Bann ki dous pou posed Later

“Mon mazinen ki lanatir pou ganny transformen e rekonsilye. . . . I pa pou ariv demen bomaten, me i pou pran en bann letan avan ler sa i arive, sa letan kot pou annan en nouvo lesyel ek en nouvo later.”—Jean-Marie Pelt, en Franse ki en spesyalis lanvironnman.

BOKOU dimoun ti a kontan vwar nou plannet later vin en paradi, akoz ler zot get leta ki nou lanvironnman ek sosyete i ladan, sa i fer zot tris. Anfet, sa aspirasyon i pa zis en rev dan nou letan modern. Depi byen lontan, Labib in promet ki en zour later pou vin en paradi. ‘Bann ki dous . . . pou posed later.’ “Ki ou lavolonte i ganny akonpli lo later parey dan lesyel.” Sa i parol ki Zezi ti dir dan Labib ki bokou dimoun i konnen. (Matye 5:5; 6:10) Me pa bokou dimoun ozordi ki krwar en zour bann dimoun ki dous pou reste lo later. Pour bokou ki dir zot Kretyen, Paradi in fini perdi.

En magazin Lafrans ki apel La Vie i eksplike akoz sa krwayans pour annan en paradi lo later ouswa dan lesyel in fini perdi, omwen dan Legliz Katolik. “I ti enn bann lansennyman ki ti ganny plis ansennyen par bann pret Katolik pour omwen 19 syek, me apre sa, [sa konsep] konsernan en paradi ti nepli ganny mansyonnen dan bann rasanbleman relizye, dan sermon Dimans, dan bann kour teolozi e dan laklas katesis.” Serten in dir ki sa mo ‘paradi’ in ganny kasyet avek en “gro nyaz mister ek konfizyon.” Serten ki prese i volonterman evite koz lo la, akoz pour zot paradi “i tro fer dimoun mazin en later kot tou dimoun i zwaye.”

Dapre Frédéric Lenoir, en sosyolog ki spesyaliz dan larelizyon, pour li sa konsep paradi in zis vin en bann vye portre, en rev ki dimoun i nepli krwar ladan. Jean Delumeau ki istoryen e loter plizyer liv lo sa size, li i krwar ki bann profesi Labib pou ganny akonpli zis dan en sans senbolik, pa literalman. I ekrir: “Konsernan sa kestyon, ‘Kisisa Paradi ozordi?’ Bann Kretyen i reponn: Gran mersi nou Sover in ganny resisite, en zour nou tou nou pou atrap lanmen kanmarad e tou sa ki nou ti pe espere pou’n ganny realize.”

Eski nou ankor kapab krwar dan en paradi lo later? Ki lavenir i rezerve pour nou plannet later? Eski lavenir i paret dan sonm, oubyen eski nou kapab get lavenir avek lasirans? Sa lot lartik pou reponn sa bann kestyon.