Ki mannyer pour kominik avek sa ‘Enn ki ekout Lapriyer’

“Ou ki ekout lapriyer, tou kalite dimoun pou vin ver ou.”—PSONM 65:2.

1. Ki diferans i annan ant bann imen ek larestan kreasyon lo later, e ki loportinite imen i annan?

DAN tou sa ki egziste lo later, selman bann imen ki kapab ador zot Kreater. Zis bann imen ki santi sa nesesite pour ador Bondye e ki annan sa dezir pour konble sa bezwen spirityel. Sa i donn nou loportinite merveye pour devlop en relasyon personnel avek nou Papa dan lesyel.

2. Ki move konsekans pese in anmennen lo relasyon ki imen i annan avek zot Kreater?

² Bondye ti kree bann imen avek sa abilite pour kominik avek li. Adan ek Ev ti ganny kree san okenn pese. Alors parey en zanfan avek son papa, zot ti kapab kominik libreman avek zot Bondye. Me zot ti perdi sa gran privilez kan zot ti fer pese. Akoz zot dezobeisans zot ti perdi sa relasyon pros avek Bondye. (Zenez 3:8-13, 17-24) Eski sa i vedir ki bann desandans enparfe Adan i nepli kapab kominik avek Bondye? Ditou. Zeova i permet zot kominik avek li si zot ranpli serten kondisyon. Ki sa bann kondisyon?

Bann Kondisyon pour kominik avek Bondye

3. Ki mannyer bann imen enparfe i devret kominik avek Bondye? Ki legzanp ki demontre sa?

³ En sitiasyon ki ti arive avek sa de garson Adan i ed nou konpran sa ki Bondye i ekspekte avek bann imen enparfe ki oule kominik avek Li. Abel konman Kaen ti fer zefor pour kominik avek Bondye par fer bann sakrifis. Lofrann Abel ti ganny aksepte me pa sa enn pour Kaen. (Zenez 4:3-5) Ki diferans ti annan ant sa de lofrann? Ebre 11:4 i dir: “Par lafwa, Abel ti ofer en sakrifis meyer ki sa ki pour Kaen. Akoz sa, Bondye ti deklar li konman en zis.” Alors i evidan ki lafwa i en kondisyon neseser pour ki Bondye i aksepte ki nou kominik avek li. En lot kondisyon i resorti dan sa ki Zeova ti dir Kaen: “Si ou konmans byen azir, pa ou pou ganny met pli o?” I evidan ki Kaen ti’n kapab kominik avek Bondye si i ti aksepte pour fer sa ki byen. Me olye fer sa, Kaen ti rezet konsey Bondye, i ti touy Abel e i ti bezwen sove. (Zenez 4:7-12) Alors, i evidan ki byen boner dan listwar imen, annan lafwa ek bann bon aksyon ti neseser pour kominik avek Bondye.

4. Ki nou bezwen rekonnet konsernan nou lapriyer?

⁴ Si nou swete kominik avek Bondye, i neseser ki nou rekonnet ki nou fer pese. Tou imen i fer pese, e pese i en lobstak pour kominik avek Bondye. Profet Zeremi ti ekrir konsernan nasyon Izrael: “Nou menm ki’n fer fot . . . Ou’n bar akse avek ou avek bann gro nyaz, pour ki lapriyer pa kapab pase.” (Lamantasyon 3:42, 44) Pourtan toudilon listwar imen, Bondye in pare pour ekout bann ki ti priy avek lafwa ek en bon leker e osi ki ti obeir son bann komannman. (Psonm 119:145) Lekel serten sa bann dimoun, e ki nou kapab aprann avek zot lapriyer?

5, 6. Ki nou kapab aprann lo fason ki Abraam ti kominik avek Bondye?

 ⁵ Nou annan legzanp Abraam. Bondye ti aksepte son lapriyer akoz I ti apel Abraam ‘son zanmi.’ (Izai 41:8) Ki nou kapab aprann lo fason ki Abraam ti kominik avek Bondye? Sa zonm fidel ti koz avek Zeova konsernan en zeritye, i ti dir: “Ki ou pou donn mwan, vi ki mon pe ale san okenn zanfan?” (Zenez 15:2, 3; 17:18) En lot fwa, i ti eksprim son santiman konsernan lekel ki ti pou ganny sove kan Bondye i detri bann mesan Sodonm ek Gomor. (Zenez 18:23-33) Abraam ti osi priy pour lezot. (Zenez 20:7, 17) E parey Abel, kominikasyon Abraam avek Bondye ti osi enplik fer bann sakrifis zannimo.—Zenez 22:9-14.

⁶ Dan tou sa bann lokazyon, Abraam ti santi li lib pour koz avek Zeova. Parkont, menm si i ti santi li lib pour koz avek son Kreater, avek limilite i ti gard en bon pwennvi lo son pozisyon vizavi son Kreater. Par egzanp, get sa respe ki Abraam ti demontre kan i ti koz avek Zeova dan Zenez 18:27: “Silvouple, la mon’n deside pour koz avek Zeova, kantmenm mon zis lapousyer ek lasann.” Pa sa i en zoli latitid pour imite!

7. Ki size serten zonm fidel avan lepok Moiz ti koz lo la avek Zeova?

⁷ Bann zonm fidel sa letan ti koz lo diferan size e Zeova ti ekout zot lapriyer. Dan en lapriyer, Zakob ti fer en ve. I ti demann led Bondye, epi i ti promet senserman: “Konsernan tou sa ki ou pou donn mwan, mon pa pou manke pour donn ou en dizyenm ladan.” (Zenez 28:20-22) Plitar ler i ti pros pour zwenn son frer, Zakob ti enplor Zeova pour protez li, i ti dir: “Mon priy ou, delivre mwan dan lanmen mon frer Ezai akoz mon per li.” (Zenez 32:9-12) En lot zonm fidel, Zob, ti priy Bondye pour son fanmiy, i ti osi ofer bann sakrifis pour zot. Ler sa trwa zonm ki ti’n vin vizit Zob ti fer pese dan sa ki zot ti dir, Zob ti priy pour zot e Zeova ti aksepte son demann. (Zob 1:5; 42:7-9) Sa bann legzanp i ed nou konpran lo kwa nou kapab koze dan nou lapriyer. I osi ed nou konpran ki Zeova i pare pour aksepte lapriyer bann ki priy dan sa bon fason.

Pandan Lepok Lalyans Lalwa

8. Ki mannyer bann size enportan ti ganny mete devan Zeova dan lepok bann Izraelit?

⁸ Apre ki Zeova ti delivre nasyon Izrael Lezip, i ti donn zot Lalyans Lalwa. Sa Lalwa  ti detaye konman pour kominik avek Bondye atraver en group pret swazir. Serten Levit ti ganny responsabilite pour travay konman pret pour lepep. Si en keksoz ki ti annan en lenportans nasyonal ti leve, en dimoun, parfwa en profet oubyen en lerwa, ti reprezant nasyon Izrael e met sa problenm dan lapriyer avek Bondye. (1 Samyel 8:21, 22; 14:36-41; Zeremi 42:1-3) Par egzanp, ler tanp ti ganny dedye, Lerwa Salomon ti fer en lapriyer sorti dan fon son leker. Zeova li ti montre ki i ti aksepte sa lapriyer ler i ti ranpli tanp avek son laglwar e ti dir: “Mon zorey [pou] ekout lapriyer ki ganny fer dan sa landrwa.”—2 Kronik 6:12–7:3, 15.

9. Ki Zeova ti demann bann pret pour fer pour ki zot apros li dan en fason akseptab?

⁹ Dan Lalwa pour Izrael, Zeova ti endike konman pour apros li dan son landrwa sen. Ki zot ti bezwen fer? Toulezour bomaten ek aswar, apard ki bann sakrifis zannimo, gran pret ti ganny demande pour bril en pe lansan parfimen devan Zeova. Plitar, bann pret osi ti fer sa louvraz eksepte Zour Propisyasyon. Si bann pret pa ti demontre sa respe profon dan sa fason, Zeova pa ti pou aksepte zot servis dan tanp.—Egzod 30:7, 8; 2 Kronik 13:11.

10, 11. Ki levidans nou annan ki Zeova i ekout lapriyer ki dimoun i fer personnelman?

¹⁰ Dan lepok pep Izrael, eski i ti posib pour kominik avek Bondye san pas par son bann reprezantan? Wi, Labib i montre ki Zeova ti aksepte bann lapriyer personnel. Salomon ti sipliy Zeova dan son lapriyer ki i ti fer pour dedye tanp: “Nenport lapriyer, nenport demann pour ganny faver delapar okenn zonm oubyen tou ou pep Izrael, . . . ler i pou vreman priy avek son lanmen ouver anver sa lakaz, alor ou ki dan lesyel, ou a ekout li.” (2 Kronik 6:29, 30) Dan Labib, Lik i rakonte ki ler Zekarya, papa Zan-Batis, ti pe ofer lansan dan tanp, en lafoul serviter Zeova ki pa ti pret ti pe “priye deor.” I paret ki i ti’n vin en koutim pour dimoun zwenn an deor tanp e priye pandan ki lansan ti pe ganny ofer avek Zeova lo lotel lor.—Lik 1:8-10.

¹¹ Alors, nou konpran ki ler dimoun ti kominik avek Zeova dan sa fason akseptab, Zeova ti kontan pour ekout lapriyer bann ki ti reprezant nasyon Izrael an antye oubyen zot lapriyer personnel. Nou nepli anba lalyans Lalwa konmela, me nou kapab retir bann leson lo lafason ki bann Izraelit ti kominik avek Bondye.

Kominikasyon avek Bondye dan Lepok Kretyen

12. Ki laranzman ti ganny met an plas pour bann Kretyen kominik avek Zeova?

¹² Aprezan, nou anba Lalwa Kris. I nepli annan en tanp parey sa enn Zerizalenm kot nou kapab vir avek pour fer nou lapriyer oubyen kot bann pret i reprezant tou  pep Bondye. Selman Zeova i ankor annan en laranzman ki permet nou kominik avek li. Ki sa laranzman? Kan Kris ti resevwar lespri sen an 29 N.L. e i ti ganny apwente konman Gran Pret, en tanp spirityel ti ganny met an plas. * Sa tanp spirityel ti nouvo laranzman pour apros e ador Zeova gras a sakrifis ki Zezi Kri ti fer pour kouver pese .—Ebre 9:11, 12.

13. Kwa ki parey dan tanp Zerizalenm ek dan tanp spirityel konsernan lapriyer?

¹³ Plizyer laspe tanp Zerizalenm i reprezant byen lafason ki sa tanp spirityel i ete, e sa i aplik osi avek lapriyer. (Ebre 9:1-10) Par egzanp, toulezour bomaten ek aswar, lansan ti ganny ofer lo lotel dan sa lasanm ki apel Sen dan tanp. Ki sa i reprezante? Dapre liv Revelasyon, “lansan i reprezant lapriyer bann sen.” (Revelasyon 5:8; 8:3, 4) David ti ganny enspire pour ekrir: “Ki mon lapriyer i ganny prepare parey lansan devan ou.” (Psonm 141:2) Alor pour bann Kretyen, lansan avek son bon loder i byen reprezant lapriyer ek louanz ki Zeova i aksepte.—1 Tesalonisyen 3:10.

14, 15. Ki nou kapab dir lo lapriyer (a) bann Kretyen swazir? (b) ‘lezot mouton’?

¹⁴ Lekel ki kapab apros Bondye dan sa tanp spirityel? Bann pret ek Levit ti annan sa privilez pour servi dan bann lakour enteryer dan tanp Zerizalenm, me selman bann pret ki ti kapab antre dan lasanm ki apel Sen. Parey bann pret ki ti servi dan lakour enteryer ek dan Sen, bann Kretyen swazir ki annan lespwar pour viv dan lesyel i dan en kondisyon spesyal e inik ki permet zot pour priye e loue Bondye.

¹⁵ Ki sitiasyon ‘lezot mouton’ ki annan lespwar pour viv lo later? (Zan 10:16) Profet Izai ti montre ki dimoun sorti dan tou nasyon ti pou vin ador Zeova “dan bann dernyen zour.” (Izai 2:2, 3) I ti osi ekrir ki bann “etranze” ti pou vin ador Zeova. Pour montre ki i ti pou kontan pour aksepte zot, Bondye ti dir: ‘Mon pou fer zot kontan dan mon lakaz lapriyer.’ (Izai 56:6, 7) Revelasyon 7:9-15 i donn plis detay ankor kan i pe koz lo en “gran lafoul sorti dan tou nasyon” ki zwenn ansanm pour ador e priy Bondye lizour konman aswar dan lakour otour tanp spirityel. Pa i ankourazan ler nou konnen ki tou serviter Zeova ozordi i kapab priy libreman Bondye e annan konfyans ki i pou ekout zot lapriyer!

Ki Lapriyer ki Bondye i aksepte?

16. Ki nou kapab aprann avek lapriyer bann premye Kretyen?

¹⁶ Bann premye Kretyen ti bann dimoun ki ti kontan priye. Ki zot ti koz lo la dan zot lapriyer? Bann ansyen dan kongregasyon ti demann led pour byen swazir bann ki ganny responsabilite dan lorganizasyon. (Akt 1:24, 25; 6:5, 6) Epafras ti priy pour son bann frer ek ser Kretyen. (Kolosyen 4: 12) Dan kongregasyon Zerizalenm, zot ti priy pour Pyer ler i ti dan prizon. (Akt 12:5) Bann premye Kretyen ti demann Bondye lardyes pour fer fas avek lopozisyon, zot ti dir: “[Zeova], regard menas ki zot in fer, e permet ou bann serviter anons ou mesaz avek lasirans san okenn lafreyer.” (Akt 4:23-30) Disip Zak ti sipliy bann Kretyen pour priy Bondye donn zot lasazes ler zot fer fas avek bann leprev. (Zak 1:5) Eski ou koz lo bann topik parey dan ou lapriyer?

17. Lapriyer lekel Zeova i aksepte?

¹⁷ Bondye pa aksepte tou lapriyer. Alor ki mannyer nou kapab priye pour ki nou lapriyer i ganny ekoute? Bann serviter fidel ki Bondye ti ekout zot lapriyer dan letan lontan ti priy avek senserite e avek en bon leker. Zot ti annan lafwa e zot ti demontre li par bann bon aksyon. Nou osi Zeova pou ekout nou lapriyer si nou priy dan sa fason ozordi.

18. Ki en Kretyen i devret fer pour ki son lapriyer i ganny ekoute?

¹⁸ I annan en lot keksoz neseser. Zapot Pol ti eksplik sa ler i ti dir: “Par Kris . . . nou kapab prezant nou devan Bondye” avek en sel Lespri. Atraver lekel nou devret prezant nou devan Bondye? Zezi Kri. (Efezyen 2:13, 18) Wi, nou kapab libreman apros nou Papa dan lesyel selman atraver Zezi.—Zan 14:6; 15:16; 16:23, 24.

19. (a) Kan Zeova pa ti kontan ler bann Izraelit ti ofer lansan? (b) Ki mannyer nou kapab fer sir ki nou lapriyer i en lansan ki anvoy en bon loder pour Zeova?

¹⁹ Parey nou ti dir pli boner, lansan ki bann pret Izraelit ti ofer i reprezant lapriyer akseptab bann serviter fidel Bondye. Parkont, parler Zeova ti degout lansan ki bann Izraelit ti ofer. Sa ti leka kan bann Izraelit ti bril lansan dan tanp me anmenmtan pe ador zidol. (Ezekyel 8:10, 11) Ozordi osi lapriyer bann ki pretann pe ador Zeova me ki pe kontinyen kas son lalwa i en move loder pour li. (Proverb 15:8) Alors annou kontinyen anmenn en lavi drwat pour ki nou lapriyer i en lansan avek en bon loder pour Bondye. Zeova i kontan lapriyer bann ki mars dan semen drwat. (Zan 9:31) Me i annan ankor kestyon: Konman nou devret priye? Ki size nou kapab koz lo la dan lapriyer? E ki mannyer Bondye i reponn nou lapriyer? Lot lartik pou reponn sa bann kestyon ek lezot.

[Not anba lo paz]

Eski ou kapab eksplike?

• Ki mannyer bann imen enparfe i kapab kominik dan en fason akseptab avek Bondye?

• Konman nou kapab imit bann zonm fidel avan Moiz dan nou lapriyer ?

• Ki nou aprann avek lapriyer bann premye Kretyen?

• Kan nou lapriyer pou parey en lansan ki anvoy en bon loder pour Bondye?

[Kestyon]

[Portre lo paz 23]

Akoz Zeova ti aksepte sakrifis Abel me pa sa enn pour Kaen?

[Portre lo paz 24]

“Mon lapousyer ek lasann”

[Portre lo paz 25]

“Mon pa pou manke pour donn ou en dizyenm ladan”

[Portre lo paz 26]

Eski ou lapriyer i en lansan ki anvoy en bon loder pour Zeova?