Bann Pwen enteresan dan trwazyenm
Parol Zeova i vivan
Bann Pwen enteresan dan trwazyenm ek katriyenm Liv Psonm
DAN en lapriyer avek Bondye, en psalmis ti demande: “Eski ou labonte leker pou ganny anonse dan latonm, ou fidelite dan landrwa destriksyon?” (Psonm 88:11) Byensir larepons i non. San lavi, nou pa kapab loue Zeova. Loue Zeova i en bon rezon pour nou reste vivan e annan lavi i en bon rezon pour donn li laglwar.
Trwazyenm ek katriyenm Liv Psonm, ki kontyen Psonm 73 ziska 106, i donn nou bokou rezon pour loue nou Kreater e beni son non. Ler nou reflesir lo sa bann psonm, sa i devret ogmant nou lapresyasyon pour “Parol Bondye” e ed nou pli byen eksprim nou ler nou loue li. (Ebre 4:12) Premyerman, annou get sa trwazyenm Liv Psonm avek bokou lentere.
“I BON POUR MWAN APROS AVEK BONDYE”
Sa premye 11 psonm dan sa trwazyenm koleksyon i bann konpozisyon Azaf oubyen en dimoun dan son lakour. Sa premye kantik i eksplike kwa ki ti anpes Azaf ganny antrennen par bann move panse. Alafen i ti ariv lo sa bon konklizyon. I ti sante: “I bon pour mwan apros avek Bondye.” (Psonm 73:28) Answit Psonm 74 i kontyen en lamantasyon konsernan destriksyon Zerizalenm. Psonm 75, 76, ek 77 i montre Zeova konman sa Ziz drwat, Sover bann ki annan limilite, ek sa enn ki ekout lapriyer. Psonm 78 i reviz listwar Izrael depi letan Moiz ziska David. Dan Psonm 79 i annan en lamantasyon konsernan destriksyon tanp. Dan Psonm 80 i annan en lapriyer pour reetablir pep Bondye. Psonm 81 i en lankourazman pour obeir Zeova. Psonm 82 ek 83 i bann lapriyer pour Bondye egzekit son zizman lo bann ziz koronpi e osi lo son bann lennmi.
En melodi bann garson Kora i dir: ‘Mon nanm in soupire e mon’n telman anvi al dan lakour Zeova.’ (Psonm 84:2) Psonm 85 i en demann pour Bondye beni bann ki ti pe retournen sorti legzil. Sa psonm i fer vwar ki benediksyon spirityel i annan bokou plis valer ki benediksyon fizik. Dan Psonm 86, David i demann Bondye pour vey lo li e enstri li. Dan Psonm 87, i annan en melodi konsernan Siyon e pour sa bann ki ti ne laba, swivi par en lapriyer avek Zeova dan Psonm 88. Labonte leker Zeova, parey i ganny eksprimen dan lalyans fer avek David, i ganny aksantye dan Psonm 89, konpoze par Etann, petet enn parmi sa kat zonm saz dan letan Salomon.—1 Lerwa 4:31.
Larepons pour bann Kestyon lo Labib:
73:9—Dan ki fason bann mesan in “met zot labous dan lesyel li menm, e zot lalang i marse partou lo later”? Vi ki bann move dimoun napa okenn respe pour personn ki swa dan lesyel oubyen lo later, zot pa ezite pour kritik Bondye avek zot labous. Zot osi kalonmni zot prosen avek zot lalang.
74:13, 14—Kan Zeova ti ‘kas latet bann mons delo sale e kraz an morso bann latet Levyatan’? “Faraon, lerwa Lezip,” i ganny apele “sa gran mons delo sale ki’n tal li dan milye kannal Nil.” (Ezekyel 29:3) Levyatan i kapab reprezant “bann ki for pour Faraon.” (Psonm 74:14, not anba paz) I probab ki sa lekspresyon kraz zot latet i refer avek defet Faraon ek son larme ler Zeova ti delivre bann Izraelit anba lesklavaz Ezipsyen.
75:4, 5, 10—Ki sa mo “korn” i sinifye? Korn en zannimo i en zarm pwisan. Alor sa mo “korn” i literalman vedir pouvwar oubyen lafors. Zeova i lev korn son pep, savedir i met zot dan en pli o pozisyon, me i ‘koup korn bann move dimoun.’ Nou ganny averti pour pa ‘lev nou korn anler’ savedir nou pa devret annan en latitid fyer oubyen arogan. Vi ki se Zeova ki elev bann dimoun, ler nou ganny responsabilite dan kongregasyon nou devret konsider sa responsabilite sorti kot li.—Psonm 75:7.
76:10—Ki mannyer “lakoler zonm” i loue Zeova? Ler Bondye i les bann imen eksprim zot lakoler kont nou akoz nou son bann serviter, sa i kapab anmenn en bon rezilta. Okenn difikilte ki nou kapab eksperyanse i kapab disiplin nou dan en serten fason. Zeova i permet soufrans selman lo en degre ki i donn nou sa kalite formasyon. (1 Pyer 5:10) ‘Larestan lakoler zonm, Bondye i anmar dan son leren.’ Me si nou soufer ziska nou perdi nou lavi? Sa osi i kapab loue Zeova akoz sa bann ki vwar nou andire fidelman i kapab osi konmans glorifye Bondye.
78:24, 25; not anba paz—Akoz lamann i ganny apele “lagrenn lesyel” ek “dipen bann lanz”? Sa de lekspresyon pa vedir ki bann lanz ti manz lamann. I ti “lagrenn lesyel” akoz i ti sorti dan lesyel. (Psonm 105:40) Vi ki bann lanz, oubyen “bann pwisan,” i reste dan lesyel, sa lekspresyon “dipen bann lanz” i kapab senpleman vedir ki Bondye, ki reste dan lesyel, ti fourni li. (Psonm 11:4) Petet Zeova ti servi bann lanz pour donn lamann bann Izraelit.
82:1, 6—Lekel sa bann ki ganny apele “bann bondye” ek “bann garson sa enn Tre O”? Sa de lekspresyon i refer avek bann ziz imen dan Izrael. Sa i apropriye lefe ki zot ti servi konman bann portparol ek reprezantan Bondye.—Zan 10:33-36.
83:2—Ki i endike ‘lev latet’? Sa zes i sinifye pare pour servi pouvwar oubyen pran aksyon, souvan pour opoze, lager, oubyen oprim lezot.
Leson pour nou:
73:2-5, 18-20, 25, 28. Nou pa devret zalou prosperite bann mesan e adopte zot move fason viv. Bann dimoun mesan i lo en teren glise. Zot pou sirman “tonbe.” Deplis, vi ki anba dominasyon bann dirizan enparfe, mesanste pou toultan egziste, nou zefor pour esey elimin li pa pou abouti dan nanryen. Parey Azaf, nou saz si nou fer fas avek mesanste par “apros avek Bondye” e par pran plezir pour annan en relasyon pros avek Li.
73:3, 6, 8, 27. Nou devret veye pour pa vant nou lekor, vin arogan, monk lezot e fer frod. Sa i leka menm si kekfwa i dan nou lavantaz pour azir dan sa bann fason.
73:15-17. Ler nou pa pe pans dan en bon fason, nou en pe konfize, nou devret evite fer tou dimoun konnen. Dir “en zistwar koumsa” i kapab dekouraz lezot. Nou devret reflesir trankilman lo keksoz ki trakas nou e rezourd zot par asosye avek nou bann frer ek ser Kretyen.—Proverb 18:1.
73:21-24. Si nou mekontan akoz bann move dimoun i paret pe byen pase i pou konmsi nou pe azir parey bann zannimo ki pa kapab rezonnen. Sa reaksyon i tro vit, i baze zis lo lemosyon. Okontrer, nou devret les konsey Zeova gid nou, avek konfyans total ki i pou ‘tyonbo nou lanmen drwat’ e siport nou. Deplis, Zeova ‘pou anmenn nou ver laglwar,’ savedir dan en relasyon pros avek li.
77:6. Montre lentere senser pour bann laverite dan Labib e avek latansyon fer resers i demann letan pour etidye e reflesir. I tre enportan ki nou met letan dekote kot nou trouv nou, nou tousel pour fer sa!
79:9. Zeova i ekout nou lapriyer, sirtou ler i konsernan glorifikasyon son non.
81:13, 16. Ekout lavwa Zeova e mars dan son semen i anmenn bokou benediksyon.—Proverb 10:22.
82:2, 5. Lenzistis i fer “bann fondasyon later” tranble. Bann aksyon enzis i deranz stabilite sosyete imen.
84: 1-4, 10-12. Lapresyasyon bann psalmis pour landrwa ladorasyon Zeova ek zot lakontantman pour zot privilez servis i vin en legzanp pour nou.
86:5. Nou vreman rekonesan ki Zeova i “pare pour pardonnen”! I pe rod okenn levidans ki pou donn li en rezon pour montre mizerikord anver en dimoun ki’n fer sa ki mal me ki repantir.
87:5, 6. Eski sa bann ki resevwar lavi dan Paradi lo later pou konn non sa bann ki’n resisite pour al dan lesyel? Sa bann verse i endike ki sa i tre probab.
88:13, 14. Si nou tarde ganny en larepons pour nou lapriyer konsernan en serten problenm, i posib ki Zeova i anvi nou demontre ki nou senser dan nou devosyon anver li.
“REMERSI LI, BENI SON NON”
Annou vwar diferan rezon pour loue Zeova ki sa katriyenm koleksyon psonm i fer resorti. Dan Psonm 90, Moiz i fer resorti diferans ki annan ant legzistans “Lerwa eternel” ek lavi kourt en zonm. (1 Timote 1:17) Dapre Psonm 91:2, Moiz i refer avek Zeova konman ‘son refiz ek son latour for’ la kot nou santi nou an sekirite. Sa detrwa psonm ki vin apre i koz lo bann zoli kalite Bondye, son panse siperyer, ek son bann travay merveye. Trwa psonm i konmans avek sa lekspresyon “Zeova li menm in vin lerwa.” (Psonm 93:1; 97:1; 99:1) En psalmis i envit nou pour “remersi [Zeova], beni son non” akoz i nou Kreater.—Psonm 100:4.
Ki mannyer en dirizan ki annan lakrent pour Zeova i devret desarz son responsabilite? Psonm 101, ki Lerwa David ti konpoze, i donn larepons. Sa lot psonm i dir nou ki Zeova “I pou sirman vir ver lapriyer bann ki’n ganny depouye, e i pa pou mepriz zot lapriyer.” (Psonm 102:17) Psonm 103 i atir latansyon lo labonte leker ek mizerikord Zeova. Par refer avek sa kantite keksoz ki Zeova in fer lo later, en psalmis i anonse: “Pa ou bann travay i bokou, O Zeova! Ou’n fer zot tou avek lasazes.” (Psonm 104:24) Sa de dernyen kantik dan katriyenm Liv i loue Zeova pour son bann travay merveye.—Psonm 105:2, 5; 106:7, 22.
Larepons pour bann Kestyon lo Labib:
91:1, 2—Lekel “sa landrwa sekre sa enn Tre O,” e ki mannyer nou kapab ‘reste’ ladan? Sa i en landrwa senbolik ki reprezant sekirite spirityel, en kondisyon oubyen leta kot nou ganny proteze spirityelman. Sa landrwa i sekre akoz bann ki pa met zot konfyans dan Bondye pa arive konn sa landrwa. Nou fer Zeova nou landrwa reste par get li konman nou refiz ek latour for, par loue li konman Souvren Dirizan liniver, e par pres sa bon nouvel Rwayonm. Nou santi nou an sekirite spirityelman akoz nou konnen ki Zeova i toultan pare pour ed nou.—Psonm 90:1.
92:12—Dan ki fason sa enn ki drwat i “fleri parey en pye palm”? En pye palm i renonmen pour son prodiktivite. En dimoun drwat i parey en pye palm akoz i drwat dan lizye Zeova e kontinyen raport “bon fri,” ki enkli bann bon aksyon.—Matye 7:17-20.
Leson pour nou:
90:7, 8, 13, 14. Ler nou fer sa ki mal sa i toultan afekte nou relasyon avek sa vre Bondye. E fer pese an sekre pa kapab reste kasyet devan li. Me si nou vreman repantir e rezet nou move semen, Zeova pou redonn nou son faver, ‘satisfer nou avek son labonte leker.’
90:10, 12. Lefe ki lavi i kourt, nou devret “kont nou bann zour.” Ki mannyer? Par annan “en leker lasazes” oubyen par montre lasazes pour nou pa gat larestan nou bann zour, me nou servi zot dan en fason ki fer plezir Zeova. Pour kapab fer sa, nou bezwen etablir bann priyorite spirityel e servi nou letan byen.—Efezyen 5:15, 16; Filipyen 1:10.
90:17. I apropriye pour priye ki Zeova i “etabli solidman travay nou lanmen” e beni nou zefor dan predikasyon.
92:14, 15. Par vin bann etidyan Labib ki serye e par asosye regilyerman avek pep Zeova, bann aze i kontinyen “gra e fre” savedir annan lafors spirityel e vin itil pour kongregasyon.
94:19. Nenport keksoz ki kapab fer nou annan “bann panse troublan,” lir e reflesir lo “bann konsolasyon” trouve dan Labib pou rekonfor nou.
95:7, 8. Par ekout konsey dan Labib, port latansyon, e pare pour obeir zot, pou anpes nou devlop en leker dir.—Ebre 3:7, 8.
106:36, 37. Sa bann verse i asosye ladorasyon zidol avek fer sakrifis avek demon. Sa i montre ki en dimoun ki servi zidol i kapab vin anba lenfliyans demon. Labib i konsey nou: “Prezerv zot kont bann zidol.”—1 Zan 5:21.
“Loue Ya, zot Lepep!”
Sa trwa dernyen kantik dan sa katriyenm Liv Psonm i fini avek sa konsey: “Loue Ya, zot lepep!” Sa dernyen psonm osi i konmans avek sa parol. (Psonm 104:35; 105:45; 106:1, 48) Annefe, sa lekspresyon “Loue Ya, zot lepep!” i aparet souvan dan katriyenm Liv psonm.
Sirman nou annan bokou rezon pour loue Zeova. Psonm 73 ziska 106 in donn nou bokou keksoz pour reflesir lo la, e i’n ranpli nou leker avek lapresyasyon pour nou Papa dan lesyel. Ler nou mazin tou sa ki i’n deza fer pour nou e pou fer pour nou dan lavenir, pa nou motive pour “loue Ya” avek tou nou lafors?
[Portre lo paz 8]
Parey Azaf, nou kapab fer fas avek lemal par “apros avek Bondye”
[Portre lo paz 9]
Faraon ti ganny defet kot Lanmer Rouz
[Portre lo paz 9]
Eski ou konnen akoz lamann i ganny apele “dipen bann pwisan”?
[Portre lo paz 11]
Kwa ki ed nou pour retir nou “bann panse troublan”?