Zeova i delivre sa Enn ki dan Depresyon

“En dimoun drwat i rankontre bokou maler, me Zeova i delivre li dan tou sa bann maler.”—PSONM 34:19.

1, 2. Ki problenm en Kretyen fidel ti gannyen, e akoz nou kapab santi parey?

E N ZENN madanm apele Keiko * in en Temwen Zeova pour plis ki 20 tan. I ti en pionye ordiner oubyen proklanmater aplentan pour en pe letan. I ti kontan en kantite sa privilez. Me pa tro lontan, Keiko ti ganny bann santiman dezespwar ek lasolitid ki ti telman for ki i pa ti kapab tenir. I dir: “Mon ti zis plere.” Pour anpes sa bann panse negatif kontinyen, Keiko ti pas plis letan dan letid personnel. I dir: “Kantmenm sa, mon pa ti kapab sanz mon fason panse. I ti ariv en pwen kot mon ti anvi mor.”

² Eski ou’n deza pas atraver bann santiman dezespwar ou osi? Konman en Temwen Zeova, ou annan bokou rezon pour zwaye akoz bann ki annan latasman avek Bondye “i posed promes lavi dan letan prezan ek dan lavenir.” (1 Timote 4:8) Konmela menm ou dan en paradi spirityel! Me eski sa i vedir ki zanmen ou pou dan sagren? Be non! Labib i dir: “En dimoun drwat i rankontre bokou maler.” (Psonm 34:19) Sa i pa sirprann nou akoz “lemonn antye i dan pouvwar dyab.” (1 Zan 5:19) Dan en fason ou en lot, nou tou nou eksperyans bann lefe sa realite.—Efezyen 6:12.

Konsekans Depresyon

3. Mansyonn legzanp bann serviter Bondye dan Labib ki ti pas atraver ladetres.

³ Ler nou ladetres i prolonze sa i kapab fer nou annan en pwennvi sonm lo lavi an zeneral. (Proverb 15:15) Konsider sa zonm drwat Zob. Dan en sitiasyon tre penib, Zob ti dir: “Zonm, ki fanm in donn nesans, i viv en pti gin letan e son lavi i ranpli avek boulvers.” (Zob 14:1) Zob ti nepli dan lazwa. Pour en serten letan, i ti menm krwar ki Zeova ti’n abandonn li. (Zob 29:1-5) Zob pa ti sa sel serviter Zeova ki ti santi bokou langwas. Labib i dir nou ki Ana ti dan en profon sagrinasyon akoz i ti napa zanfan. (1 Samyel 1:9-11) En sitiasyon dan fanmiy Rebeka ti tourmant li ki ti fer li dir: “Mon’n ay mon lavi.” (Zenez 27:46) Ler David ti reflesir lo son bann fot, i ti dir: “Toudilon lazournen mon’n marse partou tris.” (Psonm  38:6) Sa detrwa legzanp i montre ki bann zonm ek fanm ki ti kontan Bondye dan letan ansyen ti pas atraver bann moman ladetres.

4. Akoz i pa drol i annan “bann ki dan depresyon” parmi bann Kretyen ozordi?

⁴ Ki nou pou dir lo bann Kretyen? Zapot Pol ti vwar li neseser pour dir bann Tesalonisyen “koz dan en fason konsolan avek bann ki dan depresyon.” (1 Tesalonisyen 5:14, NW) En liv i fer resorti ki sa mo Grek tradwir konman “bann ki dan depresyon” i kapab refer avek dimoun ki “presyon lavi i vin tro for pour zot tenir pour en pe letan.” Parol Pol i montre ki moral serten Kretyen swazir dan kongregasyon Tesalonik ti ba. Ozordi osi i annan bann Kretyen ki dan depresyon. Me akoz zot dan depresyon? Annou egzamin trwa keksoz ki souvan lakoz.

Nou Lenperfeksyon i kapab fatig nou

5, 6. Ki rekonfor nou kapab gannyen atraver Romen 7:22-25?

⁵ Kontrerman avek dimoun koronpi ki’n “perdi tou pider,” pour bann vre Kretyen zot leta enparfe i trouble zot. (Efezyen 4:19) Zot kapab santi parey Pol, ki ti dir: “Mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan.” Apre Pol ti dir: “Malere! La sa ki mon ete!”—Romen 7:22-24.

⁶ Eski ou’n deza santi parey Pol? I pa mal pour ou konsyan ou lenperfeksyon, akoz sa i kapab fer ou byen konpran gravite pese e fortifye ou determinasyon pour evit sa ki mal. Me pa fodre ki toultan ou fer ou lavi mizerab akoz ou bann defo. Apre ki Pol ti fer resorti son ladetres, i ti azoute: “Gran mersi Bondye par Zezi-Kri nou Senyer!” (Romen 7:25) Wi, Pol ti annan konfyans ki disan ki Zezi in verse i kapab sov li dan pese.—Romen 5:18.

7. Kwa ki kapab ed en dimoun pour pa tro trouble akoz son tandans pour fer pese?

⁷ Si ou santi ou lenperfeksyon i domin ou, les sa ki zapot Zan ti ekrir konsol ou: “Si okenn antre zot i arive fer pese nou annan en avoka kot Bondye, Zezi-Kri, nou Lazistis. Limenm, viktim sakrifis ki permet nou ganny pardon nou pese, pa zis pour nou, me osi pour pese lemonn antye.” (1 Zan 2:1, 2) Si ou bann tandans pour fer pese i trouble ou, toultan mazinen ki Zezi in mor pour bann peser, me pa pour dimoun parfe. An realite, ‘tou dimoun in fer pese e pa’n arive ganny laglwar Bondye.’—Romen 3:23.

8, 9. Akoz nou devret rezet bann panse pour kondann nou lekor?

⁸ Me sipoze ou ti fer en pese grav dan lepase. Sirman plizyer fwa ou’n mansyonn sa dan lapriyer avek Zeova. Bann ansyen dan kongregasyon ti donn ou led spirityel. (Zak 5:14, 15) Ou ti vreman repantir e alor ou ti reste dan kongregasyon. Oubyen petet ou ti kit lorganizasyon Bondye pour en pe letan, me plitar ou ti repantir e reganny laprouvasyon Bondye. Dan tou le de sitiasyon, sa pese ki ou ti fer i kapab revin dan ou lespri e fatig ou. Si sa i arive, mazinen ki Zeova i pardonn “dan en gran fason” bann ki vreman repantir. (Izai 55:7) Deplis, Zeova pa oule ki ou santi konmsi ou’n ganny kondannen san okenn lespwar. Koumsa menm ki Satan i oule ou santi. (2 Korentyen 2:7, 10, 11) Satan pou ganny detrir akoz sanmenm ki i merite, me i anvi ki ou osi ou santi ki ou merit sa menm zizman. (Revelasyon 20:10) Pa les Satan reisi dan sa konplo pour detrir ou lafwa. (Efezyen 6:11) Okontrer, “reziste li” dan sa laspe, zis parey ou fer dan lezot domenn.—1 Pyer 5:9.

⁹ Dan Revelasyon 12:10, Satan i ganny apele “lakizater” bann Kretyen swazir. I akiz zot “lizour konman aswar” devan Bondye. Ler nou reflesir lo sa verse, sa i ed nou pour  vwar ki Satan, sa fo lakizater, ti pou kontan si ou ti akiz e kondann ou lekor, menm si Zeova pa fer sa. (1 Zan 3:19-22) Akoz kontinyen tourmant ou lekor lo ou bann defo ziska ou santi anvi abandonnen? Pa les Satan detri ou relasyon avek Bondye. Pa les Satan fer ou oubliye ki Zeova i “annan mizerikord ek konpasyon, pa ankoler vitman, e annan en kantite labonte leker ek laverite.”—Egzod 34:6.

Nou bann Limit i kapab dekouraz nou

10. Dan ki fason nou bann limit i kapab dekouraz nou?

¹⁰ Serten Kretyen i dekouraze akoz fason ki zot bann limit i afekte zot servis pour Bondye. Eski sa i leka avek ou? Petet en maladi grav, lavyeyes, oubyen lezot sirkonstans i anpes ou pas otan letan dan predikasyon parey ou ti abitye avan. I vre, bann Kretyen i ganny ankouraze pour rod letan pour servi Bondye. (Efezyen 5:15, 16) Me si ou bann limit i vreman anpes ou fer plis dan predikasyon e sa i vin en sours dekourazman pour ou?

11. Ki mannyer nou benefisye avek konsey Pol dan Galat 6:4?

¹¹ Labib i ankouraz nou pour pa vin pares me pour “imit sa bann ki par lafwa ek pasyans i erit bann promes Bondye.” (Ebre 6:12) Nou kapab fer sa selman si nou egzamin zot bon legzanp e rod fason pour imit zot lafwa. Me nou pa pou benefisye si nou konpar nou lekor dan en move fason avek lezot e krwar ki napa nanryen ki nou fer ki bon. Alors, i byen si nou aplik konsey Pol: “Sakenn i devre egzamin son prop aksyon, alor si i annan keksoz pour fer li fyer, i ava fyer pour son prop aksyon san ki i bezwen konpar li avek sa ki pour lezot.”—Galat 6:4.

12. Akoz nou kapab zwaye dan servis ki nou rann Zeova?

¹² Bann Kretyen i annan bon rezon pour zwaye, menm ler bann problenm lasante grav i anpes zot fer sa ki zot ti anvi fer. Labib i asir nou: “Bondye pa enzis pour li oubliy travay ki zot in fer, ni lanmour ki zot in montre pour li.” (Ebre 6:10) Petet sitiasyon an deor ou kontrol in fer li difisil pour ou kontinyen fer parey ou ti fer avan. Me avek led Zeova, petet ou’n reisi fer plis dan serten laspe travay predikasyon, par egzanp temwannyaz par telefonn e par ekrir let. Ou kapab asire ki Zeova pou beni sa ki ou fer avek tou ou leker e sa lanmour ou montre pour li e pour lezot.—Matye 22:36-40.

“Letan difisil” i kapab vin en Lour lo nou

13, 14. (a) Dan ki fason sa “bann letan difisil” i kapab afekte nou? (b) Ki mannyer nou vwar ki dimoun i annan leker dir ozordi?

¹³ Menm si nou esper pour viv dan nouvo lemonn drwat Bondye, konmela menm nou viv dan “letan difisil.” (2 Timote 3:1) Lefe ki nou konnen ki bann levennman troublan i montre ki nou delivrans i pros sa i rekonfort nou. Kantmenm sa, bann kondisyon otour nou i afekte nou. Par egzanp, si nou napa en travay. Petet louvraz i rar, e anmezir plizyer mwan i pase, ou kapab demann ou lekor si Zeova i vwar ou sitiasyon oubyen antann ou lapriyer. Oubyen petet ou’n vin viktim diskriminasyon oubyen lezot form lenzistis. Menm lir bann gran tit dan zournal i kapab fer ou santi parey sa zonm drwat, Lot ki ti “byen sagrinen,” (“akable,” Bible de Darby) avek kondwit deregle bann dimoun otour li.—2 Pyer 2:7.

¹⁴ I annan en serten laspe sa bann dernyen zour ki nou pa kapab inyore. Labib ti predir ki bokou dimoun pou annan “leker dir,” oubyen mank lafeksyon natirel. (2 Timote 3:3) Pli ale nou pe nepli vwar lafeksyon dan bokou lakour ozordi. An realite parey liv Family Violence i dir: “Levidans i montre ki i annan plis probabilite pour en  dimoun ganny touye, bate, oubyen abize emosyonnelman oubyen seksyelman par lezot manm son fanmiy ki par okenn lezot dimoun. Pour serten adilt ek zanfan, sa landrwa kot dimoun i devret santi lanmour ek sekirite in vin sa landrwa pli danzere.” Sa bann ki’n grandi dan en move lanvironnman kot zot lakour, i kapab plitar pas atraver bann moman lenkyetid ek dezespwar. Ki ou pou fer si sa i ou sitiasyon?

15. Dan ki fason lanmour Zeova i pli siperyer ki pour okenn imen?

¹⁵ Psalmis David ti sante: “Si mon prop papa e mon prop manman i kit mwan, Zeova i a pran mwan.” (Psonm 27:10) I vreman rekonfortan pour konnen ki lanmour Zeova i pli for ki lanmour okenn paran imen! Menm si i fer mal pour ganny rezete, maltrete, abandonnen par en paran, sa pa afekte ki kantite Zeova i enterese avek ou. (Romen 8:38, 39) Mazinen ki Bondye i atir sa bann ki i kontan. (Zan 3:16; 6:44) Nenport ki fason lezot dimoun in tret ou, ou Papa dan lesyel i kontan ou!

Bann Pa pratik pour soulaz Dezespwar

16, 17. Ki en dimoun i kapab fer pour prezerv son lafors spirityel ler i fer fas avek dekourazman?

¹⁶ I annan serten keksoz pratik ki ou kapab fer pour fer fas avek dezespwar. Par egzanp, swiv en bon progranm aktivite Kretyen. Reflesir lo Parol Bondye, sirtou ler dekourazman i paret tro for. En psalmis ti sante: “Ler mon dir: ‘Mon lipye pou sirman fer en fo pa,’ ou labonte leker, O Zeova, ti kontinyen soutenir mwan. Ler mon ti annan bokou panse troublan dan mwan, ou prop konsolasyon ti konmans kares mwan.” (Psonm 94:18, 19) Lir Labib toulezour pou ede ranpli ou lespri avek bann parol konsolan ek panse ankourazan.

¹⁷ Lapriyer osi i enportan. Menm si ou pa kapab eksprim ou profon santiman, Zeova i konnen sa ki ou pe esey dir. (Romen 8:26, 27) En psalmis ti donn sa lasirans: “Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.”—Psonm 55:22.

18. Ki bann pa pratik en dimoun ki dan depresyon i kapab pran?

¹⁸ Serten dimoun i tonm dan dezespwar akoz serten form depresyon ki pli grav ki apel clinical depression. * Si ou dan sa sitiasyon, esey konsantre ou latansyon lo nouvo lemonn Bondye e sa letan ler “okenn zabitan pa pou dir: ‘Mon malad.’” (Izai 33:24) Si ou bann santiman negatif i paret plis ki zis en pti depresyon ki dir pour en pe letan, dan sa ka petet i bon pour rod led medikal. (Matye 9:12) I osi enportan pour pran swen avek ou lasante fizik. Manz byen e fer en pe legzersis i kapab ede. Fer sir ki ou pe ganny ase repo. Pa get televizyon ziska tar aswar, e evit bann divertisman ki pou rann ou fatige fizikman e emosyonnelman. Pli enportan, kontinyen fer bann aktivite spirityel! Menm si i pa ankor ariv sa letan ler Zeova pou “eswiy tou larm” i pou ed ou andire.—Revelasyon 21:4; 1 Korentyen 10:13.

 Viv “anba Kontrol Pisans Bondye”

19. Ki Zeova i promet bann ki pe soufer?

¹⁹ Labib i asir nou ki menm si sa enn ki drwat i rankontre bokou maler, “Zeova i delivre li dan tou sa bann maler.” (Psonm 34:19) Ki mannyer Bondye i fer sa? Ler zapot Pol ti priye plizyer fwa pour Zeova tir sa ‘pikan dan son laser,’ Zeova ti dir li: “Mon pisans i azir dan lafebles.” (2 Korentyen 12:7-9) Ki Zeova ti promet Pol, e ki i promet ou? Bondye pa promet en gerizon deswit me i promet sa lafors pour ed ou andire.

20. Malgre nou leprev, ki 1 Pyer 5:6, 7 i asir nou?

²⁰ Zapot Pyer ti ekrir: “Alor avek limilite plas zot anba kontrol pisans Bondye pour ki dan son ler ki i’n fikse, i a elev zot. Desarz tou zot sousi lo li, parski limenm ki pran swen avek zot.” (1 Pyer 5:6, 7) Akoz Zeova i enterese avek ou, i pa pou abandonn ou. I pou siport ou malgre bann leprev ki ou eksperyanse. Kit antet ki bann Kretyen fidel i “anba kontrol pisans Bondye.” Anmezir nou servi Zeova, i donn nou lafors pour andire. Si nou fidel avek li, napa nanryen ki kapab afekte nou pour touzour. Alor, annou reste fidel avek Zeova pour ki nou ava kapab rezwir lavi eternel dan son nouvo lemonn promiz e vwar sa zour ler i pou vreman delivre pour touzour sa enn ki dan depresyon!

[Not anba lo paz]

Eski ou rapel?

• Akoz depresyon i afekte menm bann ki servi Bondye?

• Nonm serten fakter ki kapab fer serten parmi pep Bondye dekouraze.

• Ki mannyer Zeova i ed nou fer fas avek nou bann lenkyetid?

• Dan ki fason nou “anba kontrol pisans Bondye”?

[Kestyon]

[Portre lo paz 18]

Malgre leprev, pep Zeova i annan rezon pour rezwir