Montre ou saz par annan Lakrent pour Bondye!

“Lakrent pour Zeova i konmansman lasazes.”—PROVERB 9:10.

1. Akoz bokou dimoun i trouv sa lide annan lakrent pour Bondye difisil pour konpran?

I TI annan en letan kot i ti ganny konsidere konman en konpliman pour dir ki en dimoun i annan lakrent pour Bondye. Ozordi, pour bokou dimoun i nepli letan pour annan lakrent pour Bondye e sa lide annan lakrent pour Bondye i difisil pour zot konpran. Petet zot demann zot lekor, ‘Si Bondye i lanmour, akfer mon devret annan lakrent pour li?’ Pour zot lakrent i en move santiman, ki menm kapab afekte en dimoun. Me vre lakrent pour Bondye i enplik bokou keksoz e parey nou pou vwar, i pa zis en santiman oubyen en lemosyon.

2, 3. Ki vre lakrent pour Bondye i enkli?

² Labib i toultan servi sa lekspresyon lakrent pour Bondye konman en bon kalite pour devlope. (Izai 11:3) I en respe profon pour Bondye, en gran dezir pour pa ofans li. (Psonm 115:11) I enkli aksepte e reste atase avek standar moral Bondye e en dezir pour viv an armoni avek sa ki Bondye i dir i byen oubyen i mal. En liv i fer resorti ki en lakrent apropriye pour Bondye i “en latitid esansyel anver Bondye ki anmenn en konportman ki saz e fer evit tou sort move keksoz.” I apropriye ki Parol Bondye i dir nou: “Lakrent pour Zeova i konmansman lasazes.”—Proverb 9:10.

³ An realite, lakrent pour Bondye i relye avek bokou keksoz ki nou fer. I pa zis mars ansanm avek lasazes me osi avek lazwa, lape, prosperite, longer lavi, lespwar ek konfyans. (Psonm 2:11; Proverb 1:7; 10:27; 14:26; 22:4; 23:17, 18; Akt 9:31) I relye tre pros avek lafwa ek lanmour. Anfet, i enplik tou keksoz ki annan pour fer avek nou relasyon avek Bondye ek nou prosen. (Deterononm 10:12; Zob 6:14; Ebre 11:7) Lakrent pour Bondye i enkli sa profon konviksyon ki nou Papa dan lesyel i enterese avek nou personnelman e i pare pour pardonn nou pese. (Psonm 130:4) Se selman bann dimoun ki pa repantir ki devret per Bondye. *—Ebre 10:26-31.

Aprann annan Lakrent pour Zeova

4. Kwa ki kapab ed nou aprann “annan lakrent pour Zeova”?

⁴ Vi ki annan lakrent pour Bondye i esansyel pour nou kapab fer bann bon desizyon e ganny benediksyon Bondye, ki mannyer nou kapab “aprann annan lakrent pour Zeova” dan en bon fason? (Deterononm 17:19) Dan Labib i annan bokou resi lo bann zonm ek fanm ki ti annan lakrent pour Bondye, e zot legzanp in ganny prezerve “pour nou lansennyman.” (Romen 15:4) Pour ed nou konpran ki savedir vreman annan lakrent pour Bondye, annou reflesir lo lavi enn sa bann legzanp. Sa i legzanp Lerwa David dan ansyen Izrael.

5. Ki mannyer okip mouton ti ed David aprann konsernan annan lakrent pour Zeova?

⁵ Zeova ti rezet premye lerwa Izrael, Sail, akoz i ti per lepep e i pa ti montre lakrent pour Bondye. (1 Samyel 15:24-26) Parkont, fason ki David ti viv e son relasyon pros avek Zeova, i montre ki li i ti annan lakrent pour Bondye. Ler i ti ankor byen zenn, David ti souvan pas son letan deor pour okip mouton son papa.  (1 Samyel 16:11) I paret ki sa bann letan ki David ti pase deor aswar pour okip mouton ti’n ed li konpran lakrent pour Zeova. Menm si David ti kapab konpran en pti bout sa liniver imans, i ti reisi tir sa bon konklizyon—Bondye i merit nou respe ek ladorasyon. I ti ekrir plitar: “Kan mon vwar ou lesyel, travay ou ledwa, lalin ek zetwal ki ou’n prepare, ki zonm mortel i ete ki ou gard li antet, e en senp imen ki ou pran swen avek li?”—Psonm 8:3, 4.

6. Ki mannyer David ti santi ler i ti konpran grander Zeova?

⁶ Wi David ti enpresyonnen ler i ti konpar son pti grander avek sa gran lesyel ranpli avek zetwal. Olye fer li per, sa konnesans ti pous David pour loue Zeova e dir: “Lesyel pe anons laglwar Bondye; e latmosfer pe koz lo travay son lanmen.” (Psonm 19:1) Sa respe profon pour Bondye ti fer David vin pli pre avek Zeova e i ti fer li anvi aprann e swiv Son semen parfe. Zis mazinen ki mannyer David ti santi ler i ti sante avek Zeova: “Ou gran e ou pe fer bann keksoz merveye; zis ou tousel ki Bondye. Enstri mwan konsernan ou semen, O Zeova. Mon pou mars dan ou laverite. Inifye mon leker pour annan lakrent pour ou non.”—Psonm 86:10, 11.

7. Ki mannyer annan lakrent pour Bondye ti ed David lager avek Golyat?

⁷ Ler bann Filisten ti anvair pei Izrael, zot pli bon gerye ki ti apepre 3 met oter ti provok bann Izraelit, konmsi i ti pe dir zot: ‘Swazir en zonm pour lager avek mwan! Si i gannyen, nou pou servi zot.’ (1 Samyel 17:4-10) Sail e tou son solda ti ranpli avek lafreyer, me pa David. Li i ti konnen ki Zeova i sa enn ki fodre annan lakrent pour li me pa okenn zonm, menm si i annan tou pouvwar. David ti dir Golyat: “Mon pe vin ver ou onon Zeova bann larme, e sa kongregasyon antye pou konnen ki Zeova pa sov avek ni lepe ni lans, parski batay i pour Zeova.” Avek son fles ek en sel ros, e avek led Zeova, David ti met sa zean ater.—1 Samyel 17:45-47.

8. Ki legzanp bann zonm ki ti annan lakrent pour Bondye i ansenny nou?

⁸ Petet nou osi nou pe fer fas avek bann lobstak oubyen lennmi zis parey David ti rankontre. Ki nou kapab fer? Nou kapab fer fas avek zot dan menm fason ki David ek lezot fidel dan lepase ti fer, savedir avek lakrent pour Bondye. Lakrent pour Bondye i kapab sirmont lafreyer zonm. Ler son bann konpanyon Izraelit ti anba presyon akoz zot lennmi, Neemya, en serviter fidel Bondye, ti ankouraz zot: “Pa per zot. Mazin Zeova sa Enn ki gran e ki fer annan lakrent pour li.” (Neemya 4:14) Avek sipor Zeova, David, Neemya, ek lezot serviter fidel Bondye ti reisi akonpli zot travay ki Bondye ti donn zot. Avek lakrent pour Bondye, nou osi kapab fer parey.

Montre Lakrent pour Bondye ler dan Problenm

9. Dan ki sitiasyon David ti montre lakrent pour Bondye?

⁹ Apre ki David ti touy Golyat, Zeova ti donn li bokou lezot laviktwar. Me Sail ki ti zalou, ti esey plizyer fason pour touy David. Premye kou i ti esey fer li san ki David i ekspekte, apre i ti servi riz, e finalman avek son larme. Menm si Zeova ti’n asir David ki i ti pou vin lerwa, pour plizyer lannen David ti bezwen sove, lager, e esper letan ki Zeova i deside fer li vin lerwa. Dan tou sa sitiasyon, David ti montre ki i ti annan lakrent pour sa vre Bondye.—1 Samyel 18:9, 11, 17; 24:2.

10. Ki mannyer David ti montre lakrent pour Bondye ler i ti dan danze?

¹⁰ En fwa, David ti al rod refiz avek Akis, lerwa en lavil Filisten apele Gat, kot Golyat ti reste. (1 Samyel 21:10-15) Bann serviter sa lerwa ti akiz David konman en lennmi zot nasyon. Ki David ti fer dan sa sitiasyon danzere? I ti devid son leker dan lapriyer avek Zeova. (Psonm 56:1-4, 11-13) Menm si i ti bezwen fer krwar i fou pour li kapab sove, David ti konnen ki vreman Zeova ki ti delivre li par beni son zefor. Par depan antyerman lo Zeova e met konfyans  dan li, David ti montre ki i ti vreman annan lakrent pour Bondye.—Psonm 34:4-6, 9-11.

11. Ki mannyer ler nou dan difikilte nou kapab montre lakrent pour Bondye, parey David ti fer?

¹¹ Parey David, nou kapab montre lakrent pour Bondye par met konfyans dan son promes pour ed nou fer fas avek nou bann problenm. David ti dir: “Met ou lavi ek son bann fardo dan lanmen Zeova, depan lo li e i li i pou azir.” (Psonm 37:5) Sa i pa vedir ki nou larg nou problenm dan lanmen Zeova san fer nanryen e nou ekspekte i fer keksoz dan nou plas. David pa ti zis priy Bondye pour ed li e apre pa fer nanryen. I ti servi son lafors ek son lespri ki Zeova ti’n donn li e i ti fer fas avek sa problenm. Me David ti konnen ki i pa ti pou reisi si i ti zis depan lo zefor imen. Nou devret fer parey nou osi. Apre ki nou’n fer tou sa ki nou kapab fer, nou devret les Zeova fer larestan. Anfet, souvannfwa nou bezwen zis depan lo Zeova akoz i napa nanryen ki nou kapab fer. E sa i lemoman kot nou montre nou lakrent pour Bondye. Parol senser David i rekonfort nou: “Lentimite avek Zeova i pour sa bann ki annan lakrent pour li.”—Psonm 25:14.

12. Akoz nou devret pran oserye nou lapriyer, e ki latitid nou pa devret zanmen annan?

¹² Alor, nou devret pran oserye nou lapriyer ek nou relasyon avek Bondye. Ler nou apros Zeova, nou devret “krwar ki i egziste e ki i rekonpans tou bann ki rod li.” (Ebre 11:6; Zak 1:5-8) E ler i ed nou, nou devret “viv an rekonesans” parey zapot Pol ti konsey nou. (Kolosyen 3:15, 17) Nou pa devret zanmen vin parey sa bann ki en Kretyen swazir avek bokou leksperyans ti koz lo la: “Zot pran Bondye konman en servant dan lesyel. Ler zot anvi en keksoz, nek zot lev en ledwa e zot anvi deswit i vini. E ler zot in ganny sa ki zot anvi, zot oule li ale.” Sa kalite latitid i montre ki en dimoun napa lakrent pour Bondye.

Ler Lakrent pour Bondye i diminyen

13. Ki moman David pa ti arive montre respe anver Lalwa Bondye?

¹³ Ler David ti santi led Zeova dan moman difisil sa ti ogmant son lakrent pour Bondye e fer li annan plis konfyans dan Bondye. (Psonm 31:22-24) Me ti annan trwa fwa kot David ti les son lakrent pour Bondye diminyen e sa ti anmenn konsekans grav. Premye  ti ariv ler i ti fer laranzman pour transport lars Zeova Zerizalenm lo en saret olye lo zepol bann Levit, parey Lalwa Bondye ti demande. Ler Ouza, ki ti pe diriz sa saret, ti anvoy son lanmen pour tyonbo Lars pour anpes li tonbe, i ti mor sirplas pour son “mank respe.” I vre, Ouza ti fer en gro pese, me an realite i ti osi akoz David pa ti mentenir en respe apropriye pour Lalwa Bondye ki ti fer sa maler arive. Annan lakrent pour Bondye i vedir fer keksoz dapre son laranzman.—2 Samyel 6:2-9; Nonm 4:15; 7:9.

14. Ki ti arive ler David ti mank lakrent pour Bondye e kont lakantite gerye Izrael?

¹⁴ Plitar, pouse par Satan, David ti fer en resansman lo lakantite gerye dan nasyon Izrael. (1 Kronik 21:1) Ler i ti fer sa, David ti montre ki son lakrent pour Bondye ti’n diminyen, e sa ti anmenn lanmor 70,000 Izraelit. Menm si David ti repantir devan Zeova, li ek sa bann otour li ti soufer en kantite.—2 Samyel 24:1-16.

15. Kwa ki ti fer David tonm dan limoralite seksyel?

¹⁵ En lot moman kot David ti mank lakrent pour Bondye, ti fer li annan relasyon seksyel imoral avek Batseba, madanm Ouriya. David ti konnen ki adilter oubyen menm anvi madanm en lot zonm ti mal. (Egzod 20:14, 17) Sa problenm ti konmanse ler David ti vwar Batseba pe bennyen. Si David ti annan en lakrent apropriye pour Bondye a sa moman, sa ti pou’n pous li pour deswit met son lizye ek son panse lo en lot keksoz. Okontrer, i paret ki David ti ‘kontinyen get’ Batseba ziska son dezir ti vin pli for ki son lakrent pour Bondye. (Matye 5:28; 2 Samyel 11:1-4) David ti oubliye ki Zeova ti enplike dan tou laspe son lavi.—Psonm 139:1-7.

16. Ki konsekans David ti bezwen soufer pour son pese?

¹⁶ En garson ti ne atraver relasyon ki David ti annan avek Batseba. En pe letan apre sa, Zeova ti anvoy son profet Natann pour devwal pese  David. Apre ki David ti retourn alarezon, i ti reganny son lakrent pour Bondye e i ti repantir. I ti sipliy Zeova pour pa rezet li oubyen pa retir Son lespri sen lo li. (Psonm 51:7, 11) Zeova ti pardonn David e i ti redwir sa pinisyon, me I pa ti protez David kont tou bann move konsekans son aksyon. Garson David ti mor, e depi sa letan, fanmiy David ti eksperyans bokou latet fer mal ek maler. Sa i vreman en gro pri pour peye ler nou les lakrent pour Bondye diminyen!—2 Samyel 12:10-14; 13:10-14; 15:14.

17. Mansyonn latet fer mal ki pese i anmennen.

¹⁷ Ozordi, si nou pa montre lakrent pour Bondye konsernan moralite nou kapab osi sibir bann konsekans grav ki dir pour lontan. Mazin lapenn ki en zenn madanm marye ti santi ler i ti aprann ki son msye ki ti en Temwen ti’n tronp li ler i ti pe travay dan en lot pei. Avek sok ek latristes, sa madanm ti bes son latet e devid tou son larm. Konbyen letan i pou pran pour son msye reganny son konfyans ek respe? Sa bann move konsekans i kapab ganny evite par vreman annan lakrent pour Bondye.—1 Korentyen 6:18.

Lakrent pour Bondye i anpes nou fer Pese

18. Ki lobzektif ek metod ki Satan i servi?

¹⁸ Satan pe byen vitman detrir bann valer moral sa lemonn, e i sirtou anvi sali bann vre Kretyen. Pour reisi fer sa, i eksplwat mwayen pli direk pour ariv kot nou leker ek lespri e sa i atraver nou bann sans, sirtou nou lizye ek zorey. (Efezyen 4:17-19) Ki ou pou fer ler san ekspekte ou vwar bann portre, tann bann parol oubyen zwenn dimoun imoral?

19. Ki mannyer lakrent pour Bondye ti ed en Kretyen evite fer pese?

¹⁹ Konsider legzanp André *, en ansyen, ki annan zanfan e i en dokter dan en pei Lerop. Ler André ti pe travay aswar dan lopital, plizyer fwa bann madanm ki travay avek li ti met bann pti not dekore avek leker lo son zorye pour envit li dormi avek zot. André pa ti ezite pour refiz zot. Deplis, i ti al travay dan en lot landrwa pour li kapab sorti dan sa lanvironnman imoral. Annan lakrent pour Bondye ti vin en keksoz saz pour fer e sa ti anmenn benediksyon pour André. Ozordi i servi amitan dan biro brans Temwen Zeova dan son pei.

20, 21. (a) Ki mannyer lakrent pour Bondye i ed nou evite fer pese? (b) Ki nou pou egzaminen dan lartik swivan?

²⁰ Konsantre lo bann move panse i kapab fer en dimoun devlop en leta lespri kot i pare pour abandonn son relasyon presye avek Zeova an lesanz pour en keksoz ki i napa drwa. (Zak 1:14, 15) Parkont, si nou annan lakrent pour Zeova, nou pou reste lwen, menm sov lwen avek bann dimoun, landrwa, aktivite ek divertisman ki kapab fer nou perdi nou moralite. (Proverb 22:3) Menm si kekfwa sa i fer nou anbarase oubyen nou bezwen fer sakrifis, tousala i pa nanryen konpare avek perdi faver Bondye. (Matye 5:29, 30) Annan lakrent pour Bondye i pou osi ed nou pour pa zanmen volonterman ekspoz nou lekor avek okenn keksoz imoral, ki enkli tou sort kalite pornografi, me okontrer i pou fer nou “pa aret nou lizye lo sa ki initil.” Si nou fer sa, nou kapab annan konfyans dan Zeova pour ‘gard nou vivan’ e donn nou tou sa ki nou vreman bezwen.—Psonm 84:11; 119:37.

²¹ Vreman, i pou toultan en keksoz saz pour fer si nou azir avek vre lakrent pour Bondye. I osi sours vre boner. (Psonm 34:9) Sa pou tre evidan dan nou lartik swivan.

[Not anba lo paz]

Eski ou kapab eksplike?

• Ki bann kalite Kretyen ki lakrent pour Bondye i enkli?

• Ki mannyer lakrent pour Bondye i sirmont lafreyer zonm?

• Ki mannyer nou kapab montre ki nou annan sa bon pwennvi lo lapriyer?

• Dan ki fason lakrent pour Bondye i anpes nou fer pese?

[Kestyon]

[Portre lo paz 25]

David ti aprann annan lakrent pour Bondye ler i ti obzerv travay Zeova

[Portre lo paz 26]

Ki ou pou fer ler san ekspekte ou rankontre en tantasyon?