“Akoz en pti Garson nef an”

WIESLAWA i reste dan sid Lapolonny. Sak fwa bann Temwen Zeova i pas kot li, i remersye zot byen zantiman me i pa pare pour diskit nanryen avek zot. En zour, Samuel, en pti garson nef an avek son manman ti aparet devan son laport. Safwasi, Wiesława ti deside pour ekout sa mesaz e aksepte en magazin ki ti pe koz lo en paradi lo later.

Vi ki Memoryal lanmor Kris ti pe aprose, Samuel ti anvi envit Wiesława sa levennman spesyal. Alor sa pti garson, akonpannyen par son manman, ti vizit Wiesława ankor pour anmenn en lenvitasyon pour li. Wiesława ti vwar ki sa pti garson ti’n byen sanze. Alors i ti eskiz son lekor en pti kou pour li al sanze. Ler i ti retournen, i ti ekout Samuel, aksepte sa lenvitasyon, e apre demande: “Eski mon devret vin mon tousel oubyen avek mon msye?” Apre i ti dir: “Kantmenm mon msye pa vini, mwan mon pou vini. Mon a fer li pour ou, Samuel.” I ti gard son parol e sa ti fer Samuel bokou plezir.

Pandan diskour Memoryal, Samuel ti asiz obor Wiesława e montre li bann verse Labib ki ti pe ganny diskite. Sa ti enpresyonn li. I ti kontan Memoryal e apresye lefe ki bann lide profon ti ganny eksplike dan en fason senp. Sa bon lakey ki i ti gannyen e sa bon fason dimoun dan kongregasyon ti tret li, ti tous li. Depi sa zour, Wiesława in apresye plis bann keksoz spirityel e i’n konmans asosye avek Temwen Zeova regilyerman. Resaman i’n dir: “Mon kanmi mon pa ti ekout zot ler zot ti pas kot mwan. E pour dir laverite, mon ti ekout zot mesaz zis akoz en pti garson nef an, akoz Samuel.”

Parey Samuel ki reste Lapolonny, en kantite lezot zenn Temwen Zeova

i loue Bondye avek zot labous e par zot bon mannyer ek kondwit. Si ou en zenn, ou osi ou kapab ed en dimoun senser apresye bann bon valer spirityel.

[Portre lo paz 32]