Bann Pwen enteresan dan
Parol Zeova i vivan
Bann Pwen enteresan dan senkyenm Liv Psonm
EN ZONM ris i kapab dir: “Nou bann garson i parey bann plant ki’n pouse dan zot zenes, nou bann fiy, parey bann kwen ki’n ganny aranze dan stil bann pale, nou stor i plen, . . . nou troupo i miltipliye par plizyer milye.” Deplis, bann ki annan i kapab dir: “Ere sa dimoun ki dan sa kondisyon!” Me de lot kote, en psalmis i dir: “Ere sa dimoun ki son Bondye i Zeova!” (Psonm 144:12-15) Sirman i annan rezon pour ere! Zeova i en Bondye ere, e lazwa i form par lavi sa bann ki ador li. (1 Timote 1:11) Sa i ganny demontre klerman dan sa dernyen koleksyon psonm ki’n ganny enspire, depi Psonm 107 ziska 150.
Sa senkyenm Liv Psonm i met lanfaz lo bann kalite ekstraordiner Zeova, ki enkli son labonte leker, laverite ek labonte. Pli nou konpran personnalite Bondye, pli nou ganny motive pour kontan li e annan lakrent pour li. An rezilta, sa i fer nou ere. Pa sa i en mesaz enportan ki nou vwar dan sa senkyenm Liv Psonm!—Ebre 4:12.
ERE AKOZ LABONTE LEKER ZEOVA
Apre ki bann Zwif ti’n sorti an egzil Babilonn zot ti sante: “Ki dimoun i remersi Zeova pour son labonte leker e pour son bann travay merveye ki i’n fer pour bann imen.” (Psonm 107:8, 15, 21, 31) Pour loue Bondye, David ti sante: “Ou laverite [i] ariv ziska dan lesyel.” (Psonm 108:4) Dan sa melodi ki swiv apre, i ti sante: “Ed mwan, O Zeova mon Bondye, sov mwan selon ou labonte leker.” (Psonm 109:18, 19, 26) Psonm 110 i en psonm profetik konsernan dominasyon Mesi. Psonm 111:10 i dir: “Lakrent pour Zeova i konmansman lasazes.” E en verse dan Psonm 112 i dir: “Ere sa zonm ki annan lakrent pour Zeova.”—Psonm 112:1.
Psonm 113 ziska 118 i ganny apele Psonm Alel, sa i akoz sa lekspresyon “Alelouya” oubyen “Loue Ya!” i ganny repete plizyer fwa dan sa bann psonm. Dapre Misna, en liv date depi trwazyenm syek ki koz lo bann tradisyon, sa bann psonm ti ganny sante zour Lapak. Zot ti osi ganny sante pandan sa trwa lafet ki bann Zwif ti obzerve tou le zan. Psonm 119 i pli gran psonm ek sapit dan Labib. Dan sa psonm parol oubyen mesaz Zeova i ganny glorifye.
Larepons pour bann Kestyon lo Labib:
109:23—Ki David ti oule dir par sa parol: “Parey en lonbraz ki pe disparet, mon oblize ale”? Dan en fason poetik David ti pe dir ki i ti santi i pros pour mor.—Psonm 102:11.
110:1, 2—Ki Zezi Kri, “Senyer [David]” ti pe fer ler i ti pe asiz lo kote drwat Bondye? Apre son rezireksyon, Zezi ti mont dan lesyel e asiz lo kote drwat Bondye ziska 1914, sa lannen ki i ti konmans dirize konman Lerwa. Pandan ki i ti pe asize akote son Papa, Zezi ti pe diriz lo bann Kretyen swazir, i ti gid zot dan sa travay pour prese e fer disip, osi byen prepar zot pour dirize ansanm avek li dan son Rwayonm.—Matye 24:14; 28:18-20; Lik 22:28-30.
110:4—Ki sa ve Zeova in fer ‘san okenn regre’? Sa ve i sa lalyans ki i ti fer avek Zezi Kri pour vin Lerwa ek Gran Pret.—Lik 22:29.
113:3—Dan ki sans non Zeova i bezwen ganny loue “depi soley leve ziska soley kouse”? Sa i enplik plis ki en group dimoun ki ador Bondye tou le zour. Ler soley i leve dan les ziska ki i al kouse dan was, sa laklerte soley i ekler later antye. Pareyman Zeova i bezwen ganny loue dan lemonn antye. San en bon lorganizasyon, sa pa pou posib. Konman Temwen Zeova nou annan en gran privilez pour loue Bondye e pres sa bon nouvel Rwayonm avek devouman.
116:15—Ki kantite ‘presye lanmor bann serviter fidel i presye dan lizye Zeova’? Son bann adorater i vreman presye pour li, ki i pa pou permet zot ganny eliminen konman en group, akoz sa pou kout li bokou. Si Zeova ti les sa arive, i ti pou konmsi son lennmi i pli for ki li. Deplis, ti pou napa personn lo later pour konmans sa nouvo lemonn parey i’n promet.
119:71—Akoz i kapab bon pour soufer? Difikilte i kapab fer nou pli depan lo Zeova, sipliy li plis ankor dan nou lapriyer, e pour vin bann etidyan Labib pli serye, e aplik sa ki i dir. An plis ki sa, lafason ki nou reazir ler nou soufer i kapab revel bann defo dan nou personnalite ki nou kapab korize. Soufrans pa pou fer nou vin anmer si nou les li rafin nou.
119:96—Ki savedir ‘lafen avek perfeksyon’? La, sa psalmis pe koz lo perfeksyon dapre pwennvi imen. I probab ki i ti pe mazinen ki konprenezon imen lo perfeksyon i limite. Me, komannman Bondye napa limit. Son gidans i kapab ganny aplike dan tou laspe nou lavi. New International Version i dir: “Avek tou perfeksyon mon vwar en limit, me ou bann komannman napa.”
119:164—Ki savedir loue Bondye “set fwa dan lazournen”? Souvan nimero set i ganny servi dan Labib pour reprezant en keksoz ki konplet. Alors, sa psalmis pe fer resorti ki Zeova i merite ganny tou louanz.
Leson pour nou:
107:27-31. Lasazes sa lemonn pou ‘konfize’ zour Armagedon. (Revelasyon 16:14, 16) I pa kapab anpes personn ganny detri. Zis bann ki tourn ver Zeova pour delivrans ki pou viv pour “remersye [li] pour son labonte leker.”
109:30, 31; 110:5. Lefe ki en solda ti tyonbo son boukliye avek son lanmen gos e son lepe avek lanmen drwat, alors son lanmen drwat pa ti ganny proteze. Dan en sans senbolik Zeova i “dan kote drwat” son bann serviter, pour lager pour zot. Anfet i protez e ed zot. Pa sa i en bon rezon pour nou “loue [li] en kantite”!
113:4-9. Zeova i telman o, ki menm pour ‘get lesyel’ i bezwen abes li. Me kantmenm sa, i annan konpasyon pour bann dernyen dimoun, sa ki pov ek bann madanm steril. Nou Souvren Senyer, Zeova, i annan limilite e i anvi son bann adorater i azir parey li.—Zak 4:6
114:3-7. Ler nou aprann lo bann keksoz merveye ki Zeova ti fer pour son pep kot Lanmer Rouz, Larivyer Zourden, e kot Montanny Sinai, sa pou annan en gran lefe lo nou. Limanite ki ganny reprezante par later, i devret dan lafreyer, senbolikman “dan gro douler,” akoz sa ki Senyer pou fer.
119:97-101. Kan nou lir Labib pour ganny lasazes, bon zizman, ek konprenezon, sa pou protez nou spirityelman.
119:105. Parol Bondye i parey en lalimyer pour nou lipye dan le sans ki i ed nou fer fas avek bann problenm dan sa lemonn ozordi. Dan en sans senbolik i osi ekler nou semen akoz i’n predir plan Bondye pour lavenir.
ERE MALGRE DIFIKILTE
Ki mannyer nou kapab fer fas avek bann leprev e sirmont bann difikilte? Psonm 120 ziska 134 i klerman reponn sa kestyon. Nou kapab sirmont difikilte e gard nou lazwa kan nou tourn ver Zeova pour led. Sa bann psonm i ganny apele, Psonm an montan, i probab bann Izraelit ti sant zot kan zot ti mont Zerizalenm pour obzerv bann lafet tou le zan.
Psonm 135 ek 136 i montre ki Zeova i fer nenport kwa ki fer li plezir, i vreman diferan avek bann zidol ki pa kapab fer nanryen. Psonm 136 ti ganny konpoze dan en stil kot de group santer pe reponn kanmarad. Dernyen parti dan sak verse ti ganny sante konman en larepons apre ki sa premye parti ti’n fini ganny sante. Sa lot Psonm i eksprim sagrinasyon bann Zwif Babilonn ki ti anvi ador Zeova lo montanny Siyon. Psonm 138 ziska 145 ti ganny konpoze par David. I ti anvi ‘loue Zeova avek tou son leker.’ Pour ki rezon? I dir: “Parski mon’n ganny fer dan en fason merveye, e sa i fer mwan annan lakrent pour ou.” (Psonm 138:1; 139:14) Dan sa senk psonm ki swiv, David i priye pour li ganny proteze kont bann move dimoun, pour ganny disiplinen dan en bon fason, delivre dan lanmen bann persekiter, e pour ed li annan en bon kondwit. I fer resorti sa lazwa ki pep Zeova i annan. (Psonm 144:15) Apre ki i ti’n revwar grander ek labonte Zeova, David ti dir: ‘Mon labous pou koz lo louanz pour Zeova, ki tou sa ki vivan i beni son non sen pour en letan endefini, wi pour touzour.’—Psonm 145:21.
Larepons pour bann Kestyon lo Labib:
122:3—Ki mannyer Zerizalenm ti en lavil ki ti “zwenn ansanm konman en sel”? Dan bann lavil dan letan lontan, bann lakaz Zerizalenm ti ganny konstri obor kanmarad, e sa ti fer li pli fasil pour defann zot kont lennmi. Deplis, lefe ki bann lakaz ti obor kanmarad sa ti fer li fasil pour bann zabitan depan lo kanmarad pour led ek proteksyon. Sa i montre nou ki sa 12 tribi Izrael ti ini spirityelman kan zot ti zwenn ansanm pour ador Bondye.
123:2—Ki leson nou tire dan sa legzanp konsernan lizye bann serviter? En serviter i al ver son met pour de rezon: premyerman pour konnen ki son met i anvi, dezyenmman pour ganny proteksyon ek keksoz debaz dan lavi. Pareyman, nou tourn ver Zeova pour konn son lavolonte e pour ganny son benediksyon.
131:1-3—Konman David ti vin ‘kalm e trankil parey en pti baba ki’n aret tete’? Parey en pti baba i trouv soulazman ek satisfaksyon dan lebra son manman, David ti aprann pour vin kalm e trankil ‘parey en pti baba ki’n aret tete dan lebra son manman.’ Konman? I ti fer sa kan i pa ti vin orgeye, vantar e kan i pa ti tay deryer keksoz ki ti tro bokou pour li. Olye rod popilarite, David ti rekonnet son limit e i ti demontre limilite. Nou montre ki nou saz kan nou imit son latitid, sirtou ler nou anvi ganny privilez dan kongregasyon.
Leson pour nou:
120: 1, 2, 6, 7. Kalonmni ek koze mirak i kapab koz douler pour lezot. Kan nou kontrol nou lalang, sa i fason ki nou montre ki nou “debout pour lape.”
120:3, 4. Si nou bezwen fer fas avek en dimoun ki ‘triker avek son lalang,’ nou kapab ganny soulaze ler nou konnen ki Zeova pou aranz keksoz dan son letan apropriye. Bann ki koz manti pou sibir destriksyon sorti kot “en zonm pwisan.” Zot pou ganny detri zour zizman Zeova ki ganny reprezante par ‘labrez bann brousay.’
127:1, 2. Dan tou zefor ki nou fer nou devret apiy lo Zeova pour son gidans.
133:1-3. Sa linite ki egziste parmi pep Zeova i fer en bon lefe, i ed zot reste kalm e i batir zot. Nou pa devret briz sa linite par konmans rod fot dan lezot, fer diskisyon oubyen konplent.
137:1, 5, 6. Bann adorater Zeova ki ti al egzile ti atase avek Siyon, ki ti reprezant lorganizasyon Bondye. Me nou? Eski nou fidelman atase avek sa lorganizasyon ki Zeova pe servi ozordi?
138:2. Zeova in ‘lev son parol menm parlao tou son non’ pour ki tou sa ki i’n promet an son non i akonpli, e i pou vin bokou plis ki nenport kwa ki nou ti ekspekte. Vreman nou annan en lavenir merveye devan nou.
139:1-6, 15, 16. Zeova i konn tou sa ki nou fer, sa ki nou mazinen ek sa ki nou dir menm avan i sorti dan nou labous. I konn nou menm avan ki nou ti konmans ganny formen dan vant, avan ki bann manm nou lekor ti konmans devlope. Sa ki Bondye i konnen lo nou tou endividyelman i “tro merveye” pour nou konpran. Pa i rekonfortan pour konnen ki Zeova i pa zis vwar bann leprev ki nou kapab pe fer fas avek, me i osi konpran ki lefe sa i fer lo nou!
139:7-12. Bondye pou donn nou sa lafors partou kot nou ete, akoz napa okenn landrwa ki tro lwen pour li arive.
139:17, 18. Eski nou kontan ki nou konn Zeova? (Proverb 2:10) Si wi, nou’n trouv lazwa, zis parey en sours delo ki pa pou zanmen aret koule. Konnesans Zeova i “bokou plis ki gren disab.” I pou toultan annan en kantite keksoz pour aprann lo li.
139:23, 24. Nou devret pare pour les Zeova egzamin nou motivasyon, pour gete si napa okenn ‘keksoz mal’ anndan nou, move panse, dezir, tandans, e si i leka nou devret les li ed nou retir tousala.
143:4-7. Konman nou kapab andir bann difikilte ki vreman dir? Sa psalmis i donn nou larepons: Reflesir lo tou sa ki Zeova i fer, kontinyen egzaminen konman i azir, e demann li led dan lapriyer.
“Loue Ya, tou Dimoun!”
Tou le kat premye koleksyon psonm i termin avek en parol pour loue Zeova. (Psonm 41:13; 72:19, 20; 89:52; 106:48) E osi sa dernyen koleksyon. Psonm 150:6 i dir: “Tou sa ki respire—loue Ya. Loue Ya, tou dimoun.” Sa pou vin vre kan nouvo lemonn Bondye i ganny etabli.
Anmezir ki nou enpasyan pour viv sa letan kot nou pou ere, nou annan en kantite rezon pour glorifye sa vre Bondye e loue son non. Kan nou mazin sa lazwa ki nou annan akoz nou konn Zeova e nou annan en bon relasyon avek li, eski sa pa i pous nou pour loue li avek en leker ranpli avek rekonesans?
[Portre lo paz 31]
Travay merveye Zeova i kree lakrent dan nou
[Portre lo paz 32]
Konnesans Zeova “i bokou plis ki gren disab”