Zob—en Zonm ki’n andire e gard son Lentegrite
Zob—en Zonm ki’n andire e gard son Lentegrite
“Eski ou’n met ou leker lo mon serviter Zob? Napa personn lo later ki parey li, en zonm san repros e drwat, ki annan lakrent pour Bondye e rezet sa ki mal.”—ZOB 1:8.
1, 2. (a) Ki bann maler ki ti ariv lo Zob san ekspekte? (b) Dekrir lavi Zob avan maler ti ariv lo li.
TI ANNAN en zonm ki ti paret annan tou—larises, pozisyon, lasante, ek en lavi fanmiy ere. Me en sel kou maler ti tap li enn deryer lot e i ti perdi tou son larises. Apre, en nespes tanpet ti pran lavi tou son zanfan. En pti moman apre, i ti ganny en maladi ki ti afebli li e ki ti donn li bann klou fer mal partou lo li. San dout, ou’n realize ki nou pe koz lo Zob, personnaz prensipal dan sa liv Labib ki port son non.—Zob, sapit 1 ek 2.
2 Zob ti plennyen: ‘Si zis mon ti dan bann mwan depi lontan.’ (Zob 3:3; 29:2) Ler maler i arive, lekel ki pa anvi retourn dan botan? Dan ka Zob, i ti viv en bon lavi, e i paret ki i pa ti konn okenn maler. Bann dimoun enportan ti respe li e rod konsey avek li. (Zob 29:5-11) I ti ris, me i ti annan en pwennvi balanse lo larzan. (Zob 31:24, 25, 28) Kan i ti rankontre bann vev oubyen bann orfelen ki dan bezwen, i ti ed zot. (Zob 29:12-16) I ti osi reste fidel avek son madanm.—Zob 31:1, 9, 11.
3. Ki mannyer Zeova ti vwar Zob?
3 Zob ti anmenn en lavi san repros akoz i ti ador Bondye. Zeova ti dir: “Napa personn lo later ki parey li, en zonm san repros e drwat, ki annan lakrent pour Bondye e rezet sa ki mal.” (Zob 1:1, 8) Me malgre Zob ti fer tou sa ki byen, maler ti detrir son lavi konfortab. Tou sa ki i ti’n travay dir pour gannyen ti disparet, e son vre personnalite ti ganny teste par douler, langwas, ek fristrasyon.
4. Akoz i itil pour egzamin sa leprev ki Zob ti pas ladan?
4 Byensir, Zob pa sel serviter Bondye ki’n soufer akoz maler. Bokou Kretyen ozordi ki’n eksperyans bann keksoz parey i kapab fasilman konpran sa ki Zob ti resanti. Pour sa rezon, ti a bon nou egzamin de kestyon: Ki mannyer ler nou mazin leprev Zob i kapab ed nou kan nou rankontre maler? E ki mannyer i fer nou pli konpran santiman lezot ki soufer?
En Kestyon Fidelite ek en Tes Lentegrite
5. Dapre Satan, akoz Zob ti pe servi Bondye?
5 Ka Zob ti enn eksepsyonnel. Sa akoz Zob pa ti konnen ki Dyab ti’n kestyonn rezon ki i servi Bondye. Dan en rasanbleman dan lesyel, ler Zeova ti atir latansyon lo bann bon kalite ki Zob ti annan, Satan ti reponn: “Pa ou menm ou’n met en baraz otour li, otour son lakaz, e otour tou sa ki i annan?” Satan ti pe dir ki Zob ti pe servi Bondye pour son prop lentere. Nou kapab dir ki i ti oule dir menm keksoz pour lezot serviter Bondye osi. Satan ti dir avek Zeova: “Avans ou lanmen, silvouple, e tous tou sa ki i annan e vwar si i pa pou modi ou dan ou figir.”—Zob 1:8-11.
6. Ki kestyon enportan Satan ti leve?
6 Satan ti lev en kestyon serye. I ti kestyonn lafason ki Zeova i servi son pouvwar konman sa enn ki pli o. Eski i vreman posib pour dimoun obeir Bondye akoz zot kontan li? Oubyen parey Satan i krwar, finalman legoism ki pou dominen? Zeova ti les Dyab teste Zob akoz sa ti pou vin en legzanp. I ti annan konfyans dan lentegrite ek fidelite Son serviter. Alor, Satan ti tap Zob avek maler enn deryer lot. Ler Satan ti vwar ki son bann premye latak pa ti marse, i ti fer Zob soufer avek en maladi terib. Dyab ti dir: “Lapo pour lapo, e tou sa ki en zonm i annan i pou donnen pour son lavi.”—Zob 2:4.
7. Dan ki fason bann serviter Bondye ozordi i bezwen fer fas avek bann leprev parey Zob?
7 Laplipar Kretyen ozordi pa soufer otan ki Zob ti soufer. Me kantmenm sa, i annan diferan keksoz ki fer zot soufer. Bokou i fer fas avek persekisyon oubyen problenm fanmiy. Problenm ekonomik oubyen problenm lasante i kapab afekte nou en kantite. Serten in perdi zot lavi akoz zot lafwa. I vre nou pa kapab dir Satan i lakoz tou problenm ki fer nou soufer. Serten problenm ki nou gannyen i akoz en fot ki nou’n fer oubyen akoz en kondisyon fizik ki nou’n erite. (Galat 6:7) Deplis, nou tou nou bezwen siport bann lefe lavyeyes ek bann dezas natirel. Labib i montre nou klerman ki Zeova pa pe fer mirak dan nou letan pour protez son bann serviter kont sa bann soufrans.—Eklezyast 9:11.
8. Ki mannyer Satan i kapab profit lo bann problenm ki nou rankontre?
8 Parkont, Satan i kapab servi sa bann problenm ki nou gannyen pour afebli nou lafwa. Zapot Pol ti mansyonnen ki i ti soufer akoz “en pikan dan [son] laser, en lanz Satan,” ki ti “tap” li zanmen fini. (2 Korentyen 12:7, NW) Sa ti kapab en problenm fizik, parey pa vwar byen kler, oubyen en lot keksoz. Me antouleka, Pol ti konpran ki Satan ti kapab servi sa problenm ek son fristrasyon pour fer li perdi son lazwa ek lentegrite. (Proverb 24:10) Ozordi Satan i kapab fer nou fanmiy, kanmarad lekol, oubyen menm bann gouvernman diktater persekit serviter Bondye dan en fason ou en lot.
9. Akoz nou pa devret etonnen kan nou pas dan problenm oubyen persekisyon?
9 Ki mannyer nou kapab reisi fer fas avek sa bann problenm? Par vwar zot konman en loportinite pour montre ki nou lanmour pour Zeova ek nou soumisyon anver son souvrennte pa sanze. (Zak 1:2-4) Nenport rezon ki nou soufer, ler nou konpran lenportans reste fidel avek Bondye, sa pou ed nou gard nou balans spirityel. Zapot Pyer ti ekrir bann Kretyen: “Mon bann byenneme pa bezwen etonnen par bann gran soufrans ki zot pe pas ladan pour teste zot, konmsi sa ki pe ariv zot ti bann keksoz ekstraordiner.” (1 Pyer 4:12) Pol ti osi eksplike: “Tou sa ki oule viv en lavi fidel dan Kris Zezi pou ganny persekite.” (2 Timote 3:12) Satan i ankor pe kestyonn lentegrite bann Temwen Zeova, parey i ti fer dan ka Zob. Anfet, Labib i endike ki Satan pe atak pep Bondye plis ankor dan sa bann dernyen zour.—Revelasyon 12:9, 17.
Mal Konprenezon ek move Konsey
10. Ki dezavantaz Zob ti annan?
10 Zob ti annan en dezavantaz, ki nou pa bezwen eksperyanse. I pa ti konnen akoz sa bann maler ti’n ariv lo li. Alor i ti konklir: “Zeova li menm in donnen, e Zeova li menm in pran.” (Zob 1:21) Me sa pa ti vre. I kapab ki Satan ti pe sey fer Zob krwar ki Bondye ki ti pe fer li soufer.
11. Ki mannyer Zob ti reazir anver bann maler ki ti ariv lo li?
11 Zob ti dekouraz en kantite. Me i ti refize pour modi Bondye parey son madanm ti dir li fer. (Zob 2:9, 10) I ti dir: ‘Bann mesan i pli byen pase ki mwan.’ (Zob 21:7-9) I ti’n bezwen demann son lekor: ‘Akoz Bondye pe pini mwan?’ Ti annan en letan kot i ti zis anvi mor. I ti dir: “A! si ou kasyet mwan dan Seol, si ou kit mwan sekre ziska ki ou aret ankoler!”—Zob 14:13.
12, 13. Ki mannyer komanter sa trwa konpanyon Zob ti afekte li?
12 Zob ti ganny vizite par trwa son konpanyon, ki swadizan ti pe al “senpatiz avek li e rekonfort li.” (Zob 2:11) Me zot ti zis “bann konsolater ki donn plis problenm!” (Zob 16:2) Petet si Zob ti annan serten zanmi dan ki i ti’n kapab konfye son problenm, i ti pou bon pour li me sa trwa la ti zis fer li pli konfize e pli fristre.—Zob 19:2; 26:2.
13 Nou kapab konpran si Zob ti demann son lekor: ‘Akoz mwan? Ki mon’n fer pour merit tou sa maler?’ Son bann konpanyon ti donn en bann leksplikasyon ki ti konpletman fo. Zot ti prezimen ki Zob ti’n rod son soufrans li menm par fer kek pese grav. Elifaz ti demande: “Lekel sa inosan ki’n deza ganny detri? . . . Dapre sa ki mwan mon’n vwar, sa bann ki pe fabrik sa ki move e bann ki pe senm problenm, zot menm zot pou rekolte.”—Zob 4:7, 8.
14. Akoz nou pa devret taye pour asosye soufrans avek en move kondwit?
14 I vre ki nou kapab ganny problenm si nou senm sa ki fer plezir natir imen olye lespri. (Galat 6:7, 8) Selman dan sa lemonn ki nou pe viv ladan, nou kapab rankontre problenm kantmenm nou annan en bon kondwit. Deplis, i pa vre ki bann inosan i ganny proteze kont tou maler. Zezi Kri ti “sen, inosan, san okenn pese,” pourtan i ti sibir en lanmor fer mal lo en poto. E zapot Zak ti mor pour son lafwa. (Ebre 7:26; Akt 12:1, 2) Sa fo rezonnman ki Elifaz ek son de zanmi ti fer, ti pous Zob pour defann son bon repitasyon e ensiste ki i inosan. Me lefe ki zot ti ensiste ki Zob ti merite sa ki i ti pe gannyen, sa ti’n kapab enfliyans fason ki Zob ti vwar lazistis Bondye.—Zob 34:5; 35:2.
Trouv Led ler nou pas dan Problenm
15. Ki kalite rezonnman ki pou ed nou andir en soufrans?
15 Eski nou kapab aprann en leson avek Zob? Kan maler, maladi, oubyen persekisyon i arive, nou kapab vwar li konman en keksoz ki pa zis. Petet nou ganny lenpresyon ki lezot dimoun zot, zot paret dan byen. (Psonm 73:3-12) Me parfwa, nou bezwen demann nou lekor sa bann kestyon tre enportan: ‘Eski mon lanmour pour Bondye i pous mwan pour servi li nenport kwa ki kapab arive? Eski mon annan en gran dezir pour “reponn sa enn ki pe provok” Zeova?’ (Proverb 27:11; Matye 22:37) Nou pa devret zanmen les remark san reflesir ki lezot i fer, fer nou annan dout lo nou Papa dan lesyel. En fwa, en Kretyen fidel ki ti soufer avek en maladi kronik pour bokou lannen ti dir: “Mon konnen ki nenport kwa ki Zeova i permet, mon pou kapab andire. Mon konnen i pou donn mwan sa lafors ki mon bezwen. I’n toultan fer li.”
16. Ki mannyer Parol Bondye i fourni led pour bann ki pas dan difikilte?
16 Konsernan taktik Satan, nou annan en bon konprenezon ki Zob ti napa. “Nou konn byen son bann lentansyon,” oubyen move plan. (2 Korentyen 2:11) Deplis, nou annan en labondans lasazes pratik pour servi. Dan Labib, nou trouv bann resi lo bann zonm ek fanm fidel ki’n andir tou kalite difikilte. Zapot Pol ki ti soufer plis ki bokou Kretyen, ti ekrir: “Tou sa ki’n ganny ekri dan lepase in ganny ekri pour nou lansennyman, pour ki par pasyans ek konsolasyon ki Lekritir i donnen nou posed lesperans.” (Romen 15:4) En Temwen Lerop ki ti ganny met dan prizon pour son lafwa pandan dezyenm lager mondyal, pa ti pran son rasyon manze pour trwa zour zis pour li ganny en Labib. I ti dir: “Ti vo lapenn fer sa! Kantmenm mon ti lafen, mon ti ganny nouritir spirityel ki ti soutenir mwan ensi ki lezot dan bann leprev ki nou ti pas ladan dan sa letan vreman difisil. Mon’n gard sa Labib ziska ozordi.”
17. Ki bann provizyon Zeova i donn nou pour ed nou andire?
17 Apard sa rekonfor ki Labib i ofer, nou annan plizyer piblikasyon baze lo Labib ki donn bann bon gidans ler nou pe fer fas avek problenm. Si ou al get dan Watch Tower Publications Index, petet ou pou vwar en leksperyans en Kretyen ki’n pas dan en leprev en pe parey pour ou. (1 Pyer 5:9) Si ou diskit ou sitiasyon avek bann ansyen oubyen lezot Kretyen matir ki kapab konpran ou, sa i kapab osi en led pour ou. Me pli enportan ankor, ou kapab kont lo Zeova ek son lespri sen atraver lapriyer. Ki mannyer Pol ti kapab reziste kan Satan ti ‘tap’ li? I ti aprann depan lo lafors Bondye. (2 Korentyen 12:9, 10) I ti ekrir: “Mon kapab fer fas avek tou par [sa enn] ki donn mwan lafors.”—Filipyen 4:13.
18. Ki mannyer nou bann frer ek ser i kapab donn nou bann lankourazman ki vreman presye?
18 Alors led i la, e nou pa devret zanmen ezite pour rod li. En proverb dan Labib i dir: “Eski ou’n montre ou dekouraze dan letan ladetres? Ou lafors pou pti gin.” (Proverb 24:10) Zis parey karya i kapab manz en lakaz dibwa ziska i grennen, dekourazman osi i kapab ptit-a-pti afeblir lentegrite en Kretyen. Pour anpes sa danze, Zeova i donn nou sipor atraver nou bann frer ek ser spirityel. En lanz ti aparet avek Zezi e fortifye li sa zour swar ki i ti ganny arete. (Lik 22:43) Kan Pol ti pe vwayaze pour al Ronm konman en prizonnyen i ti “remersi Bondye e i ti pran kouraz” ler i ti zwenn bann frer kot Laplas piblik Apiyis ek Trwa Oberz. (Akt 28:15) En Temwen Lalmanny i ankor mazinen konman i ti ganny led ler i ti ariv dan kan konsantrasyon Ravensbrück ankor en adolesan tou per per. I rapel: “En ser ti trouv mwan toudswit e i ti akey mwan avek bokou santiman. En lot ser fidel ti gard mwan anba son lezel, e vin konman en manman spirityel pour mwan.”
“Reste fidel”
19. Kwa ki ti ed Zob reziste zefor Satan?
19 Zeova ti dekrir Zob konman en dimoun ki ti “reste ferm avek son lentegrite.” (Zob 2:3) Kantmenm i ti santi li dekouraze e i pa ti konpran akoz i ti pe soufer, Zob pa ti zanmen mazin pour abandonn son fidelite. I ti refize abandonn tou sa ki i ti krwar ladan. I ti ensiste: “Mon pou reste ferm avek mon lentegrite ziska mon lanmor!”—Zob 27:5.
20. Akoz i vo lapenn andire?
20 Si nou annan en determinasyon parey, i pou ed nou pour gard nou lentegrite dan nenport sitiasyon—dan tantasyon, lopozisyon, oubyen difikilte. Zezi ti dir kongregasyon Smirn: “Pa per pour sa ki ou pou soufer. Gete, dyab pou anvoy byento serten antre zot dan prizon, pour teste zot, e zot pou bezwen soufer [akoz problenm, ladetres, oubyen move tretman] pandan dis zour. Reste fidel ziska lanmor, e mon a donn ou kouronn lavi.”—Revelasyon 2:10.
21, 22. Ki keksoz ki kapab rekonfort nou ler nou pe pas dan moman difisil?
21 Dan sa lemonn dirize par Satan, nou landirans ek lentegrite pou ganny teste. Me Zezi i asir nou ki si nou get ver lavenir, napa nanryen pour nou per. Sa ki enportan se ki nou reste fidel. Pol ti dir: “Nou bann pti soufrans aktyel” i zis pour en pe letan, tandis ki sa “laglwar” oubyen rekonpans ki Zeova i promet nou, i “napa okenn konparezon.” (2 Korentyen 4:17, 18) Menm bann soufrans ki Zob ti pas ladan ti zis pour en pe letan konpare avek sa kantite lannen ere ki i ti rezwir avan e apre son leprev.—Zob 42:16.
22 Kantmenm sa, i kapab annan bann moman dan nou lavi kot nou leprev i paret napa en lafen e nou soufrans i paret ensiportab. Dan lartik swivan, nou pou vwar ki mannyer leksperyans Zob i kapab ansenny nou lezot leson lo landirans. Nou pou osi vwar bann fason ki nou kapab fortifye lezot ki pe pas dan difikilte.
Ki ou pou reponn?
• Ki kestyon enportan Satan ti leve konsernan lentegrite Zob?
• Akoz nou pa devret etonnen ler nou pas dan difikilte?
• Ki mannyer Zeova i ed nou andire?
[Kestyon]
[Portre lo paz 15]
Fer resers, koz avek bann Kretyen matir, e devid nou leker avek Zeova dan lapriyer i kapab ed nou andire