“Demann Bondye tou sa ki zot bezwen”
“Demann Bondye tou sa ki zot bezwen”
“Dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.”—FILIPYEN 4:6.
1. Nou kapab kominik avek lekel, e akoz sa i vreman ekstraordiner?
SI OU ti demann vwar prezidan ou pei, ki larepons ou ti pou gannyen? Dan laplipar pei, ou pou ganny en larepons poli an ekri, me tre probab i pou difisil pour rankontre prezidan li menm. Me avek pli gran lotorite, Zeova, ki Bondye ek Souvren liniver, keksoz i diferan. Nou kapab kominik avek li nenport landrwa ki nou ete e nenport ler ki nou anvi. Bann lapriyer akseptab pou touzour ariv kot li. (Proverb 15:29) Pa sa i vreman merveye! Si nou apresye sa privilez, pa nou pou anvi priy regilyerman sa Enn “ki ekout lapriyer”?—Psonm 65:2.
2. Kwa ki neseser pour ki nou lapriyer i ganny aksepte par Bondye?
2 Serten i kapab demande, ‘Ki kalite lapriyer Bondye i aksepte?’ La en keksoz ki Labib i dir i neseser pour Bondye ekout nou lapriyer: “San lafwa personn pa kapab fer plezir Bondye. Sa ki apros kot Bondye i devre krwar ki i egziste e ki i rekonpans tou bann ki rod li.” (Ebre 11:6) Alor parey sa lot lartik ti demontre, en keksoz tre enportan se ki nou annan lafwa ler nou kominik avek Bondye. Bondye i kontan pour aksepte lapriyer bann ki priy avek lafwa ek bann bon aksyon, lapriyer bann ki senser e ki annan en bon kondisyon leker.
3. (a) Dapre lapriyer ki bann serviter fidel dan letan pase ti fer, ki nou kapab enkli dan nou lapriyer? (b) Ki diferan kalite lapriyer ki nou kapab fer?
3 Zapot Pol ti dir bann Kretyen son lepok: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.” (Filipyen 4:6, 7) Dan Labib i annan en bon pe legzanp dimoun ki’n priy Bondye osize zot bann traka, parey Ana, Eliya, Izkiya, ek Danyel. (1 Samyel 2:1-10; 1 Lerwa 18:36, 37; 2 Lerwa 19:15-19; Danyel 9:3-21) Nou devret swiv zot legzanp. I enteresan osi ki Pol i mansyonn diferan kalite lapriyer. I koz lo bann lapriyer pour eksprim nou rekonesans oubyen lapresyasyon pour sa ki Bondye i fer pour nou. Sa i kapab vin avek bann louanz. Siplikasyon se ler nou sipliy Bondye avek bokou senserite ek limilite. Nou kapab osi fer bann demann pour en keksoz spesifik ki nou bezwen. (Lik 11:2, 3) Tou sa bann diferan kalite lapriyer i akseptab pour nou Papa dan lesyel.
4. Menm si Zeova i konn tou nou bezwen, akoz nou bezwen demande toudmenm?
4 Serten i kapab dir, ‘Pa Bondye i konn tou sa ki nou bezwen?’ Sa i vre. (Matye 6:8, 32) Be alor, akfer fer li konn sa ki nou bezwen? Nou kapab pran en legzanp: Meton dan en laboutik zot pe ofer en kado avek serten kliyan. Me pour ganny sa kado, fodre ki sa bann kliyan i al kot sa laboutik e demann zot kado. Bann ki pa fer sa zefor i montre ki zot pa vreman enterese avek sa kado. Pour lapriyer i parey, si nou pa anvi demann sa ki nou bezwen dan lapriyer, nou montre ki nou napa ase lapresyasyon pour sa ki Zeova i donnen. Zezi ti dir: “Demande e zot a resevwar.” (Zan 16:24) Se koumsa ki nou montre ki nou annan konfyans dan Bondye.
Ki mannyer nou devret priy Bondye?
5. Akoz nou bezwen priy Bondye onon Zezi?
5 Zeova pa’n donn en pake lareg strik konsernan lapriyer. Selman nou bezwen aprann fason akseptab pour priy Bondye parey sa ki Labib i dir. Par egzanp, Zezi ti dir son bann disip: “Tou sa ki zot pou demann mon Papa an mon non i pou donn zot.” (Zan 16:23, nou ki’n met an italik.) Pour sa rezon nou devret priy onon Zezi. Dan sa fason nou montre ki nou rekonnet ki Zezi i sa sel mwayen pour ganny sa bann benediksyon ki Bondye in rezerve pour limanite.
6. Ki pozisyon ki akseptab ler nou pe priye?
6 Eski i annan serten pozisyon spesifik pour ki nou lapriyer i akseptab? Labib pa dir. (1 Lerwa 8:22; Neemya 8:6; Mark 11:25; Lik 22:41) Sa ki enportan se priy Bondye avek senserite ek en bon kondisyon leker.—Yoel 2:12, 13.
7. (a) Ki savedir “amenn”? (b) Ki mannyer nou kapab dir “amenn” dan lapriyer?
7 Ki sinifikasyon sa mo “amenn”? Labib i montre ki sa i en bon fason pour fini en lapriyer, spesyalman si nou pe priy an piblik. (Psonm 72:19; 89:52) Sa mo Ebre ʼa·menʹ i vedir “sirman.” McClintock and Strong’s Cyclopedia i endike ki “amenn” alafen en lapriyer i “konfirm sa bann parol ki fek ganny dir, e i en demann pour ki sa lapriyer i ganny realize.” Alors, si nou fini nou lapriyer an dizan “amenn” senserman, nou montre ki nou vreman senser konsernan sa ki nou fek dir. Ler en Kretyen i reprezant kongregasyon dan lapriyer e i dir “amenn” alafen, tou bann ki la prezan i kapab dir “amenn” dan zot leker oubyen for pour montre ki zot vreman aksepte sa ki fek ganny dir.—1 Korentyen 14:16.
8. Konman nou lapriyer i kapab parey lapriyer Zakob oubyen Abraam, e ki sa pou demontre lo nou?
8 Parler Bondye i les nou montre ki kantite enportan en keksoz i ete pour nou dan lapriyer. Petet nou pou parey Zakob dan Labib ki ti lager en lannwit antye avek en lanz pour li ganny en benediksyon. (Zenez 32:24-26) Parfwa nou pou parey Abraam ki plizyer fwa ti sipliy Zeova pour ki Lot ek lezot dimoun drwat i ganny sove dan lavil Sodonm. (Zenez 18:22-33) Nou osi nou kapab sipliy Zeova konsernan bann keksoz ki enportan pour nou e enplor li pour demontre son lazistis, labonte leker ek mizerikord.
Ki nou kapab demande?
9. Kwa ki devret pli enportan dan nou lapriyer?
9 Mazin parol Pol, i ti dir: ‘Dan tou sirkonstans par lapriyer ek siplikasyon demann Bondye tou sa ki zot bezwen.’ (Filipyen 4:6) Pour sa rezon, nou lapriyer personnel i kapab abord preski nenport size dan nou lavi. Toudmenm, keksoz ki devret pli enportan dan nou lapriyer, se zentere Zeova. Danyel i en bon legzanp, akoz ler Izrael ti ganny pini pour son bann pese, i ti sipliy Zeova pour demontre mizerikord. Danyel ti dir: “Pa tarde, akoz ou menm, O mon Bondye, akoz ou non.” (Danyel 9:15-19) Eski nou lapriyer i montre ki sa ki pli enportan pour nou i ki non sen Zeova i ganny glorifye e ki son lavolonte i ganny akonpli?
10. Ki mannyer nou konnen ki napa nanryen mal pour priy lo bann keksoz personnel?
10 Toudmenm i apropriye pour demann bann keksoz personnel. Par egzanp, parey dan Psonm, nou kapab priye pour pli byen konpran bann size profon konsernan Bondye. Enn sa bann ekriven ti priye: “Fer mwan konpran, pour ki mon kapab obeir ou lalwa e gard li avek tou mon leker.” (Psonm 119:33, 34; Kolosyen 1:9, 10) ‘Zezi ti ofer son lapriyer ek son siplikasyon sa enn ki ti kapab sov li dan lanmor.’ (Ebre 5:7) Dan sa fason Zezi ti demontre ki i toutafe normal pour demann lafors avek Bondye ler nou pas dan leprev oubyen nou dan danze. Dan lapriyer model osi, Zezi ti enkli bann konsern personnel parey pardonn nou bann fot e ganny nou dekwa toulezour.
11. Konman lapriyer i kapab ed nou pa tonbe ler nou ganny tante?
11 Dan lapriyer model, Zezi ti osi dir: “Pa permet ki nou ganny tante, me anpes nou tonm dan le mal.” (Matye 6:9-13) Plitar i ti donn sa konsey: “Veye e priye pour zot pa tonm dan tantasyon.” (Matye 26:41) I neseser ki nou priye ler nou ganny tante. Kot lekol oubyen dan travay, nou kapab ganny tante pour inyor bann prensip Labib. Bann ki pa Temwen i kapab envit nou pour partisip dan bann aktivite ki pa akseptab pour en Kretyen. Serten i kapab pous nou pour kas bann prensip drwat Labib. Dan bann ka parey, avan e ler nou pe ganny tante, i tre enportan ki nou swiv konsey Zezi pour demann Bondye pour pa les nou tonbe dan tantasyon.
12. Ki kalite presyon ki kapab fer nou priye, e ki led nou kapab gannyen avek Zeova?
12 Bann serviter Bondye i bezwen sibir tou sort presyon ek traka ozordi. Bokou i trakase akoz presyon ek maladi. Sa lemonn vyolan i fer nou pa anpe. Bann problenm ekonomik i fer li difisil pour zwenn en bout avek lot. Pa i rekonfortan ler nou konnen ki Zeova i ekout lapriyer son serviter ki eksprim son konsern avek li! Psonm 102:17 i dir: “I pou vir ver lapriyer bann ki’n ganny depouye, e i pa pou mepriz zot lapriyer.”
13. (a) Ki keksoz personnel ki nou kapab koz lo la dan lapriyer? (b) Donn en legzanp.
13 An realite nou kapab priy lo tou size ki annan pour fer, dan en fason ou lot, avek nou servis oubyen relasyon avek Zeova. (1 Zan 5:14) Petet ou annan desizyon pour fer konsernan maryaz, louvraz, fer plis dan ou servis, alor pa ezite pour met tousala devan Zeova e demann son gidans. Par egzanp Filipin, en zenn madanm ti anvi konmans servis aplentan. Selman, i ti napa en travay pour soutenir li. I dir: “En zour Sanmdi, mon ti priy spesifikman lo mon dezir pour fer pionye. Plitar sa menm zour dan predikasyon, mon ti ofer en liv avek en zenn adolesan. En sel kou, sa fiy ti dir: ‘Akoz ou pa al kot mon lekol Lendi bomaten.’ Mon ti demande, ‘Akoz?’ I ti dir mwan ki zot ti pe rod en dimoun pour en plas travay la konmela. Mon ti ale e zot ti pran mwan deswit. I enkrwayab mannyer tousala ti ariv vitman.” En bon pe Temwen dan lemonn in eksperyans menm zafer. Alors, pa ezite pour priy Zeova e demann li sa ki ou bezwen avek tou ou leker!
Lapriyer si nou’n fer Pese
14, 15. (a) Akoz en dimoun pa devret ezite priye menm si i’n fer en pese? (b) Apard son lapriyer personnel, kwa ki kapab ed en dimoun ki’n fer en pese refer spirityelman?
14 Ki mannyer lapriyer i kapab ed en dimoun ki’n fer pese? Petet akoz zot santi zot koupab, serten i vwar li difisil pour priy Bondye. Me sa pa en bon solisyon. Par egzanp bann pilot dan avyon i konnen ki si zot arive perdi direksyon, zot kapab kominik avek bann personnel ater ki pou dir zot ki pour fer. Me ki ou panse lo en pilot ki pa oule demann led akoz i anbarase akoz i’n perdi? Sa ti kapab koz en aksidan grav! I parey avek en dimoun ki’n fer en pese, si i onte pour li priy Bondye, konsekans i kapab ankor pli grav. Laont pa devret anpes en dimoun koz avek Zeova. An realite Bondye i envit bann ki’n fer en pese grav pour koz avek li dan lapriyer. Profet Izai ti sipliy bann Izraelit son lepok pour priy Zeova, “akoz i pou pardonn dan en gran fason.” (Izai 55:6, 7) Byensir si nou oule ganny pardonnen par Zeova, nou bezwen premyerman abes nou, aret fer sa ki mal e repantir senserman.—Psonm 119:58; Danyel 9:13.
15 Si nou’n arive fer en pese, lapriyer i osi enportan pour en lot rezon. Disip Zak ti dir konsernan bann ki bezwen led spirityel: “I devre apel bann ansyen dan [kongregasyon], e zot a priy pour li, . . . e [Zeova] i a donn li lasante” spirityel. (Zak 5:14, 15) Wi, en Kretyen i devret konfes son pese avek Zeova dan lapriyer, me i osi kapab demann bann ansyen pour priy pour li. Sa pou ed li refer spirityelman.
Repons nou Lapriyer
16, 17. (a) Konman Zeova i reponn lapriyer? (b) Rakont en leksperyans ki montre ki predikasyon ek lapriyer i mars ansanm.
16 Ki mannyer Bondye i reponn lapriyer? Parfwa larepons i vit e evidan. (2 Lerwa 20:1-6) Parler, i kapab pran letan oubyen larepons pa sitan evidan. Parey Zezi ti montre dan sa parabol en vev ki ti pe fatig en ziz, priy Bondye plizyer fwa i kapab neseser. (Lik 18:1-8) Parkont si nou lapriyer i an armoni avek lavolonte Zeova, nou konnen ki Zeova pa pou zanmen dir nou: “Pa bezwen deranz mwan.”—Lik 11:5-9.
17 Pep Zeova in vwar en kantite fwa ki mannyer Zeova i reponn lapriyer. I sirtou evidan dan nou minister piblik. Par egzanp, de ser Kretyen Filipin ti pe ofer bann piblikasyon baze lo Labib dan en landrwa elwannyen dan pei. Zot ti kit en trak avek en madanm. Avek larm dan son lizye, sa madanm ti dir: “Yer swar mon ti priy Bondye pour li anvoy en dimoun pour ansenny mwan Labib, e mon krwar sa i larepons mon lapriyer.” Pa ti pran bokou letan pour sa madanm konmans asiste bann renyon kot Lasal Rwayonm. Dan en lot pei Sid Les Lazi, en frer ti en pe per pour pres dan bann apartman ki ekipe avek en sistenm sekirite. Toudmenm, i ti priy Zeova e avek kouraz i ti antre dan sa batiman. I ti tap laport enn sa bann apartman e en zenn madanm ti ouver. Ler sa frer ti eksplike akoz i ti devan son laport, sa madanm ti konmans plere. I ti dir li ki i ti pe rod bann Temwen Zeova e priye pour trouv zot. Sa frer ti kontan pour ed sa madanm zwenn kongregasyon dan sa landrwa.
18. (a) Ler nou lapriyer i ganny reponn, ki nou devret fer? (b) Ki lasirans nou annan si nou priye dan tou sirkonstans?
18 Lapriyer i vreman en laranzman merveye. Zeova i pare pour ekout e reponn nou lapriyer. (Izai 30:18, 19) Selman nou bezwen atantif lo ki mannyer Zeova i reponn nou lapriyer. I pa pou neseserman lafason ki nou ti ekspekte, me toudmenm ler nou rekonnet ki mannyer Zeova i gid nou, nou pa devret zanmen oubliye pour remersye e loue Zeova. (1 Tesalonisyen 5:18) Antouka annou pa zanmen bliy sa ki zapot Pol ti dir: “Dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.” Wi, sezi tou loportinite ki ou gannyen pour koz avek Bondye. Dan sa fason, ou pou eksperyans sa ki Pol ti dir konsernan bann ki Zeova i reponn zot lapriyer: “Lape Bondye ki depas tou konpreansyon imen i ava gard zot leker ek zot lespri.”—Filipyen 4:6, 7.
Eski ou kapab reponn?
• Ki diferan kalite lapriyer ki nou kapab fer?
• Ki mannyer nou devret priye?
• Lo ki size nou kapab priye?
• Konman lapriyer i ede si nou’n fer pese?
[Kestyon]
[Portre lo paz 29]
Lapriyer senser i anpes nou tonm dan tantasyon
[Portre lo paz 31]
Dan lapriyer nou eksprim nou rekonesans, konsern ek demann