann konsey kler ki bann ansyen ti donn li dan Labib e sipor bann frer ek ser ti ed li pour sorti dan en sitiasyon ki ti kapab vreman danzere pour li. Ki mannyer Birgit i santi aprezan? I dir: “Mon byen kontan ki mon ankor dan lorganizasyon merveye Zeova.” En zenn frer aze 17 an ki apel Andreas i dir: “Sa i vreman lorganizasyon Zeova, pli bon lorganizasyon dan lemonn.” Pa nou devret rekonesan pour tou sa bann bon keksoz ki lorganizasyon Zeova lo later i fourni?

Bann ki diriz Kongregasyon i enparfe

8, 9. Ki mannyer serten dimoun dan letan David ti azir, e ki ti reaksyon David?

⁸ Byensir bann ki ganny apwente pour diriz vre ladorasyon i enparfe. Zot tou zot fer fot, e serten pe lalit pour kapab annan kontrol lo en defo ki persiste. Eski nou bezwen mekontan akoz sa? Non. Menm bann dimoun ki ti ganny konfye bokou responsabilite lontan an Izrael ti fer bann fot grav. Par egzanp, ler David ti ankor zenn, i ti ganny demande pour zwe lanmizik pour kalme Lerwa Sail akoz son lespri ti fatige. Me plitar, Sail ti sey touy David, ki ti bezwen finalman sove pour son lavi.—1 Samyel 16:14-23; 18:10-12; 19:18; 20:32, 33; 22:1-5.

⁹ Ti annan lezot Izraelit ki ti mal azir. Par egzanp Yoab, ki ti komandan militer David, ti touy en fanmiy Sail ki ti apel Abner. Absalonm ti fer en konplo kont son papa David pour li pran pouvwar. E Aitofel ki ti konseye David ki i ti annan konfyans ladan ti trai li. (2 Samyel 3:22-30; 15:1-17, 31; 16:15, 21) Malgre tousala, David pa ti vin en dimoun anmer ki ti pe toultan mangonnen. I pa ni ti abandonn vre ladorasyon. Okontrer, sa bann problenm ti fer David atrap Zeova for e gard sa bon latitid ki i ti annan ler i ti sove akoz Sail. Sa letan, David ti sante: “Montre mwan faver Bondye, montre mwan faver, akoz dan ou mon’n pran refiz; mon’n pran refiz dan lonbraz ou lezel ziska ki bann difikilte in fini pase.”—Psonm 57:1.

10, 11. Ki Gertrud ti eksperyanse ler i ti ankor zenn, e ki i ti dir konsernan lenperfeksyon bann frer ek ser?

¹⁰ Ozordi napa rezon pour konplent akoz traizon dan lorganizasyon Bondye. Ni Zeova ni son bann lanz e ni bann berze spirityel pa toler bann dimoun mesan e tret dan kongregasyon Kretyen. Parkont, nou tou nou bezwen fer fas avek lenperfeksyon imen, i kapab nou prop lenperfeksyon oubyen pour lezot serviter Bondye.

¹¹ Gertrud ti en ser ki’n servi Zeova pour en kantite letan. Letan i ti ankor zenn, i ti ganny akize konmkwa i pa en vre ser e i pa en proklanmater aplentan parey i dir. Ki mannyer i ti reazir? Eski Gertrud ti konplent akoz i ti ganny trete dan sa fason? Non. Zis avan son lanmor an 2003 alaz 91 an, i ti reflesir lo son lavi e dir: “Sa bann leksperyans ek lezot plitar in fer mwan realize ki menm si i annan dimoun ki fer fot, Zeova ki diriz son gran travay, e i servi bann dimoun enparfe.” Ler Gertrud ti bezwen fer fas avek lenperfeksyon lezot serviter Bondye, i ti priy Zeova avek tou son leker.

12. (a) Ki move legzanp serten Kretyen premye syek in kite? (b) Lo ki keksoz nou merit gard nou lespri?

 ¹² Menm bann Kretyen pli fidel e pli devoue i enparfe. Alor ler en serviter ki’n ganny apwente dan kongregasyon i fer en fot, annou kontinyen ‘fer tou san mirmire.’ (Filipyen 2:14) I pou vreman domaz si nou swiv move legzanp serten dan kongregasyon premye syek! Dapre disip Zid, bann fo ansennyan sa letan ti pe “mepriz lotorite Bondye, e zot [ti pe] ensilte bann . . . ki viv dan laglwar.” Deplis, zot ti “touzour mekontan e pe touzour plennyen.” (Zid 8, 16) Annou rezet sa kalite latitid e gard nou lespri lo bann bon keksoz ki nou gannyen avek ‘lesklav fidel.’ Annou apresye bann bon keksoz dan lorganizasyon Zeova e kontinyen ‘fer tou san mirmire.’

“Sa Lansennyman i dir”

13. Ki mannyer serten ti reazir anver lansennyman Zezi Kri?

¹³ Serten dan premye syek ti mirmire kont bann serviter ki’n ganny apwente dan kongregasyon, tandis ki lezot ti mirmire kont lansennyman Zezi. Parey nou kapab lir dan Zan 6:48-69, Zezi ti dir: “Sa ki manz mon laser e bwar mon disan i annan lavi eternel.” Ler zot ti tann sa, “bokou parmi son bann disip ti dir, ‘Sa lansennyman i dir. Lekel ki kapab aksepte sa?’” Zezi ti konnen ki son bann disip “ti pe mirmire lo la.” E “depi sa, bokou son bann disip ti dekile e zot ti aret swiv li.” Me pa tou disip ki ti mirmire. Ler Zezi ti demann son 12 zapot: “E zot, zot pa anvi ale, zot osi?” Zapot Pyer ti reponn: “Senyer, kot lekel nou pou ale? Ou annan parol lavi eternel. Aprezan, nou, nou krwar e nou konnen ki oumenm ou sa Sen ki sorti kot Bondye.”

14, 15. (a) Akoz serten i mekontan avek serten laspe lansennyman Kretyen? (b) Ki nou kapab aprann avek legzanp Emanuel?

¹⁴ Dan nou letan, en pti group parmi pep Bondye in mekontan avek serten laspe dan lansennyman Kretyen e zot in mirmire kont lorganizasyon Zeova lo later. Akoz sa i arive? Sa i arive akoz sa bann dimoun ki mirmire pa tro konpran fason ki Bondye i fer keksoz. Nou Kreater i revel laverite avek son pep ptit-a-pti. Alors nou ekspekte ki nou konprenezon lo Labib i ganny rafinen detanzaot. Laplipar pep Zeova i kontan pour vwar sa bann amelyorasyon. Me en pti group i krwar zot “tro zis” e zot rezet sa bann sanzman. (Eklezyast 7:16) Lorgey i kapab zwe en rol ladan, e serten i tonm dan sa latrap pour fer sa ki zot zot panse i byen. Nenport rezon ki fer nou mirmire, mirmire i danzere akoz i kapab fer nou retourn dan sa lemonn e viv parey dimoun lemonn.

¹⁵ Emanuel ti en Temwen ki ti kritik serten keksoz ki i ti lir dan bann piblikasyon ‘lesklav fidel e pridan.’ (Matye 24:45) I ti aret lir nou bann piblikasyon e finalman dir bann ansyen dan son kongregasyon ki i nepli anvi reste en Temwen Zeova. Me en pe letan apre, Emanuel ti realize sa ki lorganizasyon Zeova i ansennyen i byen. I ti kontakte bann Temwen, admet ki i ti’n tronpe, e i ti ganny reentegre konman en Temwen Zeova. Apre sa, i ti retrouv son lazwa ankor.

16. Kwa ki kapab ed nou sirmont bann dout lo bann lansennyman Kretyen?

¹⁶ Be si nou annan tandans pour mirmire akoz nou annan dout lo serten lansennyman dan lorganizasyon Zeova? Annou pran pasyans. Petet avek letan ‘lesklav fidel’ i kapab pibliy en keksoz ki a reponn nou bann kestyon e eklersi nou bann dout. I saz pour rod led avek bann ansyen dan kongregasyon. (Zid 22, 23) Lapriyer, letid personnel, e frekant bann frer ek ser spirityel i kapab osi ed nou retir okenn dout ki nou annan. Deplis, zot kapab ed nou pli  apresye bann laverite ki nou aprann par sa mwayen ki Zeova pe servi pour kominik avek nou.

Gard en Leta Lespri pozitif

17, 18. Olye mirmire, ki latitid nou devret annan e akoz?

¹⁷ I vre ki bann imen enparfe i annan en tandans natirel pour fer pese, e pour serten sa tandans pour konplent lo en senp pti nanryen ditou i vreman for. (Zenez 8:21; Romen 5:12) Me si nou pe toultan mangonnen, sa i kapab met an danze nou relasyon avek Zeova. Alors nou bezwen kontrol sa tandans dan nou pour konplent.

¹⁸ Olye mirmire akoz serten keksoz dan kongregasyon, i byen si nou gard en latitid pozitif e annan en progranm ki fer nou reste okipe, zwaye, annan respe, ekilibre, e en lafwa for. (1 Korentyen 15:58; Tit 2:1-5) Zeova i annan kontrol lo tou keksoz dan son lorganizasyon e Zezi i konn tou keksoz ki devlope dan sak kongregasyon, zis parey i ti konnen dan premye syek. (Revelasyon 1:10, 11) Avek pasyans esper Bondye ek Kris, ki Sef kongregasyon. Bann berze responsab dan kongregasyon i kapab ganny servi pour koriz keksoz ki bezwen ganny aziste.—Psonm 43:5; Kolosyen 1:18; Tit 1:5.

19. Ziska ki Rwayonm Bondye pou pran kontrol lo bann zafer imen, lo ki nou devret konsantre?

¹⁹ Byento sa lemonn mesan pou disparet, e Rwayonm Bondye pou pran kontrol lo bann zafer imen. Ziska ki sa i arive, i vreman enportan ki nou tou nou gard en leta lespri pozitif! Sa pou ed nou vwar bann bon kalite dan nou bann frer ek ser olye konsantre lo zot defo. Ler nou konsantre lo zot bon kote, sa pou fer nou zwaye. Finalman olye santi nou epwize mantalman, nou pou ganny ankouraze e batir spirityelman.

20. Ki benediksyon en latitid pozitif pou fer nou rezwir?

²⁰ En leta lespri pozitif pou osi ed nou gard antet sa kantite benediksyon ki nou gannyen akoz nou asosye avek lorganizasyon Zeova. Sa i sel lorganizasyon dan lemonn ki fidel avek Souvren liniver. Ki mannyer ou santi konsernan sa e osi konsernan sa privilez ki ou annan pour ador sa sel vre Bondye, Zeova? Fotespere ou annan menm latitid ki David, ki ti sante: “Ou ki ekout lapriyer, tou kalite dimoun pou vin ver ou. Byennere sa enn ki ou swazir e fer aprose, pour li reste dan ou lakour. Wi, nou pou satisfe avek tou sa ki bon dan ou lakaz, landrwa sen ou tanp.”—Psonm 65:2, 4.

Eski ou rapel?

• Akoz nou devret rekonesan anver bann ki diriz kongregasyon?

• Ki mannyer nou devret reazir ler bann ki annan responsabilite dan kongregasyon i fer en fot?

• Ki mannyer nou devret vwar bann amelyorasyon dan nou konprenezon lo Labib?

• Kwa ki kapab ed en Kretyen sirmont bann dout ki i annan?

[Kestyon]

[Portre lo paz 14]

David ti donn Salomon plan tanp e siport vre ladorasyon avek tou son leker

[Portre lo paz 17]

Bann ansyen dan kongregasyon i kontan ed lezot spirityelman